Lipuzo Ze Zwa kwa Babali

Jobo n’a nyandile ka nako ye kuma kai?

Batu ba bañwi b’a nga kuli miliko ya Jobo n’e ngile lilimo ze ñata, kono buka ya Jobo ha i bonisi kuli n’a nyandile ka nako ye telele cwalo.

Kalulo ya pili ya miliko ya Jobo, yona ya ku fela kwa lubasi lwa hae ni tutu ya hae, i bonahala ku ba ye ne i bile ye kuswani. Lu bala kuli: ‘Ka lizazi le liñwi, bana ba [Jobo] ba bashimani ni ba basizana ne ba nze ba cela ni ku nwela veine mwa ndu ya muhulwan’a bona.’ Jobo n’a bihezwi ka ku tatamana kuli n’a shwezwi, ili ku shwelwa ki lipulu za hae, limbongolo, lingu, likamele, ni batanga be ne ba lisa lifolofolo zeo. Ku bonahala kuli hamulahonyana wa f’o, Jobo a utwa za lifu la bana ba hae, be ne ba “cela ni ku nwela veine mwa ndu ya muhulwan’a bona.” Ku bonahala kuli zeo kaufela ne li ezahezi mwa lizazi li li liñwi.—Jobo 1:13-19.

Kalulo ye tatama ya miliko ya Jobo i lukela ku ba ye n’e ngile nako ye telele. Satani n’a atumezi Jehova ni ku bulela kuli Jobo n’a ka palelwa kambe manyando n’a wezi yena ka sibili—ili mubili wa hae. Ku tuha f’o, Jobo a natwa ka “litombo ze maswe-maswe, ku zwa kwa mahatelo a mautu a hae, ku y’o fita ni fahal’a toho ya hae.” Mwendi butuku b’o ne b’u ngile nako ye telelenyana kuli bu yambukele kwa likalulo kaufela za mubili wa hae. Mwendi hape ne ku ngile nako kuli “kozi kaufela” yeo i y’o wela mwa lizebe za ba ba twi ki baomba-ombi ba hae, be ne ba tile ku yena.—Jobo 2:3-11.

Elifazi n’a zwa kwa Temani ili mwa naha ya Edomo, mi Zofari n’a zwa kwa sibaka se si kwa mutulo wa wiko wa Arabia. Kacwalo, libaka za habobona ne li si kwahule ni habo Jobo, kwa Uzi, mi mwendi Uzi ne i li kwa mutulo wa Arabia. Kono Bilidadi n’a li wa kwa Shuha, mi kutwi batu bahabo yena ne ba pila mabapa ni nuka ya Eufrati. Haiba Bilidadi n’a li habo yena ka nako yeo, ku kana ku ngile liviki kamba mane likweli kuli a utwe za muinelo wa Jobo ni ku tama musipili wa ku ya kwa Uzi. Ki niti kuli kwa kona ku ba kuli banna ba balalu bao ne ba li mwa silalanda sa Jobo manyando a hae ha n’a kalisize. Ku be cwañi kamba cwañi, balikani ba balalu ba Jobo ha ne ba fitile, ba “ina ni yena fafasi mazazi a 7 ni masihu a 7” ba sa buleli se siñwi.—Jobo 2:12, 13.

Ku tuha f’o, kwa taha kalulo ya mafelelezo ya miliko ya Jobo, mi litaba za yona li nyakisiswa mwa likauhanyo ze ñata za buka. Ba batwi ki baomba-ombi bao ne ba bulezi litaba ze ñata, mi hañata Jobo n’a alabanga. Zeo ha se li felile, mutangana Elihu a fa kalimelo, mi Jehova ku zwelela kwa lihalimu a sikulula Jobo.—Jobo 32:1-6; 38:1; 40:1-6; 42:1.

Kacwalo, manyando a Jobo ni tatululo ya ona mwendi ne li ezahalezi mwa likweli ze sikai, mwendi ze sa kwani silimo. Mwendi mina ka sibili mu iponezi kuli miliko ye t’ata i bonahalanga ku inelela. Kono lu si libali kuli ya felanga, sina mo ne i felezi ya Jobo. Miliko ye lu talimana ni yona ni ko i ka nga nako ye telele cwañi, lu si libali ni kamuta tuso ya Mulimu, ka mo ku boniselizwe mwa manzwi a buyelezwi a, a li: “Ñalelwa ya luna, ye bubebe, ya nako ya cwale, inze i lu fumanisa bufumu bwa kanya, bo bu sa likanyiswi, bo bu sa feli.” (2 Makorinte 4:17) Muapositola Pitrosi n’a ñozi kuli: “Mulimu wa sishemo kaufela, ya mi bizelize ka Jesu Kreste kwa kanya ya hae ye sa feli, ha mu se mu utwile butuku hanyinyani u ka mi eza ba ba petehile, a mi tiise, a mi fe mata, a mi tome.”—1 Pitrosi 5:10.