Kauhanyo 18

Mu Tahise Kuli Mulelo Wa Mina U Be Ku Sebeleza Mulimu Ku Ya Ku Ile

 1, 2. Ki sifi se si tokwahala kwand’a ku ba ni zibo ya ku ziba Mulimu?

MU NAHANE kuli mu yemi fapil’a sikwalo se si notezwi ili se si isa kwa muzuzu mo ku na ni sifumu se situna. Lu bulele kuli mutu yo muñwi ya na ni tukelo u mi file sinotolo sa kwa teñi mi u mi bulelezi kuli mu ikungele kwa lika za butokwa zeo. Sona sinotolo seo hasi na ku mi tusa se siñwi konji haiba mu itusisa sona. Ka ku swana, mu lukela ku itusisa zibo kuli i kone ku mi tusa.

² Seo ki sa niti sihulu kwa neku la zibo ya ku ziba Mulimu. Ka buniti fela, zibo ye nepahezi ya ku ziba Jehova Mulimu ni Jesu Kreste i talusa bupilo bo bu sa feli. (Joani 17:3) Niteni, yona tibelelo yeo ha i konwi ku fumaniwa ka ku ba fela ni zibo. Sina ha ne mu ka itusisa sinotolo sa butokwa, mu tokwa ku sebelisa zibo ya ku ziba Mulimu mwa bupilo bwa mina. Jesu n’a bulezi kuli ba ba eza tato ya Mulimu ba ka “kena mwa mubuso.” Batu ba ba cwalo ka buñwi ne ba ka ba ni tohonolo ya ku sebeleza Mulimu ku ya ku ile!—Mateu 7:21; 1 Joani 2:17.

 3. Ki ifi tato ya Mulimu ku luna?

³ Hamulaho wa ku ituta seo tato ya Mulimu i li sona, ki kwa butokwa hahulu ku i eza. Ki sifi se mu nahana kuli ki yona tato ya Mulimu ku mina? Ne i ka bulelwa ka bukuswani ka manzwi a: Mu likanyise Jesu. Liñolo la 1 Pitrosi 2:21 li lu bulelela kuli: “Ki sona se mu bizelizwe; kakuli Kreste ni yena u utwile butuku bakeñisa mina, a mi siyela mutala, kuli mu hate mw’a n’a hatile.” Kacwalo he, kuli mu eze tato ya ­Mulimu, mu tokwa ku latelela mutala wa Jesu ka ku tala ka mo ku konahalela kaufela. Ki mona mo mu sebeliseza zibo ya ku ziba ­Mulimu.

KA M’O JESU N’A ITUSISELIZE ZIBO YA KU ZIBA MULIMU

 4. Ki kabakalañi Jesu h’a ziba ze ñata cwalo ka za Jehova, mi se a itusisize cwañi zibo yeo?

⁴ Jesu Kreste u fita ba bañwi kwa zibo ya ku ziba Mulimu. N’a pilile ni ku sebeza ni Jehova Mulimu mwa lihalimu ka nako ye telele hahulu pili a si ka taha kale fa lifasi-mubu. ­(Makolose 1:15, 16) Mi Jesu n’a itusisize cwañi zibo yeo kaufela? N’a si ka ikolwisa ka ku ba fela ni yona. Jesu n’a pilile ka yona. Ki lona libaka ha n’a na ni hahulu sishemo, pilu-telele, ni lilato mwa ku sebelisana kwa hae ni batu ba bañwi. Jesu kacwalo n’a likanyisa Ndat’ahe wa kwa lihalimu ni k’u nga muhato ka ku lumelelana ni zibo ya hae ya linzila ni butu bwa ­Jehova.—Joani 8:23, 28, 29, 38; 1 Joani 4:8.

 5. Ki kabakalañi Jesu ha n’a kolobelizwe, mi n’a pilile cwañi ka ku ­lumelelana ni taluso ya kolobezo ya hae?

⁵ Zibo ya n’a na ni yona Jesu hape ne i mu susuelize k’u nga muhato wa butokwa hahulu. N’a zwile kwa Galilea ku taha kwa nuka ya Jordani, ili k’o Joani n’a mu kolobelize. (Mateu 3:13-15) Kolobezo ya Jesu ne i yemela nto mañi? Ka ku ba Mujuda, n’a pepezwi mwa sicaba se ne si ineezi ku Mulimu. Kacwalo, Jesu n’a ineezi ku zwa fa ku pepwa. (Exoda 19:5, 6) Ka ku fita mwa kolobezo, n’a itahisa ku Jehova ku t’o eza tato ya bumulimu kwa neku la hae ka nako yeo. (Maheberu 10:5, 7) Mi Jesu n’a pilile ka ku lumelelana ni taluso ya kolobezo ya hae. N’a sebelize ka t’ata mwa sebelezo ya Jehova, ku abana zibo ya ku ziba Mulimu ni batu mwa n’a bela ni sibaka kaufela. Jesu n’a tabela hahulu ku eza tato ya Mulimu, mane nihaiba ku bulela kuli sona seo ne si swana sina sico ku yena.—Joani 4:34.

