Lukona Kubabalela Cwañi Ndu ya Mubuso Yaluna?

Mandu A Mubuso kaufela a Lipaki za Jehova anani libizo lelikenile la Mulimu. Kabakaleo, luikutwanga kuli kukenisa Ndu ya Mubuso kuli ibonahale hande, ki tohonolo yetuna mi ki kalulo ya butokwa ya bulapeli bwaluna bobukenile. Mañi ni mañi wakona kutusa mwa musebezi wo.

Muitatele kukenisa Ndu ya Mubuso hamulaho wa mikopano. Hamulaho wa mukopano ni mukopano, mizwale ni likaizeli bakenisanga hanyinyani Ndu ya Mubuso kuli isiyale inge ikenile. Hañwi ka sunda, kubanga ni musebezi wa kukenisa Ndu ya Mubuso ka tokomelo. Muuna-muhulu kamba sikombwa sa puteho uzamaisanga musebezi wo, mi hañata uitusisanga mukoloko wa lika zeswanelwa kuezwa. Kulikana ni zetokwa kuezwa, mizwale ni likaizeli baitatelanga kufiyela, kukolopa, kamba kututula liluli, kubeya hande lipula, kukenisa ni kubeya milyani mwa limbuzi, kukenisa mahaulo ni liiponi, kuyumba manyalala, kamba kukenisa sibaka sa Ndu ya Mubuso. Mwa silimo kutomiwanga lizazi kamba mazazi a kueza musebezi omutuna wa kukenisa Ndu ya Mubuso. Ka kusebezanga hamoho ni bana baluna halueza yemiñwi ya misebezi ye, lubaluta kubonisa likute habali kwa libaka zaluna za kulapelela teñi.—Muekelesia 5:1.

Muitatele kutusa hakutokwahala kulukisa lika zeñwi kwa Ndu ya Mubuso. Silimo ni silimo, Ndu ya Mubuso yatatubiwanga ka tokomelo fande ni mwahali. Kulikana ni zefumanwa hamulaho wa kutatuba, Ndu ya Mubuso yalukiswanga kamita kuli izwelepili kubonahala hande ilikuli kusike kwaba ni lisinyehelo zetuna. (2 Makolonika 24:13; 34:10) Mulimu waluna uswanela kulapelelwa mwa Ndu ya Mubuso yekenile ni yebabalelwa hande. Halutusa mwa musebezi wa kukenisa Ndu ya Mubuso ni kuibabalela, lubonisa kuli lwalata Jehova ni kuitebuha libaka zaluna za kulapelela teñi. (Samu 122:1) Kueza cwalo hape kutahisa kuli batu baange hande bulapeli bwaluna.—2 Makorinte 6:3.

• Ki kabakalañi haluswanela kubabalela sibaka saluna sa kulapelela teñi?

• Ki litukiso mañi zeeziwanga kuli Ndu ya Mubuso izwelepili kuba mwa muinelo okenile?