Mu Sabe Jehova ka Nako Kaufela

¹ “Makalelo a butali ki ku saba [Jehova, NW].” (Samu 111:10) Sabo yeo i lu susueza ku eza misebezi ye minde mi i lu tusa ku pima ze maswe. (Liprov. 16:6) Sabo yeo ki likute le lituna ku Mubupi wa luna, mi i lu tokolomohisa ku mu nyemisa ni ku sa mu utwa. Ki nto ye lu swanela ku ituta ni ku bonisa ka nako kaufela.—Liprov. 8:13.

² Ka zazi, moya wa lifasi la Satani u lu sineneketa hahulu ku latelela linzila za ona ze maswe. (Maef. 6:11, 12) Nama ya luna ye si ka petahala ya sibi kamita i lakaza ze maswe. (Magal. 5:17) Kacwalo, kuli lu utwe milao ya Jehova, ku taba, mi ni ku fumana bupilo, lu na ni ku mu saba ka nako kaufela.—Deut. 10:12, 13.

³ Kwa Maheberu 10:24, 25, lu elelizwe kuli lu no kopananga hamoho kuli lu susuezane “sihulu” mwa mazazi a e lu pila ku ona. Ku yanga kwa mikopano kamita ki kwa butokwa kuli lu punyuhe mazazi a, a maungulo. Sabo ya luna ya ku sa nyemisa Mulimu i lu susueza ku yanga kwa mikopano ni k’u nga mulelo wa yona ka butuna. Ba ba saba Mulimu ba ikutwa kuli ku abana mwa mikopano ya Sikreste ki tohonolo ye tuna.

⁴ Ku utwa taelo ya ku kutaza taba ye nde ya Mubuso ki nzila ye ñwi ye lu bonisa ka yona kuli lu saba Mulimu. (Mat. 28:19, 20; Lik. 10:42) Mulelo o mutuna o lu ezeza musebezi wa ku kutaza ki ku tusa ba bañwi ku ituta ku saba Jehova ni ku ipeya kwa tato ya hae. Lu ba tusa cwalo ka misipili ya makutisezo, ku ikataza ku kalisa lituto za Bibele fa mandu, ni ku luta ba bañwi litaelo kaufela za Mulimu. Ka nzila yeo, lu bonisa kuli lu saba Jehova mi lu lata ba bañwi.—Mat. 22:37-39.

⁵ Ba ba sa sabi Mulimu ha ba na moya wa ku itebuha lika za kwa moya, mi ba latelela moya kamba mikwa ya lifasi ye bulaisa. (Maef. 2:2) Haike lu ikatulele ka ku tiya ku ‘sebeleza Mulimu inze lu na ni likute ni sabo.’ (Maheb. 12:28) Fohe lu ka fumana limbuyoti ze taha ku ba ba saba Jehova ka nako kaufela.