Ku Kwalula Nzila ya ku Kutela kwa Paradaisi

“Jesu a li ku yena: ‘Kaniti na ku bulelela, kacenu u ka ba ni na mwa [Paradaisi, “NW”].’”—LUKA 23:43.

 1, 2. (a) “Paradaisi” i talusa nto mañi, mi simu ya Edeni ne i lukela ku swana sina nto mañi? (b) Linzwi la Siheberu la “simu” li tolokilwe cwañi mwa Mañolo a Sigerike a Sikreste?

LUBASI lwa mufuta wa mutu ne lu kalezi mwa Paradaisi. Ka ku ama fa ku bupiwa kwa mutu, lu bala mwa buka ya pili ya Mañolo a Kenile kuli: “[Jehova] Mulimu a bupa mutu ka liluli la lifasi, mi a bululela mwa lingo za hae moya wa ku pila, mi mutu a ba moyo o pila. [Jehova] Mulimu a cala simu ya Edeni, kwa neku la upa, mi a beya mwateñi mutu y’a n’a bupile.” (Genese 2:7, 8) Libizo la “Edeni” li talusa “Ku Wabelisa,” mi ka lona libaka le simu ya Edeni ne li lihae le lituna le li wabelisa, le ne li na ni likalulo ze buheha ze fitana-fitana.

² Linzwi la “paradaisi” li zwelela fa puo ya Sigerike, mi mwa puo yeo li talusa simu ye swana sina lihae. Linzwi la Sigerike le li itusisizwe mwa ku toloka linzwi le li li libizo la Siheberu la gan, ili ku talusa “simu,” ki pa·raʹdei·sos. Mañolo a kalela ku la Mateu ku to fita fa Sinulo n’a ñozwi mwa puo ya Sigerike, mi lona linzwi leo la Sigerike ne li itusisizwe mwa ku ñola litaba ze ne li bulezwi ki Mulena Jesu Kreste ha n’a inzi mwa manyando bakeñisa katulo ya lifu fa kota ya linyando kwa Calvary ka Nisani 14 ya silimo sa 33 C.E.

Sepiso ya Jesu ya Paradaisi ku Sisinyi

 3. (a) Sisinyi ya na ni makeke n’a kupile nto mañi ku Jesu? (b) Kupo ya sisinyi ne i bonisa nto mañi ka ku ama ku seo n’a si lumela ka za Jesu?

³ Ka yona nako yeo, lisinyi ze peli ne li kokotezwi mabapa ni Jesu. Se siñwi sa lisinyi ne se si tuhezi ku bulela ku Jesu ka mukwa wa ku sheununa w’o sisinyi se siñwi se ne si kokotezwi kwa lineku le liñwi la Jesu ne si zwelapili. Sisinyi se si na ni makeke sa fetuha ni ku bulela kuli: “[Jesu], u ni hupule ha u kena mwa mubuso wa hao,” kacwalo a bonisa tumelo kuli Jesu, nihaike n’a kokotezwi mabapa ni yena, u ka ba ni mubuso mwa nako ya kwapili. (Luka 23:42; Mareka 15:32) Seo ne si amile ka butuna hakalo pilu ya Mulena Jesu! Yena sisinyi y’o wa silikani n’a lumela kuli Jesu Kreste n’a si na mulatu ni kuli n’a sa swanelwi ki koto ye tuna ya mufuta o cwalo ya ku kokotelwa ka kashwau ka ka tuna fapil’a nyangela. (Luka 23:41) Ka kupo ya hae n’a bonisize kuli n’a lumela kuli Jesu n’a ka zusiwa ku zwa kwa bafu ni kuli n’a ka taha mwa mubuso. Sisinyi hape n’a bonisize tumelo kuli yena ka sibili na ka kona ku ba ni zuho ni kuli Jesu ne i ka ba Yena ya n’a ka mu biza ku zwelela kwa bafu ni ku mu shemuba ka bupilo bo bunca fa lifasi-mubu.

 4. Jesu n’a alabile kupo ya sisinyi kamukwaufi, ili ku bonisa nto mañi?

⁴ Jesu ha n’a bulezi ku yena kuli: “Kaniti na ku bulelela, kacenu u ka ba ni na mwa [Paradaisi, NW],” n’a supa kwa zuho ya sisinyi y’o ya na ni makeke. Seo ne si bile ku omba-ombiwa luli kwa neku la sibangoki ya n’a bonisize tumelo. Kuli zuho ya mutu y’o i kone ku ba teñi, Jesu n’a na ni ku zusiwa pili. Cwale, ka ku itusisa m’ata a hae a zuho a’ filwe ki Mulimu, Jesu n’a ka biza ka ku zwisa yena sisinyi yo kwa bafu ka lizazi la zuho ya lifasi la mufuta wa mutu.—Luka 23:43; Joani 5:28, 29; 1 Makorinte 15:20, 23; Maheberu 9:15.