 6. Jesu n’a itobohile ka nzila ifi?

⁶ Jesu n’a lemuhile ka ku tala kuli ku eza tato ya Jehova ne ku ka ama buitomboli bo butuna hahulu—kuli mane ne ku ka mu tahiseza ku itombola bupilo bwa hae. Nihakulicwalo, Jesu a itoboha, ili ku beya butokwi bwa hae bwa ka butu mwa sibaka sa bubeli. Ku eza tato ya Mulimu kamita ne ku taha mwa sibaka sa pili. Kwa neku la seo, lu kona ku latelela ­cwañi mutala o petehile wa Jesu?

MIHATO YE ISA KWA BUPILO BWA KAMITA

 7. Ki ifi mihato ye miñwi yeo mutu a lukela k’u nga ilikuli a fite ku ze konisa ku kolobezwa?

⁷ Ka ku sa swana ni Jesu, ha lu si ka petahala mi lu kona fela ku fita fa sikonkwani se situna sa kolobezo hamulaho wa k’u nga mihato ye miñwi ye butokwa hahulu. Yona yeo i kala ka ku ikungela mwa pilu ya luna zibo ye nepahezi ya ku ziba Jehova Mulimu ni Jesu Kreste. Ku eza seo ku lu tahiseza ku bonisa tumelo ni ku ba ni lilato le lituna la ku lata Mulimu. ­(Mateu 22:37-40; Maroma 10:17; Maheberu 11:6) Ku lumelelana ni milao, likuka, ni lipimo za Mulimu ku swanela ku lu susueza ku baka, ku bonisa maswabi a silumeli ka za libi za luna za kwamulaho. Seo si isa kwa ku sikuluha, f’o kikuli, ku kwenuha ni ku siya nzila ifi kamba ifi ye fosahezi yeo ne lu latelezi ha ne lu si na zibo ya ku ziba Mulimu. (Likezo 3:19, 20) v. 20 for complete thoughtKa taho, haiba lu sa eza sibi se siñwi kwa mukunda mwa sibaka sa ku eza se si lukile, ha lu si ka kwenuha luli, mi hape ha lu si ka kwasheka Mulimu. Jehova w’a lemuha buipi ­kaufela.—Luka 12:2, 3.

 8. Ki muhato ufi o mu swanela k’u nga muta mu lakaza ku abana mwa musebezi wa ku kutaza Mubuso?

⁸ Bakeñisa kuli cwale se mu sweli ku ikungela zibo ye nepahezi ya ku ziba Mulimu, kana haki ko ku swanela ku nyakisisa litaba za kwa moya ka nzila ya ka butu luli? Mwendi mu cisehela ku bulelela bahabo mina, balikani, ni ba bañwi ka za se mu sweli ku ituta. Ka buniti mane, mu kana mu bile ba ba eza seo, sina Jesu mwa n’a abanezi taba ye nde ni ba bañwi mwa miinelo ya ka ku tandalelwa. (Luka 10:38, 39; Joani 4:6-15) Cwale ne mu kana mwa bata ku eza ze ñata ni ku fita. Maeluda ba Sikreste ba ka tabela ku bulela ni mina kuli ba bonisise haiba mu fitile ku ze konisa ni ku kona ku ba ni kabelo ye ñwi mwa musebezi wa Lipaki za Jehova wa ku kutaza Mubuso. Haiba mu fitile ku zona, maeluda ba ka eza li­tukiso za kuli mu ye ni Paki yo muñwi mwa bukombwa. Balutiwa ba Jesu ne ba latelezi litaelo za hae kuli ba eze bukombwa bwa bona ka nzila ye zamaiswa hande. (Mareka 6:7, 30; Luka 10:1) Mu ka fumana tuso ye swana ha mu nze mu abana mwa ku hasanya lushango lwa Mubuso fa ndu ni ndu ni ka linzila ze ñwi.—Likezo 20:20, 21.

