Mu Amuhele Bibele ka Seo I Li Sona Luli

“Ha lu liseli ku itumela ku Mulimu, kakuli nako ye mu amuhezi Linzwi la Mulimu le mu utwile ku luna, mu li amuhezi isi sina linzwi la mutu, kono sina Linzwi la Mulimu, mi ki lona luli; kifohe, li sebeza ka mata ku mina balumeli.”—1 MATESALONIKA 2:13.

 1. Ki litaba za mufuta mañi ze mwa Bibele z’e i bisa ku ba buka ye zwile mubano luli?

BIBELE YE KENILE ki buka ye tolokilwe ka sipimo se situna hahulu ni ku fita fa ku hasanyiwa hahulu mwa lifasi. Ki ye lemuhiwa ka ku sa kakanya sina ye ñwi ya libuka ze tuna ku ze ñozwi. Nihakulicwalo, sa butokwa ni ku fita, ki sa kuli Bibele i fa ketelelo ye tokwiwa ka bubebe-bebe ki batu ba mishobo kaufela ni macaba kaufela, ku si na taba ni mibeleko kamba mayemo a bona mwa bupilo. (Sinulo 14:6, 7) Ka mukwa o kolwisa munahano hamohocwalo ni pilu, Bibele i alaba lipuzo ze swana sina ze: Ki ufi mulelo wa bupilo bwa mutu? (Genese 1:28; Sinulo 4:11) Ki kabakalañi mibuso ya mufuta wa mutu ha i si ka kona ku tahisa kozo ni buiketo ze inelela? (Jeremia 10:23; Sinulo 13:1, 2) Ki kabakalañi batu ha ba shwa? (Genese 2:15-17; 3:1-6; Maroma 5:12) Ka ku ba mwa lifasi le ili le li tezi mizanda, lu kona ku talimana ni but’ata bwa bupilo ka mukwa ufi? (Samu 119:105; Liproverbia 3:5, 6) Ki sika mañi seo nako ya kwapili i lu bulukezi sona?—Daniele 2:44; Sinulo 21:3-5.

 2. Ki kabakalañi Bibele ha i fa likalabo ze itingiwa ka ku tala kwa lipuzo za luna?

² Ki kabakalañi Bibele ha i alaba lipuzo ze cwalo ka m’ata? Kakuli ki Linzwi la Mulimu. N’a itusisize batu kwa ku ñola, kono sina ha ku talusizwe hande kwa 2 Timotea 3:16, “liñolo kamukana li tahile ka Moya wa Mulimu.” Ha i si ka tahiswa ki bunuheleli bwa kwa mukunda bwa likezahalo za mufuta wa mutu. “Bupolofita [zibahazo ya lika ze ka taha, litaelo za bumulimu, lipimo za muzamao za Bibele] ha bu si ka bonahala ka ku lata kwa mutu; kono batu ne ba bulela ka taelo ya Mulimu inze ba susumezwa ki Moya o Kenile.”—2 Pitrosi 1:21.

 3. (a) Mu fe mitala ye bonisa ka m’o Bibele i’ ngezwi ku ba ya butokwa hahulu ki batu mwa manaha a fitana-fitana. (b) Ki kabakalañi batu ka buñwi ha ne ba itatela ku beya bupilo bwa bona mwa lubeta ilikuli ba bale Mañolo?

