Jobo N’a Itiisize—Ni Luna Lwa Kona ku Eza Cwalo!

“A mu bone, lu ba bulela kuli ba na ni mbuyoti ba ba konile ku itiisa.”—JAKOBO 5:11.

 1. Ki sifi sa n’a bulezi Mukreste yo muñwi wa musupali ka za litiko za hae?

‘DIABULOSI u ni manami! Ni ikutwa fela inge Jobo!’ Ka manzwi a’ cwalo A. H. Macmillan n’a talusize maikuto a hae ku mulikan’a hae yo mutuna kwa sibaka se situna sa tamaiso sa Lipaki za Jehova. Muzwale Macmillan n’a felize bupilo bwa hae bwa fa lifasi-mubu a na ni lilimo za buhulu ze 89 ka la August 26, 1966. N’a ziba kuli libubo kwa neku la sebelezo ya ka busepahali ya Bakreste ba ba tozizwe sina yena ne li k’a “ba latelela.” (Sinulo 14:13) Ka mo ku inezi fela, ne ba ka zwelapili cwalo mwa sebelezo ya Jehova ka ku zusezwa kwa bupilo bo bu s’a shwi mwa lihalimu. Balikani ba hae ne ba nyakalalile kuli Muzwale Macmillan n’a fumani mupuzo w’o. Nihakulicwalo, mwa lilimo za hae za mafelelezo fa lifasi-mubu, n’a katalizwe ki litiko ze fitana-fitana, ku kopanyeleza cwalo ni but’ata bwa za buikangulo ili bo ne bu tahisize kuli a lemuhe hahulu ku lika kwa Satani kuli a feze busepahali bwa muzwale y’o ku Mulimu.

 2, 3. Jobo ne li mañi?

² Muzwale Macmillan ha n’a bulezi kuli n’a ikutwa fela inge Jobo, n’a ama ku munna ya n’a tiyezi litiko ze tuna za tumelo. Jobo n’a pila mwa “naha ya Uzi,” ili yeo mwendi ne i li kwa mutulo wa Arabia. N’a simuluha ku Sema mwan’a Nuwe, mi n’a li mulapeli wa Jehova. Ku bonahala kuli ku likiwa kwa Jobo ne ku ezahezi ka nako ye ñwi ye mwahal’a nako ya lifu la Josefa ni nako yeo Mushe n’a iponahalize ku ba ya lukile. Mwahal’a silengo seo sa nako fa lifasi-mubu ne ku si na mutu ya n’a likana ni Jobo kwa buipeyo bwa bumulimu. Jehova n’a nga Jobo kuli ki mutu ya lukile hahulu, ya sepahala, ya saba Mulimu.—Jobo 1:1, 8.

³ Ka ku ba “yo muhulu hahulu, ku fita batu kaufela ba kwa Upa,” Jobo n’a na ni batanga ba bañata, mi limunanu za hae ne li eza palo ya 11,500. Kono liluwo la kwa moya n’e li la butokwa bo butuna ka ku fitisisa ku yena. Ka ku swana sina bondate ba bumulimu kacenu, ne ku kana kwa ba kuli Jobo n’a lutile bana ba hae ba ba lishumi ka za Jehova. Mane ni hamulaho ha ne ba se ba ipilela, n’a sebeza sina muprisita wa mwa lubasi ka ku fa matabelo kwa neku la bona, kuli mwendi ba ezize sibi.—Jobo 1:2-5.

 4. (a) Ki kabakalañi Bakreste ba ba mwa nyandiso ha ba swanela ku nyakisisa Jobo? (b) Ka ku ama ku Jobo, ki lipuzo mañi ze lu k’a nyakisisa?

