Moliezezwa Lika Mwa Puteho ni Moiokamelelwa

MUAPOSITOLA PAULUSI naabulezi taba ya butokwa ka za Mulimu mwa liñolo lahae lapili lanaañolezi mizwale ba kwa Korinte. Naañozi kuli: “Mulimu haki Mulimu wa mifilifili, kono ki wa kozo.” Mi hanaabulela za mikopano ya puteho, naaize: “Lika kaufela liezwe ka swanelo ni ka mokulukiselizwe.”—1 Makor. 14:33, 40.

² Kwa makalelo a liñolo leliswana leo, muapositola naaelelize mizwale ba kwa Korinte kabakala likauhano zeneli mwa puteho yabona. Paulusi naaelelize mizwale bao kuli ‘babulele ka kulumelelana’ ni kuli ‘baswalisane hande hamoho ka munahano ulimuñwi ni ka muhupulo ulimuñwi.’ (1 Makor. 1:10, 11) Kuzwa fo, abafa kelezo ilikuli abatuse kutatulula litaba zeshutana-shutana zenetahisa kuli kusike kwaba ni swalisano mwa puteho. Ka kuitusisa swanisezo ya mubili wa mutu, naatalusize libaka mizwale bao hane baswanela kupila hamoho ka kozo ni swalisano. Naasusuelize batu kaufela ba mwa puteho ya Sikreste kuli batusane ka lilato kusina taba ni misebezi yene baeza mwa puteho. (1 Makor. 12:12-26) Kuli swalisano yecwalo ibeteñi mwa puteho, lika nelitokwa kuzamaiswa hande.

³ Kono lika nelika ezwa cwañi mwa puteho ya Sikreste? Ki mañi yanaaka lilukisa? Ki misebezi mañi yeneka ezwa mwa puteho? Ki bo mañi bane bakaketiwa kueza misebezi yeo? Kulatelela zeibulela Bibele kuka lutusa kufumana likalabo kwa lipuzo zeo.—1 Makor. 4:6.

⁴ Puteho ya Sikreste neitomilwe fa lizazi la Pentekota ya 33 C.E. Lukona kuitutañi kwa puteho ya mwa linako za baapositola? Lika mwa puteho neliezwa ni kuokamelwa ka mwanaabatela Mulimu, kamba ka puso (Sigerike, kraʹtos) ya Mulimu (the·osʹ). Manzwi a Sigerike amabeli ao afumaneha kwa 1 Pitrosi 5:10, 11. Taba yeneezahezi mwa Jerusalema ibato ba lilimo ze 2,000 kwamulaho, ili yeñozwi ka ketelelo ya moya wa Mulimu, ibonisa hande kuli puteho ya Bakreste babatozizwe neitomilwe ki Mulimu. (Lik. 2:1-47) Neli muyaho wahae, ili ndu yahae. (1 Makor. 3:9; Maef. 2:19) Lika mwa puteho ya Sikreste kacenu liezwa ka kulatelela mutala one utomilwe mwa linako za baapositola.

⁵ Puteho ya makalelo neikalile ka balutiwa bababato eza 120. Moya okenile neusululezwi fahalimwaa batu bao pili, ili kutaleleza liñolo la Joele 2:28, 29. (Lik. 2:16-18) Kono fa lizazi leliswana leo, batu babañwi bababato eza 3,000 nebakolobelizwe mwa mezi mi bakala kuswalisana ni puteho yeo ya Bakreste bane batozizwe ka moya. Nebaamuhezi linzwi la Kreste mi “bazwelapili kutiiseza mwa tuto ya baapositola.” Mi “Jehova naazwelapili ka zazi ni zazi kubaekeleza bane bapiliswa.”—Lik. 2:41, 42, 47.

⁶ Puteho ya mwa Jerusalema neizwezipili kuhula kuli mane muprisita yapahami wa Majuda naabilaezi kuli balutiwa nebatalize Jerusalema ka tuto yabona. Baprisita babañata ba Majuda bakala kuswalisana ni puteho, mi baekeza kwa palo ya balutiwa babanca mwa Jerusalema.—Lik. 5:27, 28; 6:7.