 9. Mutu u eza cwañi buineelo ku Mulimu, mi buineelo bu ama cwañi bupilo bwa mutu y’o?

⁹ Ku kutaza taba ye nde kwa batu ba ba fitana-fitana mwa kalulo ya puteho ki nzila ya ku fumana ka yona bao ba ba bata se si lukile mi ki nto ye mwahal’a misebezi ye minde ye bonisa kuli mu na ni tumelo. (Likezo 10:34, 35; Jakobo 2:17, 18, 26) Ku fumaneha kamita kwa mikopano ya Sikreste ni ku ba ni kabelo ye na ni butokwa mwa musebezi wa ku kutaza ni zona ki linzila za ku bonisa ka zona kuli mu bakile ni ku sikuluha mi cwale mu tundamena ku pila ka ku ya ka zibo ya ku ziba Mulimu. Ki ufi muhato o tatama o utwahala? Ki ku eza buineelo ku Jehova Mulimu. Seo si talusa kuli mwa tapelo ya ka maikuto a’ buniti, mu bulelela Mulimu kuli mu fa bupilo bwa mina ku yena ka ku itatela ni ka pilu kaufela kuli mu eze tato ya hae. Yeo ki yona nzila ya ku ineela ka yona ku Jehova ni ku amuhela coko ye sishemo ya Jesu Kreste.—Mateu 11:29, 30.

KOLOBEZO—SEO I TALUSA KWA NEKU LA MINA

10. Ki kabakalañi ha mu swanela ku kolobezwa hamulaho wa ku ineela ku Jehova?

¹⁰ Ka ku ya ka Jesu, bao kaufela ba ba fita fa ku ba balutiwa ba hae ba lukela ku kolobezwa. (Mateu 28:19, 20) Ki kabakalañi seo ha si li se si tokwahala ha se mu ineezi ku Mulimu? Bakeñisa kuli se mu ineezi ku Jehova, w’a ziba kuli mwa mu lata. Kono ku si na kakanyo mu ka bata k’u nga muhato o ekezehile kuli mu zibise ba bañwi ka za lilato la mina la ku lata Mulimu. Kihona, kolobezo i mi fa sibaka sa ku ezisa ­buineelo bwa mina ku Jehova Mulimu kuli bu zibwe fa ­nyangela.—­Maroma 10:9, 10.

11. Ki ifi taluso ya kolobezo?

¹¹ Kolobezo i tezi taluso ya swanisezo. Ha mu nweliswa, kamba “ku pumbekwa,” kwatas’a mezi, ku swana inge kuli se mu shwile kwa neku la mupilelo wa mina wa kale. Ha mu tumuswa, ku swana inge kuli mu zusezwa kwa bupilo bo bunca, bo bu zamaiswa ki tato ya Mulimu mi isiñi ya mina tota. Ka mo ku inezi fela, seo hasi talusi kuli ha mu sa na ku eza mafosisa hape, kakuli kaufel’a luna ha lu si ka petahala mi kacwalo lu eza sibi ka zazi. Nihakulicwalo, ka ku ba mutanga wa Jehova ya ineezi, ya kolobelizwe, se mu ka be mu keni mwa swalisano ye ipitezi ni yena. Bakeñisa ku baka kwa mina ni ku ipeya kwa mina kwatasi ka buikokobezo mwa kolobezo, Jehova u tabela ku swalela libi za mina fa mutomo wa sitabelo sa tiululo sa Jesu. Kacwalo kolobezo i isa kwa lizwalo le li ­kenile fapil’a Mulimu.—1 Pitrosi 3:21.