³ Ka ku itebuha butokwa bwa Bibele, haki batu b’a sikai fela ba ne ba itatezi ku ba mwa muinelo o’ lubeta wa ku tamiwa, nihaiba lifu, bakeñisa ku i luwa ni ku i bala. Seo ne li sa niti mwa Spain wa Katolika mwa lilimo ze felile, m’o ba bahulu ba bulapeli ne ba na ni sabo ya kuli susuezo ya bona ne i ka fokoliswa haiba batu ne ba ka bala Bibele mwa lulimi lwa bona; hape ne li sa niti mwa Albania, m’o mihato ye utwisa maswe butuku ne i’ ngilwe ka ketelelo ya puso ya bosilatula-Mulimu ka mulelo wa ku felisa susuezo ya bulapeli kaufela. Niteñi, batu ka buñwi be ne ba saba Mulimu ne ba ipulukezi ni k’u nga ka butokwa hahulu likopi za Mañolo, ba libala, mi ba li abana ni yo muñwi ku yo muñwi. Mwahal’a Ndwa ya Lifasi ya II, mwa munganda wa tukufazo wa Sachsenhausen, Bibele ne i shela-shelile ku zwa muyaho o muñwi wa tolongo ku ya ku o muñwi (nihaike kuli seo ne si haniswa), mi be ne ba konile ku i fumana ne ba petile likalulo za yona kuli ba abane ni ba bañwi. Mwahal’a ma-1950, mwa naha m’o pili n’e li East Germany ya Komyunizimu, Lipaki za Jehova be ne ba tamilwe bakeñisa tumelo ya bona ne ba li mwa lubeta lwa ku kwalelwa mwa tolongo mutu a nosi ka nako ye telele muta ne ba tambeka likalulo ze nyinyani za Bibele ku mupantinti yo muñwi ku ya ku yo muñwi kuli li baliwe busihu. Ki kabakalañi ha ne ba ezize cwalo? Kakuli ne ba lemuhile kuli Bibele ki Linzwi la Mulimu, mi ne ba zibile kuli “mutu h’a na ku pila buhobe fela” kono “mutu a pile kaufela ze zwa mwa mulomo wa Muñ’a Bupilo.” (Deuteronoma 8:3) Manzwi ao, a’ ñozwi mwa Bibele, n’a konisize Lipaki bani ku ina inze ba pila kwa moya ku si na taba ni ku beiwa mwa situhu se si tulile tikanyo.

 4. Ki sibaka sifi seo Bibele i swanela ku ba ni sona mwa bupilo bwa luna?

⁴ Bibele haki buka ye swanela ku beiwa fela fa shelufu ni ku ama ku yona ka linako ze ñwi, mi ha i si ka lukisezwa nihaiba ku itusisa yona fela muta lu kopana ni balumeli sina luna kwa ku lapela. Zazi ni zazi lu swanela ku itusisa yona mwa miinelo ye lu lwanisana ni yona kuli i lu monyehele ni ku lu bonisa nzila ya ku zamaya ka yona.—Samu 25:4, 5.

I Lukiselizwe ku Baliwa ni ku Utwisiswa

 5. (a) Ka mo ku konahalela kaufela, mañi ni mañi wa luna u swanela ku ba ni nto mañi? (b) Mwa Isilaele wa kwaikale, batu ne ba kona ku fumana kamukwaufi litaba ze mwa Mañolo? (c) Samu 19:7-11 i ama cwañi mubonelo wa mina kwa neku la ku bala Bibele?

⁵ Mwa lizazi la luna, likopi za Bibele ki ze fumaneha nako kaufela mwa manaha a mañata, mi lu susueza mubali kaufela wa Tora ya ku Libelela ku ipumanela kopi ya yona. Ka nako yeo Bibele ne i swelwi ku ñolwa, ne ku si na mishini ye hatisa. Batu ka nañungelele ne ba si na likopi za ka butu. Kono Jehova a lukiseza batanga ba hae kuli ba kone ku utwa se ne si ñozwi. Kacwalo, Exoda 24:7 i talusa kuli, hasamulaho wa ku ñola kwa Mushe zeo Jehova n’a mu taluselize, “a’ nga buka ya bulikani a i balela sicaba.” Ka ku ba lipaki za likezahalo z’e si za ka taho ze mbwetukisa kwa Lilundu la Sinai, ne ba lemuhile kuli seo Mushe n’a ba balezi sona ne si zwa ku Mulimu mi ni kuli ne ba tokwa ku ziba ona litaba zeo. (Exoda 19:9, 16-19; 20:22) Ni luna lu tokwa ku ziba se si ñozwi mwa Linzwi la Mulimu.—Samu 19:7-11.

