Abrahama—Mutala ku bao Kaufela ba ba Bata Bulikani ni Mulimu

“Kakuli n’a sa fokoli mwa tumelo, . . . A kolwa kuli s’a sepisize Mulimu, u na ni mata a ku si eza.”—MAROMA 4:19-21.

 1. Ki kabakalañi Satani ha likile ku tahisa sheununo fa taba ye ama Abrahama?

LINZWI la bumulimu le li beilwe mwa Mañolo “ki le li pila, mi li na ni mata.” (Maheberu 4:12) Kacwalo, taba ya likezo za Jehova ni Abrahama, nihaike ki ye ñozwi lilimo ze 3,500 ze felile, ki simuluho ya susuezo ku bao kaufela ba ba bata bulikani ni Mulimu. (Maroma 15:4) Sila se situna, Satani, wa ziba se mi u se a itusisize baeteleli ba bulapeli ku lika ku sheununa taba yeo sina litangu.—2 Makorinte 11:14, 15.

 2. Ki mubonelo mañi w’o balutiwa ba Jesu ne ba na ni ona ka za Abrahama?

² Ka ku ba kalulo ya “Liñolo kamukana [le] li tahile ka moya wa Mulimu,” taba ya Abrahama ki ya niti ni ye “na ni tuso kwa ku luta [kwa Sikreste].” (2 Timotea 3:16; Joani 17:17) Balutiwa ba Jesu ba kwa makalelo kaniti luli ne ba itebuhile seo, Abrahama u bulezwi ha 74 mwa Mañolo a Sikreste a Sigerike. Mwa kauhanyo ye susueza tumelo ya bu 11 ya Maheberu, kalulo ye tuna i filwe ku yena ku fita ku ufi kamba ufi wa batanga ba Mulimu ba mwa nako yeo Bukreste bu si ka fita kale.

 3. Abrahama n’a kutekilwe ka butuna kamukwaufi?

³ Abrahama n’a si “mupolofita” fela, kakuli Jehova n’a itusisize yena mwa ku abana mwa litaba ze li “linguli” ze makaza ili m’o ñulukundi yo n’a kutekilwe ka butuna luli mwa ku ba swanisezo tenyene ya Mulimu yena ka sibili. (Genese 20:7; Magalata 4:21-26) Kacwalo, Jesu n’a bulezi ka za “sifuba sa Abrahama” ha n’a fa mutala ka za mayemo a ku shemubiwa ki Mulimu.—Luka 16:22.

Muhato Wa Hae Wa Pili wa Tumelo

 4. Ka ku ya ka Bibele, likezo za Mulimu ni Abrame ne li kalile cwañi?

⁴ Abrame, ka ku ya ka mwa na bizezwa kwa makalelo, n’a hulezi mwa “Ure wa Makalade.” Ha n’a nze a pila teñi k’o, Jehova Mulimu n’a bonahezi ku yena mi a li: “U zwe mwa naha ya henu ni mwa mushobo wa henu ni mwa ndu ya ndat’aho, u ye mwa naha ye ni ka ku supeza. Ni ka ku eza sicaba se situna, ni ku fuyole, ni hulise libizo la hao, mi ni wena u ka fa ba bañwi mbuyoti. Ni ka fuyola ba ba ku fuyola, ni kute ba ba ku kuta; mi mishobo kamukana ya lifasi i ka fiwa mbuyoti ka wena.”—Genese 12:1-3; 15:7; Likezo 7:2, 3.

 5. (a) Sepiso ya Mulimu ne i amile pilu ya Abrame kamukwaufi? (b) Ki ufi muhato wa n’a ngile Abrame kwa neku la sepiso?

