Lipuhisano ze Silikani Li Kona ku Fita kwa Pilu

¹ Puhisano i konwa ku taluswa sina ku “talusezana mihupulo ka mulomo.” Ku kalisa ku buhisana ko ku silikana fa taba ye ama ba bañwi ku kana kwa hoha mamelelo ya bona mi ku kona ku lu tusa ku fita kwa lipilu za bona ka lushango lwa Mubuso. Ze bonwi li bonisize kuli ku buanyu hahulu ku kenya batu mwa puhisano ye silikani ni ye sa pitihanyi ku fita ku ba ndendeyela fela.

² Ka mwa ku Kaliseza Puhisano ye Silikani: Ku kona ku buhisana ni ba bañwi kwa luna ha ku talusi kuli lu tokwa ku tahisa tomahanyo ye mbwetukisa ya mihupulo ni mañolo. Ka bunolo fela ku ama ku tahisa kuli mutu yo muñwi y’o a bulele ni luna. Sina ka mutala, ha lu ba ni puhisano ye silikani ni muyahwa ni luna wa fa ndu ye tatama, haki ye landalala fela fa tomahanyo kono ki ye hakululeha. Ha lu nahani ka za manzwi a luna a’ tatama kono lu sweli k’u nga muhato ka muinelo tota kwa mihupulo yeo a tahisa. Ku bonisa cisehelo ye buniti ku seo a bulela ne ku kana kwa mu susueza ku zwelapili ku buhisana ni luna. Ku swanela ku ba cwalo ni ha lu fa bupaki ku ba bañwi.

³ Litaba ze cwale ka za bukebenga, butata bwa ba banca, litaba za fa sibaka, miinelo ya lifasi, kamba nihaiba miinelo ya lizazi za konwa ku itusiswa mwa ku kalisa lipuhisano ze silikani. Litaba ze ama bupilo bwa batu ka ku nonga fa taba ki ze buanyu hahulu mwa ku zusulusa cisehelo ya bona. Puhisano ha se i kalisizwe, lwa kona ku i sikululela ka bunolo kwa lushango lwa Mubuso.

⁴ Ku ba ni puhisano ye sa pitihanyi ha ku talusi kuli ku itukiseza cimo ha ku tokwahali. Kwa tokwahala. Nihakulicwalo, ha ku na tokwahalo ya ku tahisa tomahanyo ye sa biukiwi kamba ku peta ngambolo, ili nto ye kona ku tisa puhisano ye sa hakuluhi kamba ye sa cinci ka miinelo ye ba teñi. (Mu bapanye 1 Makorinte 9:20-23.) Nzila ye nde ka ku fitisisa ya ku itukiseza ka yona ki ku keta taba i liñwi kamba ze peli za mwa Mañolo, ka mulelo wa ku toma lipuhisano ku zona. Ku lundulula litaba ze fumanwa mwa buka ya Reasoning ku ka fumaneha ku ba ko ku tusa hahulu ku seo.

⁵ Tulemeno to tu Tokwahala kwa Neku la Puhisano ye Silikani: Ha lu buhisana ni ba bañwi, lu swanela ku ba ni maikuto a’ susueza ni a’ buniti. Lumenyo ni ponahalo ye tabisa li tusa ku bonisa tulemeno t’o. Lu na ni lushango lo lunde ka ku fitisisa mwa lifasi; ki lo lu tabisa hahulu ku ba lipilu ze sepahala. Haiba ba ikutwa kuli cisehelo ya luna ku bona i susuezwa ki takazo ye buniti ya ku abana taba ye nde ni bona, f’o he ne ba kana ba susuezwa ku teeleza.—2 Makor. 2:17.

⁶ Ku ba ni puhisano ku swanela ku ba kezo ye tabisa. Kacwalo, lu swanela ku ba ni sishemo ni maseme mwa ku tahisa lushango lwa mubuso. (Magal. 5:22; Makolo. 4:6) Mu like ku siya mutu yo muñwi y’o a nze a na na ni mubonelo o munde. Ka nzila yeo, nihaiba lu sa kondisi lika kwa makalelo mwa ku fita kwa pilu ya hae, n’a kana a ba ni kamuhelo ye nde nako ye tatama h’a ka buhisana ni Paki.

⁷ Ku kalisa puhisano ye silikani ha ku tahi ka ku culoka mwa ngambolo ye tatezani. Ka bunolo fela ki taba ya ku zusulusa cisehelo mwa taba ye ama mutu. Ha se lu itukisize cimo, lu ka be lu ipakanyize ku kena mwa lipuhisano ze silikani ni batu. Haike lu like ka t’ata ku fita kwa lipilu za bao lu katana ka ku abana ni bona taba ye nde ka ku fitisisa ye konwa ku fumanwa, ya limbuyoti za Mubuso za ku ya ku ile.—2 Pit. 3:13.