Mu Tabele Linzwi la Mulimu

U FILWE mbuyoti mutu ya “tabela mulao wa [Muñ’a] Bupilo.” Mutu ya cwalo u bala Linzwi la Mulimu ka ku li “nahana musihali ni busihu.” (Samu 1:1, 2) Kana mwa li tabela cwalo? Mu kona ku ekeza cwañi kwa tabo ye li mi fa Linzwi la Mulimu?

Mu si bali fela manzwi. Mu eze inge mwa bona lika ze mu bala. Mu nahane kuli mwa utwa manzwi a ba ba bulela. Ha mu nze mu bala likauhanyo za makalelo za Bibele, mwa munahano wa mina mu utwe Jehova yena ka sibili ha patulula hanyinyani-hanyinyani ze ezwa mwa ku lukiseza hande batu lifasi-mubu. Mu teeleze h’a bulelela Mwan’a hae, yena Mubeleki ya Pahami, kuli nako i fitile ya kuli batu ba pili fa lifasi-mubu ba tahiswe. Mu nahane muta bo Adama ni Eva ha ba kwenuha, Mulimu wa ba atula mi, hasamulaho, wa ba lundula mwa Paradaisi. (Genese, likauha. 1-3) Mu ikutwe ku ba ni sabo ni likute ha mu bala kuli linzwi le li zwa kwa lihalimu li zibahaza kuli Jesu Kreste ki yena Mwan’a Mulimu, ya katelwa, ili yena ya lumilwe ki Mulimu ku t’o itombola bupilo bwa hae bakeñisa batu. (Mat. 3:16, 17) Mu like ku nahana maikuto a muapositola Joani h’a utwa Jehova a zibahaza kuli: “A mu bone, linto kaufela ni li eza ze nca.” (Sin. 21:5) Kaniti, ku bala Linzwi la Mulimu ka nzila yeo kwa tabisa luli!

Ha mu ka zwelapili ku bala litaba ze buyelezwi zeo, mu ka fita fa ku ziba Jehova kuli ki mutu ya pahami ili ya sabisa. Mu ka lata hahulu Yena y’o ya lu lata, ya lu eza ka musa, ya lu tusa ha lu tundamena ka buikokobezo ku lika ku eza tato ya hae, ili ya lu bonisa mwa ku kondiseza ku zote ze lu eza.—Josh. 1:8; Samu 8:1; Isa. 41:10.

Ha mu nze mu tanda nako ye ñata inze mu bala Bibele, tabo ya mina ikaba ye tuna hahulu zibo ya mina ya ku ziba tato ya Mulimu ka za mina ha inze i hula. Kono tabo yeo ha i na ku felela f’o. Ku bala kwa mina ha ku mi fa tuso ye mu tokwa mwa ku tatulula hande butata, mu ka ikutwa sina walisamu ya n’a ize: “Likelezo za hao za komokisa; kabakaleo pilu ya ka ya li mamela.” (Samu 119:129) Ni mina mu ka nyakalala ha mu ka lemuha likuka ze mwa Mañolo ze tusa ku zamaisa munahanelo ni litakazo za mina ka mukwa wa silumeli.—Isa. 55:8, 9.

Bibele i fa ketelelo ya za muzamao y’e lu takeleza ku ze sinya ni ku lu bonisa nzila ye lukile. Ha lu nze lu i bala, lu lemuha kuli Jehova ki Ndate ya ziba butata bo bu kana bwa zuha ha lu fenyiwa ki litakazo za nama ze si ka petahala. H’a bati kuli lu cuculiswe ki ze maswe-maswe ze ka tiswa ki ku nyaziseza likuka za hae ze pahami za muzamao. Wa lu tokomela mi u bata kuli lu pile hande hahulu. Ku bala Linzwi la hae ku lu tusa ku itebuha ka ku tala mbuyoti ya kuli ki Mulimu wa luna ni Ndat’a luna wa kwa lihalimu.

