Jehova Ulukisize Kuli Mube ni Tukuluho

1-2. (a) Jubile ki nto mañi? (Mubone mbokisi yeli, “Jubile Neli Nto Mañi?”) (b) Sina mokuboniselizwe kwa liñolo la Luka 4:16-18, Jesu naabulezi nto mañi?

MWA linaha zeñwi kueziwanga mukiti wa mulena hakwanisa lilimo ze 50 za kubusa. Silimo seo sabu 50 hañata sibizwa kuli Jubile ya mulena. Fokuñwi, batu baezanga mukiti wo ka lizazi lililiñwi, ka sunda, kamba mane kufitelela, kono hamulaho wa nako, mukiti wafelanga mi batu balibalanga kapili ka za teñi.

² Mwa taba ye, lukanyakisisa za Jubile yende hahulu yefita Jubile yenetandanga silimo, ili yene baezanga Maisilaele ba kwaikale ka silimo ni silimo sabu 50. Jubile yeo neitahisize tukuluho kwa batu bane baimamelanga. Ki kabakalañi haluswanela kuituta za taba yeo kacenu? Kabakala kuli mukiti wa Jubile wa ka silimo one baezanga Maisilaele uluhupulisa tukiso yende yaezize Jehova yelufa tukuluho yeinelela, ili tukiso yanaabulezi Jesu.—Mubale Luka 4:16-18.

 3. Ka kuya ka liñolo la Livitike 25:8-12, Jubile neitusanga cwañi Maisilaele?

³ Kuli luutwisise hande zanaatalusa Jesu ka za tukuluho, halunyakisiseñi pili za Jubile yanaalukiselize Mulimu sicaba sahae sa kwaikale. Jehova naabulelezi Maisilaele kuli: “Mulukela kukenisa silimo sabu 50 mi muzibahaze tukuluho kwa batu kaufela babapila mwa naha. Sikaba Silimo sa Tukuluho yamina, mi yomuñwi ni yomuñwi wa ku mina ukakutela kwa saanda sahae mi mañi ni mañi wa ku mina uswanela kukutela kwa lubasi lwahae.” (Mubale Livitike 25:8-12.) Mwa taba yefelile, nelunyakisisize za mo Maisilaele nebatusezwangwa ki tukiso ya kuba ni lizazi la Sabata sunda ni sunda. Kono cwale Maisilaele nebatusiwanga cwañi ki tukiso ya Jubile? Ka mutala, luungeñi kuli Muisilaele yomuñwi unani sikoloti, mi ulekisa mubu wahae kuli alife sikoti seo. Mwa silimo sa Jubile, mubu wo neuswanela kukutiswa ku yena. Kacwalo, Muisilaele yo ‘naakakutela kwa saanda sahae,’ mi hasamulaho bana bahae nebaka yola saanda seo. Kamba mwendi mutu yomuñwi naanani sikoloti sesituna hahulu kuli mane naatokwa kulekisa yomuñwi wa bana bahae mwa butanga, kamba kuitekisa yena muñi kuli alife sikoloti seo. Mwa silimo sa Jubile mutanga naatokwa “kukutela kwa lubasi lwahae.” Kacwalo, tukiso yeo neitahisanga kuli mutu asike azwelapili kuba mwa butanga asina sepo ya kuli ukalukululwa. Kaniti luli, Jehova waisa pilu batu bahae!

4-5. Ki kabakalañi haluswanela kuituta za Jubile ya kwaikale?

⁴ Jubile neitusize batu ka nzila ifi yeñwi? Jehova naabulezi cwana ka kuitusisa Mushe: “Hakuna mutu yaswanela kuba mubotana mwa sicaba sahenu, kakuli Jehova uka kufuyaula luli mwa naha yakufa Jehova Mulimu wahao kuli ibe saanda sahao.” (Deut. 15:4) Taba yeo ishutana hahulu ni zeezahala mwa lifasi kacenu, ili mo bafumi hañata bazwelapili kufuma mi babotana batotobela mwa bubotana bwabona.

