Haiba U Tahisa Siselo, Mu Itusise Wona!

¹ Bukombwa bwa Luna bwa Mubuso kamita bu lu fa mitahisezo ye akalelizwe ye fitana-fitana ya ku itusisa mwa bukombwa. Seo si lu fa mihupulo ye minca ya mwa ku huliseza cisehelo mwa lushango lwa Mubuso. Mwendi ka kweli ni kweli mu ikatazanga ku ituta u li muñwi kamba ku fitelela ya mitahisezo yeo. Nihakulicwalo, bahasanyi ba bañwi ba kana ba fumana kuli ha se ba itusisize mutahisezo o muñwi ka nakonyana, musulo o muñwi wa Bukombwa bwa Luna bwa Mubuso u fa mutahisezo o munca. Ka buniti luli ne ku kana ku sa konahali ku mañi ni mañi ku ituta mutahisezo o munca a si ka zibelela kale wa pili.

² Ka mo ku inezi fela, ku na ni mapaina ni bahasanyi ba bañwi ba ba itusisa nako ye ñata mwa sebelezo ya mwa simu. Fahalimw’a seo, liputeho ze ñata li kwahelanga kalulo ya zona hasamulaho fela wa liviki li sikai. Mwa miinelo yeo, bahasanyi ba itebuhanga ku ba ni miatumelelo ni mihupulo ye minca ya ku tahisa lushango. Seo si ba tusa ku hulisa bunangu bwa bona. Hape si bisa bukombwa bwa bona ku ba bo bu tabisa hahulu ni ku tahisa siselo ni ku ba konisa ku tiyela lishemaeto ze ba talimana ni zona.

³ Mwa muinelo ufi kamba ufi, haiba mu itukiselize mutahisezo o buanyu kwa ku hulisa cisehelo, ku be cwañi kamba cwañi mu zwelepili ku itusisa ona! Ku tuhela ku itusisa mutahisezo o buanyu ili o tahisa ze nde ha ku tokwahali. Mu u zamaiseleze fela ni buka ye fiwa mwa kweli yeo. Ha mu lundulula liakalezo ze fiwa mwa Bukombwa bwa Luna bwa Mubuso, mu bate lisupo ze hoha mamelelo ze mu kana mwa kopanyeleza mwa mutahisezo wa mina.

⁴ Kacwalo ha mu amuhela musulo o munca wa Bukombwa bwa Luna bwa Mubuso, mu hupule kuli mitahisezo ye mwateñi ki liakalezo fela. Haiba mwa kona ku itusisa yona, ku lukile. Kono haiba ki kale mu fumana mutahisezo o tahisa siselo mwa kalulo ya mina, mu itusise ona! Sa butokwa ki ku ‘feleleza za bukombwa bwa luna’ ka mukwa o munde, ili ku fumana ba ba swanela ni ku ba tusa ku ba balutiwa.—2 Tim. 4:5.