 6. (a) Sicaba sa Isilaele si si ka kena kale mwa Naha ya Sepiso, Mushe n’a ezize nto mañi? (b) Ne lu kana lwa likanyisa cwañi mutala wa Mushe?

⁶ Sicaba sa Isilaele ha ne si itukiseza ku sila Nuka ya Jordani ku kena mwa Naha ya Sepiso, kacwalo ili ku siya kwamulaho bupilo bwa bona bwa buyambaeli mwa lihalaupa, ne li ko ku swanela ku bona ku lundulula Mulao wa Jehova ni mwa na sebelisanela ni bona. Ka ku susuezwa ki moya wa Mulimu, Mushe n’a lunduluzi ni bona Mulao. N’a ba hupulisize ka za lisupo za Mulao, mi hape n’a tunumekile likuka ze ne li swalisana ni Mulao ni mikwa ye ne i ka susueza swalisano ya bona ni Jehova. (Deuteronoma 4:9, 35; 7:7, 8; 8:10-14; 10:12, 13) Sina luna kacenu ha lu kalisa ku peta kalulo ye nca ye lu filwe kamba ku talimana ni miinelo ye minca mwa bupilo, lu eza hande ku nyaka ka m’o kelezo ya mwa Mañolo i swanela ku susueza ku seo lu eza.

 7. Hasamulahonyana fela Maisilaele ha se ba silile Jordani, ki sika mañi se ne si ezizwe ili ku suña Mulao wa Jehova mwa minahano ni mwa lipilu za bona?

⁷ Hasamulahonyana wa ku sila kwa Isilaele Nuka ya Jordani, sicaba ne si kopani hape ku lundulula seo Jehova n’a ba taluselize ka Mushe. Sicaba ne si kopani ibata iba likilomita ze 50 kwa mutulo wa Jerusalema. Licika la masika ne li li fapil’a Lilundu la Ebali, mi licika le liñwi ne li li fapil’a Lilundu la Gerizimi. Teñi k’o Joshua “a bala litaba kaufela za mulao, za mbuyoti ni za sikuto.” Kacwalo banna, basali, ni banana, hamohocwalo ni bayahi ba mazwahule, ba ikutwezi ku kutelwa kwa ku balwa kwa milao ka bunako ye ama muzamao o ne u ka tahisa ku haniwa ki Jehova ni ka za limbuyoti ze ne ba ka amuhela haiba ne ba ka utwa Jehova. (Joshua 8:34, 35) Ne ba tokwa ku ba ni kutwisiso mwa munahano ka za se sinde ni se si maswe ku zwelela mwa mubonelo wa Jehova. Hape, ne ba tokwa ku koñomeka fa lipilu za bona lilato la seo si li se sinde ni sitoyo sa ku toya seo ili se si maswe, sina mwa ezeza yo muñwi ni yo muñwi wa luna kacenu.—Samu 97:10; 119:103, 104; Amosi 5:15.

 8. Ku baliwa kwa Linzwi la Mulimu ka linako ze ñwi fa mikopano ye miñwi ya sicaba sa Isilaele ne ku file tuso mañi?

⁸ Fahalimw’a ku balwa kwa Mulao mwa miteñi ya likezahalo ze zwile mubano zani, tukiso ya ku bala Linzwi la Mulimu kamita ne i talusizwe kwa Deuteronoma 31:10-12. Ka mwaha ni mwaha wa busupa sicaba mukatumbi ne si na ni ku kopana ku utwa Linzwi la Mulimu ha li nze li balwa. Seo ne si tahisa sico sa kwa moya ku bona. Ne si ezisize lisepiso ka za Peu ku ba ze buniti mwa minahano ni lipilu za bona mi kona kuli seo ne si sebelize ku etelela balumeli ba ba sepahala ku Mesiya. Litukiso za ku fepeha kwa moya ze ne li tomilwe muta Isilaele n’a li mwa lihalaupa ne li si ka kuyuka ha ne ba keni mwa Naha ya Sepiso. (1 Makorinte 10:3, 4) Mwa sibaka sa seo, Linzwi la Mulimu ne li tiisizwe ka ku ekezwa teñi kwa lisinulo ze ñwi za bapolofita.