⁴ Jobo ki mutu y’o Bakreste ba ba mwa nyandiso ba swanela ku nyakisisa ilikuli ba be ni m’ata kwa neku la ku itiisa ka pilu-telele. “A mu bone!” ki mwa n’a ñolezi mulutiwa Jakobo. “Lu ba bulela kuli ba na ni mbuyoti ba ba konile ku itiisa; mu utwile za Jobo, za ku sa fela pilu kwa hae; mi mu boni mafelelezo a hae, a’ mu file [Jehova, NW]; kakuli [Jehova, NW] u tezi sishemo ni mukekecima.” (Jakobo 5:11) Ka ku swana sina Jobo, balateleli ba Jesu ba ba tozizwe ni “buñata bo butuna” bwa mwa lizazi la cwale ba tokwa buitiiso kuli ba kone ku kondisa lika mwa ku talimana ni ku likiwa kwa tumelo. (Sinulo 7:1-9) Kacwalo, ki litiko lifi za n’a tiyezi Jobo? Ki kabakalañi ha ne li ezahezi? Mi lu kona ku fumana cwañi tuso ku za n’a ipumani ku zona?

Taba ye Tokwa Tatululo

 5. Ka ku s’a zibahala ku Jobo, ki sifi se ne si ezahala mwa lihalimu?

⁵ Ka ku s’a zibahala ku Jobo, taba ye tuna ya kananisano ne se i li bukaufi ni ku zusiwa mwa lihalimu. Ka lizazi le liñwi “bana ba Mulimu ba t’o iponahalisa fapil’a Muñ’a Bupilo.” (Jobo 1:6) Mwan’a Mulimu wa libanda, Linzwi, n’a li teñi. (Joani 1:1-3) Ni mangeloi a’ lukile ni “bana ba bashimani ba Mulimu” ba mangeloi a s’a ipeyi ku utwa. (Genese 6:1-3) Satani n’a li teñi k’o, kakuli ku lundulwa kwa hae ku zwa kwa lihalimu ne ku k’a ezahala hamulaho wa ku tomiwa kwa Mubuso ka 1914. (Sinulo 12:1-12) Mwa lizazi la Jobo, Satani n’a k’a zusa taba ye tokwa tatululo. Na s’a li bukaufi ni ku honona ka za tukelo ya bubusi bwa Jehova fa libupiwa za Hae kaufela.

 6. Ki sifi sa n’a lika ku eza Satani, mi n’a munjuzi cwañi Jehova?

⁶ “U zwa kai?” kwa buza Jehova. Satani a alaba kuli: “Ni zwa kwa ku zama-zamaya mwa lifasi, ni ku pota kafa ni kafa mwateñi.” (Jobo 1:7) N’a nze a bata y’o a k’a ca. (1 Pitrosi 5:8, 9) Ka ku loba busepahali bwa batu ka buñwi ba ba sebeleza Jehova, Satani n’a ka lika ku fa bupaki bwa kuli ha ku na ya n’a ka ipeya ku utwa Jehova ka ku tala ili bakeñisa lilato. Ka ku talima taba yeo ya kananisano, Jehova a buza Satani kuli: “Kikuli u lemuhile mutang’a ka Jobo? Mwa lifasi ha ku na ya likana ni yena; ki munna ya lukile hahulu, ya sepahala, mutu ya saba Mulimu, ya ipabalezi kwa bumaswe kaufela.” (Jobo 1:8) Jobo n’a kwanisa lipimo za bumulimu ze ne li beya mwa nahanisiso ku s’a petahala kwa hae. (Samu 103:10-14) Kono Satani a alaba ka ku kanana kuli: “Kikuli Jobo u saba Mulimu fela, a sa kutelwi ki se siñwi? Ha ni li, u mu babalezi, yena ni ba ndu ya hae, ni z’a sweli kamukana, kwa maneku kaufela? U fuyozi musebezi wa mazoho a hae, likomu za hae li tezi mwa naha.” (Jobo 1:9, 10) Diabulosi kacwalo n’a munjuzi Jehova ka ku akaleza kuli ha ku na ya mu lata ni ku mu lapela kabakala seo A li sona kono kuti U shonga libupiwa ka kweta kuli li Mu sebeleze. Satani n’a tamelelize kuli Jobo n’a sebeleza Mulimu kabakala lituso za buitati, isiñi kabakala lilato.

Satani U Eza Twaniso!