⁵ Ka kuba Bakreste, halutokwi kumamela Mulao wa Mushe. Taba yeo italusa kuli haluezangi Jubile yene baezanga Maisilaele ba kwaikale yeama kulukulula batanga, kuswalela likoloti, ni kukutisa saanda sa mubu. (Maro. 7:4; 10:4; Maef. 2:15) Nihakulicwalo, ki kwa butokwa kuli luitute za Jubile. Kabakalañi? Kakuli kueza cwalo kulutusa kuitebuha tukuluho yelukaba ni yona kwapili sina feela Jehova hanaalukisize kuli Maisilaele bafumane tukuluho.

 6. Batu batokwa kulukululwa kwañi?

⁶ Kaufelaa luna lutokwa kulukululwa kakuli lu batanga ba sibi mi butanga bo, bumaswe hahulu. Bakeñisa kuli lu batanga ba sibi, lwasupala, kukula, ni kushwa. Batu babañata baiponezi buniti bwa taba yeo habatalima mwa siiponi ni kulemuha mose babonahalela ni habaya ku mualafi kakuli bakula. Hape lwazwafanga halueza sibi. Muapositola Paulusi naabulezi kuli naaisizwe mwa “butanga bwa mulao wa sibi o mwa mubili [wahae].” Naaekelize kubulela kuli: “Ni mutu yamaibile luli! Ki mañi yaka nilamulela kwa mubili onilibisa kwa lifu le?”—Maro. 7:23, 24.

 7. Isaya naapolofitileñi ka za tukuluho?

⁷ Kwatabisa kuziba kuli Mulimu ulukisize nzila ya kuli lulukululwe kwa sibi. Jesu ki yena yatahisa kuli tukuluho yeo ikonahale. Lilimo zefitelela 700 pili Jesu asika taha kale fa lifasi, mupolofita Isaya naapolofitile za tukuluho yetuna yenekaba teñi kwapili. Tukuluho yeo neika tusa hahulu batu kufita tukuluho yene babanga ni yona Maisilaele ka silimo sa Jubile. Naañozi kuli: “Moya wa Jehova Mulena Yapahami ka Kufitisisa, u fahalimwaa ka, kakuli Jehova unitozize kuli nishaele taba yende ku babaishuwa. Unilumile kuli nitame litombo za babalobehile lipilu, kuli nikutaze babahapilwe kuli bakalukululwa.” (Isa. 61:1) Bupolofita bo nebusupa ku mañi?

 8. Bupolofita bwa Isaya bobubulela za tukuluho nebusupa ku mañi?

⁸ Bupolofita bwa butokwa bobubulela za tukuluho bo, nebukalile kutalelezwa Jesu hasaakalisize bukombwa bwahae bwa fa lifasi. Hanaaile kwa sinagoge yeneli mwa tolopo yahabo yena ya Nazareta, Jesu naabalezi Majuda bane bakopanezi mwa sibaka seo manzwi aswana ao anaañozi Isaya. Jesu naabulezi kuli manzwi ao naasupa ku yena, aali: “Moya wa Jehova u fahalimwaa ka, kakuli yena unitozize kuli nishaele taba yende kwa babotana. Unilumile kukutaza babahapilwe kuli bakalukululwa ni kukutaza libofu kuli likabona, ni kulukulula babahatelezwi, ni kukutaza mwaha wa kushemubiwa ki Jehova.” (Luka 4:16-19) Jesu naatalelelize cwañi bupolofita bo?

 9. Ki tukuluho yecwañi yene balibelela batu babañata bane bapila ka nako ya bukombwa bwa Jesu bwa fa lifasi?

⁹ Ka nako ya bukombwa bwa Jesu bwa fa lifasi, batu nebakalile kufiwa tukuluho yanaapolofitile Isaya, ili yona hape yanaabalile Jesu ka za teñi. Jesu naabonisize kuli taba yeo ki ya niti hanaabulezi kuli: “Kacenu, liñolo lemusazo ikutwela le, litalelelizwe.” (Luka 4:21) Batu babañata bane bautwile zanaabalile Jesu mwendi nebalibelela kulukululwa kwa puso ya Maroma. Mwendi nebaikutwile sina mone baikutwezi balutiwa ba Jesu bababeli bane babulezi kuli: “Nelusepile kuli muuna yo ki yena yanaaswanela kupilisa Isilaele.” (Luka 24:13, 21) Niteñi, lwaziba kuli Jesu naasika laela balutiwa bahae kufetuhela Maroma bane bababusa ka taata. Kono naabataluselize kuli ‘bakutiseze Sesare zeli za Sesare.’ (Mat. 22:21) Kacwalo, Jesu naafile cwañi batu tukuluho ka nako yeo?

