Niti Ya Cinca Bupilo

KI MASWABI kono ki taba ya niti kuli bupilo bwa batu ba bañata kacenu bu t’ata, mi ki bwa ku kalelwa. Kana kwa konahala kuli batu ba ba cwalo ba fumane tabo? Ba bañwi ki libangoki mi ba bandamenanga bomuyahwa ni bona. Kana ba kona ni kamuta ku ba lilama za nyangela ze sepeha? Kalabo kwa bubeli bwa zona lipuzo zeo ki ee. Batu ba kona ku cinca. Bupilo bwa kona ku cinciwa. Muapositola Paulusi n’a bonisize ka mo zeo li kona ku ezahalela ha n’a ñozi kuli: “Mu fetuhe ka ku shemunwa mwa kutwisiso ya mina, kuli mu lemuhe se si latwa ki Mulimu kana ki sifi, se sinde, se si kateleha, se si petehile.”—Maroma 12:2.

‘Se si latwa ki Mulimu se si petehile’ se si bulelwa fa si kana sa lu hupulisa zeo Jesu n’a bulelezi balutiwa ba hae ku fitelela lilimo ze 20 kwamulaho pili Paulusi a si ka ñola kale manzwi a fahalimu. Jesu n’a bulezi kuli: “Mu ka ziba niti, mi niti i ka mi lukulula.” (Joani 8:32) Ka “niti,” Jesu na talusa litaba za bumulimu ze buyelezwi—sihulu litaba ze ama tato ya Mulimu—ili ze lu bulukezwi mwa Bibele. (Joani 17:17) Kana niti ya Bibele luli ya lukulula batu? Kana ku pila ka ku lumelelana ni tato ya Mulimu luli kwa cinca bupilo? Kaniti luli kwa cinca. Ha mu nyakisise mitala i sikai.

Mulelo mwa Bupilo

Kwamulahonyana, Moisés, wa mwa Gibraltar, ne li munna ya n’a si na tabo. U bulela kuli: “Ne ni li ndalabangwana mi ne ni lobalanga mwa mikwakwa. Ne ni ikutwa ku lateha. Busihu ni busihu ne ni kupa ku Mulimu kuli a ni utwele butuku ni ku sa ni tuhelela ku pila lizazi le liñwi. Ne ni lilanga ni nze ni buza Mulimu libaka ha ni li mwa lifasi inge ni si na tuso, ni si na musebezi, ni si na lubasi, mi ku si na ya ni tusa. Ki kabakalañi ha ni zwelapili ku pila?” Mi cwale kwa ezahala nto ye ñwi.

Moisés u zwelapili ku bulela kuli: “Ne ni zibile kuli Mulimu n’a utwile tapelo ya ka ha ni katana Roberto, yo muñwi wa Lipaki za Jehova. Roberto n’a ni file Bibele ni kopi ya ku itusisa mwa ku ituta Bibele ili Ki Sifi Seo Mulimu A Tokwa ku Luna?a Zazi ni zazi ne lu itutelanga Bibele hamoho fa sikota fo ne ni lobalanga busihu. Hasamulaho wa kweli, Roberto n’a ni isize kwa mukopano kwa Ndu ya Mubuso ya Lipaki za Jehova. Hañihañi, niti ya Bibele ne i cincize ka ku tala mubonelo wa ka. Ha ni sa lobalanga fa nde; mi ha ni sa nwa ni ku zuba. Bupilo bwa ka bu cincize, mi ni tabile. Ni hupula ku kolobezwa cwale-cwale fa ni ku sebeleza Jehova sina yo muñwi wa Lipaki za hae.”