⁵ Ki pizo ye buima cwañi! Ku Abrame, ku taleleza seo ne ku talusa ku siya munzi wa mbombolelwa ni bana bahabo ni ku yo ba mwa bupilo bwa kwahule mwa lifasi li sili. Kono pilu ya Abrame ne i amilwe ka butuna ki sepiso ya Mulimu ye sishemo. Ka ku ba munn’a muhulu ya si na mwana ni musal’a hae ya n’a li mumba, libizo la hae ne li bonahala kuli li ka be li fitile fa ku libalwa. Sepiso ya Mulimu ne i koñomeka nto ye fapahana: “Sicaba se situna” ne si ka zwa ku yena. Fahalimw’a seo, sepiso ya Mulimu ne i kopanyeleza cwalo ni zibahazo ye makaza ya taba ye nde kwa mufuta wa mutu kaufela, ku supa kwapili kwa nako yeo macaba kamukana a ka fuy’olwa. (Magalata 3:8) Abrame n’a bonisize tumelo mwa sepiso ya Jehova mi a siya sibaka m’o ne ku na ni zwelopili ye tuna. “A funduka,” ko na mo i lu taluseza Bibele, “a sa zibi ko a ya kuli ki kakai.”—Maheberu 11:8.

 6. (a) Ki kabakalañi Genese 11:31 ha i bonisa kuli Tera ki yena ya n’a ngile muhato? (Likezo 7:2-4) (b) Ki mwa linzila mañi m’o Sara a li mutala kwa basali ba Sikreste kacenu?

⁶ Tumelo ya Abrame ne i amile ba bañwi. Ba ndu ba ya hae, hamohocwalo ni Tera, ndat’ahe, ni Lota mwan’a munyan’a hae, ba funduka ni yena. Nihakulicwalo, bakeñisa kuli Tera ne li yena ya n’a li toho ya lubasi, u boniswa sina yena ya n’a ngile muhato. (Genese 11:31) Nto ye swanelwa ku lemuhiwa ki kemelo yeo Abrame n’a bile ni yona ku zwelela ku musal’a hae, Sarai, hamulaho a bizwa Sara. A tiyela bupilo bwa sipimo se si kwatasi mwa mazazi a bupilo bwa hae kaufela. (Genese 13:18; 24:67) Ki ko ku utwahala, kuli fa lifu la hae, “Abrahama a ta kwa maswabi, ku lila Sara.” (Genese 23:1, 2) Bakeñisa tumelo ya hae ye tiile ni likute la ka pilu kaufela sina musali, u beile mutala o munde wa ku buheha kwa kwa moya kwa neku la basali ba Sikreste.—Maheberu 11:11, 13-15; 1 Pitrosi 3:1-6.

 7. Ki mwa linzila mañi m’o Bakreste kacenu ba se ba bonisize tumelo ye swana ni ya Abrahama ni Sara?

⁷ Bakreste ba bañata kacenu ba se ba bonisize tumelo ye swana ka ku itatela ku kena mwa musebezi wa ku yandulula taba ya Mulimu mwa libaka m’o ku na ni tokwahalo ye tuna ya bakutazi ba Mubuso ni mwa ku yaha ni ku zamaiswa kwa lipawana ze nca ze itusiswa mwa ku hatisa ni ku lumeleza libuka ze tomile fa Bibele. (Mateu 24:14) Bona Bakreste bao ba se ba abani mwa ku mamela taelo ya kuli, “Mu ye . . . mu lute macaba kaufela.” Ka ku ya kwa naha ye ba sa zibi, hañata ku se ku bile ni tokwahalo ya kuli ba itwaeze ku pila sipimo si sili sa mupilelo. Ba bañwi ba se ba ezize ku itombola ko ku tuna kwa neku la lika za kwa mubili ili kuli ba kone ku eza balutiwa mwa kalulo ya habo bona.—Mateu 28:19, 20.

Likezo Ze Ñwi za Tumelo

 8. Ki sifi se ne si tahisize kuli Jehova a iponahaze lwa bubeli ku Abrame?

⁸ Abrame a tibelela mwa muleneñi wa Karani ku fitela lifu la ndat’ahe, Tera. (Genese 11:31, 32) Cwale ba ndu ya hae ba sila Nuka ya Eufrati ni ku liba kwa mbowela. Kwa nalule-lule ba fita mwa “munzi wa Sikemi” fahal’a naha ya Kanana. Yeo ne i bile pono ye nde hakalo! Sikemi u fumaneha mwa libala le li nunile mwahal’a mindandwe ye mibeli ya malundu ili ao a matelele ku ona ka ku fitisisa ki Lilundu la Ebali ni Lilundu la Gerizimi. Sibaka seo ne si talusizwe sina “paradaisi ya Naha ye Kenile.” Ka ku swanela, teñi f’o Jehova a iponahaza ku Abrame ni ku bulela kuli: “Naha ye, ni ka i fa baikulu ba hao.”—Genese 12:5-7.