⁷ Jesu naabulezi kuli: “Mukaba lipaki zaka mwa Jerusalema, mwa Judea kaufela ni mwa Samaria, ni kuyo fita kwa libaka za kwahule hahulu za lifasi.” (Lik. 1:8) Hamulaho wa lifu la Setefani, balutiwa ba mwa Jerusalema banyandiswa maswe, mi bahasanela mwa libaka kaufela za Judea ni Samaria. Kono kone baile kaufela, nebazwezipili kushaela taba yende ni kuluta batu babañwi kuba balutiwa, mane nihaiba Masamaria. (Lik. 8:1-13) Hasamulaho, taba yende yakutazwa kwa batu ba macaba bane basikaya kwa mupato. (Lik. 10:1-48) Musebezi wo kaufela wa kukutaza neutahisize kuli batu babañata babe balutiwa ni kuli liputeho zenca litomiwe mwa libaka zeñwi zeneli kwande a Jerusalema.—Lik. 11:19-21; 14:21-23.

⁸ Nekuezizwe litukiso mañi kuli lika mwa puteho ni puteho yenesazo tomiwa liezwe ni kuokamelwa ka kuya ka mwabatela Mulimu? Ka kuetelelwa ki moya wa Mulimu, nekuezizwe litukiso za kuli balisananyana balise mutapi. Bo Paulusi ni Barnabasi nebaketile baana-bahulu mwa liputeho zene bapotezi mwa musipili wabona wa bulumiwa wapili. (Lik. 14:23) Luka, yomuñwi wa bañoli ba Bibele, utalusa zeneezahezi Paulusi hanaakopani ni baana-bahulu ba mwa puteho ya mwa Efese. Paulusi naabataluselize kuli: “Muitibelele mi mulibelele mutapi kaufela, ona mutapi momuketilwe ki moya okenile kuba baokameli, kuli mulise puteho ya Mulimu, yaitekezi ka mali a Mwanaa hae.” (Lik. 20:17, 28) Nebaketilwe kuba baana-bahulu kakuli nebakwanisize zetokwahala za mwa Mañolo. (1 Tim. 3:1-7) Tite yanaasebelisana ni Paulusi naafilwe maata a kuketa baana-bahulu mwa liputeho za mwa Kreta.—Tite 1:5.

⁹ Liputeho zeñata hane linze litomiwa, baapositola ni baana-bahulu ba mwa Jerusalema nebazwezipili kuba bona baokameli ba puteho kaufela ya Sikreste yeneenze ihula mwa linako za baapositola zeo. Neli bona sitopa sesietelela sa puteho ya Sikreste yeo.

¹⁰ Muapositola Paulusi hanaañolezi puteho ya kwa Efese, naatalusize kuli kulatelela ketelelo ya moya wa Mulimu, ili yefiwa ki Jesu Kreste yena Toho ya puteho, nekuka tusa puteho ya Sikreste kuzwelapili kuswalisana. Muapositola yo naasusuelize Bakreste ba kwa Efese kuli babe ni buikokobezo ni kuli balike ka taata kubuluka “buñwi bwa moya” ka kupilisana ka kozo ni batu kaufela mwa puteho. (Maef. 4:1-6) Kutuha fo, akutela kubulela manzwi afumaneha kwa Samu 68:18, mi abonisa kuli manzwi ao naaama kwa tukiso yalukisize Jehova ya kuketa baana babatiile kwa moya babakwanisize zetokwahala kuli baokamele puteho sina baapositola, bapolofita, bakutazi, balisana, ni baluti. Baana bao, babali limpo zezwa ku Jehova, nebaka tusa puteho kaufela kuli ihule kwa moya ka kutala ni kuba yetabisa Mulimu.—Maef. 4:7-16.