Walisamu n’a bulezi cwana ka za mutu ya bala Linzwi la Mulimu ka zazi: “S’a eza kaufela sa konda.” (Samu 1:3) Ee, ku si na taba ni mifokolo ya luna, ku si na taba ni kuli lu pila mwa muinelo wa linto o maswe wa Satani, mi ku si na taba ni kuli Diabulosi u eza ka t’ata kuli a lu tataule, ku bala kamita ni ku sebelisa ze mwa Linzwi la Mulimu ku ka lu konisa ku kondisa zote za mwa bulikani bwa luna ni Jehova.

Bakeñisa kuli muinelo wa kale wo wa lu siniliketa, ku anya mihupulo ya Mubupi nihaiba ka linako li sikai za butokwa ka zazi ni zazi kwa kona ku lu matafaza. Ba bañwi be ne ba lengilwe mwa tolongo kabakala tumelo ya bona ne ba kona fela ku bala litimana za ku nopa-nopa ze ne ba fumani li ñozwi mwa litaba za mwa mitende. Ne ba li pumile teñi, ku li peta mwa toho, ni ku li yeya. Jehova n’a fuyozi buikatazo bwa bona kakuli ne ba ezize ze ne konahala kuli ba fumane zibo mwa Linzwi la Mulimu. (Mat. 5:3) Niteñi, buñata bwa luna lu na ni tukuluho ye fitela kwahule yeo. Lu si ke lwa nahana kuli ku akufa ku bala fela timana ya Bibele hañwi ka zazi ku ka tusa hahulu. Kono lu ka tuseha mo kuñata haiba lu cinca ze lu kalanga ku eza ilikuli lu bale kabelo ye ñwi ya Bibele ka zazi, ku i nahana, ni ku i sebelisa mwa bupilo bwa luna.

Kaniti, ni ko lu lela hande lu mane, milelo ya luna ya kona ku mbwanjingelwa. Hakubacwalo, lu ise mamelelo ye tuna kwa lika za butokwa luli. Ka mutala, ne lu si ke lwa fitisa ka mabomu lizazi li li liñwi kamba a mabeli lu sa nwi mezi. Kacwalo, ku si na taba ni z’e lu tahela mwahal’a lizazi, lu fumane nakonyana ya ku ikatulusa ka mezi a niti.—Lik. 17:11.

Kana se mu ipalezi Bibele mukatumbi? Ba bañwi se ba ikutwile kuli ku buima ha ba nahana za ku bala ku kala ka Genese ku isa kwa Sinulo. Kabakaleo, ba bañata be ne ba batile ku bala Bibele mukatumbi ne ba kalile ka ku bala pili Mañolo a Sigerike a Sikreste. Libaka? Mwendi ki bakeñisa kuli ne ba kona ku bona ka bunolo m’o libuka za mwa Bibele zeo ne li sebeleza ku bona ka ku ba batu ba ba bata ku hata mwa n’a hatile Kreste. Kamba mwendi ki bakeñisa kuli Mañolo a Sigerike a Sikreste ne a sa bonahali ku ba a mañata hahulu ku a bala, kakuli Bibele ha ne i ka aluhanyiwa mwa likalulo ze ne, Mañolo ao n’a ka fitelela hanyinyani fela kalulo i liñwi kwa butuna. Kono ha ne ba felize ku bala libuka ze 27 zeo, ba fetuhela kwa libuka ze 39 za Mañolo a Siheberu mi ba kala ku li bala ni ku ikola zona. Ha ba y’o fezanga Mañolo a Siheberu, ne se ba tomile mukwa wa ku bala Bibele kamita, kacwalo ba zwelapili, ili ku bala Mañolo a Sigerike a Sikreste lwa bubeli, mi ni ka nako ye ha ba si ka tuhela. Haike ni mina mu balange Linzwi la Mulimu ka zazi mwa bupilo bwa mina kaufela.

Kana ku na ni mutu mwa lubasi kamba puteho ya habo mina y’a sa koni ku bala? Mwa kona ku ifana ku balelanga mutu y’o Bibele. Mu ka tuseha, mi ni yena u ka tuseha h’a nze a yeya z’a utwa ni ku li sebelisa mwa bupilo bwa hae.—Sin. 1:3.

