Lutokwa Kuezañi Kuli Mulimu Aluunge Kuba Babakenile?

Luungeñi kuli me utusa mwanaa hae kuitukiseza kuya kwa sikolo. Mushemi yo ubona teñi kuli watapisa mwanaa hae, ni kumutinisa liapalo zekenile. Kueza cwalo kutusa mwanana yo kuba ni buiketo bobunde bwa kwa mubili mi taba yeo ibonisa babañwi kuli bashemi ba mwanana yo bamubabalela. Ka nzila yeswana, Ndataa luna ya lilato, Jehova, ubata kuli lube babakenile kwa mubili ni kuba ni muzamao omunde. Haluli babakenile lwaisileleza mi lukuteka Mulimu.

1. Lukona kuba cwañi babakenile kwa mubili?

Jehova ulubulelela kuli: “Mulukela kuba babakenile.” (1 Pitrosi 1:16) Luswanela kuba babakenile kwa mubili mi luswanela kuba ni muzamao omunde. Lukona kuba babakenile kwa mubili ka kutapanga fa mubili kamita ni kutapisa liapalo zaluna, kufiyela mwa ndu, ni kukenisa mota yaluna. Hape luswanela kukenisanga Ndu ya Mubuso. Haiba luba babakenile kwa mubili, lukabonisa kuli lwakuteka Jehova.—2 Makorinte 6:3, 4.

2. Ki mikwa ifi yeluswanela kuambuka kuli lube babakenile?

Bibele ilususueza kuli “luikeniseñi kwa lika kaufela zesilafaza nama ni moya.” (2 Makorinte 7:1) Kacwalo, lueza molukonela kaufela kuambuka nto kaufela yekona kuluholofaza kwa mubili ni mwa munahano. Zelunahana liswanela kutabisa Jehova, kacwalo, luswanela kutuhela kunahananga lika zemaswe. (Samu 104:34) Hape lulika molukonela kaufela kutuhela lipulelo zemaswe.—Mubale Makolose 3:8.

Ki lika mañi zeñwi zekona kulusifaza kwa mubili ni mwa munahano? Lika zeñwi zakona kusilafaza mibili yaluna. Kacwalo, luambuka lika zecwale ka kwai ni kuitusisa maswe milyani yekola. Haluambuka lika ze, lubonisa kuli lwakuteka mpo ya bupilo. Hape lukona kuba babakenile ka kuambuka mikwa yemasila ya kuicuka ni kubuha maswaniso a mapunu. (Samu 119:37; Maefese 5:5) Haki nto yebunolo kuambuka mikwa yemaswe yeo, kono Jehova wakona kulutusa kueza cwalo.—Mubale Isaya 41:13.

MUBATISISE

3. Haluba babakenile kwa mubili, lukuteka Jehova

Lwakona kuziba mubonelo wa Jehova ka za bukeni halunyakisisa milao yanaafile kwa Maisilaele ba kwaikale. Mubale Exoda 19:10 ni 30:17-19, mi kihona mukanyakisisa lipuzo zelatelela:

• Litimana ze libonisañi ka za mubonelo wa Jehova ka za bukeni bwa kwa mubili?

• Muswanela kuezangañi kuli muzwelepili kuba babakenile kwa mubili?

Lutokwa kueza molukonela kaufela kuli luzwelepili kuba babakenile kwa mubili. Mi lwakona kueza cwalo kusina taba ni kolupila, ibe kuli lu bafumi kamba lu babotana. Mubuhe VIDIO, mi kihona mukanyakisisa puzo yelatelela.

VIDIO: Mulimu Ulata Batu Babakenile (4:10)

• Haiba luzwelapilli kubuluka lika zaluna inze likenile, batu bolukutaza ku bona bakatusiwa cwañi kukuteka hahulu Jehova?

4. Mutuhele kuba ni mikwa yemaswe

Haiba muitabisanga ka kuzuba kwai kamba kuitusisa milyani yekola, mwendi mwaziba kuli kutaata kutuhela mikwa yeo. Ki lika mañi zekona kumitusa? Hamubone zekona kuzwa mwateñi haiba muzwelapili kuba ni mikwa yeo. Mubale Mateu 22:37-39, mi munyakisise mo kwai kamba kuitusisa maswe milyani yekola kukona . . .

