Momukona Kupetela Zeñata Mwa Bukombwa

NAKO hane ifitile ya kuli Jesu alume balutiwa bahae kuyo kutaza Mubuso, naaize ku bona: “Kutulo ki yetuna, kono babeleki ki babanyinyani.” Nekunani musebezi omutuna wa kueza, kacwalo naaekelize kubulela kuli: “Mukupe Muñaa kutulo kuli alume babeleki mwa musebezi wahae wa kutulo.” (Mat. 9:37, 38) Jesu naalutile balutiwa bahae mwakukutaleza. Manzwi ahae naabonisize kuli musebezi wo neuswanela kuezwa ka putako, hanaaize: “Hamuna kufeza kupotela mileneñi kaufela ya Isilaele Mwanaa mutu asika fita kale.”—Mat. 10:23.

² Ni kacenu, musebezi wa kukutaza ki omutuna. Taba yende ye ya Mubuso inani kukutazwa pili mafelelezo asika taha kale, mi nako yesiyezi ki yenyinyani! (Mare. 13:10) Bakeñisa kuli simu ki lifasi, lu mwa muinelo oswana ni wanaali ku ona Jesu ni balutiwa bahae, feela kikuli luna lunani kukutaza mwa sibaka sesituna nikufita. Lu babanyinyani halubapanywa kwa batu babañata-ñata mwa lifasi, kono lwaziba kuli Jehova uka lutusa. Taba yende ya Mubuso ikakutazwa mwa lifasi kaufela, mi mafelelezo akataha ka nako yatomile Jehova. Kana lukaeza pili za Mubuso wa Mulimu mwa bupilo bwaluna ilikuli lupete bukombwa bwaluna ka kutala? Ki likonkwani mañi zeluitomezi mwa sebelezo yaluna ku Jehova zekona kulutusa kueza cwalo?

³ Jesu hanaatalusa zatokwa Jehova kwa batanga bahae babaineezi, naaize: “Ulukela kulata Jehova Mulimu wahao ka pilu yahao kaufela ni ka moyo wahao kaufela ni ka munahano wahao kaufela ni ka maata ahao kaufela.” (Mare. 12:30) Kaufelaa luna lutokwa kusebeleza Mulimu ka moyo kaufela. Fo kutalusa kuli luswanela kubonisa kuli lwasepahala ku Jehova mi luineezi luli ku yena ka kueza ka molukonela kaufela mwa bukombwa. (2 Tim. 2:15) Mañi ni mañi waluna wakona kueza cwalo, ka kuya ka miinelo ni maata aluna. Hamunyakisise zeñwi za lika zemukona kueza, ilikuli muitomele likonkwani za kwa moya zemukona kupeta mwa bukombwa bwamina.

⁴ Batu kaufela babaamuhela niti banani tohonolo ya kuhasanya taba yende. Wo ki ona musebezi wa butokwa wanaafile Jesu kwa balutiwa bahae. (Mat. 24:14; 28:19, 20) Hañata mulutiwa wa Jesu Kreste ukalisanga kutaluseza babañwi taba yende hamulaho feela wa kuiutwa. Ki mona mone baezelize cwalo bo Andreasi, Filipi, Kornele, ni balutiwa babañwi. (Joa. 1:40, 41, 43-45; Lik. 10:1, 2, 24; 16:14, 15, 25-34) Kana fo kutalusa kuli mutu wakona kutaluseza babañwi taba yende pili asika kolobezwa kale? Eni! Mutu asalumelezwa feela kuba muhasanyi yasika kolobezwa mwa puteho, wakona kukutaza fa ndu ni ndu. Hape wakona kueza mifuta yemiñwi ya bukombwa kulikana ni buikoneli bwahae hamohocwalo ni miinelo yali ku yona.

