Sikolo Se Si Lu Bakanyeza Ze Li za Butokwa ka ku Fitisisa

¹ Batu ba yanga kwa sikolo ilikuli ba y’o lutiwa lika ze ka ba tusa ku peta ze ba bata mwa bupilo. Kono ki ufi mulelo o muñwi o’ li wa butokwa hahulu ku fita wa ku lumbeka yena Mufani luli wa bupilo ni ku tusa ba bañwi ku ituta ka za milelo ni linzila za hae? Ha ku na ni o mukana. Mulelo wa Sikolo sa Bukombwa sa Teokratiki ki ku lu bakanyeza ku luta ba bañwi tumelo ya luna. Kacwalo, ha lu nze lu fumaneha kwa sikolo seo ka viki ni viki, lu sweli ku ituta lika z’e lu bakanyeza ku eza ze li za butokwa ka ku fitisisa mwa bupilo.

² “Tomahanyo ya 2003 ya Sikolo sa Bukombwa sa Teokratiki” ne i hatisizwe mwa Bukombwa bwa Luna bwa Mubuso bwa kweli ye felile. Tomahanyo yeo i na ni litaba ze bonisa mo si ka zamaisezwa sikolo seo. Ku ka mi bela bunolo ha mu ka buluka tomahanyo yeo mwa buka ya mina ya Mu Fumane Tuso kwa Lituto za Sikolo sa Bukombwa sa Teokratiki, ye mu lukela ku shimba ka viki ni viki kwa Sikolo sa Bukombwa sa Teokratiki. Ki ze likalulo ze ñwi za Sikolo sa Bukombwa sa Teokratiki sa 2003.

³ Mukwa wa Bubuleli: Ku kala mwa January, mukopano w’o u ka kalanga ka ngambolo ya mizuzu ye 5 ye bulela za mukwa wa bubuleli kamba kalulo ye ñwi ya ku bala, ya ku ituta, kamba ya ku luta. Muokameli wa sikolo u ka fa lingambolo za pili zeo, kamba wa kona ku fa eluda yo muñwi ya kona kuli a fe ngambolo yeo. Mubuleli wa kona ku talusa mukwa ni mukwa wa bubuleli ni butokwa bwa ona. Kihona a ka ekeza kwa litaba zeo ka ku talusa mitala ya mwa Mañolo ni ku bonisa mwa ku sebeliseza mukwa w’o, ili ku koñomeka hahulu m’o ku eza cwalo ku kona ku kondiseza sebelezo ya luna ya mwa bukombwa.

⁴ Ngambolo No. 1: Mizwale ba ba filwe ngambolo ya taelo ba sa elezwa ku “koñomeka tuso ye fumanwa mwa litaba ze ambolwa.” F’o kikuli mu bonise puteho mwa ku sebeliseza litaba zeo. Haiba mu fiwa ngambolo yeo, mu bone liakalezo za mwa ku itukiseza ze filwe fa makepe 48 ku isa 49 mwa buka ya Sikolo sa Bukombwa, mi mu nyakisise litaba ze fa makepe a’ bonisizwe kwa mafelelezo a buka yeo mwatas’a taba ye li “Musebelezo.”

⁵ Tomahanyo ya ku Bala Bibele: Haiba kwamulaho ne mu sa koni ku latelela tomahanyo ya ku bala Bibele ka viki, kiñi ha mu sa leli ku latelela tomahanyo yeo unomwaha? Ba ba eza cwalo ba ka be ba felize ku bala Mañolo a Sigerike a Sikreste silimo ha si ka y’o felanga. Lituso za ku kalisa tukiso ya ku bala Bibele ku kala ka Mañolo a Sigerike a Sikreste li nyakisisizwe fa likepe 10, paragilafu 4, mwa buka ya Sikolo sa Bukombwa.

⁶ Ze Zwile Mubano mwa ku Bala Bibele: Kalulo ye i ka fiwanga mwa mizuzu ye 10 ilikuli baputehi ba be ni kolo ya ku bulela ze ba itutile mwa likauhanyo ze tomahanyizwe mwa viki. Ba ba fiwa ngambolo ye, ba lukela ku buluka nako y’e filwe. I ka fiwanga viki ni viki, hamoho cwalo ni mwa viki ya lundululo ya lipuzo ni likalabo. Ha mu nze mu bala likauhanyo ze filwe, mu bate lisupo ze ka mi tusa mwa tuto ya mina ya lubasi, mwa bukombwa bwa mina, kamba mwa bupilo bwa mina. Ki ifi mikwa ya Jehova ye n’e bonisizwe ki mwa n’a ezelize batu ba hae ni macaba? Ne mu itutileñi ze n’e tiisize tumelo ya mina ni ku mi tusa ku itebuha hahulu Jehova? Mu lukuluhe ku alaba fa sisupo sifi kamba sifi mwa likauhanyo ze filwe, niheba mwa litimana ze ka balwa mwa Ngambolo No. 2, bakeñisa kuli muzwale ya ka bala h’a na ku bulela fa litimana zeo.

