BABANCA BABUZA KULI

Bibele Ikona Kunitusa Cwañi?—Kalulo 3: Mutusiwe Hahulu ki Litaba Zemubala Mwa Bibele

Hamuka apula Bibele, mukalemuha kuli kunani manzwi amañata mwateñi. Taba yeo haiswaneli kumipaleliswa kubalanga Bibele! Kono muiinge sina tafule fokuinzi lico zeñata zeshutana-shutana. Hamukoni kuca lico kaufela zeinzi fateñi. Kono mwakona kuketa zemukona kuca.

Kuli mutusiwe ka kutala ki litaba zemubala mwa Bibele, mutokwa kuisa kwateñi mamelelo. Taba ye ika mitusa kueza cwalo.

Ze mwa taba ye

Ki kabakalañi hamuswanela kuisa mamelelo kwa litaba zemubala mwa Bibele?

Haiba muikataza hahulu kubalanga Bibele, mukatusiwa hahulu ki yona. Halunyakisiseñi mutala wo: Haiba mubeya masamba mwa mezi acisa ka nakonyana feela, kuka utwahala kuli kunani masamba. Kono haiba mubata kuli autwahale hahulu, muasiye mwa mezi ka nako yetelele.

Komoki ya tii yelalilwe laini. Kwa lineku leliñwi kunani tii mone kubeilwe masamba ka nakonyana. Kwa lineku leliñwi kunani tii mone kubeilwe masamba ka nako yetelele.

Ki nto yeswana ni kubala Bibele. Mwa sibaka sa kuibala ka bubebe, mubange ni nako yeñata ya kunahanisisa litaba zemubala. Kona zanaaezize muñoli wa Samu 119. Ka kuama kwa mulao wa Mulimu, naabulezi kuli: “Niunahanisisa lizazi kaufela.”—Samu 119:97.

Kono fo hakutalusi kuli mutokwa kutanda lizazi kaufela inze mubala ni kunahanisisa litaba za mwa Bibele. Sisupo ki se: Muñoli wa samu naabanga ni nako ya kunahanisisa ka za Linzwi la Mulimu. Kueza cwalo neku mutusize kueza likatulo zende.—Samu 119:98-100.

“Bo ma nebakile banibulelela kuli, ‘Unani mazazi a 7 mwa sunda, mi mwahalaa sunda yeo uezanga lika zeñata za ka butu. Ki kabakalañi hausafi kwateñi Jehova kwa nako yahao? Ukaeza hande hahulu!’”—Melanie.

Hamunahanisisa likuka za mwa Bibele, mukakona kueza likatulo zende—ka mutala, hamuketa balikani kamba hamukopana ni muliko wa kuli mueze lika zemaswe.

Mukona kutusiwa cwañi ka kutala ki litaba zemubala mwa Bibele?

Mube ni tomahanyo. Julia, musizana wa lilimo ze 15 naabulezi kuli, “Mulukise tomahanyo ya kubalanga Bibele. Muzibe litaba zemuka bala, nako yemuka libala, ni sibaka komuka libalela.”

Musizana ya mwa lilimo za kunonoboka uñola tomahanyo yahae ya kubala Bibele fa kalenda.

Mubate sibaka sesinde. Bo Gianna ba lilimo ze 22 nebabulezi kuli, “Mubate sibaka sesikuzize. Hape muzibise ba lubasi lwamina ka za tomahanyo yamina ya kubalanga Bibele ilikuli basike bamifilikanyanga.”

Haiba muitusisa kapangaliko, mukwale lika kaufela zekona kumifilikanya fateñi. Mwakona kuitusisa nihaiba Bibele yehatisizwe. Mane lipatisiso libonisa kuli kubalela fa hatiso yehatisizwe kwakona kumitusa kuutwisisa hande zemubala. Ka kushutana, kukona kuba taata kuisa hahulu mamelelo hamu balela fa kapangaliko.