 5, 6. (a) Ki sifi seo Mubusisi Ponse Pilato n’a tahisize kuli si ñolwe fahalimw’a Jesu ya n’a kokotezwi? (b) Ka mo ku bonahalela Jesu n’a bulela ku sisinyi mwa puo mañi?

⁵ Jesu n’a file sepiso yeo mwa puo mañi? Li sikai ne li itusiswa ka nako yeo. Se si boniswa ki manzwi ao Mubusisi Ponse Pilato n’a laezi kuli a ñolwe ni ku pahekwa fahalimw’a toho ya Jesu Kreste ya n’a kokotezwi, ku mu zibahaza ku be ne ba fita mwa nzila kaufela kuli ba bale. Taba ye kwa Joani 19:19, 20 i talusa kuli: “Pilato a ñola liñolo, mi a li paheka fa [kota ya linyando, NW]. Ne ku ñozwi kuli: ‘Jesu wa Nazareta, Mulena wa Majuda.’ Majuda ba bañata ba bala liñolo leo, kakuli sibaka mw’a n’a kokotezwi Jesu fa [kota ya linyando], ne si inzi fakaufi ni munzi. Liñolo ne li ñozwi ka Siheberu, ka Siroma, ni ka Sigerike.”

⁶ Bakeñisa sa ku pepelwa mwa Betelehema ki mahe wa mwalyanjo, Maria, Jesu n’a pepilwe sina Mujuda, kamba Muheberu. Ka mo ku inezi, mwa ku kutaza kwa hae ka lilimo ze talu ni licika mwa naha yeo n’a pepezwi ku yona, ka mo ku bonahalela n’a kutalize mwa puo ya Sijuda, kamba Siheberu ye ne i bulelwa ka nako yeo. Kacwalo, ha n’a ezize lipulelo ze omba-omba ku sisinyi ya na ni makeke, ka mo ku inezi fela n’a bulezi mwa Siheberu. Kacwalo n’a itusisize linzwi la Siheberu la gan ha n’a supa kwa Paradaisi—ili linzwi le li fumaneha kwa Genese 2:8. Teñi k’o, toloko ya Sigerike ya Septuagint ya Mañolo a Kenile i itusisa linzwi la pa·raʹdei·sos ha i toloka linzwi la kwa makalelo la gan.

 7. Jesu n’a filwe kanya kamukwaufi ha na zusizwe?

⁷ Jesu na zusizwe kwa bafu ka lizazi la bulalu hamulaho a ku kokotelwa kwa hae, kamba ka Nisani 16 ya kalenda ya Siheberu. Hamulaho a mazazi a’ mashumi a mane a kutela kwa lihalimu, sibaka sa hae sa kwa makalelo, fela kikuli cwale u se a li mwa mayemo a pahami ni ku fita. (Likezo 5:30, 31; Mafilipi 2:9) Cwale u se a apesizwe ku sa shwa, muinelo w’o a abana ni Ndat’ahe wa lihalimu. Jehova Mulimu ki yena fela ya n’a li Muluwi wa ku sa shwa konji fa zuho ya Jesu kwa bafu la Sunda, Nisani 16.—Maroma 6:9; 1 Timotea 6:15, 16.

Tiululo I Kwalula Nzila

 8. Ki ufi mulelo wa Jehova wa kwa makalelo kwa neku la lifasi-mubu, mi ki sifi se si bonisa kuli u sa tiyezi fa mulelo w’o?

⁸ Yona ye kaufela ne li mihato mwa mulelo wa Mulimu wa ku tahisa kuli lifasi kamukana li apeswe ku buheha kwa paradaisi, ee, ku fita fa ku ba paradaisi ya lifasi kamukana. (Genese 1:28; Isaya 55:10, 11) Kwa 1 Makorinte 15:45, muapositola Paulusi u supa ku Jesu sina “Adama wa mafelelezo.” Se si bonisa kuli Mulimu u sa tiyezi fa mulelo wa hae wa kwa makalelo kwa neku la lifasi-mubu ni kuli mutu yo muñwi u ka taleleza ona mulelo w’o wa n’a palezwi ku taleleza Adama wa pili.

