Mubonelo wa Mukreste wa M’ata a Tamaiso

“Ha ku na bulena bo bu sa zwi ku Mulimu.”—MAROMA 13:1.

 1. Pulelo ya “m’ata a tamaiso” i zamaelela ni nto mañi, kacwalo ki kabakalañi ha ku konwa ku bulelwa kuli Jehova ki yena Y’a na ni M’ata a Tamaiso a Matuna ka ku Fitisisa?

M’ATA a tamaiso a swalisani ni bubupi. Pulelo ya “m’ata a tamaiso” (authority) ki ye zamaelela ni linzwi la “musimululi” (author), ili le li talusa “ya simulula, ya tahisa, kamba ya fa ku ba teñi.” Y’a M’ata ka ku Fitisisa ya n’a tahisize kuli pupo kamukana i be teñi, ye pila ni ye s’a pili, ki Jehova Mulimu. Ku si na kakanyo ki yena Y’a na ni M’ata a Tamaiso a Matuna ka ku Fitisisa. Bakreste ba niti ba na ni maikuto a’ swana ni a libupiwa za kwa lihalimu ze zibahaza kuli: “Mulena ni Mulimu wa luna, ki Wena ya lukela ku fiwa kanya, ni likute, ni mata; kakuli ki wena ya ezize linto kamukana, mi ha li li teñi, niha ne li bupilwe, ki ka ku lata kwa hao.”—Sinulo 4:11.

 2. Ka kutwisiso ye ñwi babusi ba batu ba kwa makalelo ne ba lumezi cwañi kuli ne ba si na tukelo ya ka taho ya ku busa batu sina bona, mi ki sifi seo Jesu n’a bulelezi Ponse Pilato?

² Taba fela ya kuli buñata bwa babusi ba batu ba kwa makalelo luli ne ba likile ku tahisa kuli m’ata a bona a tamaiso a be a ka mulao ka ku ipapata ku ba mulimu kamba ku ba muyemeli wa mulimu ne i bonisa temuho ya mwa pilu ya kuli ha ku na mutu ya na ni tukelo ya ka taho ya ku busa fahalimu a batu ba bañwi. (Jeremia 10:23) Simbule fela sa ka mulao sa m’ata a tamaiso ki Jehova Mulimu. Kreste n’a bulelezi Ponse Pilato, mubusisi wa Muroma wa Judea, kuli: “Kabesi kuli u a filwe ki lihalimu, kaba u si na mata ku na.”—Joani 19:11.

“Ha Ku Na Bulena Bo bu S’a Zwi ku Mulimu”

 3. Ki sifi seo muapositola Paulusi n’a bulezi ka ku ama ku “ba ba beilwe fa bulena,” mi ki lipuzo mañi zeo lipulelo za Jesu ni Paulusi li zusa?

³ Muapositola Paulusi n’a ñolezi Bakreste ba ne ba pila mwatas’a puso ya mubuso wa Roma, kuli: “Mutu kaufela a ipeye mwatas’a ba ba beilwe fa bulena. Kakuli ha ku na bulena bo bu sa zwi ku Mulimu; kono bo bu li teñi bu tomilwe ki Mulimu.” (Maroma 13:1) Ki sifi sa n’a talusa Jesu ha n’a bulezi kuli m’ata a Pilato n’a “a filwe ki lihalimu”? Mi ki ka nzila ifi Paulusi n’a nga kuli m’ata a bupolitiki a mwa lizazi la hae ne a tomilwe ki Mulimu? Kana ne ba talusa kuli Jehova yena ka butu u na ni buikalabelo fa ku ketwa kwa mubusi yo muñwi ni yo muñwi wa bupolitiki wa lifasi le?

