Tabo ya Niti mwa ku Sebeleza Jehova

“U [tabile, “NW”] mutu ya na ni Mulimu wa Jakobo ku mu tusa, ya isepisa ka [ Jehova, “NW”], Mulimu wa hae.”​—⁠SAMU 146:⁠5.

 1, 2. Ki sifi se si bulezwi ka za taluso ya tabo, mi tabo i talusa nto mañi kwa batu ba bañata kacenu?

TABO ki nto mañi? Bañoli ba lidikishinari, baituti ba za mihupulo, ni baituti ba za bulapeli se ba likile ku fa taluso ya yona ka lilimo ze myanda-anda. Kono ha ba si ka fa taluso ye fumaneha ku ba ye amuheleha ka ku tala kwa batu kaufela. Buka ya Encyclopædia Britannica i lumela kuli: “‘Tabo’ ki le liñwi la manzwi a’ sa swalehi ka ku fitisisa.” Tabo ka mo ku bonahalela fela i talusa lika ze fapahana kwa batu ba ba fapahana, ka ku itinga fa mubonelo wa bona wa bupilo.

² Kwa batu ba bañata tabo i tomile fa buikangulo bo bunde, liluwo la kwa mubili, ni silikani se si nyakalalisa. Niteñi, ku na ni batu ba ba na ni zona lika zeo kaufela kono ba ba si ka taba. Kwa banna ni basali ba ba neezwi ku Jehova Mulimu, Bibele i fa muhupulo wa tabo i li o’ fapahana kwa mubonelo wa ka nañungelele.

Mubonelo o’ Fapahana wa Tabo

 3, 4. (a) Ki bomañi ba n’a bulezi Jesu kuli ba tabile? (b) Ki sikamañi se si kona ku lemuhiwa kwa neku la miinelo ye tisa tabo ya n’a bulezi Jesu?

³ Mwa Ngambolo ya hae ya fa Lilundu, Jesu Kreste n’a si ka bulela kuli tabo i itingile fa buikangulo bo bunde, liluwo la kwa mubili, ni lika ze ñwi ze swana. N’a bulezi kuli ba tabile luli bao “ba ba ikutwa bubotana mwa pilu” ni bao “ba ba utwa tala ya Ku Luka, ni linyolwa la kona.” Se si swalisani ni miinelo ye mibeli yeo ye tokwahala kwa ku ba ni tabo ya niti ki pulelo ya Jesu ye bonahala ku lwanisana ni buniti ya kuli: “[Tabo, NW] ki ya ba ba lila, kakuli ba ka takulwa miyoko.” (Mateu 5:3-6) Ki ko ku iponahaza fela kuli, Jesu n’a s’a buleli kuli batu ne ba ka taba ku si na buikatazo ha ba latehezwi ki mulatiwa. Ka ku fapahana, n’a bulela ka za bao ba ba itilelela kabakala muinelo wa bona wa sibi ni ze zwa mwateñi za ona.

⁴ Muapositola Paulusi n’a bulezi ka za pupo ya butu ku ba ye tonga mwatas’a sibi fa mutomo wa sepo ya kuli ne i “ka lukululwa kwa butanga bwa ku bola.” (Maroma 8:21, 22) Batu ba ba amuhela tukiso ya Jehova ya ku lifa milatu ya sibi ka sitabelo sa tiululo sa Kreste ni ba ba eza tato ya Mulimu ba omba-ombilwe ni ku tabisiwa luli. (Maroma 4:6-8) Fa Ngambolo ya fa Lilundu, Jesu hape n’a bulezi kuli ba tabile “ba ba ishuwa,” “ba ba na ni sishemo,” “ba ba na ni pilu ye kenile,” ni “ba ba batiseza batu kozo.” N’a file buikolwiso bwa kuli ni ha ba nyandiswa, ba ba ishuwa ba ba cwalo ha ba na ku latehelwa ki tabo ya bona. (Mateu 5:5-11) Kw’a tabisa ku bona kuli yona miinelo y’e tisa tabo y’e sipimo sa fahalimu yeo i beya bafumi ni babotana fa mayemo a’ likanelela.