⁵ Kusina kukakanya, muhasanyi asakolobezwa feela, ubonisa kuli ubata kueza mwakonela kaufela kutaluseza babañwi taba yende. Baana ni basali banani tohonolo yeswana ya kueza musebezi wa kukutaza. Ki tohonolo luli kuzwisezapili za Mubuso wa Mulimu nihaiba feela ka sipimo sesinyinyani. Mutu kaufela yapeta zeñata mwa bukombwa ka kueza misebezi yebonisizwe kwatasi ukaba ni tabo luli.

⁶ Mwendi mu mwa puteho mo kalulo ya simu isebelezwa hañata-ñata mi batu bakutalizwe luli. Haiba ku cwalo, mwendi muikutwa kuli mwakona kupeta zeñata mwa bukombwa ka kututela kwa sibaka sesiñwi kokutokwahala hahulu bakutazi ba Mubuso. (Lik. 16:9) Haiba mu baana-bahulu kamba mu likombwa za puteho, mwendi kunani puteho yeñwi yekatokwa tuso yamina mwa misebezi ya puteho. Muokameli wamina wa mupotoloho wakona kumifa liakalezo zeñwi za momukona kutuseza puteho yeñwi ye mwa mupotoloho. Haiba mubata kusebeleza mwa kalulo isili ye mwa naha yahabo mina, mwakona kuñolela ofisi ya mutai kukupa litaba zeñwi.

⁷ Kana nemuka tabela kuyo sebeleza mwa naha isili? Haiba ku cwalo, mutokwa kunahanisisa za teñi ka tokomelo. Mutokwa kuambola ni baana-bahulu mwa puteho yamina za taba yeo. Kututela mwa naha isili kukacinca miinelo yamina ni ya batu bomuka tuta ni bona. (Luka 14:28) Kono haiba mulela kuyo sebeza ka nakonyana feela, neikaba hande hane mukanyakisisa za kusebeleza mwa libaka ze mwa naha yahabo mina.

⁸ Mwa linaha zeñwi, mizwale babaokamela isali babanca mwa niti. Mizwale babaikokobeza bao baitatela kutuhelela mizwale base basebelize sina baana-bahulu ka nako yetelele, babatutela mwa liputeho zabona kuli baokamele. Haiba mu baana-bahulu mi mulela kututela mwa naha yecwalo, muhupule kuli mulelo wamina hauswaneli kuba wa kuyo yola mizwale babaokamela mwa libaka zeo. Kono muswanela kusebeza hamoho ni bona. Mubasusueze kuli baeza ka taata kuli babe baokameli mwa puteho. (1 Tim. 3:1) Mube ni pilu-telele haiba mulemuha kuli lika zeñwi mwa puteho haliezwi sina moliezezwa mwa puteho ya mwa naha yamina. Muitusise zibo yemunani yona ka kuba baana-bahulu kuli mutuse mizwale bamina. Mi ka nako yemuka kutela kwa naha yahabo mina, baana-bahulu ba mwa puteho yemututezi ku yona bakabe bazibile hande mwakutuseza puteho yabona.

⁹ Pili ofisi ya mutai isika mifa kale mabizo a liputeho zemukona kutusa, Katengo ka Sebelezo ya Puteho yamina kakatokwa kuñola liñolo la kumipaka. Liñolo leo latokwahala ibe kuli mu baana-bahulu, mu likombwa za puteho, mu mapaina, kamba mu bahasanyi. Katengo ka sebelezo kakaluma liñolo la kumipaka hamoho ni kupo yamina kwa ofisi ya mutai ya naha yemubata kuyo sebeleza ku yona.

¹⁰ Kuli mupete zeñata mwa bukombwa, mwakona kuituta puo isili, inge cwalo puo ya bo susu. Haiba mubata kuituta puo isili ilikuli mukutaze mwa puo yeo, muambole ni baana-bahulu ni muokameli wa mupotoloho. Bakona kumifa liakalezo zeñwi ni kumisusueza. Ka ketelelo ya ofisi ya mutai, mipotoloho yemiñwi ilukisize kuli kube ni tukiso ya kuli bahasanyi babanani buanyu ni mapaina baitute puo isili, ilikuli bakutaze mwa puo yeo.