Ki cinceho hakalo! Batu ha ba si na sepo, hañata i b’a nga kabakala ku tokwa zibo. Ha ba zibi ka za Mulimu kamba milelo ya hae ye makaza. Kwa neku la Moisés, ha n’a bile ni yona zibo yeo, ne i mu file m’ata ni bundume bwa ku cinca bupilo bwa hae. Tapelo ya walisamu ku Mulimu ne i alabilwe kwa neku la Moisés: “U ni lumele liseli la hao, ni niti ya hao; li ni zamaise; li zibe ku ni tiseza fa lilundu la hao le li kenile, mwa Ndu ya hao.”—Samu 43:3.

Mwa Belize, Daniel n’a li mwa muinelo o bat’o swana. Daniel n’a sa lobalangi mwa mikwakwa—n’a na ni musebezi o kutekeha. Kono ka lilimo ze 20 n’a nz’a mbindana ni ku komiwa ki milyani ye kola ni bucwala mi n’a na ni muzamao o maswe. Niha n’a huliselizwe mwa bukatolika, Daniel n’a sa koni ku bona mulelo wa bupilo, mi n’a kakanya ku ba teñi kwa Mulimu. N’a ile kwa likeleke ze fapana-fapana ku yo bata tuso kono n’a fumani kuli buñata bwa balikani ba hae ba ba kena likeleke mane ni ba bañwi ba bahulu ba bulapeli ne ba itusisa ka mafosisa milyani ye kola kamba bucwala. Ka nako ye swana, musal’a hae n’a bata kuli a mu leleke.

Ka ku kalelwa, Daniel n’a iñolisize kwa sibaka ko ku fiwa tuso ya ku tuhela ku itusisa maswe milyani ye kola ni bucwala. Niteñi, n’a ziba kuli ha sa lukuluzwi, mi a sa fiwi tuso, n’a ka kutela mwa ku itusisa milyani ye kola. Kono ne li tuso mañi? Ka May 1996, mazazi a mabeli ku zwa fa n’a lukululezwi, Daniel n’a atumezi yo muñwi wa Lipaki za Jehova mi n’a mu komokisize ka ku mu kupa kuli, “Shangwe ha mu itute Bibele ni na.” Paki yo n’a lukisize ku itutanga Bibele ni Daniel habeli ka viki, mi hamulaho wa nakonyana Daniel n’a kalile ku pila bupilo bwa hae ka ku zamaelela ni tato ya Mulimu mi n’a tuhezi silikani ni balikani ba hae ba kale ni ku eza balikani ba Sikreste ili ba ne ba sa itusisi ka mafosisa milyani ye kola kamba bucwala mi ne ba tokolomoha mizamao ye si ka luka. Kacwalo Daniel n’a fumani kuli Bibele i bulela niti ha i li: “Ya kopana ni ba ba butali ni yena u ka talifa; kono ya twaelana ni matanya u ka utwa butuku.” (Liproverbia 13:20) Ku tuha fo n’a bulezi kuli: “Lona lo ki lwa pili mwa bupilo bwa ka ku ziba kuli ku ba ni lizwalo le li kenile ku talusañi.” Bupilo bwa Daniel ni bona ne bu cincize.

Mwa Puerto Rico, munna yo muñwi n’a bile ni cinceho ye lemuseha. N’a li mwa tolongo mi n’a ngiwa ku ba ya sabisa hahulu, kakuli n’a sa bulaile batu b’a sikai. Kana niti ya Bibele neikana ya mu cinca? Ee. Yo muñwi wa Lipaki za Jehova n’a konile ku mu fa likopi za limagazini za Watchtower ni Awake!, mi ka bubebe n’a kupile ze ñwi. Tuto ya Bibele ne i kalisizwe ni yena, mi niti ya Bibele ha ne i kalile ku mu fita kwa pilu, batu kaufela ne ba boni licinceho za n’a ezize. Ye ñwi ya liponahazo za ku cinca kwa hae ne li ya ku pumela milili ya hae ye mitelele ni ku kuta mulelu wa hae o ne u shangalakani.