Mutomo wa Tabo ya Luli

 5. Ki ufi o’ li mutomo wa tabo ya batanga ba ba ineezi ba Mulimu?

⁵ Simbule sa tabo ya niti hasi fumanehi mwa liluwo la kwa mubili. Mulena Salumoni y’a butali n’a bulezi kuli: “Ku fuyolwa ki [Jehova, NW] ku fumisa mutu; ku ipilaeza mwa pilu ha ku tusi se siñwi.” (Liproverbia 10:22) Kwa libupiwa z’e amuhela bubusi bwa pupo kaufela bwa Jehova, tabo i swalisani ni ku fuyolwa ki Jehova ka ku s’a kauhanyeha teñi. Mutu ya ineezi y’a na ni mi ya ikutwa ku ba ni mbuyoti ya Jehova ki y’a tabile luli. Ha i bonwa ka ku ya ka Bibele, tabo i ama maikuto a ku kolwiswa, ku kuliswa, ni ku talelezwa mwa sebelezo ya Jehova.

 6. Ki sifi se si tokwahala kwa batu ba Jehova kuli ba be ba ba tabile luli?

⁶ Tabo ya niti i itingile fa swalisano ye lukile ni Jehova. I tomile fa lilato la ku lata Mulimu ni busepahali ku yena. Batanga ba ba ineezi ba Jehova ba lumelelana ka pilu kaufela ni manzwi a Paulusi a’ li: “Ku luna ha ku na ya ipilela, . . . lu pilela [Jehova, NW]; . . . lu ba [Jehova, NW].” (Maroma 14:7, 8) Kacwalo, tabo ya niti ha i konwi ku fumanwa kwand’a ku ipeya ku utwa Jehova ni ku ipeya ka tabo kwatas’a tato ya hae. Jesu n’a bulezi kuli: “[Ba ba tabile, NW] ki ba ba utwa Linzwi la Mulimu, mi ba li mamela.”—Luka 11:28.

Miinelo ye Cinca-Cinca ye Tisa Tabo

 7, 8. (a) Miinelo ye tisa tabo neikana ya taluhanyiwa cwañi? (b) Ki sikamañi se si konwa ku bulelwa ka za linyalo ni ku pepa bana?

⁷ Miinelo ye bulezwi fahalimu ye tisa tabo neikana ya bizwa “ye mutomo,” kamba “ye sa cinci,” kakuli ki ye butokwa kwa batanga ba ba ineezi ba Jehova ka linako kaufela. Ka ku ekeza ku seo, ku na ni ye neikana ya bizwa ye cinca-cinca, miinelo ye neikana ya tisa tabo ka nako ye ñwi kono ye neikana ya tisa tabo ye nyinyani fela kamba mane ye neikana ya s’a tisa tabo ni ye kana ka nako ye ñwi i sili. Mwa linako za litoho za mabasi ni mwa linako za pili Bukreste bu si ka taha kale, linyalo ni ku pepa bana ne l’i ngiwa ku ba ze tokwahala kwa tabo. Seo si bonahala mwa kupo ye shwisa makeke ya Rahele ku Jakobo y’e li: “Ni fe bana, hakusicwalo na shwa.” (Genese 30:1) Ona mubonelo w’o kwa ku pepa bana ne u swanela mulelo wa Jehova ka za linako zeo.—Genese 13:14-16; 22:17.

⁸ Linyalo ni ku pepa bana ne l’i ngiwa ku ba limbuyoti ze filwe ki Mulimu mwahal’a batu ba Jehova ba mwa linako za kwa makalelo. Nihakulicwalo, manyando ne a ba teñi ka zeo ni miinelo ye miñwi mwahal’a linako za likozi mwa litaba za bona za kwaikale. (Mu bapanye Samu 127, 128 ni Jeremia 6:12; 11:22; Malilo 2:19; 4:4, 5.) Ki ko ku bonahala, kacwalo he, kuli linyalo ni ku pepa bana haki miinelo ye tisa tabo ye inelela.

Tabo Ku Si Na Linyalo mwa Linako za Kwamulaho

 9. Ki kabakalañi mwan’a Jefita wa musizana ha n’a fumana pabazo ya ka silimo ni silimo?

⁹ Ba bañata ba batanga ba Jehova ba fumani tabo ya niti ku si na linyalo. Kabakala likute kwa ku itama ka luci kwa bondat’ahe, mwan’a Jefita wa musizana n’a siyezi a li likwasha. Ka nakonyana yena ni litaka za hae ba basizana ne ba lilile bwalyanjo bwa hae. Kono ki tabo kwa butuna ya n’a bile ni yona ku sebeza nako ye tezi kwa ndu ya Jehova, mwendi mwahal’a “basali ba ba ne ba . . . sebeleza kwa munyako wa Tabernakele”! (Exoda 38:8) Ka seo, n’a fumana pabazo ya ka silimo ni silimo.—Baatuli 11:37-40.