12. Ku talusañi ku kolobezwa (a) “ka Libizo la Ndate”? (b) ‘ka libizo la Mwana’? (c) ‘ka libizo la moya o kenile’?

¹² Jesu n’a laelezi balateleli ba hae ku kolobeza balutiwa ba banca “ka Libizo la Ndate, ni la Mwana, ni la Moya o Kenile.” (Mateu 28:19) Ki sifi sa n’a talusa Jesu? Kolobezo “ka Libizo la Ndate” i bonisa kuli mutu ya kolobezwa u amuhela Jehova Mulimu ka pilu kaufela sina Mubupi ni Mubusi wa pupo kamukana ya na ni tukelo. (Samu 36:9; 83:18; Muekelesia 12:1) Ku kolobezwa ‘ka libizo la Mwana’ ku talusa kuli mutu ka buñwi u amuhela Jesu Kreste—mi sihulu sitabelo sa Hae sa tiululo—sina yona fela nzila ya puluso ye filwe ki Mulimu. (Likezo 4:12) Kolobezo ‘ka libizo la moya o kenile’ i talusa kuli numwana wa kolobezo w’a lemuha moya o kenile, kamba m’ata a’ sebeza, a Jehova, sina siitusiso sa Mulimu mwa ku peta milelo ya Hae ni ku fa batanga ba Hae m’ata a ku eza tato ya Hae ye lukile ka ku swalisana ni kopano ya Hae ye zamaiswa ka moya.—Genese 1:2; Samu 104:30; Joani 14:26; 2 ­Pitrosi 1:21.

KANA MU ITUKISIZE KWA NEKU LA KOLOBEZO?

13, 14. Ki kabakalañi ha lu sa swaneli ku saba ku keta ku sebeleza ­Jehova Mulimu?

¹³ Bakeñisa kuli kolobezo i na ni taluso ye tuna cwalo mi ki yona kezahalo ye tuna ka ku fitisisa mwa bupilo bwa mutu, kana ki muhato o mu swanela ku saba? Ku tokwa ni ­hanyinyani! Hailif’o katulo ya ku kolobezwa ha i swanelwi k’u ngiwa ka likesha ku si na kakanyo ki yona katulo ye butali ka ku fitisisa yeo mu kona ku eza.

¹⁴ Kolobezo i fa bupaki bwa keto ya mina ya ku sebeleza Jehova Mulimu. Mu nahane ka za batu bao mu kopana ni bona. Ka nzila ye ñwi, kana yo muñwi ni yo muñwi wa bona h’a sebelezi mulena yo muñwi? Ba bañwi ki batanga ba sifumu. (Mateu 6:24) Ba bañwi ba eza ka t’ata mwa ku ndongwama mibeleko ya bona kamba b’a isebeleza ka ku eza talelezo ya litakazo za bona ku ba nto ya butokwa ka ku fitisisa mwa bupilo. Ba bañwi hape ba sebeleza milimu ya buhata. Kono mu ketile ku sebeleza Mulimu wa niti, Jehova. Ha ku na yo muñwi u sili ya bonisa sishemo, mufelañeke, ni lilato le lituna cwalo. Mulimu u kuteka batu ka musebezi o’ mulelo ili o’ ba libisa kwa puluso. U fa batanga ba hae mupuzo wa bupilo bo bu sa feli. Ka buniti fela, ku latelela mutala wa Jesu ni ku fa bupilo bwa mina ku Jehova haki nzila ye swanelwa ku sabiwa. Kaniti, ki yona fela ye tabisa Mulimu ni ye utwahala ka ku tala.—1 Malena 18:21.

15. Ki ifi mikwalelo ye miñwi ye atile kwa neku la kolobezo?

¹⁵ Niteñi, kolobezo haki muhato o na ni k’u ngiwa kabakala sineneketo. Ki taba ya ka butu mwahal’a mina ni Jehova. ­(Magalata 6:4) Ha mu nze mu eza zwelopili ya kwa moya, mu kana mu keng’ezi kuli: ‘Ki sifi se si ni palelwisa ku kolobezwa?’ (Likezo 8:35, 36) Ne mu kana mwa ipuza kuli, ‘Kana ki twaniso ya mwa lubasi ye ni tibela? Kana ni sa ikenyize mwa muinelo o muñwi o si wa ka mañolo kamba kezo ya buezalibi? Kana ki kabakala kuli ni saba ku sa tabelwa ki nyangela?’ Yeo ki ye miñwi ya miinelo ye na ni ku nyakisiswa, kono mu i tatube ka k’u nga lika ka buniti bwa zona luli.

