Mu Sabele ku Jehova

“[Jehova, NW] ni sepile Wena.”—SAMU 31:1.

 1. Samu 31 i bonisa cwañi buikolwiso mwa buikoneli bwa Jehova bwa ku fa masabelo?

LINZWI la mulumo o munati li opela ka za mutu y’o, nihailikuli u katezi mwa munahano ni mwa mubili, u icumbela ku Jehova. Tumelo ya tula, ki mo a bulelela manzwi a pina ye kenile yeo. Yena munna y’o u fumana mukunda mwa mazoho a Y’a M’ata Kaufela a’ nze a libelezi, ku zwelela kwa banyandisi ba ba mu zuma. “Jehova ni sepile Wena,” ki mo i taluseza samu ya hae. “Ni si ke na swaba ni hanyinyani; kabakala niti ya hao, u ni lamulele.”—Samu 31:1.

 2. (a) Lu kona ku sepa Jehova ku ba yena lukwakwa lwa luna ka ku toma fa misumo-tuna ye mibeli ifi? (b) Jehova ki Mulimu ya cwañi?

² Walisamu, u na ni masabelo a li mañwi—ili ona a mande ka ku fitisisa! Lika kaufela ze ñwi ni ha li ka hononwa, taba ya luli ye i ka siyala: Jehova ki yena lukwakwa lwa hae lo lu tiile, masabelo a hae. Buikolwiso bwa hae bu tomile fa misumo-tuna ye mibeli ye s’a palelwi. Wa pili, tumelo ya hae yeo Jehova a si ke a swabisa, mi wa bubeli, ku luka kwa Jehova, ili nto ye talusa kuli ni kamuta H’a na ku yubekelela batanga ba Hae. Jehova haki Mulimu ya swabisa batanga ba hae ba ba sepahala; haki y’a palelwa ku taleleza lisepiso. Ka ku fapahana, ki Mulimu wa niti ni ya fa mupuzo ku ba ba mu sepa ka buniti. Kwa mafelelezo, tumelo i ka fumana mupuzo! Ku lamulelwa ku ka ba teñi!—Samu 31:5, 6.

 3. Walisamu u lumbeka cwañi Jehova?

³ Ha nze a tahisa lipina za hae ka mishonjo ye sweli ku nanauha ku zwa mwa mayemo a’ tibile a maswabi ni bumai ku ya ku a’ pahami a buikolwiso, walisamu u fumana m’ata a mwahali. U lumbeka Jehova kabakala lilato la Hae le li sepahala. “Ku lumbwe [Jehova, NW],” ki mw’a opelela, “kakuli u ni bonisize sishemo sa hae se si komokisa, mwa munzi o tiile.”—Samu 31:21.

Mpi Ye Tiile ya Baopeli Ba Ba Li Bashaeli ba Mubuso

 4, 5. (a) Ki mpi ya baopeli ifi ye lumbeka Jehova kacenu, mi ba ezize cwañi seo mwahal’a silimo se si felile sa sebelezo? (Mu bone lipalo ze kolokisizwe fa makepe 10-13.) (b) Palo hamoho ya ba ba fumanehile kwa Kupuzo i bonisa cwañi kuli ku na ni batu ka buñwi ba bañata ni ku fita ba ba tabela ku swalisana hamoho ni baopeli ba ba li bashaeli ba Mubuso? (Mu bone lipalo ze kolokisizwe.) (c) Ki sikwata mañi mwa puteho ya habo mina se ne si kana sa ba mwa mayemo a ku swalisana hamoho ni baopeli?