10. Ki sifi sa n’a bata Jehova kwa neku la Jeremia, mi kana ku bonahala kuli n’a pilile bupilo bo bu si na tabo kabakala seo?

¹⁰ Bakeñisa linako za mihato ye mituna ili zeo mupolofita Jeremia n’a pila teñi, Mulimu n’a mu bata ku tokolomoha ku nyala ni ku pepa bana. (Jeremia 16:1-4) Kono Jeremia n’a iponezi buniti bwa manzwi a Mulimu a’ li: “U filwe mbuyoti mutu ya nz’a sepa [Jehova, NW], ya isepisa ka [Jehova, NW].” (Jeremia 17:7) Mwahal’a lilimo kaufela ze fitelela 40 za sebelezo ya bupolofita, Jeremia n’a sebelelize Mulimu ka ku sepahala sina munna wa likwasha. Ka mo lu zibela kaufela, ni kamuta n’a si ka nyala ni ku ba ni bana. Niteñi, ki mañi ya kona ku honona ka za kuli Jeremia n’a tabile, inge bomasiyaleti ba ba sepahala ba Majuda ba ne ‘ba tabile ka za bunde bwa Jehova’?—Jeremia 31:12, NW.

11. Ki mitala mañi ye miñwi ya mwa Mañolo ya batanga ba Mulimu ba ba sepahala ba ne ba tabile nihailikuli ne ba si na mulikani wa mwa linyalo?

¹¹ Batu ba bañwi ba bañata ba sebelelize Jehova ka tabo ba si na mulikani wa mwa linyalo. Ne ba li makwasha, limbelwa, kamba banna ba ba shwezwi ki basali ba bona. Mwahal’a bona ne ku na ni mupolofita wa musali Ana; mwendi ni Dokasi, kamba Tabita; muapositola Paulusi; mi ni mutala o mutuna ka ku fitisisa ku yeo kaufela—Jesu Kreste.

Makwasha Kono ba ba Tabile Kacenu

12. Ki sikamañi seo batanga ba Jehova ba bañwi ili ba ba tabile, ba ba ineezi, ba itatela ku si eza kacenu, mi ki kabakalañi?

¹² Kacenu, likiti-kiti za Lipaki za Jehova ba sebeleza Mulimu ka busepahali ba si na mulikani wa mwa linyalo. Ba bañwi ba konile ku amuhela memo ya Jesu y’e li: “Ya kona ku amuhela linzwi [ka za mpo ya bukwasha], a li amuhele.” Ba ezize seo “kabakala mubuso wa kwa lihalimu.” (Mateu 19:11, 12) F’o kikuli, ba itusisize hande tukuluho ya bona ye filwe ki Mulimu ka ku neela nako ni m’ata ze ñata ni ku fita mwa ku zwisezapili licisehelo za Mubuso. Buñata bwa bona ba sebeza sina mapaina, balumiwa, kamba lilama za lubasi lwa Betele kwa sibaka se situna sa tamaiso fa lifasi sa Watch Tower Society kamba ku ye miñwi ya mitai ya yona.

13. Ki mitala ifi ye bonisa kuli Mukreste wa kona ku ba likwasha mi a li y’a tabile?

¹³ Kaizeli yo muñwi y’a supezi n’a file likande la bupilo bwa hae toho ya taba ye fa litaba tota ye li, “Y’a mwa Bukwasha ni ya Tabile Sina Paina.” (The Watchtower, May 1, 1985, makepe 23-6) Kaizeli yo muñwi wa likwasha ya n’a felize lilimo ze fitelela 50 a sebeza fa Betele n’a bulezi kuli: “Ni y’a kozwi ka ku tala ka za bupilo bwa ka ni musebezi wa ka. Ni y’a patehile cwale ku fita nako ifi kamba ifi ya kwamulaho mwa musebezi o ni lata hahulu. Ha ni na buinyazo. Ne ni ka eza katulo ya keto ye swana hape.”—The Watchtower, June 15, 1982, likepe 15.

14, 15. (a) Ka ku ya ka muapositola Paulusi, ki sikamañi se si tokwahala mwa ku siyala mwa bukwasha? (b) Ki kabakalañi Paulusi h’a bulela kuli mutu wa likwasha u eza “hande mane ku fita” mi ni kuli ki ya ‘tabile ni ku fita’?