 7. Ki ka nzila ifi Diabulosi n’a shemaetile Mulimu, mi Jehova n’a ngile cwañi muhato?

⁷ “Kono,” kwa bulela Satani, “u like fela ku otolola lizoho la hao, ni ku swala fa tutu y’a luwile kaufela, fohe lu ka bona kana a si ke a ku nyefula inz’a li fapil’a hao.” Mulimu n’a k’a nga cwañi muhato kwa shemaeto yeo ye kashwau? “Ki ze”! ki mwa n’a bulelezi Jehova. “Z’a luwile kaufela ni ku file zona. Fela u si ke wa isa lizoho fa mubili wa hae”! Diabulosi n’a bulezi kuli liluwo la Jobo kaufela ne li fuyauzwi, ku ekeziwa, ni ku silelezwa kwa maneku kaufela. Mulimu n’a ka lumeleza Jobo ku nyanda, nihaike kuli mubili wa hae ne u si ke w’a swalwa. Ka mulelo wa ku eza bumaswe, Satani a zwa fa mukopano w’o.—Jobo 1:11, 12.

 8. (a) Ki lisinyehelo mañi za sifumu zeo Jobo n’a ipumani ku zona? (b) Buniti ne li bufi ka za “mulilo wa Mulimu”?

⁸ Hañihañi, twaniso ya busatani ya kalisa. Yo muñwi wa babeleki ba Jobo n’a fitisize taba ye maswe ye: “Lipulu ne li lima, mi limbongolo ne li nze li fula kwatuko ni zona, Masabea kiha ba li tulukela, ba li hapa; mane ba bulaile ni balisana ka buhali bwa lilumo.” (Jobo 1:13-15) Silelezo ne se i zwisizwe kwa liluwo la Jobo. Ibata i’ ba honaf’o, m’ata a sidimona a’ nongile ne a sebelisizwe, kakuli mubeleki yo muñwi n’a bihile kuli: “Mulilo wa Mulimu u zwile kwahalimu mi u lengile lingu ni balisana ku ba ciseleza.” (Jobo 1:16) Ne li kezo ya budiabulosi cwañi ya ku bonahaza inge kuli Mulimu ne li yena ya tahisize likayamana le li cwalo ku mutang’a hae tota! Bakeñisa kuli lumonyi lwa pula lu zwa kwa lihalimu, Jehova n’a ka nyaziwa ka bunolo, kono ka mo ne ku inezi luli mulilo w’o ne u simuluha kwa badimona.

 9. Ku fita fa mayemo a’ maswe ku za sifumu ne ku amile cwañi swalisano ya Jobo ni Mulimu?

⁹ Satani ha n’a nze a zwelapili mwa twaniso ya hae, mubeleki yo muñwi n’a bihile kuli Makalade ne b’a ngile likamele za Jobo mi ne ba bulaile balisana ba bañwi kaufela. (Jobo 1:17) Nihaike kuli Jobo n’a keni cwalo mwa mayemo a’ maswe a za sifumu, seo ne si si k’a sinya swalisano ya hae ni Mulimu. Kana ne mu ka kona ku tiyela sinyehelo ye tuna ya za sifumu mu s’a tuheli busepahali bwa mina ku Jehova?

Likayamana le Lituna ni ku Fita L’a Lenga

10, 11. (a) Ki sifi se ne si ezahezi kwa bana ba Jobo b’a lishumi? (b) Hamulaho wa likayamana la lifu la bana ba hae, Jobo n’a ngile cwañi Jehova?

¹⁰ Diabulosi n’a si k’a feza ku lwanisa Jobo. Mubeleki yo muñwi hape n’a bihile kuli: “Bana ba hao ba bashimani ni ba basizana ne ba nze ba cela ni ku nwela veine mwa ndu ya muhulwan’a bona, Hona fo, kwa zuha moya wa liñungwa o zwa kwa lihalaupa, wa t’o nata fa likutwana za ndu ze ne; ndu kiha i wela micaha, mi ba bulaiwa kaufel’a bona. Ku bandukile na fela ni li nosi, ku t’o ku bihela.” (Jobo 1:18, 19) Ba ba s’a zibi hande ne ba kana ba bulela kuli sinyeho ye ne i tisizwe ki moya w’o wa liñungwa ne li ‘kezo ya Mulimu.’ Nihakulicwalo, m’ata a sidimona n’a tunkile Jobo fo ku butuku ka ku ipitela.