⁴ Kacenu, manzwi a walisamu hape se a bile a’ sebeza. Lipina za tumbo ku Jehova ha li konwi ku haniswa ki mulwanisi ya maswe ufi kamba ufi, ki kozi ya ka taho ifi kamba ifi, kamba bumai bufi kamba bufi bwa za sifumu; ka buniti fela, sishemo se si lilato sa Jehova se si bile se sinde hahulu kwa batu ba hae. Ku potoloha lifasi mwa silimo sa sebelezo se si felile, mpi ya baopeli, ye fita fa palo ye tuna ya ba ba eza 4,709,889 mwa linaha ze 231, ne ba opezi lushango lwa Mubuso wa Mulimu. Mulonga wa kwa lihalimu wa Jehova ka Kreste Jesu ki sisabelo se si si ke sa ba tiseza maswabi. Ñohola, bona bashaeli bao ba Mubuso ba ne ba zwa mwa liputeho ze 73,070 ne ba itusisize palo hamoho ya lihora ze 1,057,341,972 mwa musebezi wa ku hasanya evangeli. Seo si tisize kuli batu b’a 296,004 ba bonise buineelo bwa bona ku Mulimu ka ku kolobezwa mwa mezi. Mi kaufela ba ne ba fumanehile kwa Mukopano wa Mwahal’a Macaba wa Tuto ya Bumulimu o ne u ezelizwe mwa Kiev, mwa Ukraine, mwa August ye felile, ne ba ikozi kezahalo ye nde hahulu yeo ye ne i si ka libelelwa. Ne ba iponezi kezahalo ye li sisupo se situna, ili ku iponela ku kolobezwa kwa Bakreste ba niti ba bañata ka ku fitisisa ko se ku bonwi haisali! Sina ha ku polofitilwe kwa Isaya 54:2, 3, batu ba Mulimu ba sweli ku ekezeha ka lipalo ze si ka bonwa kale haisali.

⁵ Nihakulicwalo, babusiwa ba ba ekezehile ili ba ba tabela ba Mubuso wa Mulimu ba libelezi ku swalisana hamoho ni baopeli. Ñohola, kwa Kupuzo ya lifu la Jesu ne ku fumanehile palo hamoho ye mbwetukisa ya batu b’a 11,865,765. Lu na ni sepo ya kuli, buñata bwa bao ba ka fita ku ze konisa za ku opela pina ya Mubuso fa ndu ni ndu mwahal’a silimo se sa sebelezo. Yeo i lukela ku ba tibelelo ye nyemisa cwañi sila sa niti, yena Satani Diabulosi!—Sinulo 12:12, 17.

 6, 7. Mu taluse ka m’o munna yo muñwi ya n’a tabela n’a tulezi ku katazwa ki badimona ka tuso ya Jehova.

⁶ Satani u ka lika ku tibela ba bañwi kwa ku ekeza manzwi a bona kwa mpi yeo ya baopeli. Sina ka mutala, bahasanyi mwa Thailand ba fumana palo ye nze i ekezeha ya batu ba ba unjamwi ki badimona. Nihakulicwalo, ba ba buniti ba bañata se ba lukuluzwi ka tuso ya Jehova. Hamulaho wa ku potela ñaka kuli a iponele fela, munna yo muñwi n’a li mwatas’a m’ata a badimona ka lilimo ze lishumi. N’a likile ka t’ata ku itukulula kwa m’ata a ona ka tuso ya yo muhulu wa bulapeli yo muñwi, kono n’a si ka bona zwelopili ye lemuseha ni ye kana. Sikombwa wa nako ye tezi wa Lipaki za Jehova a kalisa tuto ya Bibele ni munna y’o mi a mu luta ku zwelela mwa Bibele nzila fela ya ku lukuluha ka yona kwa m’ata a badimona—ili ku ikungela zibo ye nepahezi ya niti, ku ba ni tumelo ku Jehova Mulimu, ni ku mu kupa mwa tapelo.—1 Makorinte 2:5; Mafilipi 4:6, 7; 1 Timotea 2:3, 4.

⁷ Busihu bo ne bu tatami puhisano yeo, munna y’o a lola bondat’ahe ba ne ba shwile ba mu bemba haiba a s’a kuteli kwa ku ba sisebeliso sa mioya ye maswe. Lubasi lwa hae lwa kalisa ku nyanda. Ka ku s’a tabela ku susuezwa ku cinca mayemo, munna y’o a zwelapili mwa lituto za hae za Bibele mi a kalisa ku fumaneha kwa mikopano. Mwahal’a ye ñwi ya lituto zeo, paina a talusa kuli ka linako ze ñwi tubongo-bongo to tu itusiswa mwa mikiti ya za mioya ye maswe tu kona ku fa badimona sibaka sa ku kataza batu ba ba nze ba lika ku itukulula kwa m’ata a bona. Munna y’o a hupula kuli n’a na ni oli ye ñwi ya n’a itusisize sina nkau. Cwale a lemuha kuli n’a na ni ku i yumba. Haisali a i sinya, h’a si ka katazwa hape ki mioya ye maswe. (Mu bapanye Maefese 6:13; Jakobo 4:7, 8.) Yena ni musal’a hae ba sweli ku eza hande zwelopili mwa tuto ya bona mi ba fumaneha hañata kwa mikopano kwa neku la taelo ya Bibele.