 9. (a) Kana ku baliwa kwa Mañolo ne ku eziwa fela muta Maisilaele ne ba kopana ka likwata ze tuna? Mu taluse. (b) Taelo ya mwa Mañolo ne i filwe cwañi mwa mabasi a mañwi ka buñwi, mi inz’e li ka mulelo mañi?

⁹ Ku lundulula kelezo ya Linzwi la Mulimu ne ku si ka lumelezwa fela ka nako yani muta batu ne ba kopana mwa likwata ze tuna. Likalulo za Linzwi la Mulimu ni likuka ze ne li tamahani mwateñi ne li na ni ku ambolwa ka zazi ni zazi. (Deuteronoma 6:4-9) Mwa libaka ze ñata kacenu, ku bunolo ku ba banca ku ba ni kopi ya ka butu ya Bibele, mi ki kwa butokwa hahulu ku bona ku eza cwalo. Kono mwa Isilaele wa ikale, seo ne si si cwalo. Kwamulaho k’o, bashemi ha ne ba fa taelo ku zwelela mwa Linzwi la Mulimu, ne ba na ni ku itinga ku seo ne ba petile ni fa liniti zeo ne ba suñile ka ku lata mwa lipilu za bona, hamohocwalo ni litabanyana zeo ne ba kana ba iñolezi zona ka butu. Ka ku kuta-kutela ka linako ze ñata, ne ba ka lika ku yaha lilato kwa bana ba bona la ku lata Jehova ni linzila za hae. Mulelo ne isi fela wa ku ba ni zibo ye ñata mwa toho kono ne li wa ku tusa silama ni silama sa lubasi ku pila ka nzila ye bonisa lilato la ku lata Jehova ni Linzwi la hae.—Deuteronoma 11:18, 19, 22, 23.

Ku Balwa kwa Mañolo mwa Masinagoge

10, 11. Ki tukiso mañi ya ku bala Mañolo ye ne i latelelwa mwa masinagoge, mi Jesu n’a ngile cwañi likezahalo zeo?

¹⁰ Ha se ku fitile nako hasamulaho wa ku iswa kwa Majuda mwa butanga mwa Babilona, masinagoge n’a tomilwe sina libaka za ku lapelela teñi. Kuli Linzwi la Mulimu li konwe ku balwa ni ku ambolwa kwa libaka za makopanelo zeo, likopi ze ñata za Mañolo ne li ezizwe. Seo ki sona se ne si konisize ku bandusa likopi ze 6,000 za litaba za ikale ze ñozwi ka mazoho ze na ni likalulo za Mañolo a Siheberu.

¹¹ Kalulo ya butokwa ya sebelezo ya mwa sinagoge ne li ku balwa kwa Torah, buka ye ne i likanelela ni libuka ze ketalizoho za pili za Libibele za mwa lizazi la cwale. Likezo 15:21 i biha kuli mwa lilimo za mwa mwanda wa pili C.E., ku bala k’o ne ku eziwa la Sabata ni la Sabata, mi buka ya Mishnah i bonisa kuli lilimo za mwanda wa bubeli ha li to esha, ne ku na ni ku balwa kwa Torah hape fa lizazi la bubeli ni la buketalizoho la viki. Palo ye balwa ya batu ne i abana mwa ku bala likalulo ze filwe, yo muñwi hasamulaho wa yo muñwi. Sizo sa Majuda be ne ba pila mwa Babilona ne li ku bala Torah mukatumbi ka silimo ni silimo; haili mwa Palestine mona sizo ne li ku tomahanya ku bala mwa silengo sa nako ya lilimo ze t’alu. Kalulo ye ñwi ya Bapolofita ni yona hape ne i balwa ni ku taluswa. N’e li kwa ka sizo ku Jesu ku fumaneha kwa litukiso za la Sabata za ku bala Bibele mwa sibaka seo na pila ku sona.—Luka 4:16-21.