 9. Ki sifi seo Jesu n’a si file ili ku kwalula nzila ya ku kutela kwa Paradaisi?

⁹ Ka ku ya ka Paulusi, Jesu n’a file “tifo ye liulula.” (1 Timotea 2:6) Jesu Kreste yena ka sibili na bulezi kuli: “Sina Mwan’a mutu ya si ka taha kuli a sebelezwe, kono ili ku sebeleza, ni ku fa bupilo bwa hae, kuli a liulule ba bañata.” Se ne si konisize kuli bao ba ba bonisa tumelo ku Jesu Kreste ba kone ku fumana bupilo bo bu sa feli.—Mateu 20:28; Joani 3:16.

10. (a) Ki sifi seo Mulimu a si atuzi ka ku ama kwa palo ya makutela-kaufi ya batu ba ba shemubilwe? (b) Ku ketiwa kwa “mutapinyana” ne ku kalile lili, mi ki ka mañi?

¹⁰ Jesu ha n’a kambamezi kwa lihalimu hamulaho a zuho ya hae kwa bafu, na kona ku tahisa teko ya sitabelo sa hae sa tiululo ku Mulimu kwa neku la lubasi lwa mufuta wa mutu. Niteñi, ne li mulelo wa Ndat’ahe wa lihalimu, Jehova Mulimu, ku ikungela mwahal’a macaba a lifasi-mubu “sicaba se si sumekelwa libizo la hae.” (Likezo 15:14) Ka ku ya ka Sinulo 7:4 ni 14:1-4, ne ba na ni ku ba batu ka buñwi ba palo ye fita fela fa 144,000, “mutapinyana,” ba ba bizelizwe kwa Mubuso wa lihalimu wa Mulimu. (Luka 12:32) Ku ketwa kwa bona bao ba ba shemubilwe ka nzila ye ipitezi ba Jehova Mulimu ne ku kalisize ka ku ketiwa kwa baapositola ba Jesu Kreste ba 12. (Mateu 10:2-4; Likezo 1:23-26) Jesu n’a bulezi kwa lilama ba ne ba li mitomo ya puteho ya hae kuli: “Hasi mina mu ni ketile, kono ki na ni mi ketile.” (Joani 15:16) Bona bao ne ba ka etelela musebezi wa ku kutaza ka za Paradaisi ya lifasi kamukana mwatas’a puso ya Mubuso.

Ku Taha kwa ka Nako kwa Mubuso

11. Mubuso wa Bumesia ne u ka tomiwa l’ili?

¹¹ Ka libizo la Mulena Jesu Kreste, luna kacenu lu zwelapili ku fa tapelo ku Jehova kuli Mubuso wa hae u tahe. (Mateu 6:9, 10; Joani 14:13, 14) Mubuso wa Bumesia ne u na ni ku tomwa kwa mafelelezo a “linako za bamacaba.” (Luka 21:24) Zona Linako za Bamacaba zeo ne li talelelizwe mwa silimo sa 1914.a

12. Ki sifi se ne si ezahezi ka 1914 ka ku swalisana ni bupolofita bwa Jesu bwa lika ze komokisa ze ne li ka bonisa ku ba teñi kwa hae ka ku sa bonahala?

¹² Silimo seo ne si zibahezi ka ndwa ya lifasi ya pili mwa litaba za mufuta wa mutu kaufela. Seo si lumelelana ni bupolofita bwa Jesu ka za lika ze komokisa ze ne li ka bonisa ku ba teñi kwa hae ka ku sa bonahala mwa m’ata a Mubuso fahalimw’a lifasi-mubu. Balutiwa ba hae ne ba mu buzize puzo ye li: “U lu bulelele zeo fo li ka bonahalela, ni se si ka supa ku taha kwa hao, ni ku fela kwa lifasi.” Ka ku alaba Jesu n’a bulezi kuli: “Kakuli sicaba si ka lwanisa sicaba se siñwi, mubuso u lwanise mubuso o muñwi, mi litala li ka ba teñi, ni lizikinyeho za lifasi. Kono zeo kaufela li ka ba makalelo fela a manyando. [Taba ye nde, NW] ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.—Mateu 24:3, 7, 8, 14; Mareka 13:10.

13. (a) Ku kutaziwa kwa Mubuso wa Mulimu ki taba ye nde kamukwaufi? (b) Litapelo za ku kupa kuli Mubuso wa Mulimu u tahe li se li filwe ka butelele bwa nako ye kuma kai, mi kana lipaki za hae fa lifasi-mubu ha ba si ka katala ni kamuta mwa ku fa litapelo zeo?