 8, 9. Ki mikwalelo ifi ye miñwi yeo bashaeli ba Mubuso ba bañwi ba tulile?

⁸ Mikwalelo ye miñwi neikana ya fokolisa mulumo wa taba ye nde. Bakeñisa muinelo wa za mali o’ hatelela hahulu mwa Ghana, babeleki ba bañwi se ba zwisizwe misebezi. Bupilo se bu tulile hahulu, ili nto ye tahisa kuli ku be but’ata hahulu ku fumana ze tokwahala ka mutomo mwa bupilo. Batu ba Jehova se ba sebelisani cwañi ni seo? Ka ku sepa Jehova, isiñi ku isepa ili bona. Sina ka mutala, ka lizazi le liñwi munna yo muñwi n’a siile ingulopu ye kwalilwe fa tafule ya mafitelo a bapoti kwa ofisi ya mutai. Mwa ingulopu m’o ne ku na ni mali a’ eza $200, kamba mali a manyinyani ka ku fitisisa a’ konwa ku holwa mwa likweli ze talu. Ingulopu yeo ne i zwa ku mufani wa mpo ya n’a si ka fa libizo la hae, kono fo ne a putezwi ne ku ñozwi cwana: “Ni sinyehezwi ki mubeleko wa ka, kono Jehova u ni file u sili. Ni itumela hahulu ku yena ni ku Mwan’a hae, Kreste Jesu. Ka ku tusa mwa ku hasanya taba ye nde ya Mubuso pili mafelelezo a si ka taha kale, ni kwahelela teñi nubu ya ka y’e fokola.”—Mu bapanye 2 Makorinte 9:11.

⁹ Ku fumaneha kwa mikopano ku tusa ku luta ba ba swalisana hamoho ni mpi ya baopeli ba ba fa tumbo ku Jehova. (Mu bapanye Samu 22:22.) Kacwalo, mwa kalulo ya kwa mboela ya naha ya Honduras, ku na ni puteho ye bizwa El Jordán. Ki nto mañi ye tabisa hahulu ka za sikwata se si nyinyani seo? Ki ku fumaneha kwa bona kwa mikopano ka ku sepahala. Kwa bahasanyi b’a 19, b’a 12 ba na ni ku sila nuka ye tuna kuli ba fumanehe kwa mikopano ka viki ni viki. B’o haki but’ata bo butuna mwa nako ya mbumbi, bakeñisa kuli ba kona ku sila nuka yeo ka ku tana fa macwe a matuna. Nihakulicwalo, mwahal’a litabula, miinelo ya cinca. Mezi a ne a s’a sabisi a fita fa ku ata ni ku buba ka m’ata ni ku kukisa lika kaufela ze mwa sibaka m’o a fita. Kuli ba tule mukwalelo w’o, mizwale ni likaizeli ba na ni ku ziba ku tapa hande silozi. Pili ba si ka sila kale, ba beya liapalo za bona ze ba ka apala kwa mikopano mwa tina (sikotolo) mi ba si kwahela ka mukotana wa pulasitiki. Y’a tiile ka ku fitisisa mwa ku tapa u itusisa yona tina yeo sina macimbaukelo ha nze a etelela sikwata mwa ku sila. Ha se ba fitile hande mwa buse, ba itaula mezi, ku apala litino ze nde, mi ba fita kwa Ndu ya Mubuso ba tabile mi ba kenile hande-nde!—Samu 40:9.

Sisabelo Mo Lu Kana Lwa Ina

10. Ki kabakalañi ha lu kona ku sikuluhela ku Jehova mwa linako za sineneketo?

¹⁰ Haiba mu mwatas’a twaniso ye nongile ya badimona kamba mu fumana sineneketo ye zwa kwa limbule ze ñwi, Jehova u kona ku ba lukwakwa lwa mina. Mu kupe ku yena ka tapelo. U teeleza ka mamelelo mane ni kwa milumo ye minyinyani ka ku fitisisa ya sitongo sa batu ba hae. Walisamu n’a fumani seo ku ba sa niti mi n’a ñozi kuli: “U ni sikekele zebe ya hao; u ni lamulele kapili; ibe Wena licwe la ka le li tiile, sisabelo f’o ka ni piliseza. Kakuli licwe la ka ni lukwakwa lwa ka, ki Wena; mi kabakala Libizo la hao, u ni zamaise, u be ndambo ya ka. U ni yangwele mwa kanyandi ka ba ni teezi inze ba ipatile. Kakuli ki Wena sisabelo sa ka.”—Samu 31:2-4.

