Ku Ka Mezi “a’ inzi kwatasi-tasi”

LISHITANGUTI la mwa Bibele le liñwi li bulela kuli: “Mulelo wa mwa pilu ya mutu u swana sina mezi a’ inzi kwatasi-tasi, ku y’o a ka kwateñi, konji ya na ni ngana.” (Liproverbia 20:5) Mwa linako za Bibele ne ku li t’ata hahulu ku fumana mezi ku fita mo ku inezi mwa libaka ze ñata kacenu. Musali wa Musamaria ha n’a ambozi ni Jesu, n’a hoha mezi mwa lisima la Jakobo, ili le ne li na ni butungi bo bu eza limita ze 23!—Joani 4:5-15.

Sina ka mo i boniseza Liproverbia 20:5, ngana ye tokwahala mwa ku zwisa mihupulo ye tungile ni maikuto a’ putanezi mwa pilu ya mutu i likana ni buikatazo bo bu tokwahala mwa ku ka mezi mwa lisima. Ye ki nto ya niti mwa likalulo ze ñata za bupilo. Sina ka mutala, mu kana mwa ziba batu ba bañwi ba se ba bile ni zibo ni yeloseli ze tuna mwahal’a lilimo ze ñata. Haiba bona bao ki ba ba sa ifeli fela likelezo ba si ka kupiwa, mu kana mwa tokwa ku ba ezisa ku bulela. Ka ku bonisa cisehelo, ku buza lipuzo, ni ku batisisa ka butali, sina ka mo ku inezi, mu ka cimbeka hemele ya mina mwa lisima le li tungile la butali.

Kelezo ye kwa Liproverbia 20:5 hape ya sebeza mwa lubasi. Hañata bafumahali ba utwiwanga ba bulela kuli: “Bo munn’a ka ha ba ni bulelelangi mo ba ikutwela!” Munna a kana a bulela kuli: “Musal’a ka h’a ambolangi ni na!” Mwa miinelo ye cwalo, ku tokwahala ngana ku ziba mihupulo ye mwa pilu ya sinyalana ni yena. Lipuzo ze butali (Lizazi la mina li zamaile cwañi? Ki lifi ze n’e ezahalile? Ki tuso mañi ye ni kona ku fa?) hañata li kona ku tisa ku ambolisana ko ku zwelela kwa pilu. Ku bonisa ngana ko ku cwalo ku kona ku tiisa linyalo, ili nto ye tusa ku munna ni musali hamoho.