10. Jesu naalukuluzi batu kwa nto mañi?

¹⁰ Mwanaa Mulimu naatusize batu kuba ni tukuluho mwa linzila zepeli. Sapili, Jesu naatusize batu kulukuluha kwa lituto za buhata zene baluta baeteleli ba bulapeli, ili zeneimeza batu. Majuda babañata ka nako yeo nebahapelezwa kulatelela lizo ni litumelo za buhata. (Mat. 5:31-37; 15:1-11) Batu bane baipapata kuli nebatusa batu kulapela Mulimu nebasa lapeli Mulimu ka nzila yeswanela; kacwalo, nebaswana sina libofu. Bakeñisa kuli nebahanile Mesia ni lituto za niti zanaaluta batu, nebazwezipili kuba mwa lififi ni mwa sibi. (Joa. 9:1, 14-16, 35-41) Jesu naalukuluzi batu babaishuwa kwa moya ka lituto za niti zanaalutile ni kubatomela mutala omunde.—Mare. 1:22; 2:23–3:5.

11. Ki ifi nzila yeñwi yeo Jesu naafile batu tukuluho?

¹¹ Nzila yabubeli yeo Jesu naalukuluzi batu ka yona ki ka kubazwisa mwa butanga bwa sibi sene bahozize. Bakeñisa kuli Jesu naafile bupilo bwahae sina sitabelo, Mulimu uswalelanga libi za batu kaufela bababonisa tumelo ni babaamuhela tiululo yeo. (Maheb. 10:12-18) Jesu naabulezi kuli: “Haiba Mwana amilukulula, mukaba babalukuluhile luli.” (Joa. 8:36) Kaniti luli, tukuluho yeo neifitela kwahule tukuluho yene babanga ni yona Maisilaele mwa silimo sa Jubile! Ka mutala, mutu yomuñwi yanaalukuluzwi mwa silimo sa Jubile naakona kuba mutanga hape, mi hasamulaho naashwanga.

12. Ki bo mañi bane bali bapili kufiwa tukuluho yanaabulezi Jesu?

¹² Fa lizazi la Pentekota ya 33 C.E., Jehova naatozize baapositola ni baana ni basali babañwi bane basepahala ka moya okenile. Naabaañuzi sina bana bahae, ilikuli kwapili abazuseze kwa lihalimu kuli bayo busa ni Jesu. (Maro. 8:2, 15-17) Bao neli bona bapili kufiwa tukuluho yanaabulezi Jesu mwa sinagoge ya kwa Nazareta. Baana ni basali bao nebalukuluzwi mwa butanga bwa lituto za buhata ni lizo zesi za ka Mañolo zene baezanga baeteleli ba bulapeli bwa Sijuda. Hape Mulimu naabaanga kuli balukuluzwi kwa sibi sesitahisa lifu. Jubile ya swanisezo yenekalile balateleli ba Kreste hane batozizwe ka silimo sa 33 C.E., ikafela kwa mafelelezo a Puso ya Jesu ya Lilimo ze 1,000. Ki lika mañi zende zekapetiwa ka nako yeo?

13-14. Ki bo mañi babañwi babakona kutusiwa ki tukuluho yanaabulezi Jesu kwandaa Bakreste babatozizwe?

¹³ Mwa linako zaluna, batu babañata-ñata ba lipilu zende babazwa mwa macaba kaufela ki ba “lingu zeñwi.” (Joa. 10:16) Habasika ketiwa ki Mulimu kuli bayo busa ni Jesu kwa lihalimu. Kono Bibele ibonisa kuli batu bao banani sepo ya kuto pila kuya kuile fa lifasi. Kana ni mina munani sepo yecwalo?