¹³ Taba ye nde ye ya Mubuso wa Jehova cwale i sweli ya kutaziwa mwa manaha a fitelela 200, mi mihato i sweli ya eziwa mwa ku i yandululela mwa manaha a mañwi. Ki taba, isi ya puso ya lifasi ye na ni ku taha, kono ki ya mubuso o inzi mwa m’ata cwale, o sweli ku busa. Ona Mubuso w’o ne u tomilwe ka 1914. Ne u beile mutomo wa kalabo kwa tapelo yeo Jesu n’a i bonisize lilimo ze fitelela 1,900 ze felile. Yona tapelo yeo i se i filwe ku Mutomi wa Mubuso w’o haisali ku zwiwa f’o yena ya n’a ka ba Mulena wa mulonga w’o n’a lutezi balutiwa ba hae ku u lapelela. Kacwalo Mutateki wa ona Mubuso wo u se a ikutwezi kupo ya ka za ona ka nako ye telele hahulu. U se a tabile ka ku ikutwela litapelo ze fiwa ku yena ki lipaki za hae fa lifasi-mubu mwahal’a yona nako yeo kaufela, kakuli ne si bonisa kuli ne ba tiile mwa tumelo ya kuli Mubuso ne u ka taha. Ne ba si ka katala mwa ku fa tapelo yeo ku “Ndat’a luna ya kwa lihalimu,” sina inge kuli ne se i fitile fa ku ba ye si na tuso ku bona.—Mateu 6:9, 10.

14. Ki kabakalañi Lipaki za Jehova ha ba tundamezi ku kutaza taba ye nde ya Mubuso wa Mulimu?

¹⁴ Hailifo Lipaki za Jehova ba lumela ni ku zibahaza kuli Mubuso ne u tomilwe ka 1914 mwa mahalimu, ba zwelapili ku kutaza taba ye nde ye ya Mubuso. Ba eza cwalo bakeñisa kuli Mubuso o tomilwe ha u si ka nga kale tamaiso ye tezi ya lifasi-mubu kono u lumelelize mibuso ya lifasi le ku zwelapili ku itusisa m’ata ni tamaiso ya yona fahalimw’a mishobo ni masika kamukana a mufuta wa mutu. (Maroma 13:1) Kacwalo u lukela ku taha mwa kutwisiso ye tezi, fo kikuli, fa sipimo sa kuli ki ona mulonga fela o na ni m’ata fahalimw’a lifasi-mubu kamukana.—Daniele 2:44.

15. Ki sifi se si sweli ku ezahala haisali ku zwiwa fa Pentekonta ya 33 C.E. se si eziwa ka sipimo se si makaza ku fita fo ne ba tozezwa malena ba Isilaele?

¹⁵ Nihaike kuli Jesu u beilwe sina Mulena wa ona Mubuso w’o, h’a busi a li nosi. Jehova Mulimu u ketile balateleli ba Mwan’a hae wa silena ba 144,000 sina babusi hamoho ni yena mwa Mubuso wa Mulimu wa Bumesia. (Daniele 7:27) Sina malena ba mwa Isilaele wa ikale ha ne ba toziwangwa ka mafula a kenile ki muprisita yo mutuna, kacwalo haisali ku zwiwa fa lizazi la Pentekonta ya 33 C.E., Jehova u se a tahisize kuli ba ba ka busa hamoho ni Jesu Kreste ba 144,000 ba toziwe ka moya wa Hae o kenile, ku ba ngela kwa bupilo bwa kwa moya mwa mahalimu ku y’o ba ni “Mulena wa malena, ni Mubusisi wa babusisi.”—Sinulo 19:16; mu bapanye 1 Malena 1:39.

Paradaisi i ka Kutiswa Sinca ki “Adama wa Mafelelezo”

16. Ki ufi o ne u li mubonelo kwa neku la Mubuso fa ku kokotelwa kwa Jesu, kono ki kabakalañi ha n’a si ka ba muzibahazi wa taba ye fosahalile?

¹⁶ Fa ku kokotelwa kwa Jesu ka 33 C.E., ne ku sa bonahali luli kuli n’a kona ku ba ni mubuso. Kono mwa ku kutaza kwa hae Mubuso wa Mulimu, n’a si muzibahazi wa taba ye fosahezi. Fa lizazi la bulalu hamulaho a ku kokotelwa kwa hae, Mutomi wa Mubuso n’a boni teñi kuli balutiwa ba Jesu ne ba si ke ba fa tapelo ya ka za mulonga o ne u sa koni ku ba teñi. Jehova n’a zusize Y’o n’a ka Mu yemela mwa Mubuso o ne u lapelelwa ni ku mu apesa ku sa shwa.