Bibele i bulela kuli Mulimu wa swalela baezalibi ba ba baka ka buniti ni ku cinca bupilo bwa bona. Paulusi n’a ñozi kuli: “Kana ha mu zibi kuli ba ba sa ezi ka ku luka, ha ba na ku ca sanda sa mubuso wa Mulimu? . . . Ba bañwi ku mina ki se ne mu li sona; kono mu tapisizwe.” (1 Makorinte 6:9, 11) Ku si na ku kakanya manzwi ao n’a omba-ombile yena munna yo, sina mwa n’a mu omba-ombezi manzwi a’ kwa Likezo 24:15: “Ku zuha kwa bafu ku ka ba teñi, kwa ba ba lukile ni ba ba si ka luka.” N’a bulezi kuli: “Ni bata ku ba teñi zuho ya bafu ha i ka ezahala ilikuli ni kupe swalelo ku be ne ni bulaile.”

Lubasi lo Lu Nca

Ka lizazi le liñwi, Luis, paki ya Jehova y’a li muhasanyi wa taba ye nde wa ka nako kaufela mwa Argentina, n’a katani mucaha ya n’a bile ni makalelo a maswe mwa bupilo. Ka ku ba ya n’a yubekilwe ki bashemi ba hae h’a pepwa, n’a huliselizwe mwa libaka za pabalelo ze fapana-fapana. Ha n’a bile ni lilimo ze bat’o ba ze 20 za buhulu, n’a zibile ko ne ba inzi bom’ahe mi a lela ku yo pila bukaufi ni bona. N’a sebelize ka t’ata, ku buluka mali a mañata, ni ku ya kwa muleneñi ko ne ba pila bom’ahe. Ne ba mu lumelelize ku ina ni bona ku fitela fo ne a felezi mali a hae mi ba mu lelekisa. Ku lelekiswa k’o ne ku mu ezisize ku bata ku ipulaya.

Nihakulicwalo, Luis n’a konile ku abana niti ya Bibele ni yena mucaha y’o. Niti i kopanyeleza buikolwiso bwa kuli: “Ndate ni me, niha ba ka ni tuhela, [Jehova, NW] u ka ni nopa.” (Samu 27:10) Mucaha yo n’a fumani kuli n’a na ni Ndat’ahe wa kwa lihalimu ya n’a si ke a mu tokolomoha. Ki ya tabile cwale ku ba silama sa lubasi lo lu nca, lubasi lwa Jehova.

Munna yo muñwi mwa naha ye swana n’a bulelezi yo muñwi wa Lipaki za Jehova kuli wa lata magazini ya Watchtower. Kabakalañi? Kabakala kuli ne i pilisize linyalo la hae. Ku bonahala kuli ka zazi le liñwi yena munna yo, ha n’a zwa kwa musebezi, n’a boni magazini ya Watchtower mo ku latelwanga manyalala ye n’e na ni toho ya taba ye li “Divorce” (Telekano) i ñozwi ka muñolo o mutuna. Kabakala kuli linyalo la hae ne li sa zamayi hande mi yena ni musal’a hae ne se ba kalile litukiso za kuli ba kauhane ka mulao, n’a nopile magazini yeo ni ku i bala. N’a i shimbile kwa ndu ni ku yo i bala ni musal’a hae. Bosinyalana bao ne ba likile ku itusisa kelezo ya mwa Bibele ye n’e li mwa magazini yeo. (Maefese 5:21–6:4) Kutokwa ni sibaka, swalisano ya bona ne i bile hande. Ne ba tuhezi ku eza litukiso za ku kauhana mi cwale ba ituta Bibele sina bosinyalana ba ba swalisani.

