Kana Kunani Misebezi Yebaezanga Basali Mwa Kopano ya Lipaki za Jehova?

Eni, mwa lifasi kaufela kunani basali babañata-ñata babali Lipaki za Jehova babaezanga misebezi ya buluti. Basali babañata-ñata basweli kukutaza taba yende ya Mubuso wa Mulimu. Liñolo la Samu 68:11 nelipolofitile cwana ka za baluti bao: “Jehova ufa taelo; basali babashaela taba yende ki mpi yetuna.”

Niteñi, musebezi obaeza basali babali Lipaki za Jehova hauswani ni obaeza basali babali babahulu ba bulapeli mwa likeleke zeñwi. Kunani shutano yetuna. Bashutana cwañi?

Shutano yapili iama batu babasebelezwa. Hañata, basali babali babahulu ba bulapeli mwa likeleke zetwi ki za Sikreste bafiwanga musebezi wa kuluta ni kuzamaisa mwa likeleke zabona, mi balutanga ba mwa keleke yabona. Kono baluti babasali babali Lipaki za Jehova bona bakutazanga kwa batu babasi kalulo ya puteho yabona, ili bebakopananga ni bona habanze bakutaza fa ndu ni ndu ni mwa libaka zeñwi.

Shutano yeñwi yeliteñi mwahalaa baluti babasali babali Lipaki za Jehova ni baluti ba mwa bulapeli busili iama musebezi obaeza mwa puteho. Basali babali babahulu ba bulapeli mwa likeleke zetwi ki za Sikreste ni bulapeli bobuñwi bazamaisanga ni kuluta batu babaswalisana ni keleke yeo lituto zayona. Kono baluti babali Lipaki za Jehova bona habalutangi mwa puteho haiba baana babakolobelizwe bateñi mwahalaa bona. Babaezanga cwalo ki baana feela babaketilwe kuba baluti mwa puteho.—1 Timotea 3:2; Jakobo 3:1.

Bibele ibonisa kuli baana ki bona feela babaswanela kufiwa musebezi wa kuokamela mwa puteho. Mulemuhe zanaabulezi muapositola Paulusi hanaañolela Tite liñolo, ili yanaali muokameli sina yena: “Neni kusiile mwa Kreta kuli . . . [ukete] baana-bahulu mwa muleneñi omuñwi kuya kuomuñwi.” Paulusi naaekelize kutalusa zenekona kutusa muuna kuketiwa hanaabulezi kuli muuna naaswanela kuba “yasanyazahali, wa musali alimuñwi.” (Tite 1:5, 6) Paulusi naafile litaelo zeswana mwa liñolo lanaañolezi Timotea, hanaaize: “Mutu haeza ka taata kuli abe muokameli, ulakaza musebezi omunde. Hakulicwalo, muokameli uswanela kuba yasanyazahali, ibe muuna wa musali alimuñwi, . . . yakona kuluta batu.”—1 Timotea 3:1, 2.

Ki kabakalañi baana habali bona feela babaswanela kuketiwa kuba baokameli? Paulusi naabulezi kuli: “Hanilumelezi musali kuluta, kamba kuba ni maata fahalimwaa muuna, kono uswanela kusiyala inze akuzize. Kakuli Adama naabupilwe pili, kihona kubupiwa Eva.” (1 Timotea 2:12, 13) Taba yeo ibonisa kuli Mulimu naafile baana buikalabelo bwa kuokamela ni kuluta babañwi.

Batanga ba Jehova balikanyisa mutala wabatomezi Mulenaa bona Jesu Kreste. Mulutiwa Luka naabulezi cwana ka za bukombwa bwa Jesu: “Aya mwa muleneñi ni muleneñi ni mwa munzi ni munzi anze akutaza ni kushaela taba yende ya Mubuso wa Mulimu.” Hamulaho wa fo, Jesu naataluselize balateleli bahae kueza musebezi oswana, lubala kuli: “Baya mwa sibaka kaufela kuzwa munzi omuñwi kuya ku omuñwi, banze bashaela taba yende.”—Luka 8:1; 9:2-6.

Kacenu, batanga ba Jehova kaufela, ibe kuli ki baana kamba ki basali baeza mobakonela kaufela kueza musebezi wanaapolofitile zaona Jesu, hanaaize: “Taba yende ye ya Mubuso ikakutazwa mwa lifasi kaufela kuli ibe bupaki kwa macaba kaufela, kihona kukataha mafelelezo.”—Mateu 24:14.