¹⁴ Nihaiba ka nako ya cwale, mwakona kuikola lika zende zebasweli kuikola batu babakayo busa mwa Mubuso wa Mulimu kwa lihalimu. Bakeñisa kuli munani tumelo mwa sitabelo sa Jesu, mwakona kukupa Jehova kuli aswalele libi zamina. Kueza cwalo kuka mitusa kuba ni mayemo amande fapilaa Mulimu ni kuba ni lizwalo lelinde. (Maef. 1:7; Sin. 7:14, 15) Hape munahane feela limbuyoti zeñata zemusweli kuikola zetahiswa ki kulukululwa kwa lituto za buhata zesi za ka Mañolo, ili zene mulumezi ka nako yetelele. Jesu naabulezi kuli: “Mukaziba niti, mi niti ika milukulula.” (Joa. 8:32) Kwatabisa luli kuba ni tukuluho yecwalo!

15. Ki tukuluho ni limbuyoti mañi zelulibelela kuikola kwapili?

¹⁵ Mwakona kuba ni sepo ya kuli kwapili batu bakaba ni tukuluho yetuna. Hona cwale-cwale fa, Jesu ukafelisa bulapeli bwa buhata ni mibuso ya lifasi yehatelela batu. Mulimu ukasileleza ba “buñata bobutuna bwa batu” baba musebeleza, mi ukatahisa kuli baikole limbuyoti mwa paradaisi fa lifasi. (Sin. 7:9, 14) Batu babañata-ñata bakazusiwa kwa bafu mi bakalukululwa kwa lika kaufela zemaswe zetahisizwe ki sibi sa Adama.—Lik. 24:15.

16. Ki tukuluho mañi yende yebakaba ni yona batu kwapili?

¹⁶ Ka nako ya Puso ya Kreste ya Lilimo ze 1,000, Jesu ni babaka busa ni yena bakatusa batu kuba babapetahalile ni kuba ni silikani sesinde ni Mulimu. Sina feela batu hane balukululwanga ni kukutelwa ki saanda sabona mwa silimo sa Jubile, puso yeo ni yona ikatahisa kuli batu bafumane tukuluho mi babe ni silikani sesinde ni Mulimu hape. Batu kaufela babasebeleza Jehova ka busepahali, bakaba babapetahalile mi habana kuba ni sibi.

17. Ka kuya ka liñolo la Isaya 65:21-23, ki limbuyoti mañi zebaka ikola batu ba Mulimu kwapili? (Mubone siswaniso sesi fa likepe la fahalimu.)

¹⁷ Liñolo la Isaya 65:21-23 libonisa mobuka bela bupilo fa lifasi kwapili. (Mubale.) Batu habana kunamanga feela wa toze. Kono Bibele ibonisa kuli batu ba Mulimu ka nako yeo bakaezanga misebezi yeminde yetabisa. Lwakona kuba ni buikolwiso bwa kuli kwa mafelelezo a Puso ya Kreste ya Lilimo ze 1,000, “zebupilwe likalukululwa hape kwa butanga bwa kubola ni kufumana tukuluho yemakaza ya bana ba Mulimu.”—Maro. 8:21.

18. Ki kabakalañi halukona kuba ni buikolwiso bwa kuli kwapili batu bakaikola bupilo?

¹⁸ Sina feela Jehova hanaalukisize kuli Maisilaele babange ni nako ya kusebeza ni nako ya kupumula, ukalukisa kuli batu bahae ni bona baezange cwalo ka nako ya Puso ya Kreste ya Lilimo ze 1,000. Kusina kukakanya, batu bakabanga ni nako ya kulapela Mulimu. Kulapela Mulimu kulutahiseza tabo kacenu mi ni mwa lifasi lelinca lukaezanga cwalo. Batu kaufela babasepahala bakaba ni tabo ka nako ya Puso ya Kreste ya Lilimo ze 1,000 kakuli bakaezanga musebezi otabisa, mi batu kaufela bakasebeleza Mulimu.