¹¹ Ka ku ba ni maswabi a matuna, Jobo a “pazula kubo ya hae, a ipeula milili kwa toho, mi a wela fafasi ka pata, a lapela.” Niteñi, a mu teeleze kwa manzwi a hae. “Muñ’a Bupilo n’a ni file, mi cwale Muñ’a Bupilo u ni amuhile; ku lumbekwe Libizo la Muñ’a Bupilo.” Taba yeo i ekeza kuli: “Mwa litaba zeo kaufela Jobo h’a si ka fosa, mi h’a si ka beya mulatu ku Mulimu.” (Jobo 1:20-22) Satani n’a tulilwe hape. Ku cwañi ha ne lu ka ipumana mwa ku shwelwa ni maswabi sina batanga ba Mulimu? Buipeyo ku Jehova bo bu si na buitati ni ku mu sepa li kona ku lu konisa ku itiisa sina babuluki ba busepahali, sina mwa n’a ezelize Jobo. Batoziwa ni bao ba ba swalisana ni bona ili ba ba na ni sepo ya fa lifasi-mubu ka buniti fela ba omba-ombiwa ni ku tiiswa ki taba ye ya buitiiso bwa Jobo.

Taba Y’a Hula

12, 13. Kwa mukopano o muñwi mwa lihalimu, ki sifi sa n’a kupile Satani, mi Mulimu n’a alabile cwañi?

¹² Jehova hañihañi n’a putile mukopano o muñwi mwa maino a kwa lihalimu. Jobo na s’a bile mutu ya si na mwana, ili y’a shebile, mi ne ku bonahala inge n’a ezizwe cwalo ki Mulimu, kono busepahali bwa hae ne bu si k’a nyanganyiswa. Ka mo ku inezi fela, Satani n’a si ke a lumela kuli litamilikezo za hae ku Mulimu ni Jobo ne li za buhata. Cwale “bana ba Mulimu” ne ba li bukaufi ni ku utwa ku fiwa kwa maikuto ni ku hanyezwa kwa ona Jehova ha nze a hohela Diabulosi mwa ku tisa taba yeo fa kaulakañi.

¹³ Ka ku zekisa Satani, Jehova n’a buzize kuli: “U zwa kai?” Kalabo? “Ni zwa kwa ku zama-zamaya mwa lifasi, ni ku pota kafa ni kafa mwateñi.” Jehova hape a hohela mamelelo ku mutang’a hae Jobo ya lukile hahulu, ya sepahala, ya saba Mulimu, ili ya n’a sa bulukile ka ku tiya busepahali bwa hae. Diabulosi a alaba kuli: “Litalo ka litalo! Mutu s’a sweli kaufela wa si fana, kuli a pilise bupilo bwa hae! Kono u otolole lizoho la hao, mi u swale fa masapo a hae ni fa nama ya mubili wa hae; fohe, u ka bona kana a si ke a ku nyefula inz’a li fapil’a hao.” Kacwalo Mulimu a bulela kuli: “Ki yo, u mwa lizoho la hao; u babalele fela bupilo bwa hae.” (Jobo 2:2-6) Ka ku akaleza kuli Jehova n’a si k’a zwisa kale mikwalelo kaufela ya silelezo, Satani n’a kupile kuli lisapo ni litalo la Jobo li swalwe. Diabulosi n’a si ke a’ lumelezwa ku bulaya Jobo; kono Satani n’a ziba kuli makulanu a kwa mubili ne a ka mu utwisa butuku ni ku bonahaza inge kuli n’a fiwa koto ki Mulimu kabakala libi za kwa mukunda.