Muhato wa ka Butu ni Musebelisezo

12. (a) Muta Mushe n’a balezi batu Mulao, batu ne ba tusehile cwañi? (b) Batu ne b’a ngile cwañi muhato?

¹² Ku balwa kwa Mañolo a buyelezwi ne ku si ka lukisezwa ku ba mukwa wa ka sizo fela. Ne ku si ka ezezwa ku taleleza litakazo fela za ka butu. Muta Mushe n’a balezi Isilaele “buka ya bulikani” mwa libala le ne li talimani ni Lilundu la Sinai, n’a ezize cwalo ilikuli ba izibele buikalabelo bwa bona fapil’a Mulimu ni ku bu taleleza. Kana ne ba ka eza cwalo? Ku bala ne ku tokwa k’u nga muhato. Batu ne ba izibezi seo, mi ba bulela ka ku tumusa, ba li: “Muñ’a Bupilo z’a bulezi kamukana lu ka li mamela ni ku ya ka zona.”—Exoda 24:7; mu bapanye Exoda 19:8; 24:3.

13. Muta Joshua n’a balile likuto ze tahiswa ki ku sa ipeya ku utwa, batu ne ba na ni ku eza nto mañi, mi ka mulelo mañi?

¹³ Hasamulaho, muta Joshua n’a balezi sicaba limbuyoti ze ne li sepisizwe ni likuto, kamba miinelo ya bumai, muhato ne u na ni k’u ngiwa. Hasamulaho wa muinelo o muñwi ni o muñwi wa bumai, taelo ne i filwe: “Mi sicaba kaufela si ka li: Amen.” (Deuteronoma 27:4-26) Kacwalo, sisupo ka sisupo ha si nze si nyakiwa ne ba fita fa ku lumela ku seo Jehova n’a si nyaza ka ze fosahalile ze bonisizwe. Ne li kezahalo ye nyangumuna hakalo muta sicaba kaufela ne si tuuma ka tumelelano!

14. Mwa mazazi a Nehemia, ki kabakalañi ku bala kwa fa nyangela kwa Mulao ha ne ku bonahezi sihulu-hulu ku ba kwa butokwa?

¹⁴ Mwa mazazi a Nehemia, muta batu kaufela ne ba kubukani mwa Jerusalema ku teeleza kwa Mulao, ne ba iponezi kuli ne ba sa lateleli ze ne li ñozwi mwateñi ka ku tala. Fa kezahalo yeo ne ba itusisize ka bubebe se ne ba itutile. Ki sifi se ne si zwile mwateñi? “Tabo ya ba ye tuna.” (Nehemia 8:13-17) Hasamulaho wa viki ya ku bala Bibele ka zazi ni zazi mwahal’a mukiti, ne ba lemuhile kuli ne ku sa batahala ze ñata. Ka mukwa o’ buniti ne ba lunduluzi litaba za kwamulaho ka za ku sebelisana kwa Jehova ni batu ba hae ku zwelela mwa mazazi a Abrahama ni ku ya cwalo kwapili. Zeo kaufela ne li ba konisize kuli ba konke kwa neku la ku ipeya ku utwa seo Mulao ne u si tokwa, ku pima ku kena mwa manyalo ni mazwahule, ni ku amuhela litamo za ku babalela tempele ni sebelezo ya yona.—Nehemia, likauhanyo 8-10.

15. Litaelo ze kwa Deuteronoma 6:6-9 li bonisa cwañi kuli, mwahal’a mabasi, taelo ye mwa Linzwi la Mulimu ne i sa swanelwi k’u ngiwa sina mukwa fela wa ku latelela mulao?