⁷ Ngambolo No. 2: Ngambolo ya pili ya baituti ka viki ni viki ki ya ku itwaeza ku bala fa nyangela. Kaufel’a zona, kwand’a fela ya kwa mafelelezo a kweli ni kweli, li ka zwa mwa likauhanyo za Bibele ze tomahanyizwe mwa viki. Kalulo ya ku bala ya mafelelezo mwa kweli i ka zwa mwa Tora ya ku Libelela. Muituti u lukela ku bala litaba ze filwe a sa fi tahiso kamba mafelelezo. Ka ku eza cwalo, wa kona ku isa mamelelo ya hae fa buikoneli bwa hae bwa ku bala.—1 Tim. 4:13.

⁸ Lingambolo No. 3 ni No. 4: Lingambolo ze ñwi ze, li tomile fa litaba ze ñata ze mwa buka ya Tabo ya Lubasi ku fita ze ñwi; ze ñwi li na ni fela litoho za taba. Ba ba fiwa lingambolo ze tomile fa lihatiso ze si na hahulu litaba kamba ku fiwa fela toho ya taba ba ka ba ni kolo ya ku lukisa lingambolo za bona ka ku eza patisiso mwa lihatiso za luna za Sikreste. Ku eza cwalo ku ka nolofalela likaizeli ku bulela z’e swanela batusi ba bona.

⁹ Miezezo: Ka mo ku boniselizwe fa likepe 45 mwa buka ya Sikolo sa Bukombwa, muokameli wa sikolo wa kona ku fa muezezo. Haiba a sa ezi cwalo, fohe likaizeli ba kona ku iketela muezezo fa mukoloko o fa likepe 82. Haiba kaizeli a fa ngambolo i liñwi mwa likweli ze peli, miezezo ye 30 yeo i ka mu fa mifuta-futa ye likani ye ka nga lilimo ze 5 ku itusisa yona. Likaizeli ba ba keta No. 30, y’e li “Muezezo o muñwi o sebeza mwa silalanda sa mina,” ba lukela ku ñola muezezo wa bona kwatasi kamba kwa buse bwa kapampili ka ngambolo (S-89). Muokameli wa sikolo u ka ñola lizazi la ngambolo ya muituti fa likepe 82 la buka ya muituti y’o kwatuko ni muezezo w’a itusisize. Wa kona ku eza cwalo f’a laitelela fomu ya muituti ya kelezo.

¹⁰ Fomu ya Kelezo: Fomu ya mina ya kelezo i mwa buka ya mina. I fa makepe 79 ku isa 81. Kacwalo, mu ka tokwa ku fa buka ya mina ku muokameli wa sikolo hamulaho wa ngambolo ni ngambolo ye mu fa. Muokameli wa sikolo u ka tokwa ku buluka mukoloko wa lisupo za kelezo ze ba sebeleza teñi baituti.

¹¹ Lundululo ya Lipuzo ni Likalabo: Lundululo ya Sikolo sa Bukombwa sa Teokratiki i ka eziwa ka ku buza lipuzo. I ka eziwanga hañwi mwa likweli ze peli mi i ka eziwa mwa mizuzu ye 30. Lipuzo ze ka nyakisiswa mwa lundululo li ka zwelapili ku boniswa mwa Bukombwa bwa Luna bwa Mubuso. Haiba viki ya lundululo ya lipuzo ni likalabo ki yona hape viki ya mukopano wa mupotoloho kamba y’a pota muokameli wa mupotoloho, fohe lingambolo za viki ye tatama li fiwe mwa viki yeo mi lundululo ya lipuzo ni likalabo i tomahanywe sinca kuli i eziwe mwa viki ye tatama.

¹² Litopa Ze Ñwi: Mwa liputeho mo ku na ni baituti ba ba fitelela 50 kwa buñata, maeluda ba kona ku atula kuli ku itusiswe litopa ze ñwi. “Tukiso yeo i kona ku itusiswa kwa lingambolo zote za baituti kamba ze peli fela za mafelelezo.” (Sikolo sa Bukombwa, likepe 285) Akalezo ye ama lingambolo ze peli fela za mafelelezo i fezwi ku tusa liputeho ze na ni likaizeli ba bañata ni mizwale ba banyinyani ba ku talima za lingambolo za ku bala. Maeluda ba swanela ku keta mizwale ba ba kona kuli ba zamaise litopa zeo.