 4. Jesu ni Paulusi ne ba bizize cwañi Satani, mi ki buipapato mañi bwa Satani bwa n’a si k’a hana Jesu?

⁴ Seo ne si kona ku ba cwañi cwalo, hailif’o Jesu n’a bizize Satani “mulena wa lifasi le,” mi muapositola Paulusi n’a mu bizize “mulimu wa lifasi le”? (Joani 12:31; 16:11; 2 Makorinte 4:4) Fahalimu a zeo, ha n’a likile Jesu, Satani n’a mu sepisize “bulena” fa “mibuso kaufela ya lifasi,” a ipapata kuli m’ata ao n’a a filwe. Jesu n’a hanile mpo ya hae, kono n’a si k’a hana kuli Satani n’a na ni m’ata a’ cwalo a n’a kona ku fa.—Luka 4:5-8.

 5. (a) Lu na ni ku utwisisa cwañi manzwi a Jesu ni a Paulusi ka za m’ata a tamaiso a butu? (b) Ki ka kutwisiso mañi bulena ha “bu tomilwe ki Mulimu”?

⁵ Jehova n’a file bubusi bwa lifasi le ku Satani ka ku mu lumeleza ku pila hamulaho wa ku kwenuha kwa hae ni hamulaho wa ku lika Adama ni Eva mi ni ha s’a ba tahiselize ku kwenuhela bubusi bwa Hae. (Genese 3:1-6; mu bapanye Exoda 9:15, 16.) Kacwalo, manzwi a Jesu ni a Paulusi a lukela ku talusa kuli batu ba pili ba babeli mwa Eden ha se ba hanile teokratiki, kamba puso ya Mulimu, Jehova n’a tuhelezi batu ba ba siyo mwa silikani ni yena kuli ba tahise litukiso za m’ata a tamaiso ze ne li ka ba lumeleza ku pila mwa nyangela ye zamaiswa ka mulao. Ka linako ze ñwi, kwa neku la kuli a pete mulelo wa hae, Jehova s’a tisize ku wa kwa babusi kamba milonga ye miñwi. (Daniele 2:19-21) Ba bañwi u ba tuhelezi ku siyala ba li babusi. Ka za babusi bao Jehova a tuhelezi ku ba teñi kwa bona, ku konwa ku bulelwa kuli bulena bwa bona “bu tomilwe ki Mulimu.”

Bakreste ba kwa Makalelo ni Ba M’ata a Tamaiso ba Siroma

 6. Bakreste ba kwa makalelo ne b’a nga cwañi ba m’ata a tamaiso ba Siroma, mi ki kabakalañi?

⁶ Bakreste ba kwa makalelo ne ba si k’a swalisana ni likwata za bulapeli za Sijuda ze ne li lelisana ni ku lwanisa ku busiwa kwa Isilaele ki Maroma. Ka sipimo sa kuli ba m’ata a tamaiso ba Siroma, ka miinelo ya za milao ya bona ye ne i ñozwi, ne ba buluka tukiso ye nde mwa naha ni mwa liwate; ne ba yahile maabwa, mikwakwa, ni masilelo a’ tusa; mi ka nañungelele ne ba sebeleza ku tuseha kwa b’ote, Bakreste ne ba b’a nga ku ba ‘mutanga wa Mulimu kwa neku la ku ba isa ku ze nde.’ (Maroma 13:3, 4) Mulao ni tukiso ye nde ne li tahisa muinelo o ne u konisa Bakreste ku kutaza taba ye nde mo ku ñata, sina ka mwa n’a laelezi Jesu. (Mateu 28:19, 20) Ka ku ba ni lizwalo le linde, ne ba kona ku lifa mitelo ye ne i tokwiwa ki Maroma, mane nihaiba kuli mali a mañwi ne a itusisizwe kwa milelo ye s’a lumelezwi ki Mulimu.—Maroma 13:5-7.

 7, 8. (a) Ku bala Maroma 13:1-7 kwa ka tokomelo ku patulula nto mañi, mi mutomo wa litaba u bonisa nto mañi? (b) Ki mwatas’a miinelo mañi m’o ba m’ata a tamaiso ba Siroma ne ba si k’a sebeza sina “mutanga wa Mulimu,” mi ha ku ba cwalo Bakreste ba kwa makalelo ne ba bile ni mubonelo mañi?