¹⁴ Mu lemuhe manzwi a’ li “katulo ya keto.” Paulusi n’a ñozi kuli: “Ya tiile mwa pilu ya hae, a si na se si mu tamile, mi a na ni sibaka sa ku eza mw’a latela, ya cwalo h’a lelile mwa pilu ya hae kuli a buluke [bwalyanjo bwa hae, NW], u eza hande. Cwale, y’a nyalisa [bwalyanjo bwa hae, NW], u eza hande; mi ya sa [bu, NW] nyalisi, u eza hande mane ku fita.” (1 Makorinte 7:37, 38) Ki kabakalañi ha ku li “hande mane ku fita”? Paulusi n’a talusize kuli: “Se ni lata kikuli mu tokwe pilaelo. Ya si ka nyala u tokomela za Mulena, mw’a ka tabiseza Mulena. . . . Hape, . . . Ya si ka nyalwa, u tokomela za Mulena, . . . Ha ni bulela seo, ki ku mi tusa, . . . ku mi isa ku ze swaneleha, kuli mu sebeleze Mulena, ku si na se si mi zwisa.”—1 Makorinte 7:32-35.

¹⁵ Kana ‘ku sebeleza Mulena, ku si na se si zwisa’ ka ku beya mwa munahano ‘ku tabisa Mulena’ ki ko ku swalisani ni tabo? Ka mo ku bonahalela fela Paulusi n’a nahana cwalo. Ha n’a bulela ka za mbelwa wa Sikreste, n’a bulezi kuli: “U lukuluzwi, u ka nyalwa ki ye a lata; fela ibe ku Mulena. Kono mulomo wa ka ki wo: H’a ka itulela fela, u ka ba ya [tabile, “NW”] ni ku fita. Mi ni hupula kuli, ni na, ni na ni Moya wa Mulimu.”—1 Makorinte 7:39, 40.

Lituso za Muinelo wa Ku S’a Ba Mwa Linyalo

16. Ki lituso mañi ze ñwi ze ikoliwa ki Lipaki za Jehova ba ba si yo mwa linyalo?

¹⁶ Haiba Mukreste ki likwasha bakeñisa katulo ya ka butu kamba ka ku hapelezwa ki miinelo, muinelo wa ku s’a ba mwa linyalo u zamaelela ni lituso za ka butu z’e ñata. Batu ba makwasha ka nañungelele ba na ni nako ye ñata ni ku fita ya ku ituta Linzwi la Mulimu ni ku eza nahanisiso ye tungile ku lona. Haiba ba itusisa hande muinelo wa bukwasha, muinelo wa bona wa kwa moya u k’a tunga. Ka ku s’a ba ni mulikani wa mwa linyalo wa ku abana ni yena but’ata bwa bona, ba bañata ba ituta ku tiyela ka butuna ku Jehova ni ku bata ketelelo ya hae mwa lika kaufela. (Samu 37:5) Seo si tusa ku tahisa swalisano ye li bukaufi hahulu ni Jehova.

17, 18. (a) Ki sibaka sifi sa sebelezo ya mwa simu ye ekezehile se si li teñi kwa batanga ba Jehova ba ba si mwa linyalo? (b) Batanga ba Jehova ba bañwi ba ba si mwa linyalo ba talusize cwañi tabo ya bona?

¹⁷ Bakreste ba ba si yo mwa linyalo ba na ni sibaka sa sebelezo ya mwa simu ye ekezehile kwa tumbo ya Jehova. Tuto ye ipitezi ye sweli ku fiwa cwale kwa Sikolo sa Tuto sa Bukombwa i fiwa fela kwa mizwale ba makwasha ni ba ba shwezwi ki basali ba bona. Likaizeli ba ba si ka nyalwa ni bona ki ba ba lukuluhile ku bata matohonolo mwa sebelezo ya Mulimu. Kaizeli ya supezi ya s’a bulezwi kale mwa taba ye n’a itatezi ku sebeza mwa naha ye ñwi ya mwa Africa ili f’o, ka ku ama manzwi a hae tota n’a li, “musali y’a si ka tiya hande wa lilimo za buhulu ze fitelela 50.” Mi n’a zwezipili ku ba k’o, mane ni mwahal’a nako ya ku kwalelwa, muta balumiwa kaufela ne ba lunduzwi. U sa sebeza kona k’o sina paina, nihailikuli cwale se a na ni lilimo za buhulu ze fitelela 80. Kana u tabile? Mwa likande la bupilo bwa hae n’a ñozi kuli: “Ne ni konile ku itusisa tukuluho ni mwendela ze ekezehile zeo bukwasha bu lumeleza ku ba y’a patehile mwa bukombwa, mi seo si ni tiselize tabo ye tuna. . . . Ka lilimo zeo swalisano ya ka ni Jehova i bile ye tungile. Sina musali wa likwasha mwa naha ya mwa Africa, ni mu boni sina Musilelezi.”