16. Mu ka fumana cwañi tuso mwa ku sebeleza Jehova?

¹⁶ Haki k’u nga lika ka buniti bwa zona luli ku tatuba ze itombolwa lu sa nyakisisi lituso za ku sebeleza Jehova. Sina ka mutala, mu nyakisise taba ya twaniso ya mwa lubasi. Jesu n’a sepisize kuli niha neikaba kuli balutiwa ba hae ba latehelwa ki bahabo bona bakeñisa ku mu latelela, ba ka fumana ­lubasi lo lutuna lwa kwa moya. (Mareka 10:29, 30) Balumeli sina mina bao ba ka mi bonisa lilato la sizwale, ku mi tusa ku tiyela ­nyandiso, ni ku mi fa kemelo mwa nzila ye liba kwa bupilo. (1 Pitrosi 5:9) Sihulu maeluda ba mwa puteho ba kona ku mi tusa ku sebelisana ni but’ata ni ku kondisa lika mwa ku talimana ni lishemaeto ze ñwi. (Jakobo 5:14-16) Haili ka za ku sa tabelwa ki batu mwa lifasi le, mu kana mwa ipuza hande kuli, ‘Ki nto mañi ye kona ku likana ni ku ba ni tumelezo ya Mubupi wa pupo kamukana, ku mu tabisa ka nzila ye ni ­ketile ya bupilo?’—Liproverbia 27:11.

KU PILA KA KU LUMELELANA NI BUINEELO BWA MINA NI KOLOBEZO

17. Ki kabakalañi ha mu swanela ku bona kolobezo sina makalelo mwa sibaka sa ku ba muinelo wa mafelelezo?

¹⁷ Ki kwa butokwa ku hupula kuli kolobezo haki ona mafelelezo a zwelopili ya mina ya kwa moya. Yona ki makalelo a sebelezo ya mwa bupilo kaufela ku Mulimu sina sikombwa ya sumekezwi ni yo muñwi wa Lipaki za Jehova. Nihaike kuli kolobezo ki ya butokwa hahulu, ha i talusi kuli mu ka piliswa ku be cwañi kamba cwañi. Jesu n’a si ka bulela kuli: ‘Ya kolobezwa kaufela u ka piliswa.’ Ka ku fapahana, n’a ize: “Ya tundamena ku isa kwa mafelelezo, ki yena ya ka piliswa.” ­(Mateu 24:13) Kacwalo, ki kwa butokwa kuli mu bate Mubuso wa Mulimu pili ka ku u eza nto ya pili ye mu iyakatitwe mwa ­bupilo bwa mina.—Mateu 6:25-34.

18. Hamulaho wa kolobezo, ki lifi ze ñwi za likonkwani ze swanelwa ku ndongwamiwa?

¹⁸ Kuli mu itiise mwa sebelezo ya mina ku Jehova, mu ka bata ku itomela likonkwani za kwa moya. Sikonkwani se siñwi sa butokwa ki sa ku ekeza zibo ya mina ya ku ziba Mulimu ka tuto ya ka butu ili ya kamita ya Linzwi la hae. Mu lukise ku bala Bibele ka zazi. (Samu 1:1, 2) Mu fumanehe kwa mikopano ya Sikreste kamita, kakuli swalisano ye mu fumana teñi k’o i ka tusa mwa ku mi fa m’ata a kwa moya. Ka butu, ki kabakalañi ha mu sa ikezezi sikonkwani sa ku alaba kwa mikopano ya puteho mi kacwalo ili ku lumbeka Jehova ni ku bata ku yahisa ba bañwi? (Maroma 1:11, 12) Sikonkwani se siñwi ne si kana sa ba sa ku zwisezapili mayemo a litapelo za mina.—Luka 11:2-4.

19. Ki tulemeno tufi t’o moya o kenile u kona ku mi tusa ku bonisa?

¹⁹ Kuli mu kone ku pila ka taluso ya kolobezo ya mina, mu tokwa ku tokomela se mu eza kamita, ili ku tuhelela moya wa Mulimu o kenile kuli u tahise ku mina tulemeno to tu cwale ka lilato, tabo, kozo, pilu-telele, musa, bunde, tumelo, buishuwo, ni buiswalo. (Magalata 5:22, 23; 2 Pitrosi 3:11) Mu hupule kuli Jehova u fa moya wa hae o kenile ku bao kaufela ba ba u lapelela ni ku ipeya ku mu utwa sina batanga ba hae ba ba sepahala. (Luka 11:13; Likezo 5:32) Kacwalo mu lapele ku Mulimu kwa neku la moya wa hae mi mu mu kupe tuso mwa ku bonisa tulemeno to tu mu tabisa. Tulemeno to tu cwalo tu ka bonahala hahulu mwa lipulelo ni muzamao wa mina ha mu nze m’u nga muhato kwa susuezo ya moya wa Mulimu. Ka mo ku inezi fela, mutu kaufela ka buñwi mwa puteho ya Sikreste u sweli ku satalala ku tahisa ‘mutu yo munca’ ilikuli a swane hahulu ni Kreste. (Makolose 3:9-14) Yo muñwi ni yo muñwi wa luna u talimana ni lishemaeto ze fitana-fitana mwa ku eza seo kakuli lu mwa mayemo a’ fitana-fitana a zwelopili ya kwa moya. Bakeñisa kuli ha mu si ka petahala, mu lukela ku sebeza ka t’ata kuli mu be ni butu bo bu swana ni bwa Kreste. Kono ni kamuta mu si ke mwa zwafa ku seo, kakuli sa konahala ka tuso ya Mulimu.