⁷ Ku bala ka tokomelo litimana ze supile za pili za Maroma kauhanyo 13 ku patulula kuli “ba ba beilwe fa bulena” mwa bupolitiki ne ba li “mutanga wa Mulimu” wa ku lumba ba ba eza se sinde ni ku fa koto ku ba ba eza se si maswe. Mutomo wa litaba u bonisa kuli Mulimu, isiñi ba ba beilwe fa bulena, ki yena ya atula ka za se sinde ni se si maswe. Kacwalo, haiba mubusi wa Siroma kamba wa m’ata a tamaiso a bupolitiki ufi kamba ufi n’a ka bata lika zeo Mulimu n’a hanisize kamba, kwa lineku le liñwi, n’a ka hanisa lika zeo Mulimu n’a bata, n’a fita fa ku s’a sebeza sina mutanga wa Mulimu. Jesu n’a bulezi kuli: “Mu kutiseze Sesare ze li za Sesare; mi mu kutiseze Mulimu ze li za Mulimu.” (Mateu 22:21) Haiba puso ya Roma ne i ka bata lika ze li za Mulimu, ze cwale ka ku lapelwa kamba bupilo bwa mutu, Bakreste ba niti ne ba latelela kelezo ya baapositola ye li: “Ki swanelo kuli lu utwe Mulimu ku fita batu.”—Likezo 5:29.

⁸ Ku hana kwa Bakreste ba kwa makalelo ku lapela mubusi ni milimu ya maswaniso, ku tuhela mikopano ya bona ya Sikreste, ni ku tuhela ku kutaza taba ye nde ne ku tisize nyandiso. Ka nañungelele ku lumelwa kuli muapositola Paulusi n’a bulailwe ka taelo ya Mubusi Nero. Babusi ba bañwi, sihulu bo Domitian, Marcus Aurelius, Septimius Severus, Decius, ni Diocletian, ni bona ne ba nyandisize Bakreste ba kwa makalelo. Bona babusi bao ni ba m’ata a tamaiso ba ne ba li mwatas’a bona ha ne ba nyandisa Bakreste, ka buniti fela ne ba s’a sebezi sina “mutanga wa Mulimu.”

 9. (a) Ki sifi se si sa li sa niti ka za ba ba beilwe fa bulena bwa bupolitiki, mi sibatana sa bupolitiki si fumana m’ata ni tamaiso ku zwelela ku mañi? (b) Ka ku utwahala ki sifi se si konwa ku bulelwa ka za ku ipeya kwatas’a ba ba beilwe fa bulena kwa Bakreste?

⁹ Zeo kaufela li fa mutala wa kuli hailif’o ba ba beilwe fa bulena ba bupolitiki mwa miinelo ye miñwi ba sebeza sina “se si tomilwe ki Mulimu” kuli ba buluke nyangela ya butu ye zamaiswa hande ka mulao, ba sa li kalulo ya muinelo wa linto wa silifasi ili w’o Satani a li mulimu wa ona. (1 Joani 5:19) Bona ki kalulo ya kopano ya bupolitiki ya mwa lifasi kamukana ye swanisezwa ki “sibatana” sa kwa Sinulo 13:1, 2. Sibatana seo si fumana m’ata ni tamaiso ku zwelela ku “drakoni ye tuna,” yena Satani Diabulosi. (Sinulo 12:9) Kacwalo, ka ku utwahala, ku ipeya kwa Bakreste kwatas’a ba m’ata a tamaiso ba ba cwalo ki ko ku na ni maciñekelo, haki kwa ka ku tala.—Mu bapanye Daniele 3:16-18.

Likute Le Li Swanela kwa M’ata a Tamaiso

10, 11. (a) Paulusi n’a bonisize cwañi kuli lu swanela ku kuteka batu ba m’ata a tamaiso? (b) Ki kamukwaufi mi ki kabakalañi litapelo ha li konwa ku ezezwa “malena, ni ba ba inzi fa bunduna kaufela”?