Nako ha inze i ya, mu kana mwa bata ku ikupulela ze ipitezi za ku eza mwa ku bala Bibele kwa mina. Ze ñwi za zona zeo za kona ku ekeza kutwisiso ya mina ya mo li swalisanela likalulo ze fitana-fitana za Bibele. Haiba Bibele ya mina i na ni litaba ze ñozwi kwa matuko a mibamba ze isa kwa litaba ze ñwi, zeo za kona ku mi fumanisa tunango twa litaba ze ezahezi ni litaba ze zamaelela ni liñolo. Za kona ku mi tusa ku lemuha lika ze ne libisize kwa ku ñola lisamu ze fitana-fitana hamohocwalo ni mañolo a n’a ñozwi ki baapositola ba Jesu Kreste. Insight on the Scriptures i fa litaba ze ñata-ñata ka za batu, libaka, ni mikwa ye pundilwe mwa Bibele. Mikoloko i isa mamelelo kwa litalelezo za bupolofita bwa Bibele, i bonisa malena ni bapolofita be ne ba pilile mwa miteñi ye swana, ni ku fa mazazi a akalezwa fo ne ku ezahalezi lika ze ñata ze mwa Bibele.

Ha mu nze mu yeya ze mu ituta, mu ka utwisisa mabaka lika ze ñwi ha ne li kenezi sicaba sa Mulimu. Hape mu ka fumana libaka Jehova ha n’a sebelisani cwalo ni sicaba sa hae. Mu ka bona m’o Jehova a atulela likezo za milonga, macaba, ni batu ka buñwi. Zeo li ka mi tusa ku ziba hahulu mw’a nahanela.

Za kwamulaho ze ñozwi mwa Bibele li ka tabisa hahulu ha mu bona mwa munahano sibaka mo ne li ezahalezi lika. Limapa za libaka ze bulezwi mwa Bibele li patulula miinelo ya naha ni buhule bwa misipili ya mwahal’a zona. Ka mutala, ka akalezo, Maisilaele ne ba silezi kai Liwate le li Fubelu? Naha ya Sepiso ne i kuma kai? Jesu n’a fitile kai ha n’a zamaya inz’a eza bukombwa bwa hae bwa fa lifasi-mubu? Paulusi n’a boni lika mañi fa misipili ya hae ya bulumiwa? Limapa ni litaluso za naha li fa tunango to tu ka tahisa kuli ku bala kwa mina ku tabise. Mu kona ku fumana kai limapa za linaha ze bulezwi mwa Bibele? Ze ñwi li fumaneha mwa New World Translation of the Holy Scriptures. Livolyumu za Insight li na ni limapa ze bat’o ba ze 70, mi kwa mafelelezo a volyumu ya pili ku na ni mukoloko o bonisa kwa ku fumana limapa. Mu itusise Watch Tower Publications Index kuli mu fumane limapa ze ñwi. Haiba ha mu na lihatiso zeo, mu itusisange limapa ze hasanywa mwa Tora ya ku Libelela ha mu nze mu bala Bibele.

Mwa Mañolo a Siheberu, Mulena Davida n’a lumbile Jehova, a li: “Mihupulo ya hao Mulimu, hasi mo i ni fitela! Mwa buñata bwa yona i eza palo ye kuma kai!” (Samu 139:17) Mwa Mañolo a Sigerike a Sikreste, muapositola Paulusi n’a lumbile Jehova kakuli U “benyisize mwa lipilu za luna liseli la zibo ya kanya ya Mulimu ye mwa pata ya Kreste.” (2 Makor. 4:6) Ku zwa ku Davida, ne ku fitile lilimo ze mianda-nda ku isa ku Paulusi; niteñi, sibeli sa bona ne ba tabela Linzwi la Mulimu. Ni mina mwa kona ku li tabela cwalo haiba mu fumana nako ya ku bala zote zeo Jehova a mi file mwa Linzwi la hae le li buyelezwi.