17, 18. (a) Ki bufi butokwa bwa ku biziwa kwa Jesu kuli ki “Adama wa mafelelezo”? (b) Likezahalo za lifasi haisali ku zwiwa ka 14 li bonisa nto mañi?

¹⁷ Jesu n’a zibile kuli Mubupi wa Paradaisi ya makalelo fa lifasi-mubu n’a ka beya fahalimw’a hae buikalabelo bwa ku kutisa sinca Paradaisi ni ku bona teñi kuli simu ya lifasi kamukana i tala ka batu. Kwa 1 Makorinte 15:45, 47, lu bala kuli: “Kakuli ki mo ku ñolezwi, kuli: ‘Mutu wa pili, Adama, u ezizwe [moyo, NW] o pila;’ mi Adama wa mafelelezo u ezizwe moya o pilisa. Mutu wa pili neli wa lifasi, wa mubu; wa bubeli ki wa lihalimu.” Adama wa bubeli n’a zwile kwa lihalimu mi ki yena ya itusiswa ki Jehova mwa ku toma sinca Paradaisi fa lifasi-mubu fa. Ki fona fa mutomo f’o Mulena Jesu ha n’a bulezi ku sisinyi ya na ni makeke kuli: “U ka ba ni na mwa [Paradaisi, NW].” (Luka 23:43) Ku zwelela fa puhisano yeo ku konwa ku bonwa hape kuli Paradaisi i ka tomiwa fa lifasi-mubu mwatas’a Mubuso wa lihalimu mwa mazoho a Jesu Kreste ya filwe kanya, “Adama wa mafelelezo.”

¹⁸ Likezahalo za lifasi haisali ku zwiwa ka 1914 li swalisana ni bupolofita bo ne bu bulezwi ki Jesu Kreste mi kacwalo li fa bupaki bwa kuli Jesu u se a bile mwa m’ata haisali ku zwiwa f’o. Mwahal’a lilimo ze fitelela mashumi a supile cwale, batu ba lusika lo lwa mwa lilimo za mwanda wo wa bu 20 ba ba pila haisali ku zwiwa ka 1914 ba se ba iponezi ku talelezwa kwa likezahalo ze kolokisizwe mwa bupolofita bwa Jesu bo bu fumanwa kwa Mateu kauhanyo 24. Kacwalo, yona kalulo ya nako ye i se i fita fa maungulo a yona, mi ku kutiswa kwa Paradaisi fa lifasi-mubu ku se ku li bukaufi.—Mateu 24:32-35; mu bapanye Lisamu 90:10.

Nako Ya Lifasi Le Linca Ye Tabisa I Fapilinyana

19, 20. (a) Hamulaho wa Armagedoni, ki mwa sikamañi m’o Jehova a ka kenya balatiwa ba hae? (b) Ki sifi se si ka tokwa ku ezwa hamulaho fela wa Armagedoni?

¹⁹ Muinelo wa linto m’o Jehova a ka tisa balatiwa ba hae ha u na ku ba o zwafisa, ili o sa tabisi hamulaho a ku tunafaza bubusi bwa hae bwa pupo kamukana ku si na katowati ka ku honona fa lishengo la ndwa ya Armagedoni. Nako ye taha kwa lubasi lwa mufuta wa mutu mwatas’a puso ye nde ya Mulena wa Bumesia, Jesu, Mwan’a Mulimu, i ka ba ye tabisa luli. Ha, ki lika kwa buñata ze ka tokwa ku eziwa ili za mufuta o na ni tuso! Mañiba kaufela afi kamba afi a ka siyala fa lundandala lwa lifasi-mubu ku zwelela fa ndwa ye ambeka lifasi kamukana mwahal’a limpi za lihalimu za Jehova ni limpi ze itukisize za bumaswe a ka zwisiwa. Ha ku na katowati ni ka ka kana ka ka ka siyala.