¹⁰ Nihakulicwalo, seo hasi talusi kuli Bakreste ba swanela ku ba ni mubonelo wa ku tokwa buishuwo, wa mañaña a’ kashwau ku ba ba beilwe fa bulena bwa bupolitiki. Ki niti, buñata bwa bona banna bao ha ba swanelwi ki likute le li ipitezi mwa bupilo bwa bona bwa kwa mukunda, kamba mane ni bwa fa nyangela. Niteñi, baapositola, ka mutala wa bona ni ka kelezo ya bona, ne ba bonisize kuli batu ba ba na ni m’ata a tamaiso ba swanelwa k’u ngiwa ka likute. Paulusi ha n’a tile fapil’a Mulena Heroda Agrippa II ya n’a pila mwa sindoe, n’a bulezi ku yena ka likute le li swanela.—Likezo 26:2, 3, 25.

¹¹ Paulusi mane n’a bulezi kuli ki ko ku swanela ku bulela ba m’ata a tamaiso ba silifasi mwa litapelo za luna, sihulu ha ba kupiwa ku eza likatulo ze ama bupilo ni misebezi ya luna ya Sikreste. N’a ñozi kuli: “Cwale, kutazo ya ka ya pili ki ye: Milapelo, ni litapelo za buikokobezo, ni za likupo, ni za buitumelo, li ezezwe batu kamukana, Ni malena, ni ba ba inzi fa bunduna kaufela; kuli lu pile mwa kozo ni buiketo, ka bulapeli kaufela ni ka ku ikuteka. Kakuli se ki se sinde, ki s’a katelwa Mulimu Mupilisi wa luna, Yena ya lata kuli batu kamukana ba piliswe, mi ba fite fa zibo ya ku ziba niti.” (1 Timotea 2:1-4) Mubonelo wa luna o likute ku ba m’ata a tamaiso ba ba cwalo ne u kana wa ba isa kwa ku lu tuhelela ku eza musebezi wa luna wa ku lika ku pilisa “batu kamukana” ka tukuluho ye tuna ni ku fita.

12, 13. (a) Ki kelezo mañi ye itikanelezi ye ama kwa m’ata a tamaiso yeo Pitrosi n’a file? (b) Lu kona ku fokolisa cwañi “milomo ya batu ba likuba” ba ba tahisa k’u ngiwa ka s’aluluti kwa Lipaki za Jehova?

¹² Muapositola Pitrosi n’a ñozi kuli: “Kabakala Mulena, mu ipeye kwatasi a ba ba inzi fa bulena kaufela bo bu tomilwe ki batu; nihaiba ku mulena, kakuli ki yena yo mutuna; Nihaiba kwa babusisi, kakuli ba lumilwe ki yena ku fa ba ba eza maswe mulatu, ni ku kuteka ba ba eza hande. Ki sona s’a lata Mulimu, kuli ka ku eza hande, mu tibe milomo ya batu ba likuba, ba ba sa zibi se siñwi; Mu ba ba lukuluhile, kono mu si ke mwa eza bulukuluhi bwa mina kubo ya ku apesa bumaswe; kono mu izamaise sina batanga ba Mulimu. Mu fanane likute ni batu kamukana; mu late banabahabo mina; mu sabe Mulimu; mu kuteke Mulena.” (1 Pitrosi 2:13-17) Ki kelezo ye itikanelezi hakalo! Lu na ni ku ipeya kwatas’a Mulimu ka ku tala sina batanga ba hae, mi lu fa ku ipeya kwa ka maciñekelo ni kwa ka likute kwatas’a ba m’ata a tamaiso ba bupolitiki ba ba lumilwe ku fa koto ku ba ba eza ze maswe.