 9. (a) Ki mwa nzila ifi ye zwile mubano yeo Abrame n’a zwezipili ku bonisa tumelo? (b) Ki tuto mañi ye lu ituta ku zwelela ku sona seo?

⁹ Abrame a nga muhato hape ka kezo ye ñwi ya tumelo. Sina taba ha i talusa kuli: “A yaha aletare ya [Jehova].” (Genese 12:7) Ka mo ku swanehela, seo ne si kopanyeleza cwalo ni ku fa sitabelo sa folofolo, kakuli linzwi la Siheberu la “aletare” li talusa “sibaka sa sitabelo.” Hamulaho, Abrame a kuta-kutela likezo zeo za tumelo mwa likalulo ze ñwi za naha. Fahalimw’a seo, n’a ‘lapezi fa libizo la Jehova.’ (Genese 12:8; 13:18; 21:33) Pulelo ya Siheberu ye tolokilwe “ku lapela libizo” hape i talusa ku “zibahaza (ku kutaza) libizo.” Ba ndu ya Abrame hamohocwalo ni Makanana ne ba kana ba mu utwile inze a zibahaza ka bundume libizo la Mulimu wa hae, Jehova. (Genese 14:22-24) Ka ku swana, bao kaufela ba ba bata bulikani ni Mulimu kacenu ba lukela ku biza libizo la hae ka tumelo. Seo ne si ka kopanyeleza cwalo ni ku kutaza fa nyangela, kamita ku “tisez[a] Mulimu sitabelo sa milumbeko, kikuli bupaki bo bu zwa mwa milomo ye lumba libizo la hae.”—Maheberu 13:15; Maroma 10:10.

10. (a) Ki mwa linzila lifi ze ñwi zeo Abrame n’a bonisize tumelo? (b) Ki mutala mañi wa n’a beile ku bao ba ba li litoho za mabasi a Sikreste? (1 Timotea 3:12)

¹⁰ Tumelo ya Abrame ku Jehova ne i bonisizwe mwa linzila ze ñwi ze ñata. N’a itombozi lika ze ñwi ili ku bukeleza kozo mi niteñi n’a tatuluzi butata ka bundume. (Genese 13:7-11; 14:1-16) Nihaike n’a fumile, n’a si na lilato la sifumu. (Genese 14:21-24) Ka ku fapahana, n’a lata ku amuhela baenyi mi ka sishemo n’a file kemelo kwa bulapeli bwa Jehova. (Genese 14:18-20; 18:1-8) Se si butokwa ka ku fitisisa, n’a li toho ya lubasi ya n’a li mutala o munde ni ya n’a latelela taelo ya Jehova ka ku laela bana ba hae ni ba ndu ya hae mwamulaho wa hae kuli “ba mamele nzila ya [Jehova], ba eze niti.” (Genese 18:19) Ka seo, ba ndu ya Abrame ne ba ngile nzila ye fapahana ka ku tala ni ya Makanana ba ne ba ndongwami likezo ze maswe za buhule mwa Sodoma ni Gomora minzi ye ne i ikabela miseto ni bona. Abrame kaniti luli n’a si ke a tuhelela libi ze tuna za mufuta o cwalo mwahal’a ba ndu ya hae. Haili ka za kuli n’a busa ba ndu ya hae ka mukwa o munde si boniswa ka nzila yeo lilama ba ndu ya hae ne ba mu likanyisize ka ku biza fa libizo la Jehova ka tumelo.—Genese 16:5, 13; 24:26, 27; 25:21.

“N’a Sa Fokoli mwa Tumelo”

11. Abrame n’a konile ku tiyela cwañi miinelo sina “mo ku inelwa mwa naha ya basili” ka lilimo ze mwanda?

¹¹ Tumelo ya Abrame ye tiile ne i mu tusize ku tiyela butata sina ha n’a pilile ka lilimo ze mwanda mwahal’a batu ba ne ba talusa kuli naha ne li ya bona. (Genese 12:4; 23:4; 25:7) Bibele i talusa kuli: “A ina mwa naha ya Sepiso, mo ku inelwa mwa naha ya basili, inz’a pila mwa litente, hamoho ni Isaka, ni Jakobo, ba ba ne ba ka ca ni yena sanda sa Sepiso. Kakuli n’a talimezi munzi [Mubuso wa Mulimu] o na ni mitomo ya niti, o Mulali ni Muyahi wa ona ki Mulimu. Kabe ne ba hupuzi [naha] ye ba zwile ku yona, kabe ne ba fumani sibaka sa ku kutela mwateñi.”—Maheberu 11:9, 10, 15; mu bapanye Maheberu 12:22, 28.