¹⁸ Se si swanelwa ku lemuhiwa, hape, ki manzwi a muzwale ya n’a sebelize ka mashumu-shumi a lilimo kwa sibaka se situna sa tamaiso sa Watch Tower Society. N’a tabile, nihailikuli n’a si ka nyala ni kamuta mi nihailikuli n’a na ni sepo ya kwa lihalimu y’e si na tibelelo ya linyalo. Ha n’a na ni lilimo za buhulu ze 79, n’a ñozi kuli: “Ka zazi ni zazi ni kupa Ndat’a luna wa kwa lihalimu y’a lateha ka tapelo kwa neku la tuso ni butali bwa kuli ni ipuluke ka buikangulo ni ku tiya kwa moya hamohocwalo ni kwa mubili ilikuli ni kone ku zwelapili ku eza tato ya hae ye kenile. Mwahal’a lilimo ze ze mashumi a mane ka ze ketalizoho ka z’ene mwa sebelezo ya Jehova ka mo ku inezi fela ni ikozi nzila ya bupilo y’e tabile, ye na ni mbuyoti ni ye fuy’ozwi. Mi ka sishemo sa Jehova se si si ka libelelwa ni talima kwapili kwa sebelezo ye zwelapili kwa tumbo ni kanya ya hae ni kwa limbuyoti za batu ba hae. . . . Tabo ya Jehova i ni tusa ku itiisa mwa ndwa ye nde ya tumelo, ku talima kwapili kwa nako yeo lila za Jehova li ka ba siyo mi lifasi-mubu kaufela li ka tala kanya.”—Numere 14:21; Nehemia 8:10; The Watchtower, November 15, 1968, makepe 699-702.

Tabo ya Niti i Itingile fa Nto Mañi?

19. Tabo ya luna i k’a itinga fa nto mañi nako kaufela?

¹⁹ Swalisano ya luna ye nde hahulu ni Jehova, tumelezo ya hae, ni mbuyoti ya hae—yeo ki yona miinelo ye ka lu tiseza tabo ya niti mwahal’a nako kaufela ya kamita. Ka ku ba ni mubonelo o’ swanela wo ka se si tahisa tabo ye buniti, mane ni batanga ba Jehova ba ba mwa linyalo b’a lemuha kuli linyalo la bona haki yona nto ya butokwa ka ku fitisisa mwa bupilo bwa bona. Ba utwa taelo ya muapositola Paulusi y’e li: “Banabahesu, se ni bulela ki se, nako ki ye kuswani; ku zwa cwale ba ba na ni basali, ba be inge ha ba na bona.” (1 Makorinte 7:29) Seo ha si talusi ku keshebisa basali ba bona. Banna ba ba nyezi ba Sikreste ba ba hulile ba beya sebelezo ya Jehova mwa sibaka sa pili, mi ni basali ba bona ba ba eza bumulimu, ba ba lilato, ili ba ba fa kemelo ba eza cwalo, ba bañwi mane ba sebeza nako ye tezi hamoho ni banna ba bona.—Liproverbia 31:10-12, 28; Mateu 6:33.

20. Ki mubonelo mañi o’ swanela o’ Bakreste ba bañata ba na ni ona kwa matohonolo a bona a linyalo?

²⁰ Mizwale ba ba nyezi bao ili baokameli ba maeto, baitateli ba fa Betele, maeluda ba mwa puteho—ka mo ku inezi fela, Bakreste kaufela ba ba mwa linyalo ba ba beya licisehelo za Mubuso mwa sibaka sa pili—ha ba ‘itusisi lifasi ka ku tala’; ba sebeza ku beya matohonolo a bona a linyalo mwa bupilo bwa bona bo bu neezwi bwa sebelezo ku Jehova. (1 Makorinte 7:31, NW) Niteñi, ba tabile. Ki kabakalañi? Kakuli libaka le lituna la tabo ya bona haki linyalo la bona kono sebelezo ya bona ku Jehova. Mi banna ni basali ba ba sepahala ba bañata—ee, mane hape ni bana ba bona—ba tabile lika ha li li cwalo.

21, 22. (a) Ka mutomo wa Jeremia 9:23, 24, ki sikamañi se si swanela ku lu taza ka tabo? (b) Ki miinelo mañi ye tisa tabo ye bulezwi kwa Liproverbia 3:13-18?

