Mubuso Oswana Sina Kota Yetuna

Busihu bobuñwi, Nebukadenezare naalolile tolo yesabisa. Abiza baana bahae bababutali kuli bato mutaluseza zeitalusa. Kono hakuna nihaiba alimuñwi ku bona yanaakona kutalusa tolo yahae. Kwa mafelelezo, mulena aambola ni Daniele.

Nebukadenezare abulelela Daniele, ali: ‘Mwa tolo yaka, niboni kota. Neihulile hahulu kuba yetelele kuli mane yayo fita kwa lihalimu. Neikona kubonahala mwa lifasi kaufela. Neinani matali amande ni miselo yemiñata. Lifolofolo nelibutanga mwatasaa muluti wayona, mi linyunywani neliezanga liyaleto fa mitai yayona. Cwale lingeloi lashetumuka kuzwa kwa lihalimu. Lahuwa kuli: “Muleme kota, mi mulemake mitai yayona. Kono musiye lisina ni mibisi yalona mwa mubu, mi mulitame ka liwenge la sipi ni la kopa. Pilu ya kota ikatuhela kuba ya mutu ni kuba ya folofolo ya mwa naheñi, mi kukafita linako ze 7 fahalimwaa lona. Batu kaufela bakaziba kuli Mulimu ki Mubusi ni kuli wakona kufa mubuso ku mutu ufi kamba ufi yalata.”’

Jehova ataluseza Daniele taluso ya tolo yeo. Daniele hanaazibile taluso ya tolo, asaba hahulu. Kihaa li: ‘Mawe mulena, kambe tolo ye neiama lila zahao, kono ibulela ka za hao. Kota yetuna yenelemilwe, ki wena. Ukaamuhiwa mubuso wahao, mi ukacanga bucwañi mwa naheñi sina folofolo ya mwa naheñi. Kono bakeñisa kuli lingeloi nelibulezi kuli kusiiwe lisina ni mibisi yalona, ukaba mulena hape.’

Hamulaho wa silimo, Nebukadenezare naazamaya fa situwa sa ndu yahae ya bulena, inze alakaza Babilona. Naabulela kuli: ‘Hamubone muleneñi omunde hahulu oniyahile. Hamubone maata amatuna eninani!’ Hanaanze abulela, kwautwahala linzwi lelizwa kwa lihalimu lelili: ‘Nebukadenezare! Mubuso uzwile ku wena.’

Ka yona nako yeo, Nebukadenezare atakana mi aba sina folofolo ya mwa naheñi. Alelekwa kuzwa mwa ndu yahae ya bulena mi ayo pila ni lifolofolo mwa naheñi. Milili ya Nebukadenezare yahula sina mafufa a mbande, mi manala ahae aba sina a linyunywani.

Lilimo ze 7 hase lifelile, Nebukadenezare aba hande hape mi Jehova amueza mulena wa Babilona. Cwale Nebukadenezare ali: ‘Nilumbeka Jehova, Mulena wa mahalimu. Cwale naziba kuli Jehova ki Mubusi. Ukokobeza mutu yaikuhumusa, mi ukona kufa mubuso ku mutu kaufela yalata.’