¹³ Muelezi wa Mutusi: Ka mo ku boniselizwe mwa tomahanyo ya Sikolo sa Bukombwa sa Teokratiki, muelezi wa mutusi u lukelwa ku ketiwa ki sitopa sa maeluda ilikuli a fange kelezo ya kwa mukunda kwa maeluda ni batanga ba bukombwa ba ba fa ngambolo ya ze zwile mubano za mwa Bibele ni ngambolo ya taelo. Muzwale ya filwe musebezi w’o wa ku eleza i be ya yeziseli, ili y’o kelezo ya hae i ka amuhelwa ki maeluda ba bañwi. Kelezo ya hae i be ye yahisa, ili ku babaza bubuleli ni milutelo ye minde ni ku akaleza sisupo si li siñwi kamba ze peli fo ba tokwa ku sebeleza. Ha ku tokwahali ku fa kelezo hamulaho wa ngambolo ni ngambolo ye fiwa ki muzwale y’a fanga lingambolo hañata. Kono muzwale ya filwe buikalabelo bwa ku eleza u lukela ku lemuha ni ku utwisisa kuli niheba mizwale bao cwale se ba fa lingambolo za nyangela ni bona ba kona ku tusiwa ku eza zwelopili.—1 Tim. 4:15.

¹⁴ Ze Mu Lukela ku Tokomela: Ki lika mañi ze kona ku tusa muelezi ku tatuba ngambolo? Sikwenda sa bulalu se si mwa buñata bwa likauhanyo ze 53 za tuto z’e mwa buka ya Sikolo sa Bukombwa si na ni kusufazo ya ze mu lukela ku tokomela. Muokameli wa sikolo hape u lukela ku tokomela likupuliso kamba liakalezo ze ñwi ze mwa buka ili ze ka mu tusa ku ziba kapili ka za haiba ngambolo i tamahanyizwe ni ku fiwa hande. Ka mutala, mu bone lipuzo ze tatamana ze kwahalimu a likepe 55 ni mihupulo ye mwa paragilafu ya mafelelezo fa likepe 163.

¹⁵ Ku Taleleza Mo ku Si Na Ze Ñozwi: Kwand’a maneku a matuna a makepe a yona a’ si ka ñolwa se siñwi, buka ya Sikolo sa Bukombwa i na ni libaka li sikai ze si ka ñolwa ze lukisizwe kuli mu ñolange teñi lisuponyana ha mu eza tuto ya ka butu ni ha mu li kwa Sikolo sa Bukombwa sa Teokratiki. (Mu bone makepe 77, 92, 165, 243, 246, ni 250.) Mu shimbange buka ya mina ka viki ni viki. Mu latelele ku yona ha ku nze ku fiwa ngambolo ya pili. Mu siye buka ya mina i apuzwi ku isa kwa mafelelezo a sikolo. Mu lemuhe liakalezo z’a fa muokameli wa sikolo. Mu iteekele milutelo, lipuzo, mitala, lipulelo za swanisezo, liswanisezo, ku luta ka ku bonisa lika, ni lishutano ze ba itusisa babuleli. Ka ku ñola lisupo ze tusa, mu ka kona ku hupula ni ku itusisa lisupo ze ñata ze mu itutile kwa sikolo.

¹⁶ Jesu Kreste n’a lemuhile kuli ku shaela taba ye nde ya Mubuso wa Mulimu ki tohonolo ye tuna ka ku fitisisa ye kona ku fiwa ku mutu ufi kamba ufi. N’e li ona musebezi wa hae o mutuna. (Mare. 1:38) N’a ize: “Ni swanezi ku y’o bulelela ni minzi ye miñwi taba ye munati ya mubuso wa Mulimu; kakuli ki sona se ni lumezwi.” (Luka 4:43) Ka ku ba batu ba ba amuhezi memo ya ku mu latelela, ni luna lu patehile hahulu ku shaela taba ye nde, mi kamita lu likanga ku kondolokisa “sitabelo sa milumbeko” ya luna. (Maheb. 13:15) Kacwalo, haike lu tundamene ku abananga mwa Sikolo sa Bukombwa sa Teokratiki, ili sikolo se si ka lu bakanyeza ze li za butokwa hahulu mwa bupilo.