Kana Lu Sweli ku Tona—Ili ku Pima Liyembuluko?

¹ Jesu n’a file temuso ya kuli: “Mu tone . . ., kuli mu kone ku banduka” likozi ze ne li na ni ku taha luli. (Lu. 21:36) Lu pila mwa linako ze t’ata ka ku fitisisa mwa litaba za mufuta wa mutu. Likayamana leo li libelezi bao ba ba lumeleza ku ozela kwa kwa moya. Seo si tahisa lubeta ku mañi ni mañi wa luna. Jesu n’a bulezi ka za ku ca, ku nwa, lipilaelo za ka zazi ni zazi za mwa bupilo. Ki kabakalañi? Kakuli mane nihaiba zona lika zeo ne li ka lu patehisa, ku ba liyembuluko, ni ku tahisa lubeta lwa ku ozela kwa moya.

² Liyembuluko ze Atile: Ba bañwi se ba patehisizwe hahulu ki ku itabisa ko ku tulile tikanyo kamba ko ku nyazahala, mane ni ku hapiwa ki TV. Ka mo ku inezi fela, ku bata pili Mubuso ha ku talusi kuli lu lukela ku tokolomoha mifuta kaufela ya ku itabisa. Ha lu itusisa nahanisiso ni buitikanelo, ku itabisa ku kona ku ba ko ku na ni tuso. (Mu bapanye 1 Timotea 4:8.) Kono i kona ku ba yembuluko muta i ba nto ye tuna mwa bupilo bwa luna, nto ye nga buñata bwa nako ya luna, lika za luna, kamba ku abana kwa luna mwa musebezi wa ku kutaza-Mubuso.

³ Yembuluko ye ñwi ye atile ili ye tisa ku ozela kwa kwa moya ki takazo ya lika ze sa tokwahali za sifumu. Seo si tokwa kuli mutu a fe nako ye ñata kwa musebezi wa silifasi ni ku tahisa kuli lindongwamo za kwa moya li pukutiswe. Ba bañwi se ba latehezwi ki pono ya likonkwani za kwa moya ka ku tupwikela hahulu mwa ku ba ni lika za sifumu ilikuli ba fumane nzila ya bupilo bwa mbombolelwa ye tuna. Hailif’o lu tokwa “lico ni liapalo,” lu lukela ku itibelela kwa ku hulisa lilato la ku lata mali, ili le li kona ku lu keluhisa mwa tumelo. (1 Tim. 6:8-10) Ka ku palelwa ku beya meto a luna a tomile fa licisehelo za Mubuso, lu kana lwa tepelela mwa ku tokomela butokwi bwa kwa moya bwa lubasi lwa luna ni ku palelwa ku peta bukombwa bwa luna.—1 Tim. 5:8; 2 Tim. 4:5.

⁴ Ba bañwi hape ba lumeleza ‘lipilu za bona ku sinyiwa ki lipilaelo za mwa bupilo’ ku fita fa sipimo sa ku lobala kwa moya. (Lu. 21:34) Ka linako ze ñwi, ku bilaela ku tiswa ki butata bwa buikangulo bwa kwa mubili kamba miinelo ya lubasi ye swenya. Kono ku iyakatwa ko ku cwalo kwa ka butu ha ku lukelwi ku lumelezwa ku fokolisa ku lemuha kwa luna mafelelezo a nze atumela kapili a muinelo wo wa linto.—Mare. 13:33.

⁵ Ha ku na nto ye ne i ka tabisa Diabulosi hahulu ku fita ku kondisa mwa ku lu beya mwa muinelo o swana sina tolo, ku ndongwama mihupulo ye miñwi ya silifasi ye si na mutomo. Lu na ni ku lwana kuli lu zwelepili ku tona kwa moya. Lwa ziba kuli ‘lizazi la Jehova li ka taha sina lisholi’ mi ki kwa butokwa hahulu kuli lu “tone mi lu iswale.” (1 Mates. 5:2, 6) Haiba lu lemuha miinelo ye ozelisa ku luna, ki kwa ka putako kuli lu “itobohe. . .misebezi ya lififi.”—Maro. 13:11-13.

⁶ Lituso ze Lu Tusa ku Zwelapili ku Tona: Ki lifi lituso zeo? Tapelo ki ya butokwa. Lu swanela ku lapela ka ku swalelela. (1 Mates. 5:17) Ku ba bukaufi ni puteho ya Sikreste ku ka ‘lu susumeza mwa lilato ni mwa misebezi ye minde.’ (Maheb. 10:24) Ku itatubisisa kamita ni ka buniti ku kona ku lu tusa ku zwelapili ku lemuha butokwi bwa luna bwa ku tula bufokoli. (2 Makor 13:5) Mikwa ye minde ya tuto ya ka butu i ka lu buluka inze lu “utilwe ka manzwi a tumelo.” (1 Tim. 4:6) Haiba lu eza ka buikatazo, lwa kona ku ba ni buniti bwa kuli lu ka kona ku tokolomoha liyembuluko, ‘ili ku tona ni ku tiya mwa tumelo.’—1 Makor. 16:13.