Kauhanyo 5

“Yo Ki Mwan’a Ka”

BANANA ha ba eza lika ze nde, bashemi ba bona ba tabela. Musizana kamba mushimani h’a eza hande nto ye ñwi, bondat’ahe ba tabela ku bulelela ba bañwi kuli: “Yo ki mwan’a ka.”

Jesu kamita u ezanga ze tabisa Ndat’ahe. Kacwalo, Ndat’ahe wa mu lata. Kana wa hupula za n’a ezize Ndat’ahe Jesu zazi le liñwi Jesu ha n’a li ni ba balalu kwa balateleli ba hae?— Mulimu n’a ba bulelezi ku zwelela kwa lihalimu kuli: “Yo ki Mwan’a ka ya latwa, ye ni katelwa; mu mu utwe.”—Mateu 17:5.

Jesu kamita ki ya tabile ku eza lika ze tabisa Ndat’ahe. Kana wa ziba libaka? Ki kakuli wa lata luli Ndat’ahe. Haiba mutu a eza lika kakuli u na ni ku li eza, ku li eza ku kana kwa ba t’ata. Kono haiba a tabela, ku bunolo ku li eza. Kana wa ziba se ku talusa ku tabela?— Ku talusa ku bata luli ku eza nto ye ñwi.

Mane pili Jesu a si ka taha fa lifasi, n’a tabela ku eza kaufela za n’a mu kupa Ndat’ahe. Libaka kikuli u lata Ndat’ahe, yena Jehova Mulimu. Jesu n’a na ni sibaka se sinde kwa lihalimu ni Ndat’ahe. Kono Mulimu n’a na ni musebezi o mutuna w’o Jesu n’a na ni ku eza. Kuli a eze musebezi w’o, Jesu n’a na ni ku zwa kwa lihalimu. N’a na ni ku pepwa sina mbututu fa lifasi. Jesu n’a tabela ku eza cwalo kakuli Jehova n’a bata kuli a eze honacwalo.

Kuli a pepiwe sina mbututu fa lifasi, Jesu n’a tokwa ku ba ni m’ahe. Kana wa ziba libizo la hae?— Libizo la hae ki Maria. Jehova n’a lumile Gabriele lingeloi la hae ku zwa kwa lihalimu ni ku t’o bulela ni Maria. Gabriele n’a bulelezi Maria kuli n’a ka pepa mwana wa mushimani. Mwana y’o n’a ka beiwa libizo la Jesu. Mi ndat’ahe mbututu yeo n’a ka ba mañi?— Lingeloi leo ne li ize Ndat’ahe mbututu yeo n’a ka ba Jehova Mulimu. Ki kabakaleo Jesu ha n’a ka biziwa Mwan’a Mulimu.

Ka m’o bonela wena, Maria n’a ikutwile cwañi ka za taba yeo?— Kana n’a ize, “Ha ni lati ku ba m’ahe Jesu”? Kutokwa, Maria n’a tabela ku eza mwa n’a batela Mulimu. Kono Mwan’a Mulimu ya kwa lihalimu n’a kona ku t’o pepwa cwañi sina mbututu fa lifasi? Ku pepwa kwa Jesu ne ku shutana cwañi ni ku pepwa kwa limbututu ze ñwi? Kana wa ziba?—

Mulimu n’a ezize bashemi ba luna ba pili, bona bo Adama ni Eva, ilikuli ba kone ku kopana ka nzila ye makaza. Ku tuha f’o, mbututu ne i ka kalisa ku hula mwa mba ya bom’a yona. Batu ba bulelanga kuli yeo ki makazo! Na sepa ni wena wa lumela cwalo.

Kono Mulimu n’a ezize nto ye ñwi ye makaza hahulu. N’a ngile bupilo bwa Mwan’a hae ku zwa kwa lihalimu ni ku bu beya mwa mba ya Maria. Mulimu ni kamuta n’a si ka eza nto ye cwalo pili, mi h’a si ka eza nto ye cwalo hape ku zwa f’o. Kabakala makazo yeo, Jesu a kalisa ku hula mwa mba ya Maria, ka mo li hulela limbututu ze ñwi mwa mba ya bom’a zona. Ku tuha f’o, Maria a nyalwa ki Josefa.

Nako ya ku pepwa kwa Jesu ha ne i tile, Maria ni Josefa ne ba pota kwa muleneñi wa Betelehema. Kono n’o tezi batu ba bañata. Mane bo Maria ni Josefa ne ba si na ni sibaka, mi kacwalo ne ba na ni ku ina mo ne ku pila lifolofolo. Maria a pepela teñi, mi Jesu a beiwa mwa sicelo, sina ha u kona ku iponela fa. Sicelo ki sibaka mo ku beiwa lico ze li canga likomu ni lifolofolo ze ñwi.

