Bupilo Nebukalile Cwañi?

‘Mulimu ki simbule sa bupilo.’ (Samu 36:9) Kana mwalumela taba yeo? Batu babañata banahana kuli lika neliitahezi feela kusina yalibupile. Haiba taba yeo ki ya niti, uzibe ni luna lufumanehile feela fa lifasi ka sipundumukela. Kono haiba kuli Jehova Mulimu ki yena yabupile lika zepila, uzibe fo kuswanela kuba ni mulelo walibupezi, nji cwañi?a Munyakisise litaba za mwa Bibele zebulela ka za mone bukalezi bupilo ni kunyakisisa libaka halukona kulumela zeibulela Bibele.

1. Lifasi ni mahalimu nelizwa kai?

Bibele ibulela kuli: “Kwa simuluho, Mulimu naabupile mahalimu ni lifasi.” (Genese 1:1) Basayansi babañata balumela kuli ze mwa mahalimu ni lifasi linani makalelo. Mulimu naabupile cwañi mahalimu ni lifasi? Naaitusisize “maata” ahae, ili ona moya wahae okenile kueza lika kaufela ili zekopanyeleza milalambinda, linaleli, ni lipulaneti.—Genese 1:2.

2. Ki kabakalañi Mulimu hanaabupile lifasi?

Jehova ‘naasika bupa feela lifasi kusina mulelo, kono naaliezize kuli liyahiwe.’ (Isaya 45:18) Naabupile lifasi laluna kuli ibe sibaka sesinde selukona kupila ku sona kuya kuile. (Mubale Isaya 40:28; 42:5.) Litaba za sayansi libonisa kuli lifasi liipitezi mi lashutana ni lipulaneti zeñwi. Ki fa lifasi feela fobakona kuzwelapili kupila batu.

3. Ki lika mañi zetahisa kuli batu bashutane ni lifolofolo?

Hasaafelize kubupa lifasi, Jehova naabupile lika kaufela zepila kuli lipile mwateñi. Naakalile kutaza lifasi ka limela ni lifolofolo. Hamulaho, “Mulimu abupa mutu ka siswaniso sahae.” (Mubale Genese 1:27.) Ki kabakalañi batu habashutana ni lifolofolo? Bakeñisa kuli lubupilwe ka siswaniso sa Mulimu, lwakona kubonisa tulemeno twahae, totucwale ka lilato ni katulo yelukile. Mulimu hape ulubupile ni buikoneli bwa kuituta lipuo, kutabela lika zende, ni kuikola lipina. Mi ka kushutana ni lifolofolo, luna lwakona kulapela Mubupi waluna.

MUBATISISE

Munyakisise bupaki bobubonisa kuli lika nelibupilwe ni libaka halukona kukolwa taba yeo. Muitute zeluituta ka za Mulimu ka kunyakisisa tulemeno tobanani tona batu.

4. Lika zepila nelibupilwe

Batu balumbiwanga kabakala lika zebapangile ka kulikanyisa lika zebupilwe. Kono, ki mañi yaswanelwa kulumbiwa kabakala kueza lika zebalikanyisanga batu habapanga lika zeñwi? Mubuhe VIDIO, mi kihona mukanyakisisa puzo yelatelela.

VIDIO: Kulumela ku Mulimu (2:43)

• Ki lika mañi zebapangile batu ka kulikanyisa molibupezwi lika?

Ndu ni ndu iyahilwe ki mutu yomuñwi. Kono ki mañi yaezize lika ze fa lifasi ni mwa mahalimu? Mubale Maheberu 3:4, mi kihona mukanyakisisa lipuzo zelatelela:

• Ki lika mañi ku zebupilwe zemutabela hahulu?

• Kana lwaswanela kulumela kuli lika ze mwa pupo kaufela nelibupilwe? Ki kabakalañi hamubulela cwalo?

Kana mwaziba?

Mwakona kufumana litaba ni mavidio abulela ka za taba ye, fa jw.org mwatasaa taba yeli “Kana ki Nto Yenebupilwe” ni “Zebabulela Babañwi ka za Mone Bukalezi Bupilo.”

“Ki niti kuli ndu ni ndu inani yaiyahile, kono yayahile lika kamukana ki Mulimu”

5. Zeibulela Bibele ka za lika zebupilwe ki za niti

VIDIO: Kana ze Mwa Mahalimu ni Lifasi Nelibupilwe?—Kalulonyana ya vidio (3:51)

• Kana Bibele iluta kuli lifasi ni zepila mwateñi nelibupilwe mwa mazazi a 6 a lihora ze 24?

• Kana mwalumela kuli zeibulela Bibele ka za kuli lika zepila nelibupilwe ki za niti? Ki kabakalañi hamubulela cwalo?

Mubale Genese 1:1, mi kihona mukanyakisisa puzo yelatelela:

• Basayansi babulela kuli ze mwa mahalimu ni lifasi linani makalelo. Taba yeo ilumelelana cwañi ni zemusazo bala mwa Bibele?

Batu babañwi banahananga kuli mwendi Mulimu naabupile lika zepila ka kutahisa kuli liipilaule feela. Mubale Genese 1:21, 25, 27, mi kihona mukanyakisisa lipuzo zelatelela:

• Kana Bibele iluta kuli Mulimu naabupile nto yeñwi yepila ni kutahisa kuli iipilaule kuba tapi, batu, ni lifolofolo? Kamba kana Mulimu naabupile “mifuta” ya lika zeo kaufela?b

6. Batu babupilwe ki Mulimu ka nzila yeipitezi

Jehova ulubupile ka nzila yeshutana ni mwabupezi ni lifolofolo. Mubale Genese 1:26, mi kihona mukanyakisisa puzo yelatelela:

• Bakeñisa kuli lubupilwe ka siswaniso sa Mulimu, buikoneli bwaluna bwa kubonisa lilato ni makeke bubonisañi ka za mwainezi Mulimu?

LITABA KA BUKUSWANI

Jehova ki yena yabupile ze mwa mahalimu ni lifasi hamohocwalo ni zepila kaufela.

Mulundulule

• Bibele ilutañi ka za mone kutezi kuli kube ni mahalimu ni lifasi?

• Kana Mulimu naatahisize kuli nto iliñwi iipilaule ni kutahisa mifuta yemiñwi ya lika zepila, kamba kana naalibupile kaufelaa zona?

• Ki kabakalañi batu habashutana ni lika zeñwi zepila?

MUBONE LITABA ZEÑWI

Mubone lika zeñwi zebonisa kuli kunani yabupile lika kaufela.

“Luitutañi Kwa Lika Zebupilwe?” (Muzuhe!, September 2006)

Mubone mo ndate akona kutaluseza mwanaa hae litaba za mwa Bibele ka za lika zebupilwe.

‘Jehova Naabupile Lika Kaufela’ (2:37)

Munyakisise haiba tuto ya kuipilaula yaswalisana ni zeibulela Bibele.

“Kana Mulimu Naabupile Lika za Mifuta-futa ka Kutahisa Kuli Liipilaule?” (Taba ya fa webusaiti)

Mubone haiba litaba za kwaikale kamba lika zebaezize basayansi zabonisa kuli lika nelitile ka kuipilaula kamba nelibupilwe.

Lipuzo ze 5 ka za Mone Bukalezi Bupilo (broshuwa)