¹⁵ Ka mukwa o swana, mwa lubasi, ku fa tuto ya mwa Mañolo ne ku si ka lelelwa kuli ibe mukwa fela wa ka sizo. Sina ha se lu boni kale, ka swanisezo kwa Deuteronoma 6:6-9, batu ne ba taluselizwe ku ‘tama manzwi a Mulimu fa mazoho a bona sina poniso’—kacwalo ili ku bonisa ka mutala ni kezo ku lata kwa bona linzila za Jehova. Mi ne ba na ni ku beya manzwi a Mulimu sina “lwamuhelo lwa fa pata”—kacwalo ilikuli ba hupule ka nako kaufela likuka ze bonisizwe mwa Mañolo ni ku itusisa zeo sina mutomo kwa neku la likatulo za bona. (Mu bapanye puo ye itusisizwe kwa Exoda 13:9, 14-16.) Ne ba na ni ku ‘a ñola fa mabala a mwa minyako ya mandu a bona ni fa likwalo za bona’—kacwalo ili ku zibahaza mandu a bona ni lilalanda za bona sina libaka m’o linzwi la Mulimu ne li kutekiwa ni ku sebeliswa. Ka mubulelelo o muñwi, bupilo bwa bona ne bu na ni ku fa bupaki bo butuna bwa kuli ne ba lata ni ku sebelisa liketelelo ze lukile za Jehova. Ne si k’a ba se si tusa hakalo seo! Kana Linzwi la Mulimu li na ni mufuta wo wa butokwa bo butuna mwa bupilo bwa mabasi a luna bwa ka zazi ni zazi? Ka bumai, Majuda ne ba fetuzi yona tukiso yeo sina mukwa fela wa ku latelela mulao, ne ba apala tukwati to ne tu na ni litaba za mwa Mañolo inge kuli ne li linkau. Ku lapela kwa bona ne ku sa zweleli kwa pilu mi ne ku hanilwe ki Jehova.—Isaya 29:13, 14; Mateu 15:7-9.

Buikalabelo bwa Ba Ba mwa Likalulo za Okamelo

16. Ki kabakalañi ku bala Mañolo kwa ka nako ni nako ha ne ku li kwa butokwa ku Joshua?

¹⁶ Kwa neku la ku balwa kwa Mañolo, mamelelo ye ipitezi ne i libiswa ku ba ne ba li baokameli ba sicaba. Ku Joshua, Jehova n’a ize: “U tokomele ku ya ka mulao kaufela.” Ka mulelo wa kuli a taleleze buikalabelo b’o, n’a bulelezwi kuli: “U i nahane musihali ni busihu; . . . Ka ku eza cwalo u ka kondisa nzila ya hao, mi z’o ka eza kaufela, u ka li kona.” (Joshua 1:7, 8) Sina haili niti ku ufi ni ufi y’a li muokameli wa Sikreste kacenu, ku bala Mañolo kwa ka nako ni nako kwa Joshua ne ku kana kwa mu tusa ku hupula hande ze ñwi za litaelo tota zeo Jehova n’a file batu ba Hae. Joshua hape n’a tokwa ku utwisisa ka m’o Jehova n’a sebelisanezi ni batanga ba Hae mwa miinelo ye fapahana-fapahana. Ha n’a nze a bala litaba za mulelo wa Mulimu, ne kuli kwa butokwa ku yena ku hupula ka za buikalabelo bwa hae ka sibili ka ku swalisana ni mulelo w’o.

17. (a) Kuli malena ba tusehe ku zwelela kwa ku bala Mañolo ka nzila yeo Jehova n’a talusize, ki sika mañi se ne si tokwahala mwa ku bala kwa bona? (b) Ki kabakalañi ku bala kwa kamita Bibele ni ku fa nahanisiso ye tungile ha ku li kwa butokwa hahulu kwa maeluda ba Sikreste?

