Jesu Utuha Aeza Paseka Lwa Mafelelezo

Jesu ufeza kuluta baapositola bahae babane fa Lilundu la Likota za Olive, ni kualaba puzo yabona ka za kubateñi kwahae ni ka za kufela kwa lifasi.

Jesu naapatehile hahulu fa lizazi la Nisani 11! Mwendi ki habali mwa musipili wabona wa kukutela kwa Betania kuyo lobala, Jesu habulelela baapositola bahae kuli: “Mwaziba kuli kusiyezi feela mazazi amabeli kuli Paseka ieziwe, mi Mwanaa mutu uka fiwa kuli abulaelwe fa kota.”—Mateu 26:2.

Kubonahala kuli ka lizazi lelitatama, lona la Bulaalu, Jesu utola ni baapositola bahae feela. La bubeli, naanyazize baeteleli ba bulapeli ni kupatulula za buipi bwabona kwa nyangela. Babata kumubulaya. Ka mukwa ocwalo, haaiponahazi kwa batu la Nisani 12 ilikuli asike apaleliswa ki nto ifi kamba ifi kufumaneha kwa mukiti wa Paseka ni baapositola bahae manzibwana a lizazi lelitatama, ili makalelo a lizazi la Nisani 14.

Kono baprisita babahulu ni babahulu ba sicaba habaituleli feela Mukiti wa Paseka usika fita kale. Bakopana mwa lapa la muprisita yapahami, yena Kayafa. Kabakalañi? Bafilikani kakuli Jesu upatuluzi za buipi bwabona. Cwale balelisana hamoho kuli “baswale Jesu ka bupumi ni kumubulaya.” Bakaeza cwalo ka mukwa ufi mi ki lili? Bali: “Isiñi ka nako ya mukiti, kuli kusike kwazuha mufilifili mwahalaa batu.” (Mateu 26:4, 5) Basaba kuswala Jesu bakeñisa kuli utabelwa ki batu babañata.

Zeo halili cwalo, baeteleli ba bulapeli baamuhela muenyi. Bakomokiswa ki taba ya kuli mutu yo, ki yomuñwi wa baapositola ba Jesu, yena Judasi Isikariota. Satani ukenyize mwa pilu yahae muhupulo wa kubeteka Mulenaa hae! Judasi ubabuza kuli: “Muka nifañi kuli nimibetekele yena?” (Mateu 26:15) Batabiswa ki taba yeo, mi “balumela kumufa masheleñi a silivera.” (Luka 22:5) Bukai? Balumelelana kumufa masheleñi aeza lishekele ze 30 za silivera. Kwazibahala kuli mutanga naalifiwangwa lishekele ze 30. (Exoda 21:32) Ka kueza cwalo, baeteleli ba bulapeli babonisa Jesu kashwau, ka kumuunga kuli haki wa butokwa hahulu. Judasi cwale ukalisa “kubata nako yende ya kumubeteka ku bona, buñata bulisiyo.”—Luka 22:6.

Lizazi la Nisani 13 likalisa la Bulaalu lizazi halilikela, mi ki lizazi la bu 6 ni busihu bwa mafelelezo bo Jesu alobala mwa Betania. Lizazi lelitatama, batokwa kueza litukiso zamafelelezo za Paseka. Baswanela kufumana ngunyana ilikuli ibulaiwe ni kubesiwa mutumbi, lizazi la Nisani 14 hase lifitile. Ki kakai ko bakayo cela lico, mi ki bo mañi babaka lilukisa? Jesu haasika talusa litaba zeo. Ka mukwa ocwalo, Judasi haakoni kutaluseza baprisita babahulu taba yeo.

Mwendi ki la Bune musihali, Jesu haluma Pitrosi ni Joani kuzwa mwa Betania, mi ubabulelela kuli: “Hamuye muyo lulukiseza Paseka kuli luce.” Baalaba kuli: “Ki kai koubata kuli luyo ilukiseza?” Jesu uli: “Hamubone! Hamukena mwa muleneñi, mukakatanyezwa ki muuna yalwezi nkwana ya mezi. Mumulatelele mwa ndu mwakayo kena. Mi mubulelele muñaa ndu yeo kuli: ‘Muluti uli ku wena: “Ukai muzuzu wa baenyi monikona kucela Paseka ni balutiwa baka?”’ Mi muuna yo uka mibonisa muzuzu omutuna wa kwahalimu mokunani zetokwahala kaufela. Mulukise Paseka mwateñi.”—Luka 22:8-12.

Kusina kukakanya, muñaa ndu yeo ki mulutiwa wa Jesu. Mwendi naalibelela kuli Jesu ukakupa kuitusisa ndu yeo fa mukiti wo. Baapositola bababeli ba habakena mwa Jerusalema, bafumana lika kaufela ka mwanaa babulelezi Jesu. Ka mukwa ocwalo, balukisa ngunyana ni lico zeñwi zetokwahala fa Paseka zekwana batu ba 13 ili Jesu ni baapositola ba 12.