14. Satani n’a natile Jobo ka nto mañi, mi ki kabakalañi ha ne ku si na mutu ya n’a kona ku imulula munyandi y’o?

¹⁴ Ka ku zwisiwa fa mukopano w’o, Satani a funduka ka tabo ye situhu. A nata Jobo ka “litombo ze maswe-maswe, ku zwa kwa mahatelo a mautu a hae, ku y’o fita ni fahal’a toho ya hae.” Ki maswenyeho kwa butuna a n’a tiyezi Jobo ha n’a nze a inzi mwa mulola wa fa liiso ni ku iñwaya ka siemba sa liñetana! (Jobo 2:7, 8) Ha ku na mualafi wa butu ya n’a kona ku mu tiseza kimululo kwa ncwa yeo ye butuku, ye nyenyisa, ni ye kokobeza ka mukwa o maswe-maswe, kakuli ne i tisizwe ka m’ata a busatani. Ki Jehova fela ya n’a kona ku folisa Jobo. Haiba mu mutang’a Mulimu ya si na buikangulo hande, ni kamuta mu si ke mwa libala kuli Mulimu wa kona ku mi tusa ku itiisa mi wa kona ku mi fa bupilo mwa lifasi le linca le li si na matuku.—Samu 41:1-3; Isaya 33:24.

15. Ki sifi seo musal’a Jobo n’a mu susuelize ku si eza, mi Jobo n’a ngile cwañi muhato ku seo?

¹⁵ Kwa nalulelule, musal’a Jobo a bulela kuli: “Kiñi ha u sa tiiseza mwa ku sepahala kwa hao? U kute Mulimu, mi u shwe!” “Ku sepahala” ku talusa buipeyo bwa ka ku tokwa nyazo, mi n’a kana a bulezi ka ku shendekela ilikuli a tahiseze Jobo ku kuta Mulimu. Kono Jobo a alaba kuli: “U bulela ka ku likanyisa basali ba matanya, mo ba bulelela. Ku cwañi? Lu amuhela ze nde mwa lizoho la Mulimu, mi ze maswe lu hane ku li amuhela?” Mane ni kashambwe kao ka Satani ne ka si k’a sebeza, kakuli lu bulelezwi kuli: “Mwa litaba zeo kaufela Jobo h’a si ka fosa ka mulomo wa hae.” (Jobo 2:9, 10) Ku cwañi lilama za lubasi ba ba lwanisa ha ne ba ka bulela kuli lu ikatalisa fela ka bukuba mwa lindongwamo za luna za Sikreste ni ku lu susueza ku tuhela Jehova Mulimu. Ka ku swana sina Jobo, lwa kona ku tiyela tiko ye cwalo kakuli lwa lata Jehova mi lu lakaza ku lumbeka libizo la hae le li kenile.—Samu 145:1, 2; Maheberu 13:15.

Bapumi ba Bal’alu Ba Ba Na ni Muipo

16. Ki bomañi ba ne ba tile ku se si twi ki ku t’o omba-omba Jobo, kono Satani n’a itusisize bona cwañi?

¹⁶ Ku se ne si fitile fa ku bonahala ku ba kezo ye ñwi ya busatani, “balikani” ba bal’alu ne ba tile ku se ne si twi ki ku t’o omba-omba Jobo. Yo muñwi ne li Elifazi, ili y’o n’a kana a li ya n’a simuluha ku Abrahama ka Isau. Bakeñisa kuli Elifazi n’a na ni tohonolo ya ku bulela pili, ku kana kwa ba kuli ne li yena yo muhulu ka ku fitisisa. Yo muñwi ya n’a li teñi, ne li Bilidadi, ya simuluha ku Shua, yo muñwi wa bana ba Abrahama ka Ketura. Wa bul’alu ne li Zofari, ya n’a bizwa kuli ki wa kwa Naama ili ku bonisa lusika lwa habo kamba sibaka kwa n’a pila, mwendi ili kwa wiko wa mutulo wa Arabia. (Jobo 2:11; Genese 25:1, 2; 36:4, 11) Ka ku swana ni bao ba ba lika ku tuhelisa Lipaki za Jehova ku utwa Mulimu kacenu, bona ba bal’alu bao ne ba itusisizwe ki Satani ka buikatazo bwa ku tahisa kuli Jobo a itumelele bufosi kwa litamilikezo za buhata ni ku tuhela busepahali bwa hae.