¹¹ Bahasanyi kaufela baswanela kuziba zetokwahala kuli mutu aeze bupaina bwa kutusa, bwa kamita, ni bobuipitezi, hamohocwalo ni mifuta yemiñwi ya sebelezo ya nako kaufela. Paina ulukela kuba Mukreste yakolobelizwe, yali mutala omunde, ili yo miinelo yahae imukonisa kukwanisa palo ya lihora zetomilwe mwa musebezi wa kukutaza taba yende. Katengo ka Sebelezo ya Puteho ki kona kakalumelezanga bahasanyi kusebeza sina mapaina ba kutusa kamba sina mapaina ba kamita, kono mapaina babaipitezi bona baketiwanga ki ofisi ya mutai.

¹² Mapaina ba kutusa bakona kueza bupaina kukalela fa kweli iliñwi, kamba ka likwelinyana zetatamana, kamba kuzwelapili cwalo, kulikana ni miinelo yabona. Bahasanyi ba Mubuso babañata baikolanga kueza bupaina bwa kutusa ka linako zeipitezi, inge cwalo ka nako ya Kupuzo kamba mwa kweli yapota muokameli wa mupotoloho. Babañwi baiñolisanga kuba mapaina mwa likweli zebali fa lipumulo za mubeleko. Bahasanyi babakolobelizwe babakena sikolo bakona kuiñolisa kuba mapaina ba kutusa mwa likweli za pumulo. Bahasanyi bakona kuiñolisa kuba mapaina ba kutusa mwa kweli ya March ni April silimo ni silimo, ni mwa kweli yebapotelwa ki muokameli wa mupotoloho, mi mwahalaa nako yeo kaufela bakona kuiketela kueza bupaina bwa lihora zekusufalizwe. Kusina taba ni miinelo yamina, haiba munani muzamao omunde, mi mwakona kukwanisa lihora zetomilwe za kusebeza mwa simu, mi muikutwa kuli mwakona kueza bupaina bwa kutusa ka kweli iliñwi kamba kufitelela, mufitise kupo yamina kwa baana-bahulu ba puteho, mi bakatabela kunyakisisa kupo yamina ya kueza sebelezo ya butokwa yeo.

¹³ Kuli mukwanise zetokwahala za kuba paina wa kamita, muswanela kuba babakona kukwanisa lihora zetomilwe za ka silimo. Ka kuba paina wa kamita, muswanela kusebelisana hahulu ni puteho yamina. Mapaina babatukufalezwi batusa hahulu puteho ka kususueza babañwi kuba ni tukufalelo mwa bukombwa mane nihaiba kubasusueza kuba mapaina. Kono pili musika iñolisa kale kuli mube paina wa kamita, muswanela kuba muhasanyi yatoma mutala omunde, ili yasakwanisize likweli ze 6 kuzwa fakolobelezwa.

¹⁴ Mapaina babaipitezi hañata baketiwanga mwahalaa mapaina ba kamita babanani buanyu mwa bukombwa. Baswanela kuba babaitatela kuya kwa sibaka sifi kamba sifi koika baluma ofisi ya mutai. Hañata balumiwanga kwa libaka za kwahule, kobakona kufumana batu babatabela ni kutoma liputeho zenca. Fokuñwi, mapaina babaipitezi balumiwanga kwa liputeho zetokwa tuso kuli likwahele kalulo yazona ya simu. Mapaina babaipitezi babañwi babali baana-bahulu hape balumiwanga kuyo tusa liputeho zenyinyani, liputeho zeo niha lisina butokwi luli bwa bakutazi ba Mubuso. Mapaina babaipitezi bafiwanga penenyana yeebatusa kukwahela lisinyehelo zebabanga ni zona. Mapaina babaipitezi babañwi baketiwanga kusebeza nakonyana.

