Ki Ifi Tato ya Mulimu?

Mulimu ubata kuli lupile ka kozo ni ka tabo mwa paradaisi fa lifasi kuya kuile!

Kono mwendi mwakona kuipuza kuli: ‘Taba yeo ikona kuezahala cwañi?’ Bibele ibulela kuli Mubuso wa Mulimu ukakona kueza cwalo, mi ki tato ya Mulimu kuli batu kaufela baitute za Mubuso wo ni zalulelezi Mulimu.—Samu 37:11, 29; Isaya 9:7.

Mulimu ubata kuli lupile bupilo bobunde.

Sina feela mushemi yomunde hatabela kuli bana bahae bapile hande, Ndataa luna wa kwa lihalimu ulakaza kuli lubeni tabo kuya kuile. (Isaya 48:17, 18) Usepisize kuli ‘yaeza tato ya Mulimu uina kuya kuile.’—1 Joani 2:17.

Mulimu ubata kuli luzamaye mwa linzila zahae.

Bibele ibulela kuli Mubupi waluna ubata ‘kululuta linzila zahae’ ilikuli lukone ‘kuzamaya mwa makululu ahae.’ (Isaya 2:2, 3) Uonga-ongile ‘batu bababizwa ka libizo lahae,’ kuli bazibahaze tato yahae mwa lifasi kaufela.—Likezo 15:14.

Mulimu ubata kuli luswalisane hamoho halunze lumulapela.

Kufita kukauhanya batu, bulapeli bwa Jehova bobukenile bubatusa kuswalisana ka lilato la niti. (Joani 13:35) Ki bo mañi kacenu babaluta baana ni basali kai ni kai kuli basebeleze Mulimu ka swalisano? Lumimema kubala broshuwa ye kuli mufumane kalabo kwa puzo yeo.