Mangeloi—Ki Bomañi?

MULENA wa mubuso o m’ata n’a komokile hahulu za n’a boni. Banna ba balalu ba ne ba atulezwi ku bulaiwa ka mulilo ne ba yangwezwi kwa lifu! Ki mañi ya n’a ba yangwezi? Yena Mulena kasibili n’a bulelezi banna ba ne ba yangwezwi bao kuli: “Ku lumbekwe [Mulimu wa mina], Yena ya lumile lingeloi la hae ku t’o lamulela batanga ba hae ba ba mu sepile.” (Daniele 3:28) Mulena wa Babilona y’o n’a kile a iponela mwa n’a piliselize mangeloi lilimo ze fitelela 2,000 kwamulaho k’o. Batu ba kwaikale ba ba eza bolule-lule ne ba lumela kuli mangeloi a teñi. Kwand’a ku lumela fela kuli mangeloi a teñi, batu ba bañata kacenu ba lumela kuli bupilo bwa bona bwa amiwa ki mangeloi ka linzila ze ñwi. Mangeloi ki bomañi, mi a simuluha kai?

Sina mo i boniseza Bibele, mangeloi ki libupiwa za moya, sina Mulimu ni yena ha li Moya. (Samu 104:4; Joani 4:24) Palo ya mangeloi kaufela ki ye tuna, i eza bolule-lule. (Sinulo 5:11) Mi kaufela ona a “tiile ka mata.” (Samu 103:20) Nihaike kuli mangeloi a swana sina batu bakeñisa kuli a na ni tulemeno mi a filwe m’ata a ku iketela za ku eza, ona n’a si ka bupiwa nako ye swana ni ye ne ba bupilwe batu. Mane Mulimu n’a bupile mangeloi kale-kale pili batu ba si ka bupiwa kale—nihaiba lifasi li si ka bupiwa kale. Bibele i bulela kuli Mulimu ha n’a ‘tomile mitomo ya lifasi,’ “linaleli za malungasiku [mangeloi] . . . ne li nze li opela hamoho, mi bana ba Mulimu kaufela ne ba luluweziswa ki tabo.” (Jobo 38:4, 7) Bakeñisa kuli mangeloi ki pupo ya Mulimu, kona libaka h’a bizwa bana ba Mulimu.

Ki kabakalañi Mulimu ha n’a bupile mangeloi? Mangeloi a petileñi mwa bupilo bwa batu? Kana a ama bupilo bwa luna kacenu? Bakeñisa kuli a na ni m’ata a ku iketela za ku eza, kana ku na ni mangeloi a n’a latelezi nzila ya Satani Diabulosi ni ku ikeza lila za Mulimu? Bibele i fa likalabo za niti kwa lipuzo zeo.