¹⁵ Katengo ka Sebelezo ka Sitopa Sesietelela ki kona kakaketanga balumiwa, mi balumiwa bao balumiwanga ki Katengo ka Mutai kuyo sebeleza mwa libaka mokunani batu babañata. Batusanga kuli musebezi wa kukutaza uzwelepili mi batiisanga liputeho. Hañata, balumiwa ibanga mizwale ni likaizeli babafumanehile kwa Sikolo sa Bakutazi ba Mubuso. Balukisezwanga ndu mwa kuina mi bafiwanga penenyana yeebatusa kukwahela lisinyehelo zebabanga ni zona.

¹⁶ Mizwale babaketiwanga ki Sitopa Sesietelela kuli babe baokameli ba mupotoloho balutiwanga mwakuezeza musebezi wo, mi baitutanga zeñata habasebeza pili sina mutusi wa muokameli wa mupotoloho. Mizwale bao balata bukombwa ni mizwale babona. Mizwale bao ki mapaina babatukufalezwi, babaitutanga Bibele kamita, mi ki babuleli ni baluti babande. Batoma mutala omunde ka kubonisa muselo wa moya, habaezangi lika ka kutula tikanyo, mi banani kutwisiso ni temuho. Haiba muzwale yali muokameli wa mupotoloho unyezi, musalaa hae yali paina uswanela kutoma mutala omunde mwa muzamao ni mwapilisanela ni babañwi. Musalaa hae uswanela kuba ni buanyu mwa musebezi wa kukutaza. Hape musalaa hae uswanela kuba Mukreste yaipeya kwatasi, yasaikwameki maata a muunaa hae, ni yasafi litaelo haambola ni babañwi. Baokameli ba mupotoloho ni basali babona ki batu babapatehile luli, kacwalo mizwale ni likaizeli bababata kueza sebelezo ye, baswanela kuba babaiketile kwa mubili. Mapaina habaswaneli kuiñolisa kuli babata kuba baokameli ba mupotoloho. Kono haiba babata kusebeza sina muokameli wa mupotoloho, baswanela kutaluseza muokameli wa mupotoloho wabona za milelo yabona, mi muokameli wa mupotoloho uka bafa liakalezo zeka batusa.

¹⁷ Sikolo sa Bakutazi ba Mubuso: Kutokwahala bakutazi ba Mubuso babañata kuli bakwahele libaka zesakutalezwangwi hahulu ni kutiisa liputeho. Kacwalo, mizwale ba makwasha, likaizeli ba makwasha, ni Bakreste babanyalani bakona kuiñolisa kuli bakene Sikolo sa Bakutazi ba Mubuso. Hase bakwazize sikolo seo, mizwale ni likaizeli bao balumiwanga kuyo sebeza sina mapaina ba kamita kwa libaka kokutokwahala hahulu bakutazi ba Mubuso mwa naha yabona. Kono babaitukiselize kulumiwa kwa sibaka sifi kamba sifi bakona kufiwa misebezi yemiñwi mwa naha yabona kamba mwa naha isili. Babañwi ku bona bakona kulumiwa kuyo sebeza sina mapaina babaipitezi ba swalelele kamba sina mapaina babaipitezi. Mapaina babatabela kukena sikolo se bakona kuziba zebatokwa kueza ka kufumaneha kwa mukopano wa babaitakaleza kukena sikolo seo, oeziwanga kwa mukopano omutuna.

