Ku Taleleza Buitamo bwa Luna ka Zazi ni Zazi

¹ Walisamu Davida n’a susuelizwe ku bulela ku Jehova kuli: “Ni ka lumba Libizo la hao kamita; Kuli ni eze za buitamo bwa ka, ka mazazi.” (Samu 61:8) Davida n’a ziba kuli ku eza buitamo ki taba ya ku itatela ka ku tala. Niteñi, hape n’a itemuhezi kuli haiba n’a ka eza buitamo, n’a tamehile ku bu taleleza. Nihakulicwalo, n’a lumbekile Jehova ka ku mu fa sibaka sa ku taleleza buitamo bwa hae ka zazi ni zazi.

² Ha ne lu ineezi ku Jehova, ne lu itatezi ku eza tato ya hae ka buitamo. Ne lu itobohile mi lwa keta ku sebeleza Jehova sina ndongwamo ye tuna ka ku fitisisa mwa bupilo. (Lu. 9:23) Kacwalo, ni luna lu lukela ku lifa buitamo bwa luna ka zazi ni zazi. (Muek. 5:4-6) Zibahazo ya luna ya fa nyangela ye ne lu ezize fa kolobezo ya mezi i swanelwa ku boniswa mwa muinelo kamukana wa bupilo bwa luna, bakeñisa kuli lwa ziba kuli “mutu . . . u paka ka mulomo, kuli a piliswe.” (Maro. 10:10) Seo si kopanyeleza ku kutaza taba ye nde. (Maheb. 13:15) Miinelo ya ka butu ki ye fapahana ka butuna hahulu, kono kaufel’a luna lwa kona ku tokomela hahulu tokwahalo ya ku abana taba ye nde ni ba bañwi ka zazi ni zazi.

³ Mu Lukise Miinelo ye Konahalisa ku Kutaza ka Zazi: Ku abana taba ye nde ni yo muñwi ki kalulo ye tabisa hahulu. Kuli seo si eziwe ka zazi, lu na ni ku lukisa miinelo ye konahalisa ku kutaza ka nako kaufela f’o miinelo ya luna i lu lumeleza. Buñata bwa ze bonwi ze tabisa li ikozwi ki bao ba ba ngile muhato wa ku paka ka ku tandalelwa kwa batu ha ba li kwa musebezi kamba kwa sikolo ni ku bomuyahwa ni bona kamba ku ba bañwi bao ba katana ni bona ka zazi ni zazi. Nihaiba ku ñola liñolo kamba ku itusisa luwaile ku kona ku ba nzila ye ñwi ya ku paka ku ba bañwi. Ku sebelisa miinelo yeo kamukana ku talusa cwalo ni ku buluka nako kamita ya ku paka fa munyako ni munyako mi ku eza misipili ya makutisezo ku kona ku libisa kwa tabo ye ipitezi ili ye fumanwa mwa ku zamaisa tuto ya Bibele ya fa ndu. Ee, ka zazi ni zazi ne lu kana lwa kona ku tahisa miinelo ye konahalisa ku kutaza.

⁴ Kaizeli yo muñwi n’a kalisize ku bala Ku Tatuba Mañolo ka Zazi ni Zazi mwahal’a ku ishumusa kwa hae kwa musebezi. N’a memile ya sebeza ni yena kuli a bale liñolo la zazi ni yena, mi seo hañihañi ne si libisize kwa tuto ya Bibele ni musali y’o. Ne ba itutanga ka licika la hora ka zazi ni zazi, ili ka mazazi aketalizoho ka viki. Yo muñwi ya n’a sebeza ni bona n’a lemuhile tuto ya bona ya ka zazi. Kwa nalulelule n’a izibahalize sina muzwale ya ishefuzi fela. Ka ku susuezwa ki cisehelo ya kaizeli, n’a bonani ni eluda ilikuli a kone ku sebeza hape. Kaizeli y’o n’a susuelize batu ba babeli hape ka nzila ye buniti kabakala ku satalala kwa hae kwa neku la talelezo ya buitamo bwa hae ka zazi ni zazi.

⁵ Ha lu susuezwa ki pilu ye tezi buitebuho ku ze nde kaufela zeo Jehova a lu ezelize, ku taleleza buitamo bwa buineelo bwa luna ka mo lu konela ka ku fitisisa ka zazi ni zazi ku ka lu tahiseza tabo ni buikolwiso. Sina walisamu, lwa kona ku bulela kuli: “[Jehova, NW] Mulimu wa ka, ni ka ku lumbeka ka pilu ya ka kaufela; Mi ni ka lumba Libizo la hao kamita ni mita.”—Samu 86:12.