Ne ku ezahezi lika ze tabisa busihu bwa n’a pepilwe Jesu. Bukaufi ni Betelehema, lingeloi la potela balisana ba bañwi. La ba bulelela kuli Jesu n’a li mutu wa butokwa. Lingeloi leo ne li ize: ‘A mu bone! Ni mi bulelela taba ye nde ye ka tabisa batu. Kacenu ku pepilwe mutu ya ka pilisa batu.’—Luka 2:10, 11.

Lingeloi leo ne li bulelezi balisana kuli ne ba ka fumana Jesu mwa Betelehema, inz’a lobezi mwa sicelo sa lifolofolo. Mi, ka sipundumukela, mangeloi a mañwi kwa lihalimu a t’o swalisana ni lingeloi leo mwa ku lumbeka Mulimu. Mangeloi ao n’a opezi kuli: “Kanya i be ku Mulimu . . . Kozo i be teñi mwa lifasi; batu ba shemubwe.”—Luka 2:12-14.

Mangeloi ha s’a ile, balisana ba ya kwa Betelehema mi ba y’o fumana Jesu. Teñi, ba bulelela bo Josefa ni Maria lika ze nde kaufela ze ne ba utwile. Kana wa ziba mwa n’a tabezi Maria kakuli n’a lumezi ku ba ma’he Jesu?

Hasamulaho, bo Josefa ni Maria ba ya ni Jesu kwa munzi wa Nazareta. Jesu n’a hulezi teñi k’o. Ha s’a hulile, a kalisa musebezi wa hae o mutuna wa ku luta. W’o n’e li musebezi o muñwi w’o Jehova Mulimu n’a bata Mwan’a hae ku t’o u eza fa lifasi. Jesu n’a tabela ku eza musebezi w’o kakuli n’a lata hahulu Ndat’ahe wa kwa lihalimu.

Jesu a si ka kala kale musebezi wa hae sina Muluti yo Mutuna, n’a kolobelizwe ki Joani Mukolobezi mwa Nuka ya Jordani. Mi kwa ezahala nto ye ñwi ye makaza! Jesu ha n’a nze a zwa mwa mezi, Jehova a bulela ku zwa kwa lihalimu, a li: “Yo ki mwan’a ka ya latiwa, ye ni katelwa.” (Mateu 3:17) Kana ha u ikutwangi hande bashemi ba hao ha ba ku bulelela kuli ba ku lata?— Lwa kona ku kolwa kuli Jesu ni yena n’a ikutwile hande.

Jesu kamita n’a ezanga ze lukile. N’a sa ipumisangi ku ba mutu u sili. N’a si ka bulelela batu kuli ki yena Mulimu. Lingeloi Gabriele ne li bulelezi Maria kuli Jesu n’a ka bizwa Mwan’a Mulimu. Yena Jesu ka sibili n’a ize n’a li Mwan’a Mulimu. Mi n’a si ka bulelela batu kuli n’a ziba ze ñata ku fita Ndat’ahe. N’a ize: “Ndate ki yo muhulu ku na.”—Joani 14:28.

Niheba kwa lihalimu, Jesu ha n’a fiwanga musebezi ki Ndat’ahe kuli a u eze, n’a u ezanga. N’a sa bulelangi kuli n’a ka u eza mi kona a eza nto ye ñwi. N’a lata Ndat’ahe. Kacwalo, n’a utwa za n’a mu bulelela Ndat’ahe. Mi Jesu ha n’a tile fa lifasi, n’a ezize za n’a mu lumezi Ndat’ahe wa kwa lihalimu kuli a t’o li eza. N’a si ka eza nto isili. Ku swanezi Jehova h’a tabela Mwan’a hae!

Ni luna lu bata ku tabisa Jehova, nji cwañi?— Kanti he lu lukela ku bonisa kuli luli lwa utwa Mulimu, sina Jesu ha n’a mu utwile. Mulimu u bulela ni luna ka Bibele. Ne ku si ke kwa ba ko ku lukile ku puma kuli lwa utwa Mulimu kono kihona lu lumela ni ku eza lika ze sa lumelelani ni Bibele, nji cwañi?— Mi u si libali kuli, haiba luli lwa lata Jehova, lu ka tabela ku mu tabisa.

Cwale ha ku bale mañolo a mañwi a mwa Bibele a a’ bonisa ze lu tokwa ku ziba ni ku lumela ka za Jesu: Mateu 7:21-23; Joani 4:25, 26; ni 1 Timotea 2:5, 6.

[Siswaniso se si fa likepe 33]

Lingeloi Gabriele ne li bulelezi Maria nto mañi?

[Siswaniso se si fa likepe 34]

Jesu n’a beezwiñi mwa sicelo sa lifolofolo?

[Siswaniso se si fa likepe 35]

Ki ifi taba ye nde yeo le liñwi la mangeloi a li bulelezi balisana?