17. Ki sifi se ne ba ezize bapoti ba bal’alu bao, mi ki sifi se ne ba si k’a eza ka mazazi a’ supile ni masihu a’ supile?

¹⁷ Bona ba bal’alu bao ne ba iponahalize ku mu utwela hahulu butuku ka ku lila, ku pazula liapalo za bona, ni ku isukululela maluli kwa litoho za bona. Kono cwale ba ina ni Jobo ka mazazi a supile ni masihu a’ supile ba s’a buleli linzwi ni le likana la ku mu omba-omba! (Jobo 2:12, 13; Luka 18:10-14) Bona bapumi ba bal’alu bao ba baipi ne ba li mwa butokwi bo butuna bwa mayemo a kwa moya kuli mane ne ba si na sa ku bulela se si omba-omba ka za Jehova ni lisepiso za hae. Niteñi, ne ba fita fa likutwisiso ze fosahezi ni ku itukiseza ku li sebelisa ka ku lwanisa Jobo ba sa feza fela ku eza ka sizo sa nyangela sa za ku lobeha pilu. Ka ku hoha mamelelo, pili ku kuza k’o kwa mazazi a’ supile ku si k’a fela kale, mucaha Elihu a ina bukaufinyana fa n’a kona ku utwa puhisano.

18. Ki kabakalañi Jobo ha n’a batile kozo mwa lifu?

¹⁸ Kwa mafelelezo Jobo a felisa ku kuza k’o. Ka ku ba ya si k’a fumana ku omba-ombiwa ni ko ku kana kwa bapoti ba bal’alu bao, a kuta lizazi la ku pepwa kwa hae mi a komoka libaka bupilo bwa hae bo bu tezi maswenyeho ha ne bu zwelapili. N’a batile kozo mwa lifu, ka ku s’a hupula kuli na k’a kona ku ba ni tabo luli hape pili a si k’a shwa kale, cwale ha n’a fitile fa ku ba mufuzana, ya shwezi, ni ya kula hahulu. Kono Mulimu n’a si ke a tuhelela Jobo ku holofazwa ku fita fa lifu.—Jobo 3:1-26.

Batamilikezi ba Jobo Ba Mu Unjama

19. Ki mwa miinelo mañi m’o Elifazi n’a tamelelize Jobo litaba za buhata?

¹⁹ Elifazi ki yena ya n’a kalile ku bulela mwa kananisano ya likalulo ze t’alu yeo ne i ekelize ku lika busepahali bwa Jobo. Mwa ku bulela kwa hae kwa pili, Elifazi n’a buzize kuli: “Ba kai ba ba sepahala ba ba yundisizwe?” N’a fitile fa kutwisiso ya kuli ku lukela ku ba kuli Jobo u ezize nto ye ñwi ye maswe ha amuhezi koto ya Mulimu. (Jobo, likauhanyo 4, 5) Mwa ku bulela kwa hae kwa bubeli, Elifazi n’a somile butali bwa Jobo ni ku buza kuli: “S’o ziba ki sifi se lu sa zibi ni luna?” Elifazi n’a akaleza kuli Jobo n’a lika ku iponahaza ku fita Ya-Mata-Kaufela. Ka ku feleleza ku bulela kwa hae kwa bubeli ili kwa twaniso, a talusa kuli Jobo u na ni mulatu wa bukwenuheli, ku shonga ka kweta, ni bupumi. (Jobo, kauhanyo 15) Mwa ku bulela kwa hae kwa mafelelezo, Elifazi ka bupumi a tameleza Jobo milatu ye miñata—buputeleli, ku tima ba ba mwa butokwi sico ni mezi, ni ku hatelela limbelwa ni lindiyala.—Jobo, kauhanyo 22.