¹⁸ Sikolo sa Giliadi sa Bibele sa Watchtower: Babaketiwanga kukena sikolo se ki mizwale ba makwasha, likaizeli ba makwasha, ni Bakreste babanyalani, babaziba puo ya Sikuwa, ili babali mwa sebelezo yeipitezi ya nako kaufela. Bahasanyi bao ki babakona kutiisa liputeho ni kutusa kuli musebezi fa liofisi za mutai uzamaye hande. Mizwale ni likaizeli bao ki babatabela kusebeleza mizwale babona ni kutusa babañwi ka lilato, ni kubasusueza kulatelela ketelelo yefumaneha mwa Mañolo ni yezwa kwa kopano. Ba Katengo ka Mutai ki bona babamemanga mizwale ni likaizeli babakona kukena sikolo seo kuli baiñolise. Hase bakwazize sikolo seo, mizwale ni likaizeli bao balumiwanga kuyo sebeleza kwa libaka zeñwi kamba kwa ofisi ya mutai ya kwa naha isili kamba ya mwa naha yabona.

¹⁹ Kusebeleza fa Betele ki tohonolo yetuna. Linzwi la Betele litalusa “Ndu ya Mulimu,” mi kaniti luli linzwi leo laswanela kubiziswa libaka zeo kokuezezwa misebezi ya Mulimu. Mizwale ni likaizeli ba fa Betele baeza musebezi wa butokwa hahulu oama kuhatisa, kutoloka, ni kuabela lihatiso zetomile fa Bibele. Misebezi yebaeza itusa hahulu Sitopa Sesietelela, sesiokamela ni kuetelela liputeho mwa lifasi kaufela. Buñata bwa batoloki bapila ni kusebeleza mwa libaka moibulelwa puo yebatoloka, ili zeokamelwa ki mutai wabona. Kusebeleza mwa libaka zeo kubatusa kuikutwela puo yebaitusisa batu mwa lipulelo zabona za ka zazi ni zazi. Hape, bakona kulemuha haiba batu bautwisisa puo yebaitusisize mwa lihatiso zebatolokile.

²⁰ Buñata bwa misebezi yeeziwa fa Betele ki misebezi ya mazoho. Kacwalo, babamemiwa kuya fa Betele sihulu ki mizwale babaineezi ni kukolobezwa, babasa ikutwa, babanani buikangulo bobunde, ili babatiile kwa mubili. Haiba kunani butokwi mwa naha yahabo mina mi mwatabela kusebeleza fa Betele, mwakona kuziba zeñata zemutokwa kueza ka kubuza baana-bahulu mwa puteho yamina.

²¹ Kuyaha libaka zeitusiswa kwa misebezi ya Mubuso ki nzila yeñwi yelukona kusebeleza Mulimu ka yona, mi musebezi wo uswana ni musebezi one uezizwe wa kuyaha tempele ya Salumoni. (1 Mal. 8:13-18) Mizwale ni likaizeli babañata babonisa tukufalelo yetuna ka kufana nako yabona ni maata abona kueza musebezi wo.

²² Kana mwakona kutusa mwa musebezi wo? Haiba mu muhasanyi yakolobelizwe mi nemuka tabela kueza musebezi wo, mizwale babaokamela musebezi wa kuyaha mwa sibaka samina bakaitebuha hamuka ifana kutusa, mi mane baitukiselize kumiluta nihaikaba kuli hamuzibi za musebezi wa kuyaha. Mwakona kuzibisa baana-bahulu ba mwa puteho yamina kuli nemuka tabela kutusa. Bahasanyi babakolobelizwe babañwi babakwanisize zetokwahala bakonile kuitatela kuya kwa linaha lisili kuli bayo yaha libaka zeitusiswa mwa misebezi ya Mubuso.