¹³ Se ku fumanwi kuli ba m’ata a tamaiso ba silifasi ba bañata ba na ni mibonelo ye fosahezi ni ye si k’a libelelwa ka ku fitisisa ka za Lipaki za Jehova. Seo hañata ki ka libaka la kuli ha ba si k’a bulelelwa niti ki lila ze situhu za batu ba Mulimu. Kamba ne ku kana kwa ba ka libaka la kuli ze ba ziba kaufela ka za luna ba li zibile ku zwelela mwa likalulo ze hasanya litaba, ili zeo hañata li na ni s’aluluti mwa ku talusa litaba kwa zona. Ka linako ze ñwi lu kona ku felisa s’aluluti seo ka mubonelo wa luna o’ likute ni, ha ku konahala, ka ku fa ba m’ata a tamaiso tolongosho ye nepahezi ya musebezi ni litumelo za Lipaki za Jehova. Kwa makwambuyu ba ba patehile, broshuwa ya Lipaki za Jehova mwa Lilimo za Mwanda wa Mashumi a Mabeli i fa litaluso ze kuswani ze utwahala. Kwa neku la litaba ze tezi ni ku fita, ba kona ku fiwa buka ya Jehovah’s Witnesses—Proclaimers of God’s Kingdom, ili sisebeliso se sinde hahulu se si swanelwa ki ndao fa mashelufu a libuka a mwa mandu a nyangela mo ku kalimiwa libuka za ku bala a fa sibaka kamba a naha.

M’ata a Tamaiso Mwahal’a Malapa a Sikreste

14, 15. (a) Ki ufi mutomo wa m’ata a tamaiso mwahal’a lubasi lwa Sikreste? (b) Ki ufi o swanela ku ba mubonelo wa basali ba Sikreste kwa banna ba bona, mi ki kabakalañi?

¹⁴ Ki nto ye iponahaza hande-nde kuli haiba Bakreste ba tokwiwa ki Mulimu ku bonisa likute le li swanela ku ba m’ata a tamaiso ba silifasi, ka ku swana ba swanela ku kuteka muinelo wa za m’ata a tamaiso o’ tomilwe ki Mulimu mwahal’a mandu a Sikreste. Muapositola Paulusi n’a talusize ka ku puma litaba sikuka sa butoho se si fumaneha mwahal’a batu ba Jehova. N’a ñozi kuli: “Ni lata kuli mu zibe se: Toho ya munna kaufela ki Kreste; mi munna ki toho ya musali; mi Mulimu ki toho ya Kreste.” (1 Makorinte 11:3) Seo ki sona sikuka sa teokratiki, kamba puso ya Mulimu. Kana si ama nto mañi?

¹⁵ Ku kuteka teokratiki ku kalela mwa lapa. Musali wa Sikreste ya s’a bonisi likute le li swanela kwa m’ata a tamaiso a munn’a hae—a be mulumeli sina yena kamba ku tokwa—h’a ezi ka teokratiki. Paulusi n’a elelize Bakreste kuli: “Mu ipeye yo muñwi kwatas’a yo munwi, mu nze mu saba Mulimu. Basali, mu ipeye kwatas’a banna ba mina, sina ha mu ipeya kwatas’a Mulena; Kakuli munna ki toho ya musali, sina Kreste h’a li toho ya Keleke; mi ki yena Mupilisi wa mubili, ili yona Keleke. Sina Keleke ha i ipeya kwatas’a Kreste, basali ni bona ba ipeye kwatas’a banna ba bona mwa litaba kaufela.” (Maefese 5:21-24) Sina fela banna ba Sikreste ha ba na ni ku ipeya kwatas’a butoho bwa Kreste, basali ba Sikreste ba swanela ku lemuha butali bwa ku ipeya kwatas’a m’ata a tamaiso a banna ba bona ao ba filwe ki Mulimu. Seo si k’a tisa buikolwiso bwa mwahali bo bu tungile mi, ka butokwa ni ku fita, si k’a tisa mbuyoti ya Jehova.

16, 17. (a) Bana ba ba huliselizwe mwa malapa a Sikreste ba kona ku ifapahanya cwañi ku ba banca ba bañata kacenu, mi ki nto mañi y’e ba susueza? (b) Jesu n’a li cwañi mutala o munde ku ba banca kacenu, mi ba susuezwa ku eza nto mañi?