12. Ki sifi sibaka kwa makalelo se ne si bile teñi sa kuli Abrame a kute kwa Ure, mi ki sifi sa n’a ezize ka ku talimana ni butata?

¹² Abrame n’a si ka ina nako ye telele mwa Kanana muta tala ye tuna ne i mu file “sibaka sa ku kut[a].” Ure, o ne u na ni mezi a mañata ku zwelela mwa Nuka ya Eufrati, ne u si ka itinga fa ku nela kwa pula. Mwa sibaka sa ku kutela teñi k’o, niteñi, Abrame a buluka tumelo ya hae ku Jehova ni ku falulela kwa lineku li sili—Egepita. F’o ne ku na ni kozi. Ka ku ba ni musali ya buheha, muzamai, Abrame, bupilo bwa hae ne bu li mwa kozi ku yona naha yeo ye sienyi. Nihakulicwalo, a’ nga mihato ye lukela ka ku kupa Sarai kuli a pate swalisano ya bona ya linyalo. Jehova a fuy’ola Abrame bakeñisa tumelo ya hae, mi hañi-hañi n’a konile ku kutela kwa Naha ya Sepiso ka sifumu se situna ku fita pili.—Genese 12:10–13:2; 20:12.

13. Ki sifi se si swanisezwa ki muinelo wa Sarai wa ku ba mumba ni ku pata kwa Abrame swalisano ya linyalo ni yena?

¹³ Se hape ne si fitile fa ku ba nguli ya bupolofita ili yeo Abrame ka ku sa lemuha n’a i ezize kuli lu lutiwe. Sarai, ili y’o na sa li mumba, n’a swaniseza kopano ya Jehova ya kwa lihalimu ya mangeloi a sepahala ye swana sina musali. Yena musali y’o ya buheha wa swanisezo n’a na ni ku libelela ka lilimo ze fitelela 4,000 pili a si ka kona kale ku tahisa peu ya niti ya Abrahama yo Mutuna, Jehova Mulimu. Ku nyandiswa ko ku tuna kwa batanga ba Mulimu ba ba sepahala mwahal’a zona lilimo zeo za ku libelela fokuñwi ne ku bonahala kuli inge Jehova n’a patile swalisano ya hae ya ku ba munna wa yena musali y’o.—Genese 3:15; Isaya 54:1-8; Magalata 3:16, 27, 29; 4:26.

14. (a) Kwa nalule-lule ki muhato ufi w’o Sarai n’a u ngile kwa neku la ku ba kwa hae mumba? (b) Ki sifi se ne si ezahezi mwa silimo sa Abrame sa bu 100, mi ki kabakalañi?

¹⁴ Hamulaho wa ku tiyela muinelo wa ku ba muzwahule ka lilimo ze lishumi, Abrame na si ka fita kale fa ku ba ni mwana wa mushimani sina muyoli. Ka ku ba ni takazo ye tuna hahulu, Sarai a mu kupa kuli a tahise lusika ka musali ya n’a li mutang’a hae, Hagare. Abrame a lumela mi Ishimaele n’a pepilwe. (Genese 12:4; 16:1-4, 16) Kono peu ye ne i sepisizwe ya mbuyoti ne i na ni ku taha ka mutu u sili. Mwa silimo sa Abrame sa bu 100, libizo la hae ne li cincizwe ka ku ba Abrahama, sina Mulimu ha n’a bulezi kuli, “ni ka ku beya ndat’ahe macaba a mañata.” Libizo la Sarai ne li cincizwe ka ku ba Sara ka sepiso ya kuli u ka pepa mwana wa mushimani.—Genese 17:1, 5, 15-19.