20. Ki ka linzila lifi zeo mu kona ku likanyisa Jesu ka zona mwa bukombwa?

²⁰ Mwahal’a likonkwani za mina za kwa moya ku swanela ku ba ni sa ku likanyisa hande hahulu mutala wa Jesu wa tabo. (Maheberu 12:1-3) N’a lata bukombwa. Haiba mu na ni tohonolo ya ku abana mwa musebezi wa ku kutaza Mubuso, f’o he, mu si ke mwa u tuhelela ku ba kezo fela ya kamita ili ye si ka ipitela. Mu bate ku fumana tabo mwa ku luta ba bañwi ka za Mubuso wa Mulimu sina mwa n’a ezelize Jesu. Mu sebelise litaelo zeo puteho i fa mwa ku mi tusa ku eza zwelopili sina muluti. Mi mu ikolwise kuli Jehova w’a kona ku mi fa m’ata a ku peta bukombwa bwa mina.—1 Makorinte 9:19-23.

21. (a) Lu ziba cwañi kuli Jehova u’ nga batu ka buñwi ba ba kolobelizwe ili ba ba sepahala ku ba ba butokwa hahulu? (b) Ki sifi se si bonisa kuli kolobezo ki ya butokwa mwa ku punyuha kwa luna ku fitiswa kwa katulo ya Mulimu fahalimu a muinelo wa linto o maswe wo?

²¹ Mutu ya ineezi, ya kolobelizwe ya sweli ku lika ka t’ata ili ka busepahali ku latelela Jesu ki y’a ipitezi ku Mulimu. Jehova u tatuba bolule kaufela b’a likiti-kiti ba lipilu za batu mi wa ziba ku ipitela kwa batu ka buñwi ba ba cwalo. U b’a nga ku ba ba butokwa hahulu, ki “bufumu.” (Hagai 2:7) Bupolofita bwa Bibele bu bonisa kuli Mulimu u’ nga ba ba cwalo sina ba ba swailwe kuli ba punyuhe katulo ya hae yeo ona cwale-cwale fa i ka taha fahalimu a muinelo o maswe wo. (Ezekiele 9:1-6; Malaki 3:16, 18) Kana mu “ketezwi bupilo bo bu sa feli”? (Likezo 13:48) Kana mu na ni takazo ye buniti ya ku swaiwa sina y’a sebeleza Mulimu? Buineelo ni kolobezo ki kalulo ya liswayo leo, mi ki ze tokwahala kwa neku la ku ­punyuha.

22. Ki litibelelo lifi zeo “buñata bo butuna” ba kona ku libelela?

²² Hamulaho wa Munda wa fa lifasi-mubu kamukana, Nuwe ni lubasi lwa hae ne ba zwile mwa aleka ni ku taha mwa lifasi-mubu le li kenisizwe. Ka ku swana kacenu, “buñata bo butuna” bo bu sebelisa zibo ya ku ziba Mulimu mwa bupilo bwa bona ni ku fumana tumelezo ya Jehova ba na ni tibelelo ya ku punyuha mafelelezo a muinelo wa linto o maswe wo ni ku ikola bupilo bo bu sa feli fa lifasi-mubu le li kenisizwe ku ya ku ile. (Sinulo 7:9, 14) Bupilo b’o bu ka ba bo bu cwañi?

MU TATUBE ZIBO YA MINA

Jehova u bata kuli mu itusise cwañi zibo ya mina ya ku mu ziba?

Ki ifi ye miñwi ya mihato ye isa kwa kolobezo?

Ki kabakalañi kolobezo ha i si muinelo wa mafelelezo kono wa makalelo?

Lu kona ku pila cwañi ka ku lumelelana ni buineelo ni kolobezo ya luna?

[Siswaniso se si fa likepe 172]

Kana se mu ezize buineelo ku Mulimu mwa tapelo?

[Maswaniso a fa likepe 174]

Ki sifi se si mi paleliswa ku kolobezwa?