¹⁶ Bana ba ba li ba teokratiki ki ba ba tabile ku bonisa likute le li swanela kwa bashemi ba bona. Ka za ba banca mwa linako za maungulelo, ne ku bulezwi cimo kuli ne ba k’a ba “ba ba sa utwi bashemi.” (2 Timotea 3:1, 2) Kono kwa bana ba Sikreste Linzwi la Mulimu le li buyelezwi li bulela kuli: “Bana, mu utwe bashemi ba mina mwa linto kaufela, kakuli ki se si tabisa Mulimu.” (Makolose 3:20) Ku kuteka m’ata a tamaiso a bashemi ku tabisa Jehova mi ku tisa mbuyoti.

¹⁷ Seo si filwe mutala ki Jesu. Taba ya Luka i bulela kuli: “A shetumuka ni bona [bashemi ba hae], a ya kwa Nazareta. N’a ikokobeza ku bona. . . . Mi Jesu n’a zwelapili, a talifa, a hula, a tabisa Mulimu ni batu.” (Luka 2:51, 52) Jesu n’a na ni lilimo za buhulu ze 12 ka nako yeo, mi muinelo wa ku eza sika wa linzwi la Sigerike le li itusisizwe fa u koñomeka kuli n’a “[zwezipili, NW] ku ikokobeza” kwa bashemi ba hae. Kacwalo ku ipeya kwa hae kwatasi ne ku si ka fela ha n’a keni mwa lilimo za hae za ku nonoboka. Haiba mina ba banca mu bata ku zwelapili mwa mayemo a kwa moya ni mwa ku tabisa Jehova ni batu ba mayemo a bumulimu, mu k’a bonisa likute ku ba m’ata a tamaiso mwahali ni kwande a lapa la habo mina.

M’ata a Tamaiso Mwahal’a Puteho

18. Ki mañi ya li Toho ya puteho ya Sikreste, mi u file m’ata a tamaiso ku bomañi?

¹⁸ Ha n’a bulela ka za tokwahalo ya tukiso ye nde mwahal’a puteho ya Sikreste, Paulusi n’a ñozi kuli: “Mulimu hasi Mulimu wa mifilifili, kono ki wa kozo. . . . Linto kaufela li ezwe ka swanelo, ni ka mulao.” (1 Makorinte 14:33, 40) Kuli lika kaufela li ezahale ka mukwa o na ni tukiso hande, Kreste, yena Toho ya puteho ya Sikreste, u file m’ata a tamaiso kwa banna ba ba sepahala. Lu bala kuli: “Isali yena ya file ba bañwi kuli ba be baapositola, ba bañwi ba be bapolofita, ba bañwi ba be babuleli, ba bañwi ba be balisana ni baluti; Ili ku hulisa balumeli mwa bupetehi, ku eza sebelezo ya bulisana . . . Kono lu latelele niti, lu nze lu na ni lilato, kuli lu hule mwa linto kaufela ku Kreste, yena ye li toho.”—Maefese 4:11, 12, 15.

19. (a) Ki mañi y’o Kreste a ketile fahalimu a z’a luwile kamukana fa lifasi-mubu, mi ki ku bomañi k’o a file m’ata a tamaiso a’ ipitezi? (b) Ki ku fa m’ata a tamaiso kufi ko ku ezahala mwa puteho ya Sikreste, mi seo si tokwa nto mañi ku luna?

¹⁹ Mwa linako ze za maungulelo, Kreste u ketile sikwata sa “mutanga ya sepahala, ya na ni kutwisiso” fahalimu a “z’a luwile kaufela,” kamba licisehelo za Mubuso fa lifasi-mubu. (Mateu 24:45-47) Ka ku swana sina mwa lilimo za mwanda wa pili, yena mutanga y’o u yemelwa ki sitopa se si busa sa banna ba ba tozizwe ba Sikreste bao Kreste a file m’ata a tamaiso a ku eza likatulo ni ku keta baokameli ba bañwi. (Likezo 6:2, 3; 15:2) Sitopa se si Busa ni sona si fa m’ata a tamaiso kwa Tutengo twa Mutai, baokameli ba mupotoloho ni ba sikiliti, ni maeluda mwahal’a ye ñwi ni ye ñwi ya liputeho ze fitelela 73,000 za Lipaki za Jehova mwa lifasi kamukana. Bona banna ba Sikreste bao kaufela ili ba ba na ni buipeyo ba swanelwa ki kemelo ni likute la luna.—1 Timotea 5:17.