15. (a) Ki kabakalañi Abrahama ha n’a sehile ka za muhupulo wa kuli Sara n’a ka mu pepela mwana wa mushimani? (b) Ki bupaki mañi b’o Abrahama n’a zwezipili ku bonisa ka za tumelo ya hae ye tiile?

¹⁵ Abrahama (hamulaho ni Sara) n’a sehile ka za muhupulo wo kakuli m’ata a hae hamoho cwalo ni a Sara a ku kona ku pepa bana na felile. (Genese 17:17; 18:9-15) Kono k’o ne si ku seha kwa ku tokwa tumelo. Sina Bibele ha i talusa: “N’a sa fokoli mwa tumelo, . . . ka sepiso ya Mulimu . . . a itiisa mwa tumelo, inz’a lumbeka Mulimu; A kolwa kuli s’a sepisize Mulimu, u na ni mata a ku si eza.” (Maroma 4:18-21) Ka lona lizazi le li swana leo, Abrahama a fa bupaki bwa tumelo ya hae ye tiile. Ka ku ba sina sisupo sa bulikani bwa Mulimu ni yena, Jehova a taluseza Abrahama ku ya kwa mupato hamohocwalo ni banna kaufela ba ndu ya hae ye ne ili ye tuna. (Genese 15:18-21; 17:7-12, 26) Ki ufi muhato wa n’a ngile kwa neku la yona taelo yeo ye butuku? “A ba kenya mwa mupato ka lona lizazi leo, mw’a n’a mu bulelezi Mulimu.”—Genese 17:22-27.

16. (a) Ki sifi se ne si ezahezi fa lizazi la ku kwisiwa kwa Isaka? (b) Ku lelekiswa kwa Hagare ni Ishimaele ne ku yemela nto mañi?

¹⁶ Isaka, y’o libizo la hae li talusa “Liseho,” n’a pepilwe ki Sara silimo se ne si tatama. (Genese 21:5, 6) Hañi-hañi nako ya fita ya kuli a kwisiwe. Mwahal’a mukiti, Ishimaele ya n’a na ni sitoyo a nyandisa Isaka. Ka seo, Sara ka tundamo ye tuna a susueza Abrahama kuli a leleke musali wa mutanga, Hagare, ni mwan’a hae ka ku ba zwisa mwa lubasi. Jehova Mulimu a yemela kupo ya Sara. Nihaike n’a tabehile kwa pilu, Abrahama n’a utwile seo ka putako. (Genese 21:8-14) Ka ku ya ka Magalata 4:21-30, seo ne si swaniseza ka m’o Abrahama yo Mutuna n’a ka feliseza swalisano ya hae ni sicaba sa Isilaele wa ka sipepo. Ka ku swana sina mufuta wa mutu kaufela, ne ba pepezwi mwa butanga bwa sibi. (Maroma 5:12) Kono hape ne ba hanile Jesu Kreste, Peu ya niti ya Abrahama, ya n’a tile ku to ba lukulula. (Joani 8:34-36; Magalata 3:16) Mi sina Ishimaele ha n’a nyandisize Isaka, ne ba nyandisize puteho ya Sikreste ya Isilaele wa kwa moya ye ne i sa z’o tomwa, ba ne ba li kalulo ya bubeli ya peu ya Abrahama.—Mateu 21:43; Luka 3:7-9; Maroma 2:28, 29; 8:14-17; 9:6-9; Magalata 3:29.

Tiko Ya Hae Ye Tuna Ka Ku Fitisisa ya Tumelo

17. Tumelo ya Abrahama ne i likilwe ka butuna hamulaho kamukwaufi?

¹⁷ Ki nto ye sa libelelwi kuli ndate ufi kamba ufi wa butu n’a ka ba ni lilato ku mwana le li fita leo Abrahama ya n’a s’a supezi n’a na ni lona ku Isaka. Ne i bile kakamalo kwa butuna, kacwalohe, muta na amuhezi taelo ye: “U nge mwan’a hao wa libanda, y’o lata hahulu, yena Isaka; u ye mwa naha ya Moria, u y’o mu eza sitabelo sa ku cisa, fahalimu a lilundu le ni ka ku supeza.”—Genese 22:1, 2.