²³ Kunani linzila zeñata zemukona kutusa ka zona mwa musebezi wa kuyaha. Bahasanyi babakolobelizwe babali mutala omunde ili babanani yeloselinyana mwa misebezi yemiñwi ni babakona kutusa mwa misebezi yeezwa bukaufi ni kobapila bakona kusebeza sina Baitateli ba Liluko Lelitalima Musebezi wa Kuyaha. Bahasanyi babañwi babakona kutusa mwa misebezi yeezwa kwa libaka za kwahule ka nakonyana ili babaketilwe ki ofisi ya mutai, basebezanga sina bayahi babali baitateli ka lisunda zepeli kamba kufitelela, mane kuisa likweli zetaalu. Bahasanyi babaketiwanga kusebeza mwa musebezi wa kuyaha ka nako yetelele babizwa likombwa za musebezi wa kuyaha. Sikombwa sa musebezi wa kuyaha yafiwa musebezi kwa naha isili ubizwa sikombwa sa musebezi wa kuyaha yasebeleza mwa naha isili. Likombwa za musebezi wa kuyaha ni bayahi babali baitateli babali mwa Sikwata sa Bayahi sesiswana ki bona babazamaisanga musebezi wa kuyaha obafilwe mi batusiwanga ki baitateli babalumilwe ki ba Liluko Lelitalima Musebezi wa Kuyaha ni baitateli babazwa mwa liputeho zeyahelwa libaka zeo. Likwata za Bayahi liyahanga libaka zeshutana-shutana ze mwa sibaka sesiokamelwa ki mutai.

²⁴ Haiba muineezi ku Jehova, takazo yamina ki kusebeleza Jehova kuya kuile. Kono ki lifi likonkwani zamina za kwa moya zemuitomezi ka nako ya cwale? Kuba ni likonkwani za kwa moya kuka mitusa kuitusisa hande maata ni maluwo amina. (1 Makor. 9:26) Likonkwani zeo lika mitusa kuhula kwa moya ni kumitusa kuisa pilu kwa lika za butokwa hahulu nikufita, hamunze mueza zetokwahala kuli mufiwe buikalabelo bobuñwi.—Mafil. 1:10; 1 Tim. 4:15, 16.

²⁵ Muapositola Paulusi naalutomezi mutala omunde oluswanela kulatelela halunze lusebeleza Mulimu. (1 Makor. 11:1) Paulusi naaikatalize kusebeleza Jehova ka maata ahae kaufela. Naalemuhile kuli Jehova naamufile linzila zeñata za kumusebeleza ka zona. Paulusi naañolezi mizwale ba kwa Korinte kuli: “Nikwalulezwi munyako omutuna wa musebezi.” Kana haki nto yeswana ni ku luna kacenu? Lunani linzila zeñata zelukona kusebeleza Jehova ka zona hamoho ni puteho, sihulu ka kukutaza taba yende ya Mubuso. Kono sina mone kubezi ku Paulusi, luswanela kuhupula kuli halunze lufita mwa “munyako omutuna” wo, lukalwaniswa ki ‘bahanyezi babañata.’ (1 Makor. 16:9) Paulusi naatabela kuiswala. Mulemuhe manzwi anaabulezi, aali: “Nititika mubili waka ni kuuzamaisa sina mutanga.” (1 Makor. 9:24-27) Kana ni luna lwaeza cwalo?

²⁶ Mañi ni mañi ususuezwa kukwanisa likonkwani za kwa moya zaitomezi kulikana ni miinelo yahae. Mizwale ni likaizeli babañata ba mwa sebelezo ya nako kaufela kacenu kabakala kuli nebaitomezi sikonkwani seo inze basali banana. Nihaike kuli nebasali banana, bashemi babona ni mizwale babañwi neba basusuelize kuitomela sikonkwani seo. Kacwalo, bafumani limbuyoti zeñata kabakala kusebeleza Jehova, mi habainyazi kabakala kuunga muhato wo. (Liprov. 10:22) Likonkwani zeñwi za butokwa zelukona kuitomela ki kuyanga mwa sebelezo ya mwa simu sunda ni sunda, kukalisa ni kuzamaisa tuto ya Bibele ya fa ndu, ni kuitukisezanga hande mikopano ya puteho. Sa butokwa kikuli luzwelepili kutiya ni kupeta bukombwa bwaluna ka kutala. Haiba lueza cwalo, lukalumbeka Jehova ni kupeta sikonkwani saluna sesituna, sona sa kumusebeleza kuya kuile.—Luka 13:24; 1 Tim. 4:7b, 8.