20. Ki mutala mañi o’ bonisa kuli Jehova h’a tabiswi ki ba ba si na likute kwa Bakreste sina bona ba ba na ni m’ata a tamaiso?

²⁰ Ka ku ama kwa likute le lu swanela ku fa ku ba ba na ni m’ata a tamaiso mwahal’a puteho ya Sikreste, ku kona ku eziwa ku bapanya ko ku hoha mamelelo kwa ku ipeya kwatasi ko lu swanela ku fa ku ba m’ata a tamaiso ba silifasi. Mutu h’a loba mulao wa batu w’o Mulimu a lumeleza, koto ye fiwa ki “ba ba busa,” ka mo ku inezi, ka nzila ye ñwi ki poniso ya buhali bwa Mulimu ku “ba ba maswe.” (Maroma 13:3, 4) Haiba Jehova w’a nyema mutu h’a loba milao ya batu ni h’a s’a bi ni likute le li swanela ku ba m’ata a tamaiso ba silifasi, u kona ku s’a tabela ni ku fita haiba Mukreste ya ineezi a lwanisa likuka za Bibele ni ku bonisa kashwau kwa Bakreste sina yena ba ba mwa m’ata a tamaiso!

21. Ki kelezo mañi ya mwa Mañolo ye lu k’a tabela ku latelela, mi ki sifi se si k’a nyakisiswa mwa taba ye tatama?

²¹ Mwa sibaka sa ku itahiseza ku s’a tabelwa ki Mulimu ka ku ba ni mubonelo wa bukwenuheli kamba wa buipanguli, lu k’a latelela kelezo ya Paulusi kwa Bakreste mwa Filipi: “Cwale balatiwa ba ka, sina ha mu li ba ba utwa kamita, ni li, mu sebeze za ku piliswa kwa mina ka sabo ni ka tutumelo, isi fela ha ni li teñi ku mina, kono sihulu ha ni li siyo. Kakuli Mulimu ki Yena ya sebeza ku mina kuli mu late mi mu eze, mw’a latela yena. Mu eze linto kaufela mu sa tongi mu sa kanani; Kuli mu be ba ba sa nyazahali, ba ba si na bumaswe, bana ba Mulimu ba ba si na litiba mwahal’a lusika lo lu si ka luka, lo lu maswe, mo mu benya sina mamonyi mwa lifasi.” (Mafilipi 2:12-15) Ka ku s’a swana ni lusika lwa cwale lo lu si ka luka ni lo lu maswe lo lu itiselize silikwalikwani kwa neku la za m’ata a tamaiso, batu ba Jehova ba ipeya ka bunolo kwatas’a ba m’ata a tamaiso. Kacwalo ba ipumanela lituso ze tuna, sina ha lu k’a bona mwa taba ye tatama.

Ka ku Ba Lundululo

◻ Ki mañi Y’a na ni M’ata a Tamaiso a Matuna ka ku Fitisisa, mi ki kabakalañi m’ata a hae a tamaiso h’a li a’ swanela ka mulao?

◻ Ki ka kutwisiso mañi ba ba beilwe fa bulena ha ba “tomilwe ki Mulimu”?

◻ Ki l’ili f’o ba ba beilwe fa bulena ba fita fa ku s’a ba “mutanga wa Mulimu”?

◻ Ki miinelo mañi ya m’ata a tamaiso ye li teñi mwahal’a mabasi a Sikreste?

◻ Ki ku fa kufi kwa m’ata a tamaiso ko ku fumaneha mwahal’a puteho ya Sikreste?

[Siswaniso se si fa likepe 11]

Jesu n’a bulezi kuli: “Mu kutiseze Sesare ze li za Sesare”