18. Ki ufi muhato wa n’a ngile Abrahama fa taelo ya Jehova ya ku fa Isaka sina sitabelo?

¹⁸ Ne ku kana ku bile ko ku tata ku Abrahama ku utwisisa libaka la taelo yeo ye tahiseza mutu maswabi a matuna. Niteñi na bonisize ku utwa kwa hae kwa kamita ili kwa ka putako. (Genese 22:3) Ne ku mu ngile mazazi a malalu a mabangatiko ku fita fa lilundu le ne li ketilwe. Teñi k’o a yaha aletare ni ku beya likota fahalimu. Ka yona nako yeo, na kana a talusize kale taelo ya Mulimu ku Isaka, ili y’o ka bunolo n’a ka be a ngwilimani ka ku baleha. Ka ku fapahana, Isaka a lumeleza ndat’ahe wa musupali ku mu tama kwa mazoho ni kwa mautu ni ku mu lobaza fa aletare. (Genese 22:4-9) Lu kona ku bulela kuli ku ipeya ku utwa ko ku cwalo ne ku zwa fa nto mañi?

19. (a) Lu kona ku talusa kuli ki nto mañi ye ne i tahisize kuli Isaka a ipeye kwatasi ka bundume? (b) Swalisano ye mwahal’a Abrahama ni Isaka ki tuto kwa mabasi a Sikreste kacenu kamukwaufi?

¹⁹ Abrahama ka busepahali n’a talelelize buikalabelo bwa hae ka ku ama ku Isaka, sina ka mo ne ku boniselizwe kwa Genese 18:19. Ku si na ku kakanya n’a koñomekile ku Isaka mulelo wa Jehova wa ku zusa ba ba shwile. (Genese 12:3; Maheberu 11:17-19) Isaka, kwa neku la hae, n’a latiwa ki Abrahama ka lilato le li tungile hahulu mi n’a kana a bile ya bata ku tabisa ndat’ahe mwa lika kaufela, sihulu seo ha ne si ama ku eza tato ya Mulimu. Ki tuto ye nde hakalo kwa mabasi a Sikreste kacenu!—Maefese 6:1, 4.

20. Abrahama n’a ipeile ku utwa kamukwaufi, mi ki sifi se ne si zwile mwateñi?

²⁰ Cwale masetela a tiko na s’a fitile. Abrahama a swala tipa ya ku bulaisa. Kono ha n’a li bukaufi ni ku bulaya mwan’a hae, Jehova a mu tuhelisa ni ku bulela kuli: “Cwale, ni ziba kuli u saba Mulimu; ha u si ka ni hanisa mwan’a hao wa libanda.” (Genese 22:11, 12) Abrahama n’a filwe mupuzo ka butuna hakalo ka ku ikutwela zibahazo ya Mulimu ka sibili ya ku luka kwa hae! Cwale n’a kona ku ikutwa ku ba ni buniti bwa ku taleleza seo Mulimu n’a si tokwa ku mutu ya si ka petahala. Sa butokwa ni ku fita ki sa kuli, ku likanyeza kwa Jehova tumelo ya hae kwa makalelo ne ku fumanehile ku ba ko ku buniti. (Genese 15:5, 6) Hamulaho wa se, Abrahama a eza totolo sitabelo ye ne i filwe ka makazo mwa sibaka sa Isaka. Cwale a ikutwela Jehova inze a koñomeka, ka ku konka, lisepiso za bulikani. Hamulaho, n’a fitile fa ku zibahala sina mulikan’a Jehova.—Genese 22:13-18; Jakobo 2:21-23.

21. Ki swanisezo ifi ya bupolofita ye ne i filwe fa, mi i swanela ku lu susueza ku bata nto mañi?

²¹ Sitabelo sa na ezize Abrahama ne li “swanisezo.” (Maheberu 11:19, NW) Ne si yemela sitabelo se si butuku, ili sa teko ye pahami seo Jehova Mulimu n’a ezize ha n’a lumile Mwan’a hae ya latiwa fa lifasi-mubu ku to shwa sina “Ngunyana [ya] Mulimu ya zwisa sibi sa lifasi.” (Joani 1:29) Mi ku itatela kwa Isaka ku shwa ku swaniseza ka m’o Isaka yo Mutuna, Jesu Kreste, ka lilato n’a ipeile kwa ku eza tato ya Ndat’ahe wa kwa lihalimu. (Luka 22:41, 42; Joani 8:28, 29) Kwa mafelelezo, sina Abrahama ha n’a amuhezi mwan’a hae inze a pila ku zwelela fa aletare, Jehova n’a amuhezi Mwan’a hae ya latiwa ku zwa kwa bafu sina sibupiwa sa kwa moya se si mwa kanya. (Joani 3:16; 1 Pitrosi 3:18) Ona ze kaufela ki ze susueza hakalo ku bao ba ba bata bulikani ni Mulimu kacenu!