20. Ki ufi o ne u li muinelo wa manzwi a twaniso a Bilidadi ku Jobo?

²⁰ Ka ku ba wa bubeli mwa ku bulela ku ye ñwi ni ye ñwi ya likalulo ze t’alu za kananisano, Bilidadi hañata n’a latelela sikuka sa taba sa ka nañungelele se si tomilwe ki Elifazi. Lipulelo za Bilidadi ne si ze ñata hahulu kono ne li utwisa pilu butuku ni ku fita. Mane n’a tamelelize bana ba Jobo bufosi mi kacwalo kuti ne ba swanelwa ki lifu. Ka ku nahana ko ku si k’a konda, a itusisa swanisezo ye: Sina kuma ni mataka ha li oma ni ku shwa ha li si na mezi, ku cwalo ni kwa “batu kaufela ba ba libala Mulimu.” Pulelo yeo ki ya niti, kono ne i s’a sebezi ku Jobo. (Jobo, kauhanyo 8) Bilidadi n’a nga manyando a Jobo sina a’ taha ku ba ba maswe. (Jobo, kauhanyo 18) Mwa ku bulela kwa hae kwa manzwi a manyinyani kwa bul’alu, Bilidadi n’a talusize kuli mutu ki “libuku” ni “libukunyana” mi kacwalo h’a si k’a kena fapil’a Mulimu.—Jobo, kauhanyo 25.

21. Zofari n’a tamilikelize Jobo nto mañi?

²¹ Zofari ne li yena wa bul’alu ku bulela mwa puhisano. Ka nañungelele, munahanelo wa hae ne u latelela wa Elifazi ni Bilidadi. Zofari n’a tameleza Jobo bumaswe ni ku mu susueza ku tuhela likezo za hae za sibi. (Jobo, likauhanyo 11, 20) Hamulaho wa likalulo ze peli za puhisano Zofari n’a tuhezi ku bulela. N’a si na sa ku ekeza teñi mwa kalulo ya bul’alu. Nihakulicwalo, mwahal’a nako yeo kaufela, Jobo n’a alabile batamilikezi ba hae ka bundume. Sina ka mutala, ka nako ye ñwi n’a bulezi kuli: “Kaufel’a mina mu baomba-ombi ba ba swabisa. Manzwi a’ si na tuso a ka fela, kamba cwañi?”—Jobo 16:2, 3.

Lwa Kona ku Itiisa

22, 23. (a) Sina mwa taba ya Jobo, Diabulosi n’a kana a lika cwañi ku sinya busepahali bwa luna ku Jehova Mulimu? (b) Nihaike kuli Jobo n’a tiyela litiko ze fitana-fitana, ki sifi se ne lu kana lwa buza ka za mubonelo wa hae?

²² Ka ku swana sina Jobo, ne lu kana lwa talimana ni but’ata busikai ka nako ye swana, mi Satani n’a kana a itusisa ku zwafa kamba miinelo ye miñwi mwa buikatazo bwa hae bwa ku sinya busepahali bwa luna. N’a kana a lika ku lu fulalelisa Jehova haiba lu talimana ni but’ata bwa za sifumu. Haiba mutu yo lu lata a timela kamba lu ipumana mwa mapongo, Satani n’a kana a bata ku lika ku lu susumeza kuli lu fe Mulimu mulatu. Ka ku swana sina balikani ba Jobo, mutu yo muñwi mane n’a kana a lika ku lu tamilikeza taba ya buhata. Sina ka mwa n’a boniselize Muzwale Macmillan, Satani n’a kana a ‘lu manami,’ kono lwa kona ku itiisa.

²³ Sina ha se lu boni ku t’o fita cwale, Jobo n’a tiyela litiko za hae ze fitana-fitana. Nihakulicwalo, kana n’a itiisa ka mukwa wa ku ba fakaufi ni ku honeha? Kana luli n’a na ni moya o lobehile? Ha lu boneñi haiba luli Jobo n’a latehezwi ki sepo kaufela.

Ne Mu K’a Alaba Cwañi?

◻ Ki taba mañi ye tuna yeo Satani n’a zusize mwa lizazi la Jobo?

◻ Ki ka miinelo mañi Jobo n’a likilwe ku fita kwa sipimo se situna ka ku fitisisa?

◻ “Balikani” ba Jobo ba bal’alu ne ba mu tamilikelize lika mañi?

◻ Sina mwa taba ya Jobo, Satani n’a kana a lika cwañi ku sinya busepahali bwa luna ku Jehova?

[Siswaniso se si fa likepe 17]

A. H. Macmillan