11. Mu taluse libaka sisabelo sa Jehova ha si si sibaka sa swalelele.

¹¹ Mukunda w’o Jehova a fa haki wa swalelele fela kono ki masabelo a s’a konwi ku lwaniswa ili mo lu kana lwa ina ka buiketo. Ketelelo ni tamaiso ya hae ni kamuta ha li si ka siya batu ba hae. M’ata a bumulimu a k’a tahisa kuli likezo ze kalole za Satani ni ba hae li be ze s’a sebezi. (Maefese 6:10, 11) Ha lu nze lu sepa Jehova ka pilu kaufela, u ka lu isa kwahule ni malaba a Satani. (2 Pitrosi 2:9) Mwahal’a lilimo z’e ne ze felile musebezi wa ku kutaza wa Lipaki za Jehova u lumelelizwe mwa linaha ze bat’o ba ze 35. Hape, mwa libaka za lifasi m’o miinelo ya za mipilelo, za sifumu, kamba za bupolitiki i tibela ku kutaziwa kwa taba ye nde, batu ba bañwi ba ba swana sina lingu se ba shimbulukezi ko ba konwa ku fumanwa hande ni ku fita. Japan ki ye ñwi ya libaka ze cwalo.

12. Paina yo muñwi mwa Japan n’a tahisize cwañi kuli Jehova a be masabelo a hae?

¹² Mwa Japan se ku bile ni ku ekezeha kwa babeleki ba ba zwa kwa linaha li sili, mi liputeho ze ñata ze itusisa lipuo li sili se li tomilwe. Se si bonwi sa muzwale yo muñwi mwa puteho ye itusisa puo ya mwa Japan si bonisa ka m’o kalulo ye ya puo i sili i bezi ye tahisa siselo. N’a bata ku y’o sebeza k’o butokwi bu li bo butuna ni ku fita. Niteñi, na s’a zamaisa lituto za Bibele ze lishumi mwa sibaka seo n’a li ku sona. Yo muñwi wa balikani ba hae ka lishea n’a bulezi kuli: “Haiba u ya kwa sibaka k’o butokwi bu li bo butuna ni ku fita, u ka tokwa ku zamaisa lituto za Bibele ze 20 teñi k’o!” N’a filwe kalulo mi a ya kwa Hiroshima. Nihakulicwalo, hamulaho wa likweli z’e ne, n’a na ni tuto ya Bibele i liñwi fela. Ka lizazi le liñwi a pota ku munna yo muñwi ya n’a zwa kwa Brazil ili y’a ziba fela Siputukisi. Bakeñisa kuli muzwale n’a s’a koni ku ambolisana ni munna y’o, a leka buka ye ñwi ya tuto ya Siputukisi. Hamulaho wa ku ituta lipulelo ze ñwi ze bunolo za mwa ku ambolisana, hape a potela munna y’o. Muzwale ha n’a mu lumelisize ka puo ya Siputukisi, munna y’o n’a makalile mi, ka lumenyo lo lutuna, a kwalula hahulu sikwalo ni ku mu memela mwahali. Tuto ya Bibele ne i kalisizwe. Hañi-hañi muzwale na s’a zamaisa palo hamoho ya lituto ze 22, ze 14 mwa Siputukisi, ze 6 mwa puo ya mwa Spain, mi ze peli mwa puo ya mwa Japan!

