Jesu Kreste—Lushango Lwa Hae mo lu mi Amela

“Na, ni tezi lingu za ka, kuli li be ni bupilo, mane li bu fumane ka buñata.” —JOANI 10:10.

JESU KRESTE na tile fa lifasi kuli a to fana, isiñi ku to fiwa. Ka bukombwa bwa hae, Jesu na file batu mpo ya butokwa hahulu—ili lona lushango lo ne lu patuluzi niti ka za Mulimu ni tato ya Hae. Batu ba ba amuhela lushango lo, ba kona ku ikola bupilo bo bunde ka nako ya cwale, sina mo ba kona ku pakela Bakreste ba niti ba bañata-ñata.a Kono kalulo ye tuna ya lushango lwa na kutalize Jesu ki mpo ya butokwa hahulu kwa batu kaufela—ili bona bupilo bo bu petehile bwa na fanile kabakala luna. Kuli lu fumane bupilo bwa ku ya ku ile ku itingile ka mo lu amuhelela kalulo ye ya butokwa ya lushango lwa hae.

Za na fanile Mulimu ni Kreste Jesu na zibile kuli na ka shwa lifu le li butuku ka ku bulaiwa ki lila za hae. (Mateu 20:17-19) Niteñi, mwa manzwi a hae a zibahala hande a fumaneha kwa Joani 3:16, na bulezi kuli: “Mulimu u latile lifasi hahulu, mane u li file Mwanaa hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” Jesu hape na bulezi kuli na tile ku to “fa bupilo bwa hae, kuli a liulule ba bañata.” (Mateu 20:28) Ki kabakalañi ha na bulezi kuli na ka fana bupilo bwa hae ku fita ku bu amuhiwa?

Kabakala ku susuezwa ki lilato le lituna, Mulimu na ezize tukiso ya ku yangwela batu kwa sibi se ne si hozizwe ni ze ne si tahisa—ili kona ku sa petahala ni lifu. Mulimu na ezize cwalo ka ku luma Mwanaa hae wa libanda fa lifasi ku to shwa lifu la sitabelo. Jesu na lumezi, mi a fana bupilo bwa hae bwa butu bo bu petehile kabakala luna. Tukiso ye, ye bizwa tiululo, ki mpo ye tuna ka ku fitisisa ya file Mulimu kwa batu.b Ki mpo ye kona ku isa batu kwa bupilo bo bu sa feli.

Ze mu tokwa ku eza Kana tiululo ki mpo ye mu filwe ka butu? Ku itingile ku mina beñi. Ka mutala: Mu nge kuli mutu yo muñwi u mi tambeka mpo ye putezwi mwa mbokisi. Niti kikuli mpo yeo ha i si ka ba kale ya mina konji ha mu i amuhela. Ka ku swana, Jehova u mi fa tiululo, kono mpo ye haki ya mina luli konji ha mu i amuhela. Mu kona ku i amuhela cwañi?

Jesu na bulezi kuli ki bao feela ba ba “lumela” ku yena ba ba ka fiwa bupilo bo bu sa feli. Tumelo i ama mupilelo wa mina. (Jakobo 2:26) Ku lumela ku Jesu ku talusa ku pila bupilo bo bu lumelelana ni lika za na lutile ni za na ezize. Kuli mu kone ku eza cwalo, mu swanela ku ziba hande Jesu ni Ndatahe. Jesu na bulezi kuli: “Mi bupilo bo bu sa feli, kikuli ba ku zibe, Wena, Mulimu a nosi wa niti, ni yoo lumile, yena Jesu Kreste.”—Joani 17:3.

Lilimo ze fitelela 2,000 kwamulaho, Jesu Kreste na lutile lushango lo lu cincize bupilo bwa batu ba bañata-ñata mwa lifasi kaufela. Kana mwa tabela ku ziba ze ñata ka za lushango lo ni mo mina ni balatiwa ba mina mu kona ku tusezwa ki lona, isi feela ka nako ya cwale kono ni ku ya ku ile? Lipaki za Jehova ba ka tabela ku mi tusa.

Litaba ze latelela li ka mi tusa hahulu ku ziba hande Jesu Kreste, mutu ya na kutalize lushango lo lu kona ku cinca bupilo bwa mina ku ya ku ile.

[Litaluso za kwatasi]