¹¹ Kacenu, lika mwa liputeho kaufela za Lipaki za Jehova liezwa ka nzila yeswana. Liputeho zeo kaufela liswalisani hamoho kuba puteho iliñwi ya mwa lifasi kaufela mi litusa Bakreste babatozizwe. (Zak. 8:23) Jesu Kreste ki yena yakonahalisa taba yeo. Uzwezipili kutaleleza sepiso yahae ya kuba ni balutiwa bahae babatozizwe ka “mazazi kaufela kuisa nako ya kufela kwa lifasi.” Batu babatile mwa puteho yezwelapili kuhula baamuhezi taba yende ya Mulimu, baneezi bupilo bwabona ku Jehova ka pilu kaufela, mi bakolobelizwe kuba balutiwa ba Jesu. (Mat. 28:19, 20; Mare. 1:14; Lik. 2:41) Baziba kuli Jesu Kreste, yena “mulisana yomunde,” ki yena Toho ya mutapi kaufela, ili mutapi wa Bakreste babatozizwe kukopanyeleza cwalo ni ba “lingu zeñwi.” (Joa. 10:14, 16; Maef. 1:22, 23) “Mutapi ulimuñwi” wo uzwezipili kuswalisana kabakala kuli walatelela ketelelo ya Kreste yefiwa ka kuitusisa “mutanga yasepahala yanani kutwisiso” yaketilwe ki Kreste. Haike luzweleñipili kusepa hahulu mutanga yasepahala yanani kutwisiso, kakuli ki yona nzila yeo Kreste aitusisa kwa kulufa ketelelo kacenu.—Mat. 24:45.

¹² Kunani likopano zetomilwe ilikuli lico za kwa moya likone kufiwa ka nako yeswanela ni kuli taba yende ya Mubuso ikone kukutazwa pili mafelelezo asika taha kale. Likopano za ka mulao zeo liñolisizwe ka kuya ka milao ya linaha zeshutana-shutana, mi lisebelisana hamoho. Likopano zeo litusa mwa musebezi wa kukutaza taba yende mwa lifasi kaufela.

¹³ Ofisi ya mutai haitomiwa, kuketiwanga baana-bahulu babalaalu kamba babafitelela fo kuli babe mwa Katengo ka Mutai, ilikuli batalime misebezi mwa naha kamba mwa linaha zeokamelwa ki mutai wo. Yomuñwi wa mizwale ba mwa katengo kao uketiwanga kuba muswalisanisi wa Katengo ka Mutai.

¹⁴ Liputeho zeokamelwa ki mutai ni mutai lialuzwi mwa mipotoloho. Mipotoloho yeo yashutana-shutana kwa butuna kulikana ni libaka koifumaneha, lipuo zebulelwa kwateñi, hamohocwalo ni palo ya liputeho zeokamelwa ki mutai wo. Kuketiwanga muokameli wa mupotoloho kuli apotelange liputeho ze mwa mupotoloho ni mupotoloho. Ofisi ya mutai ilumelanga baokameli ba mupotoloho litaelo zebonisa misebezi yebaswanela kueza.

¹⁵ Liputeho lilatelelanga litukiso za kopano zelukiselizwe kutusa mañi ni mañi. Liamuhelanga likatulo za kuketiwa kwa baana-bahulu, babaokamela musebezi mwa mitai, mwa mipotoloho, ni mwa liputeho. Liputeho liitingile ku mutanga yasepahala yanani kutwisiso kuli alilukiseze lico za kwa moya ka nako yeswanela. Mutanga yasepahala kacenu ni yena ulatelela ketelelo ya Kreste, mi umamela likuka za Bibele ni kulatelela ketelelo ya moya okenile. Kaufelaa luna halunze lusebelisana hamoho ka buñwi, lukaba ni limbuyoti zeswana ni zene babile ni zona Bakreste ba mwa linako za baapositola, sina feela hane kutalusizwe kuli: “Liputeho zazwelapili kutiiswa mwa tumelo mi palo ya balumeli yazwelapili kuekezeha ka zazi ni zazi.”—Lik. 16:5.