¹⁷ Jehova n’a laezi kuli mañi ni mañi ya na ka sebeza sina mulena fahalimu a batu ba Hae, kwa makalelo a puso ya hae, n’a na ni ku eza kopi ya Mulao wa Mulimu, ka ku zwelela fa kopi ye ne i bulukiwa ki baprisita. Cwale n’a na ni ku “bala mwateñi ka mazazi kaufela a bupilo bwa hae.” Mulelo ne isi wa ku peta fela litaba ze mwateñi. Ka ku fapahana, ne i li kuli “a itute ku saba Muñ’a Bupilo Mulimu wa hae” ni kuli “pilu ya hae i si ke ya ikuhumuseza bana bahabo.” (Deuteronoma 17:18-20) Seo ne si tokwa kuli a nahanisise ka butungi ku seo n’a si bala. Ba bañwi ba malena ka bupaki ne ba hupuzi kuli ne ba patehile hahulu ni misebezi ya bona ya bubusisi kuli ba eze cwalo, mi sicaba kaufela sa nyanda kabakala ku keshebisa kwa bona. Kalulo ya maeluda mwa puteho ya Sikreste ni kamuta haki yani ya malena. Nihakulicwalo, sina ha n’e li sa niti ka za malena, ki kwa butokwa kuli maeluda ba bale ni ku nahanisisa ka butungi fa Linzwi la Mulimu. Ku eza kwa bona seo ku ba tusa ku bukeleza mubonelo o lukile ku bao ba ba beilwe mwa pabalelo ya bona. Si ka ba konisa hape ku taleleza buikalabelo bwa bona sina baluti ka mukwa o kuteka Mulimu ka buniti ni ku tiisa Bakreste sina bona kwa moya.—Tite 1:9; mu bapanye ni Joani 7:16-18; mu fe fapahano ya 1 Timotea 1:6, 7.

18. Ki mutala mañi o bonisizwe ki muapositola Paulusi o ka lu tusa ku likanyisa ku bala ni ku ituta kamita Bibele?

¹⁸ Muapositola Paulusi, muokameli wa Sikreste wa mwa lilimo za mwanda wa pili, ne li mutu ya n’a ziba hande Mañolo a buyelezwi. Muta n’a file bupaki kwa batu ba mwa Tesalonika wa ikale, n’a kona ku bulela ku bona ka ku ya ka Mañolo ka buanyu ni ku ba tusa ku utwisisa taluso. (Likezo 17:1-4) N’a fitile kwa lipilu za bateelezi ba ba buniti. Kacwalo, buñata ba ne ba utwile litaba za hae ne ba bile balumeli. (1 Matesalonika 2:13) Ka ku ba kwa mina ni tukiso ya ku bala ni ku ituta Bibele, kana mwa kona ku nahanisisa ka buanyu ku zwelela mwa Mañolo? Kana sibaka se s’i ngiwa ki ku bala Bibele mwa bupilo bwa mina ni ka m’o mu ezeza seo ku fa bupaki bwa kuli mwa itebuha ka buniti seo ku si talusa ku ba ni Linzwi la Mulimu sina siluwo? Mwa taba ye tatama, lu ka nyakisisa ka m’o kalabo ye utwahala i kona ku felwa kwa lipuzo zeo nihaiba ku bao litomahanyo za bona li li ze pitihanyizwe hahulu.

Ne Mu Ka Alaba Cwañi?

◻ Ki kabakalañi batu ha se ba bile ba ba itatela ku beya bupilo ni tukuluho ya bona mwa lubeta ilikuli ba kone ku bala Bibele?

◻ Lu fumana cwañi tuso ka ku lundulula litukiso zeo ne li ezelizwe Isilaele wa kwaikale mwa ku utwa Linzwi la Mulimu?

◻ Ki sika mañi se lu swanela ku eza ka litaba ze lu bala mwa Bibele?

◻ Ki kabakalañi ku bala Bibele ni ku fa nahanisiso ye tungile ha ku li kwa butokwa hahulu kwa maeluda ba Sikreste?

[Siswaniso se si fa likepe 7]

Jehova n’a bulelezi Joshua, kuli: “U i nahane musihali ni busihu”