TUTO 52
Libaka Halutokwa Kuketanga Hande Liapalo Zelutina ni Kutatubanga Ponahalo Yaluna
Kaufelaa luna lutabelanga kuketa liapalo zelulata ni kubonahala hande. Haiba lulatelela likuka za mwa Bibele, lukaapala ka nzila yelutabela ni kutabisa Jehova. Halunyakisiseñi zeñwi za likuka zeo.
1. Ki likuka mañi zekona kulutusa kuketanga hande liapalo zelutina ni kutatubanga ponahalo yaluna?
Luswanela kuapalanga “liapalo zeswanela, ka kuapala hande ka likute ni ka kutwisiso,” ni kuba ni ponahalo yende ili yebonisa ‘kuli luineezi ku Mulimu.’ (1 Timotea 2:9, 10) Halunyakisiseñi likuka zeene zelatelela: (1) Luswanela kuapalanga “liapalo zeswanela.” Mwendi mulemuhile kuli kwa mikopano ya puteho, batu ba Jehova baapalanga ka nzila yeshutana-shutana ni kukamuna hande milili yabona, mi baezanga cwalo ka nzila yebonisa kuli bakuteka Mulimu yebalapela. (2) Luswanela kuapalanga “ka likute” ili kuapala ka nzila yesakoni kutahisa kuli babañwi babe ni mihupulo ya buhule ni kuisa hahulu mamelelo ku luna. (3) Lubonisa kuli lunani “kutwisiso” ka kuambuka mitinelo ni miikabisezo yeatile hahulu mwa lifasi. (4) Ponahalo yaluna kamita iswanela kubonisa ‘kuli luineezi ku Mulimu,’ ili nto yekatusa babañwi kulemuha kuli lulapela Mulimu wa niti.—1 Makorinte 10:31.
2. Ponahalo yaluna ikona kuama cwañi mizwale ni likaizeli baluna?
Nihaike kuli lunani tukuluho ya kuiketela za kutina, luswanela kuhupulanga mo mutinelo waluna ukona kuamela babañwi. Lulika ka molukonela kaufela kuli lusike lwasitatalisa babañwi, kono kuli ‘lutabise mwanahabo luna ka kumuezeza zende, kuli lumutiise.’—Mubale Maroma 15:1, 2.
3. Ponahalo yaluna ikona kutahisa cwañi kuli babañwi bakalise kuituta ka za Jehova?
Nihaike kuli lutokwa kuapalanga ka nzila yeswanela ka nako kaufela, luezanga cwalo sihulu haluya kwa mikopano ni haluya mwa bukombwa. Halubati kuli batu bapalelwe kuutwa taba yende kabakala ponahalo yaluna. Kono lubata kuli ponahalo yaluna ituse batu kutabela taba yende yelukutaza ni kuli bakone ‘kukutekehisa tuto ya Mupilisi waluna.’—Tite 2:10.
MUBATISISE
Halunyakisiseñi zekona kulutusa kuli mutinelo ni ponahalo yaluna libonise kuli lu Bakreste.
Ponahalo yaluna yakona kubonisa haiba lwakuteka batu babafilwe maata a kuzamaisa kamba kutokwa. Nihaike kuli Jehova waziba ze mwa lipilu zaluna, ponahalo yaluna iswanela kubonisa kuli lwamukuteka
4. Kubonahala hande kubonisa kuli lwakuteka Jehova
Ki kabakalañi haluswanela kuisa hahulu pilu kwa ponahalo yaluna? Mubale Samu 47: 2, mi kihona mukanyakisisa lipuzo zelatelela:
Kuziba kuli luyemela Jehova kuswanela kulususueza kuapalanga ka nzila yecwañi?
Kana mubona kuli kwaswanela kuapalanga hande haluli kwa mikopano ni mwa bukombwa? Ki kabakalañi hamualaba cwalo?
5. Zekona kulutusa kuketanga hande liapalo zelutina ni kutatubanga ponahalo yaluna
Kusina taba ni muinelo oluli ku ona, liapalo zaluna liswanela kubanga zekenile ni kubonahala hande ibe kuli ki zetula kamba ki zecipile. Mubale 1 Makorinte 10:24 ni 1 Timotea 2:9, 10. Mi hasamulaho, munyakisise libaka halutokwa kuambukanga kutina liapalo . . .
zetuna hahulu kamba zesaswaneli.
zeswala hahulu fa mubili, zebelela, kamba zetahiseza batu kuba ni mihupulo ya buhule.
Nihaike kuli Bakreste habatokwi kumamela Mulao wa Mushe, mulao wo ubonisa mwaangela lika Jehova. Mubale Deuteronoma 22:5, mi kihona mukanyakisisa puzo yelatelela:
Ki kabakalañi haluswanela kuambuka mitinelo yekona kubonisa baana inge kuli ki basali kamba yekona kubonisa basali inge kuli ki baana?
Mubale 1 Makorinte 10:32, 33 ni 1 Joani 2:15, 16, mi kihona mukanyakisisa lipuzo zelatelela:
Ki kabakalañi halutokwa kutokomela kuli ponahalo yaluna haisitatalisi batu bolupila ni bona mwa silalanda kamba mwa puteho?
Ki mitinelo yecwañi yeatile hahulu komupila?
Kana mubona kuli Mukreste waswanela kuapala ka nzila yecwalo? Ki kabakalañi hamualaba cwalo?
Lwakona kutina ka linzila zeshutana-shutana kono ili ka kutabisa Jehova
BABAÑWI BABULELANGA KULI: “Ninani tukelo ya kutina monilatela.”
Kana ni mina kona momuikutwela cwalo? Ki kabakalañi hamubulela cwalo?
LITABA KA BUKUSWANI
Haluketa hande liapalo zelutina ni kutatuba ponahalo yaluna, lukakuteka Jehova ni batu babañwi.
Mulundulule
Ki kabakalañi Jehova hatokwa kuli luketange hande liapalo zelutina ni kutatuba ponahalo yaluna?
Ki likuka mañi zeñwi zekona kulutusa kueza likatulo zende ka za ponahalo yaluna?
Ponahalo yaluna ikona kutahisa kuli batu babañwi baange cwañi bulapeli bwa niti?
MUBONE LITABA ZEÑWI
Munyakisise mobaangela batu liapalo zamina.
Musika basa kale maswaniso fa mubili wamina, munahanisise bumaswe bwa kueza cwalo.
“Bibele Ibulelañi ka za Kuibasa Maswaniso fa Mubili?” (Taba ya fa webusaiti)
Munyakisise likuka zeñwi hape zekona kulutusa kueza likatulo zende.
“Kana Litino Zemutina Zakanyisa Mulimu?” (Tawala ya Mulibeleli, September 2016)
Musali yomuñwi naabonisize cwañi kuli naanani mubonelo oswanela ka za ponahalo ya babañwi?
“Nenisazibi Kuketa Hande Liapalo za Kutina ni Kutatuba Ponahalo Yaka” (Muzuhe!, December 22, 2003)