Ku Kutaza ka Buikolwiso

13. Ki kabakalañi ha ku si na mutu ya swanela ku lika ku lu hapeleza ku sebeleza Jehova ka ku lu swabisa?

¹³ Ka buikolwiso batu ba Jehova ba opela pina ya Mubuso ka tumelo ye tezi ya kuli Jehova ki yena masabelo a bona. (Samu 31:14) Ha ba na ku swaba—Jehova h’a na ku ba tiseza maswabi, kakuli u ka taleleza linzwi la hae. (Samu 31:17) Diabulosi ni balikani ba hae ba sidimona ba ka swaba. Bakeñisa kuli batu ba Jehova ba filwe musebezi wa ku kutaza lushango lo lu s’a swabisi, ha ba hapelezwi ki batu ba bañwi ka mukwa wa ku swabisiwa kuli ba kutaze. Yeo haki yona nzila yeo Jehova, kamba Mwan’a hae, ba susueza batu ku Mu lapela. Lipilu za batu ha li tezi tumelo ni buitebuho bwa ku itebuha bunde ni sishemo se si lilato sa Jehova, ki muinelo o munde wa lipilu za bona o’ susueza milomo ya bona ku bulela. (Luka 6:45) Kacwalo, nako kaufela ye lu sebelisa mwa sebelezo ya mwa simu ka kweli ni kweli, sihulu haiba nako yeo i bonisa ka mo lu kona ku ezeza kaufela, ki nako ye nde, haki ye swabisa. Mponyana ya musali wa mbelwa ne i itebuhilwe ka ku tala ki Jesu ni Ndat’ahe, nji cwañi?—Luka 21:1-4.

14. Ki maikuto afi ao mu kona ku fa ka ku ama kwa musebezi wa bupaina? (Mu bone hape lipalo ze kolokisizwe.)

¹⁴ Kwa bahasanyi ba palo ye sweli ku hula, ku ba ba moyo kaufela mwa ku lapela kwa bona ku kopanyeleza cwalo ni ku sebeza sina mapaina—palo ye tuna ya bona ñohola ne li 890,231! Haiba ku ba ni zwelopili ye likana ni ya silimo se si felile, palo yeo i ka kona ku fitelela 1,000,000. Se si bonwi se si tatama si bonisa ka m’o kaizeli yo muñwi mwa Nigeria n’a bezi paina. U ñola kuli: “Ha ne ni li bukaufi ni ku feza sikolo sa sekondari, ne ni ile kwa ku tusa ku tatehela ba ne ba fumaneha kwa sikolo sa bupaina sa Lipaki za Jehova. Teñi k’o ne ni boni likaizeli ba babeli ba ne ba li basupali ku fita bokuku. Ha ne ni zibile kuli ne li mapaina ba ne ba fumaneha kwa sikolo, na nahana kuli, ‘Haiba ba babeli b’ani b’a kona ku eza bupaina, ki sika mañi se si ni tibela?’ Kacwalo ha se ni felize sikolo, ni na na ba paina wa kamita.”

15. Bupaki bwa ku tand’alelwa bu kona ku tahisa cwañi kuli ba bañwi ba sabele ku Jehova?

¹⁵ Haki b’ote ba ba kona ku eza bupaina, kono ba kona ku fa bupaki. Mwa Belgium kaizeli wa lilimo za buhulu ze 82 n’a ile kwa ku leka nama. N’a lemuhile kuli musal’a mulekisi wa nama n’a swabile hahulu bakeñisa likezahalo za cwanoñu fa za bupolitiki. Kacwalo kaizeli a comeka trakiti ye li Ki Sikamañi Seo Lipaki za Jehova ba Si Lumela? hamoho ni mali a mapampili ha n’a lifa. Kaizeli y’o ha n’a kutezi kwa sintolo sa nama seo, musal’a mulekisi, ku si na ku kata-kata ni hanyinyani, a buza ka za seo Bibele i bulela ka za ku konahala ku tumbuka kwa ndwa ya lifasi ya bulalu. Kaizeli y’o a mu tiseza buka ye li Kozo ni Buiketo za Niti—Mu Ka Li Fumana Cwañi? Mazazi a’ sikai hamulaho, kaizeli wa musupali y’o ha n’a kena mwa sintolo seo, musal’a mulekisi n’a na ni lipuzo ze ñata za ku mu buza. Kaizeli y’o a shwela hahulu musali y’o makeke; ka bunolo fela a mu fa tuto ya Bibele, mi yeo ne i amuhezwi. Cwale, musal’a mulekisi y’o s’a bata ku kolobezwa. Ku cwañi ka za mulekisi wa nama yena ka sibili? N’a balile trakiti y’ani mi cwale ni yena s’a ituta Bibele.