22. Sikwata se si ketilwe sa batu ba fa lifasi si se si fumani tuso kamukwaufi ku zwelela kwa lilato le li si na ni le li likana ni lona la Mulimu?

²² Ka ku bonisa tumelo ku ona muhato wo wa lilato o si na ni o likana ni ona kwa neku la Abrahama yo Mutuna, Jehova Mulimu, sikwata se si ketilwe sa batu ba fa lifasi ba se ba atuzwi kuli ki ba ba lukile sina bana ba Mulimu. (Maroma 5:1; 8:15-17) Ka ku ngiwa pili ku zwelela kwa Majuda mi cwale ni Balicaba, bona bao kaniti luli ba se ba fuy’ozwi ka Peu ya Abrahama, Jesu Kreste. (Likezo 3:25, 26; Magalata 3:8, 16) Ni bona cwale, ba fita fa ku ba kalulo ya bubeli ya peu ya Abrahama. (Magalata 3:29) Bona bao kwa mafelelezo ba fita fa palo ye eza 144,000 mi, ka ku swana ni Jesu, ba zusezwa kwa bupilo bwa kwa lihalimu hamulaho a ku iponahaza ili bona ku ba ba ba sepahala ku to fita ni fa lifu.—Maroma 6:5; Sinulo 2:10; 14:1-3.

23. (a) Bolule-lule ba sweli ba fuy’olwa ka bo masiyaleti ba peu ya Abrahama kamukwaufi? (2 Makorinte 5:20) (b) Ki limbuyoti mañi ze ñwi ze libelezi “buñata bo butuna” kwapili?

²³ Ka nako ye, bolule-lule ba ba zwelela mwa macaba kamukana ba sweli ba ‘ifuy’ola ili bona’ ka ku nga kwa bona muhato fa bukombwa bo bu lilato bwa bo masiyaleti ba banyinyani ba peu ya Abrahama. (Genese 22:18) Ba se ba nyakalalile ka ku ituta ka m’o batu ba ba mwa sibi ba kona ku bulela kuli ki ba ba lukile sina balikani ba Mulimu. Ka lona libaka le, “buñata bo butuna . . . [ba] ba zwa mwa macaba kaufela” ba ikola sishemo sa Mulimu, kakuli “ba tapisize liapalo za bona, ba li sweufalize mwa mali a Ngunyana.” Ka ku ba ni bo masiyaleti ba b’a nga muhato wa ku etelela, ni bona hape ba fa Mulimu sebelezo ye kenile ka “ku mu sebeleza musihali ni busihu.” Se si beilwe fapil’a bona buñata bo butuna b’o ki sepo ye makaza ya bupilo bo bu sa feli mwa Paradaisi ya fa lifasi-mubu sina “bana ba Mulimu.” (Sinulo 7:9-17; 21:3-5; Maroma 8:21; Lisamu 37:29) Niteñi, pili limbuyoti za mufuta o cwalo li si ka fita kale fa ku ba teñi tenyene, likezahalo za butokwa bo butuna li lukela ku ezahala, sina ha lu ka ituta seo mwa taba ye latelela.

Lipuzo za Lundululo

◻ Tumelo ya Abrahama ni ba ndu ya hae ne i likilwe cwañi?

◻ Bakreste kacenu ba se ba bonisize tumelo ye swana kamukwaufi?

◻ Ki mwa linzila mañi ze ñwi zeo Abrahama n’a bonisize tumelo?

◻ Abrahama, Sara, ni Isaka ki mitala ya mabasi a Sikreste kamukwaufi?

◻ Ki sifi se ne si swanisezwa ki kezo ye tuna ka ku fitisisa ya tumelo ya Abrahama?