²⁰ Kono ku cwañi ka za lilwaniso za ndwa zeo macaba a ka siya kwamulaho? Ka ku beya mwa munahano ku boniswa kwa ka swanisezo kwa neku la butelele bwa nako ye ka ngiwa mwa ku sinya likalulo ze kona ku ciswa, li ka ba ze ñata hahulu. (Ezekiele 39:8-10) Bapunyuhi ba Armagedoni ba kana ba kona ku shakutula likalulo ze ñwi za lilwaniso za mwa ndwa za macaba ni ku li fetulela kwa milelo ye na ni tuso.—Isaya 2:2-4.

21. Ka ku swana ni muinelo o ne ba ipumani ku ona bapunyuhi ba Munda, ki muinelo mañi w’o bapunyuhi ba Armagedoni ba ka talimana ni ona, kono ili ka ku ba ni fapahano ifi ye tuna?

²¹ Sina Nuwe ni lubasi lwa hae ba ne ba li bapunyuhi ba Munda wa lifasi kaufela ka makazo, balikani ba bona ba mwa lizazi la cwale ba ka talimana ni muinelo wa fa lifasi o swana ni w’o Nuwe ni lubasi lwa hae ne ba ipumani ku ona. Niteñi, Satani Diabulosi ni limpi za hae za madimona ha ba na ku kataza mahalimu a sa bonahali a potolohile lifasi-mubu kono u ka paleliswa ka ku tala ku eza nto ni ye kana ka lilimo ze myanda ye lishumi. (Sinulo 20:1-3) Bapunyuhi ba Armagedoni ba ka ba ni likulutendano la ku busa lifasi-mubu le li fitile mwahal’a “lizazi le lituna la Mulimu Ya-Mata-Kaufela,” ku talimana ni lika kamukana ze tisizwe ki seo ze siyezi fa lifasi le.—Sinulo 16:14.

22. Bapunyuhi ba Armagedoni ba ka nga muhato mañi kwa neku la likulutendano la ku yandulula Paradaisi lifasi-mubu kamukana?

²² Ka ku ba ba palo ye nyinyani, bona bapunyuhi bao ba Armagedoni ka mo ku inezi fela ne ba kana ba libelelwa ku ba mwa sabo hahulu muta ba fiwa likulutendano la ku yandulula Paradaisi lifasi-mubu kamukana. Kono ka ku fapahana, ka tabo ye fitisisa, ba ka nga muhato o bundume ni wa ku ipeya ku utwa mi ni ku kalisa musebezi. Ba izibela ka ku tala kuli lona lifasi-mubu le ki sipula sa swanisezo sa fa hatela mautu a Mulimu, mi ka buniti luli ba bata kuli lona lifasi le la mufuta wa mutu li tiswe mwa muinelo o lateha ni o buheha o swanela kuli mautu a hae a be teñi fa.

23. Ki kemelo mañi yeo bapunyuhi ba Armagedoni ba na ni yona sina ona mutomo wa kuli musebezi wa bona wa ku kutisa sinca Paradaisi u ka be u kondile?

²³ Kwa tabisa ni ku susueza ku ziba kuli ha ba na ku siiwa ba nosi ni ba ba si na ya ba tusa hamulaho a ku nga sebelezo yeo ye tabisa mwa ku taleleza taelo ya bumulimu kwa neku la lifasi-mubu. (Mu bapanye Isaya 65:17, 21-24.) Ba ka ba ni kemelo ye tezi, ye si na maciñekelo ya Y’o ya n’a ezize sepiso ya Paradaisi ye kutisizwe sinca mi ili ya n’a bulezi fa ku kambamela kwa hae kwa lihalimu kuli: “Ni filwe bulena kaufela mwa lihalimu ni mwa lifasi.” (Mateu 28:18) U sa na ni bulena b’o, mi wa kona ku taleleza sepiso ya hae ye makaza ku sisinyi ya na ni makeke, sina ha lu ka bona mwa taba ye latelela.

[Litaluso za kwatasi]

Lipuzo Za Lundululo

◻ Sepiso ya Jesu kwa Calvary i koñomeka nto mañi kwa mufuta wa mutu ni ku sisinyi a li muñwi?

◻ Ki ufi mutomo mwa ku kwalula nzila ya ku kutela kwa Paradaisi?

◻ Ki sifi seo Adama wa pili n’a palezwi ku si eza, kono ki sifi seo “Adama wa mafelelezo” a ka si peta?

◻ Hamulaho wa Armagedoni, ki mwa muinelo wa linto o cwañi m’o Jehova a ka kenya balatiwa ba hae?

[Siswaniso se si fa likepe 13]

Taba ye li “Mafelelezo a Mibuso Kaufela mwa 1914” ne i bonahezi mwa “The World Magazine” ya August 30, 1914