‘Pulukelo ya Bunde’

16. Jehova u beile cwañi kwatuko pulukelo ya bunde ya batu ba hae?

¹⁶ Mwahal’a mazazi a mafelelezo a, a’ tezi lisineneketo, kana Jehova haki y’a “bonisize sishemo sa hae se si komokisa” ku ba ba sabezi ku yena? Ka ku swana sina ndate ya lilato, ili ya sileleza, Jehova u beile kwatuko pulukelo ya bunde ya bana ba hae ba fa lifasi-mubu. Se a sweli ku ba fa tabo ka buñata fapil’a bashalimeli kaufela, sina fela mw’a bulelela walisamu kuli: “Sishemo [“bunde,” NW] sa hao ki se situna cwañi, s’o bulukezi ba ba ku saba; s’o bonahaliseza ba ba ku sepile, fapil’a bana ba batu.”—Samu 31:19, 21.

17-19. Mwa Ghana, ki ze nde lifi ze ne li zwile mwa ku ñolisa linyalo ka mulao kwa munna yo muñwi wa musupali?

¹⁷ Kacwalo, batu ba silifasi ba fita fa ku iponela busepahali bwa ba ba lapela Jehova, mi b’a komoka. Sina ka mutala, mwa Ghana munna wa lilimo za buhulu ze 96 n’a ile kwa ofisi ya muñoli wa micato ni ku y’o kupa kuli linyalo la hae le ne li se l’i ngile lilimo ze 70 mi ili le li si ka catiswa cwale li ñoliswe. Muñoli wa micato a kakamala ni ku buza kuli: “Mu tiisa niti seo ki sona se mu bata ku eza? Mina ba se ba kuma f’o?”

¹⁸ Munna y’o a talusa kuli: “Ni bata ku ba yo muñwi wa Lipaki za Jehova ni ku abana mwa musebezi wa butokwa ka ku fitisisa pili maungulo a lifasi a si ka fita kale—ili musebezi wa ku kutaza taba ye nde ya Mubuso wa Mulimu. Musebezi w’o u isa kwa bupilo bo bu s’a feli. Lipaki za Jehova ba ipeya ku utwa milao ya mulonga, ku kopanyeleza cwalo ni mulao wa k’u nga micato. Kacwalo shangwe, ha mu ni ñolise.” Muñoli y’o n’a makalile hahulu. A mu fa mucato, mi munna muhulu y’o a funduka f’o a tabile hahulu kuli cwale na s’a na ni linyalo la ka mulao.—Mu bapanye Maroma 12:2.

¹⁹ Hamulaho wa seo, muñoli wa micato a kengeyela ka za lika za n’a utwile. “Lipaki za Jehova . . . musebezi wa butokwa ka ku fitisisa . . . maungulo a lifasi . . . Mubuso wa Mulimu . . . bupilo bo bu s’a feli.” Ka ku s’a utwisisa libaka zeo kaufela ha ne li li za butokwa cwalo mwa bupilo bwa munna wa lilimo za buhulu ze 96, a ikatulela ku bata Lipaki ni ku tatubisisa ka ku ekezeha mwa taba yeo. N’a amuhezi tuto ya Bibele ya fa ndu mi a eza zwelopili ya ka bubebe. Kacenu, yena muñoli wa manyalo y’o ki Paki ya kolobelizwe. Kacwalo, ha lu ipeya ku utwa Jehova mane ni mwa lika zeo ba bañwi ne ba kana b’a nga ku ba litaba ze nyinyani, seo ne si kana sa tahisa bunde bo butuna ku luna ni ku ba ba iponela muzamao wa luna.—Mu bapanye 1 Pitrosi 2:12.