²¹ Mupolofita Jeremia n’a ñozi kuli: “[Jehova, NW] s’a bulela ki se, u li: Ya butali a si ke a ikuhumusa ka butali bwa hae; ya ikutwa mata a si ke a ikolwa ka mata a hae; ya fumile a si ke a itumba ka bufumu bwa hae. Kono ya itumba, a itumbe ka s’a utwisisa, h’a ziba kuli ki Na [Jehova, NW] ya sweli ku busa lifasi ka sishemo, ni ka likatulo ni ka ku luka, ku bulela [Jehova, NW].”—Jeremia 9:23, 24.

²² Ku si na taba ni kuli lu makwasha kamba ba ba mwa linyalo, simbule se situna ka ku fitisisa sa tabo ya luna si swanela ku ba zibo ya luna ya ku ziba Jehova ni kutwisiso ya kuli lu na ni mbuyoti ya hae bakeñisa kuli lu eza tato ya hae. Hape lu ba ba tabile ku ba ni kutwisiso ye tezi ku seo ili sipimo sa lika ze butokwa luli, lika zeo Jehova a li tabela. Mulena Salumoni ya n’a nyezi hañata-ñata n’a s’a ngi linyalo ku ba sona sinotolo kwa tabo. N’a bulezi kuli: “Mutu ya ipatela butali u na ni [tabo, NW], hamoho ni ya ikataleza zibo. Kakuli butali bu fita silivera kwa ku fumisa, bu fita ni gauda ye kenile kwa ku luwisa. Ki bwa butokwa ku fita macwe a rubi; ku ze lakazeha kamukana ha ku na ye likana ni bona butali. Ku la bulyo bu sweli mazazi a matelele, mi ku la nzohoto bu sweli bufumu ni ku kutekiwa. Linzila za bona ki linzila fo ku iketilwe, mi mikwakwa ya bona kaufela ki ya kozo. Ki kota ya bupilo ku ba ba bu sweli, mi ya bu inisa ku yena, u na ni [tabo, NW].”—Liproverbia 3:13-18.

23, 24. Ki kabakalañi ha lu kona ku ikolwisa kuli kaufel’a bona batanga ba Jehova ba ba sepahala ba k’a ba ni tabo mwa muinelo wa linto o munca?

²³ Haike bao ku luna ba ba mwa linyalo ba fumane tabo ya kamita mwa ku eza tato ya bumulimu. Mi haike mizwale ni likaizeli ba luna ba ba lateha ba ba li makwasha ka ku iketela ku ba cwalo kamba ka ku hapelezwa ki miinelo ba tiyele litiko za bona kaufela mi ba fumane tabo ni ku ikolwisa mwa ku sebeleza Jehova cwale ni ku ya ku ile. (Luka 18:29, 30; 2 Pitrosi 3:11-13) Mwa muinelo wa linto o’ taha wa Mulimu, “libuka” li ka apulwa. (Sinulo 20:12) Zeo li ka ba ni milao ni litaelo ze nca ze tabisa ze ekeza kwa tabo ya mufuta wa mutu o ipeya ku utwa.

²⁴ Ka buniti fela, lwa kona ku ba ni buikolwiso luli kuli ‘Mulimu ya tabile’ wa luna u lu bulukezi lika ze nde hahulu ze ka lu tahiseza tabo ye tezi. (1 Timotea 1:11) Mulimu u ka zwelapili ku ‘fumbutulula sata sa hae, ni ku kulisa ze pila kaufela.’ (Samu 145:16) Ha ku komokisi kuli ku na ni tabo ya niti mi kamita ku ka ba ni tabo ya niti mwa ku sebeleza Jehova.

Ne Mu Ka Alaba Cwañi?

◻ Ki ufi o’ li mutomo wa tabo ya batanga ba Jehova ba ba ineezi?

◻ Mwa linako za ku ñolwa kwa Bibele, ne li bomañi ba bañwi ba batanga ba Jehova ba ne ba si yo mwa linyalo ba ne ba tabile?

◻ Ki kabalalañi Paulusi ha n’a babalize bukwasha, mi Bakreste ba bañwi ba fumani cwañi seo ku ba bupilo bo bu tabisa?

◻ Tabo ya luna i k’a itinga fa nto mañi kamita?

◻ Ki kabakalañi ha lu swanela ku ikolwisa kuli batu kaufela ba ba sepahala ba k’a ba ni tabo mwa muinelo wa linto o munca?