Macaba A Halifile

 4. Ne mu ka talusa cwañi ka bukuswani lisupo ze tuna ze mwa Samu 2:1, 2?

⁴ Ka ku ama kwa likezo za macaba ni babusi ba ona, walisamu u kala pina ya hae ka ku opela kuli: “Macaba a halifeziñi, mi batu ba lelelañi ze si na tuso? Malen’a lifasi ba lumelelani, ni bazamaisi ba kopani ku lelisana, mo ba ka lwaniseza [Muñ’a] Bupilo ni Mutoziwa wa hae.”—Samu 2:1, 2.a

5, 6. Macaba a ‘lelisani’ ku ezañi ze ‘si na tuso’?

⁵ “Ze si na tuso” z’a ‘lela’ macaba a cwale ki lika mañi? Ku fita ku amuhela Mutoziwa wa Mulimu—Mesiya kamba Kreste—macaba a zwezipili ku ‘lela’ kamba ku kengeela mwa ku zwisezapili m’ata a bona. Manzwi ao a mwa samu ya bubeli hape ne a bile ni talelezo mwa linako za baapositola muta babusi ba Majuda ni ba Maroma ne ba lelisani ni ku bulaya Jesu Kreste, yena Mulena ya n’a ka fiwa bulena ki Mulimu. Kono talelezo ye tuna ne i kalile ka 1914 Jesu ha n’a filwe Bulena mwa lihalimu. Ku zwa yona nako yeo, ha ku na kopano ya bupolitiki nihaiba i liñwi fa lifasi ye amuhezi Mulena ya tomilwe ki Mulimu.

⁶ Ne ku talusañi walisamu ha n’a buzize kuli ‘batu ne ba lelelañi ze si na tuso’? Mulelo wa bona ki ona o si na tuso; ki wa mbango mi ha u na ku konda. Ha ba koni ku tisa kozo ni swalisano mwa lifasi le. Kono mane ba fita fa ku lwanisa bubusi bwa Mulimu. Mane ba lumelelani mi ba swalisani mwa ku lwanisa Muambakani-ya-Pahami ni Mutoziwa wa hae. Ki butoto kwa butuna!

Mulena ya Tuzi wa Jehova

 7. Balateleli ba Jesu ba kwa makalelo ne ba sebelisize cwañi manzwi a’ kwa Samu 2:1, 2 mwa tapelo?

⁷ Balateleli ba Jesu ne ba bonisize kuli manzwi a’ kwa Samu 2:1, 2 a ama yena. Ha ne ba nyandisezwa tumelo ya bona ne ba lapezi kuli: “Mulena [Jehova], ki Wena ya ezize lihalimu, ni lifasi, ni liwate, ni linto kamukana ze ku zona; n’o bulezi ka mulomo wa Davida mutang’a hao, wa li: Macaba a halifeziñi, mi batu ba lelelañi ze si na tuso? Malen’a lifasi ba lumelelani, ni bazamaisi ba kopani, ku lwanisa Mulena ni Mutoziwa wa Hae. Ki niti, Heroda [Antipasi] ni Ponse Pilato ba kopani ni bamacaba ni masika a Isilaele, mwa munzi wo, ku lwanisa Mutang’a hao ya Kenile, Jesu ye u ketile.” (Likezo 4:24-27; Luka 23:1-12)b Luli, mwa linako za Jesu, ne ku bile ni ku lelisana ku lwanisa Jesu, yena mutang’a Mulimu ya tozizwe. Kono samu yeo ne i ka ba ni talelezo ye ñwi hape lilimo ze mianda-nda hasamulaho.

 8. Samu 2:3 i ama cwañi macaba a cwale?

⁸ Isilaele wa kwakale ha n’a busiwa ki batu, ba ba cwale ka Davida, macaba a sihedeni n’a kubukani ku lwanisa Mulimu ni mulena wa hae ya tozizwe. Kono ku cwañi mwa linako za luna? Macaba a cwale h’a lati ku eza ze tokwiwa ki Jehova ni Mesiya. Kacwalo ba boniswa ku ba ba ba bulela kuli: “A lu pume mawenge a bona, lu nepele kwahule matamiso a bona.” (Samu 2:3) Likaniso lifi kamba lifi ze tomiwa ki Mulimu ni Mutoziwa wa hae li lwaniswa ki babusi ni macaba. Niteñi, buikatazo kaufela bo bu eziwa bwa ku puma mawenge ni ku nepela kwahule matamiso a cwalo ha bu na ku konda.