20. Mwa Myanmar, busepahali bwa kaizeli yo muñwi yo munca ne bu isize cwañi kwa ku fa bupaki bo bunde?

²⁰ Ba ba hulile ba ba lumelelize niti ku ba tahiseza ku ba batu ba ba sepahala ba fa mutala o munde ku ba banca mwa lifasi le li s’a sepahali le. Mwa Myanmar ku pila kaizeli yo munca ya cwalo. U zwa mwa lubasi lo lu shebile ili lo lu ishuwa lwa bana b’a lishumi. Ndate, ya s’a tuhezi mubeleko, ki paina wa kamita. Ka lizazi le liñwi kwa sikolo, kaizeli y’o n’a nopile kaseka ka kwa munwana ka ndaimani, mi kapili-pili a ka isa ku bo muluti ba hae. Sitopa ha ne si kopani fa lizazi le li tatama, muluti y’o n’a taluselize sitopa ka za m’o kaseka kao ne ka fumanezwi ni ku fitiswa kuli ka kutisiwe ku muñ’a kona. Cwale a kupa kaizeli yo munca y’o ku yema fapil’a sitopa kamukana ni ku talusa libaka ha n’a ezize cwalo, ka ku ziba kuli banana ba bañwi ne ba k’a be ba ikatulezi ku ipulukela kona. Kaizeli y’o n’a talusize kuli ki Paki ya Jehova ni kuli Mulimu wa hae h’a lati ku uzwa kamba mufuta ufi kamba ufi wa ku s’a sepahala. Ba fa sikolo kamukana ne ba utwile ka za seo, ili ku fa kaizel’a luna yo munca y’o sibaka se sinde sa ku fa bupaki kwa baluti hamohocwalo ni kwa bana ba sikolo.

21. Ba banca ha ba nze ba sepa Jehova, muzamao wa bona u tahisa kuli a bonwe cwañi?

²¹ Mwa Belgium muluti yo muñwi mwa sitopa n’a bulezi nto ye ñwi ye hoha mamelelo ka za Lipaki za Jehova. N’a lemuhile muzamao wa yo muñwi wa baituti ba hae, ili y’o hape a li kaizeli yo munca, mi n’a bulezi kuli: “Cwale se ni na ni maikuto a sili ka za Lipaki za Jehova. S’aluluti ne si ni isize kwa ku nahana kuli ne ba ka ba batu ba ba s’a koni ni hanyinyani ku tiyela miinelo ye ba s’a lati. Ne ba bonahalile ku ba bona ba ba kona ku i tiyela ka ku fitisisa, ba s’a sheng’oki likuka za bona.” Ka silimo se siñwi ni se siñwi mupuzo w’a fiwa ki baluti kwa baituti ba bona ba ba sebelize hande ka ku fitisisa. O muñwi wa mipuzo ki wa kwa neku la sikuka sa muzamao. Ka lilimo ze talu ze tatamani, mipuzo ku ba ba kumbile ze ñata ka ku fitisisa ba balalu ne i filwe ki muluti y’o kwa bana ba Lipaki za Jehova. Ki mo ku bela hañata ku bao sepo ya bona ya ka busepahali i ku Jehova.—Samu 31:23.

22. Ki manzwi afi a mafelelezo a’ na ni tulo a kwa Samu 31, mi ao a lu tusa cwañi mwahal’a mafelelezo a muinelo wo wa linto?

²² Samu 31 i utwahaza hande-nde manzwi a yona a mafelelezo a’ na ni tulo a’ li: “Mu itiise, mi lipilu za mina li tiye, mina kaufela ba ba sepile [Jehova, NW].” (Samu 31:24) Kacwalo, ha lu talimana ni mazazi a mafelelezo a muinelo wa linto o maswe wa Satani, ka ku s’a lu yubeka, Jehova u ka sutelela bukaufi hahulu ni luna ni ku lu fa m’ata a hae luli. Jehova w’a sepahala mi h’a palelwi. Ki yena masabelo a luna; ki yena mapilelo a luna.—Liproverbia 18:10.

Kana Mw’a Hupula?

◻ Lu kona ku eza cwañi Jehova masabelo a luna ka buikolwiso?

◻ Ki bupaki mañi bo bu li teñi bwa kuli mpi ya baopeli i sweli ku opela tumbo ya Mubuso ka bundume?

◻ Ki kabakalañi ha lu kona ku ba ni buikolwiso bwa kuli kanyandi ka Satani ha ka na ku swasa batu ba Jehova?

◻ Ki pulukelo ifi yeo Jehova a beile kwatuko ya ba ba sabela ku yena?

[Chati fa likepe 10-13]

PIHO YA MWA SILIMO SA SEBELEZO SA 1993 YA LIPAKI ZA JEHOVA MWA LIFASI KAMUKANA

(Mu bone muputo o tiile)

[Maswaniso a fa likepe 8, 9]

Ba ba sabela ku Jehova ba eza mpi ya baopeli ba ba li bashaeli ba Mubuso—ba ba fita fa 4,709,889!

1. Senegal

2. Brazil

3. Chile

4. Bolivia