“Kubalela fa kapangaliko kwani filikanyanga. Fa foni yaka kutahanga tushango, fokuñwi mulilo wafelanga mi fokuñwi Intaneti yatuhelanga kubeleka. Hanibilaezwangi ki lika ze kaufela haniitusisa buka yehatisizwe, zenitokwanga feela ki liseli leliñata.”—Elena.

Mukale ka kulapela. Mukupe Jehova kuli amituse kuutwisisa, kuhupula, ni kutusiwa ki taba ya mwa Bibele yemubata kubala.—Jakobo 1:5.

Kuli mubonise Jehova kuli mubata lika zemukupile, mueze lipatisiso fa taba yemubala. Mukona kueza cwañi cwalo? Haiba muitusisa Progilamu ya JW Library kamba mubalela Bibele fa Intaneti, mwakona kusina fa timana yeo kuli mufumane litaba zeñwi.

Muipuze lipuzo. Ka mutala: ‘Taba ye inilutañi ka za Jehova? Kana yabonisa kalemeno kahae keni kona kulikanyisa?’ (Maefese 5:1) ‘Ki lika mañi zeniituta kwa taba ye zenikona kuitusisa mwa bupilo bwaka?’ (Samu 119:105) ‘Kana nakona kuitusisa litaba zenibalile kuli nituse babañwi ka nzila yeñwi?’—Maroma 1:11.

Hape muipuze kuli, ‘Litaba zenibalile liswalisana cwañi ni taba yetuna ya mwa Bibele?’ Puzo yeo ki ya butokwa hahulu. Kabakalañi? Kabakala kuli litaba kaufela ze mwa Bibele—kuzwa kwa Genese kuisa kwa Sinulo—liswalisana ka nzila yeñwi ni taba yetuna ye: Mo Jehova aka keniseza libizo lahae ka kuitusisa Mubuso wahae wa kwa lihalimu, ni mwaka boniseza kuli unani tukelo ya kubusa ni kuli puso yahae ki yende.

Zebabulela litaka zamina

“Haiba mutabela litaba za kwamulaho, muitute ka za linako kamba litaba zebafumani bapumbuli ka za linaha za mwa Bibele. Haiba mutabela kuituta ka za mikwa ya batu, muitute litaba za batu babacwale ka Davida. Nto kaufela yatabela mutu ni mutu yafumaneha. Mutu uswanela feela kuziba taba yabata kuituta hahulu ka za teñi.”—Judah.

“Hanibalanga taba yeñwi ya mwa Bibele, nitabelanga kunyakisisa mutu ni mutu yabulezwi—ibe kuli ki yomunde kamba ki yamaswe—mi nibuzanga kuli, ‘Ki lika mañi zeneezahezi ku mutu yo? Ki moya ocwañi wanaa bonisize, mi ki lika mañi zenezwile mwateñi?’ Kihona nika ipuza kuli, ‘Taba ye ikona kunitusa cwañi?’”—Mackenzie.

“Niezanga lipatisiso ka za taba ya mwa Bibele yenibala. Ka mutala, neiñozwi lili? Ki mañi yanaaiñozi, mi ki ufi mulelo wa buka ya mwa Bibele yeo? Litaba zeñata zakona kuitusiswa mwa linako za luna, kono kueza lipatisiso kunitusanga kuutwisisa hande mo likezahalo zeñozwi mwa Bibele neliamezi batu bane bapilile ka nako yeo.”—Elle.

“Hanibalanga Bibele, nibeyanga mwa munahano kuli taba yenibala nikaitaluseza mutu yomuñwi. Nikona kumutusa cwañi kuutwisisa taba ye? Ki mutala mañi onika itusisa kuli nikoñomeke sisupo sesituna? Kunahanisisanga likalabo za lipuzo zeo kunitusanga kuutwisisa hande litaba zenibala. Taba ya kuli, ‘Nzila yende ya kuituta ka yona nto yeñwi ki ka kuiluta babañwi’ ki ya niti luli.”—Owen.