• kusinyeza bulikani bwamina ni Jehova.

• kumitahiseza butata mwa lubasi lwamina ni balikani.

Mulike ka taata kutuhela mikwa yemaswe.a Mubuhe VIDIO.

VIDIO: Mube ni Buiswalo (2:47)

Mubale Mafilipi 4:13, mi kihona mukanyakisisa puzo yelatelela:

• Kulapelanga kamita, kuitutanga Bibele, ni kufumanehanga kwa mikopano kukona kutusa cwañi mutu kutuhela mukwa omaswe?

5. Mutuhele kunahana lika zemasila ni kuambuka kueza lika zemaswe

Mubale Makolose 3:5, mi kihona mukanyakisisa lipuzo zelatelela:

• Luziba cwañi kuli kubuha maswaniso a mapunu, kulumelana mashango ni maswaniso a buhule fa foni, ni kuicuka ki lika zemasila mwa meeto a Jehova?

• Kana mwautwisisa libaka halutokwa kuba babakenile mwa meeto a Jehova? Libaka?

Mubone zekona kumitusa kutuhela kunahana lika zemaswe. Mubuhe VIDIO.

VIDIO: Mulike ka Taata Kuzwelapili Kuba Babakenile (1:51)

Jesu naaitusisize swanisezo yeñwi kuli alutuse kubona libaka haluswanela kuzwelapili kuba ni muzamao okenile. Mubale Mateu 5:29, 30, mi kihona mukanyakisisa puzo yelatelela:

• Nihaike kuli Jesu naasatalusi kuli lwakona kuikolofaza kwa mubili, naabonisize kuli lutokwa kueza sesiñwi. Mutu uswanela kuunga muhato mañi kuli aambuke kunahana lika zemasila?b

Haiba musweli kuikataza kutuhela mikwa yemaswe, Jehova waitebuha buikatazo bwamina. Mubale Samu 103:13, 14, mi kihona mukanyakisa puzo yelatelela:

• Haiba musweli kuikataza kutuhela mikwa yemasila, liñolo le limisusueza cwañi kuzwelapili kuikataza kutuhela mikwa yeo?

Musike mwazwafa!

Kukona kumibela bunolo kubulela kuli, ‘Nenikutezi mukwa waka omasila, kacwalo niikutwa kuzwafa.’ Kono munahane taba ye: Mumati hasitatala ni kuwa hakutalusi kuli hakoni kuwina, kamba kuli utokwa kuyo kalela kwa makalelo kumata hape. Ka nzila yeswana, hamuikutwa kuzwafa bakeñisa kuli mupalezwi kutuhela mikwa yemaswe, hakutalusi kuli hamuna kukona kuituhela. Kono muise pilu kwa buikatazo bwamina. Fokuñwi mwakona kuzwafa bakeñisa kukutela mukwa omubata kutuhela. Kono musike mwazwafa! Jehova uka mitusa kutuhela mukwa omaswe.

LITABA KA BUKUSWANI

Lutabisa Jehova ka kuikenisa kwa mubili, mwa munahano, ni kuba ni muzamao omunde.

Mulundulule

• Ki kabakalañi kuba babakenile hakuli kwa butokwa?

• Mukona kuikenisa cwañi kwa mubili?

• Mukona kuba cwañi ni minahano ni muzamao omunde?

MUBONE LITABA ZEÑWI

Ki lika mañi zebunolo zemukona kueza kusina taba kuli mu babotana kamba mufumile?

Bukeni ni Kuba ni Makete—Kutapa Kwa Mazoho (3:01)

Mubone lika zekona kumitusa kutuhela kuzuba kwai.

“Mwakutuhelela Kuzuba” (Muzuhe!, July-September 2010)

Munyakisise bumaswe bwa kubuha maswaniso a mapunu.

“Kana Maswaniso A Mapunu Akona Kutisa Butata Kamba Kutokwa?” (Tawala ya Mulibeleli, August 1, 2013)

Mubone zenetusize muuna yomuñwi kutuhela kubuhanga maswaniso a mapunu.

“Nenipalezwi Hañata-ñata Kufitela Nikondisa” (Tawala ya Mulibeleli No. 4 2016)