Kwa Uruguay, munna yo muñwi ya bizwa Luis na si na tabo. Ku tengulwa ki milyani ye kola, tumelo ya mioya, ku lapela maswaniso, ku itusisa maswe bucwala—ze ki ze ñwi za lika ze n’e ezisa bupilo bwa hae ku sa kondoloka. Kwa mafelelezo, Luis, ka ku zwafa, n’a latehezwi ki tumelo ya hae ku Mulimu. Mulikan’a hae yo muñwi n’a mu file buka ye bizwa Life—How Did It Get Here? By Evolution or by Creation?b Seo ne si tahisize swalisano ye kuswani ni Lipaki za Jehova, kono Luis hape n’a kutezi kwa ku itusisa bucwala ni milyani ye kola. Muta o muñwi, mwa manyando a matuna ha n’a ipumani a inzi mwa musima wa manyalala, n’a lapezi, ili ku isa tapelo ya hae ku “Ndat’ahe Jesu Kreste,” kakuli n’a si na buikolwiso hande ka za libizo la Mulimu.

N’a kupile Mulimu kuli a mu bonise haiba ku na ni libaka l’a bezi teñi fa lifasi. Luis u biha kuli: “Lizazi le li tatama luli, mulikani yo muñwi n’a ni file buka ya n’a sa tokwile musebezi ni yona. Toho ya taba ya yona buka yeo ne li ifi? Revelation—Its Grand Climax At Hand!”c Buka yeo ne i mu tusize ku alaba puzo ya hae. Luis n’a lapezi hape kuli a tusiwe mwa ku fumana bulapeli bo bu ka mu bonisa mwa ku sebeleza Mulimu. Ki ku makaza! Ne ku bile ni ku ngongota kwa munyako, mi fande ne ku yemi Lipaki za Jehova ba babeli. Honafo Luis n’a kalile ku ituta Bibele ni bona. N’a ezize zwelopili ya ka bubebe mi cwale u ikutwa ku ba ya fuyauzwi ka ku ba Paki ya kolobelizwe. U pila bupilo bo bu kenile mi u tusa ba bañwi ku fumana mulelo mwa bupilo bwa bona. Ku yena, manzwi a’ kwa Samu 65:2 a bile a niti a’ li: “Wena ya utwa milapelo, batu kaufela ba ka ta ku Wena.”

Mwa Philippines, Allan n’a banga mulwanisi wa mulonga. N’a li yo muñwi wa kopano ili yeo mulelo wa yona ne li wa “ku tulula mulonga ilikuli masika a kwapili a te a ikole ku likanelela.” Niteñi, ka zazi le liñwi, n’a potezwi ki Lipaki za Jehova mi n’a itutile ku zwelela mwa Bibele mulelo wa Mulimu kwa mufuta wa mutu. Ona mulelo wo u kopanyeleza teñi ni sepiso ye buyelezwi ya kuli: “Ku sa na ni nakonyana ye nyinyani, mi ya maswe h’a sa na ku ba teñi . . . Kono ba ba ishuwa ba ka luwa naha, ba ka ikola kozo ye tuna.” (Samu 37:10, 11) Allan n’a bulezi kuli: “Kutokwa ni sibaka ne ni lemuhile kuli seo kopano ya luna ne i si lwanela ne si sepisizwe kale mwa Bibele. Lika kaufela ze ne lu lakaza luli li ka fiwa mwa Mubuso wa Mulimu.” Allan cwale u yemela Mubuso wa Mulimu mi u tusa ba bañwi ku ba ni tumelo mwa niti ya Bibele.

Ee, bupilo bwa cinca batu ha ba utwa niti ya Linzwi la Mulimu, yona Bibele. Kaniti, nako y’a ta ili fo mufuta wa mutu o’ ka ba teñi kaufela u ka be u lumelelanisize bupilo bwa ona ni tato ya Mulimu. Yeo ikaba cinceho luli! Fo, bupolofita bu ka talelezwa bo bu li: “Ha ku sa na ya ka holofaza kamba ku sinya fa lilundu la ka le li kenile; kakuli lifasi li ka tala zibo ya [Jehova, NW], sina mezi mw’a kwahelezi liwate.”—Isaya 11:9.

[Litaluso za kwatasi]