Jehova Ki ‘Yena Sisabelo sa Luna mwa Nako ya Ziyezi’

“Ku piliswa kwa ba ba na ni niti, ku zwa ku [Muñ’a] Bupilo; ki Yena sisabelo sa bona mwa nako ya ziyezi.”—SAMU 37:39.

1, 2. (a) Jesu n’a lapeleziñi balutiwa ba hae? (b) Ki ufi mulelo wa Mulimu kwa batu ba hae?

JEHOVA ki Mulimu ya m’ata ote. U na ni m’ata a ku sileleza balapeli ba hae ba ba sepahala ka mwa latela kaufela. Mane n’a ka kona nihaiba ku zwisa batu ba hae mwa lifasi ni ku ba isa mwa sibaka sa kozo se si iketile. Kono ha n’a lapela ka za balutiwa ba hae ku Ndat’ahe wa kwa lihalimu, Jesu n’a ize: “Ha ni ku lapeli kuli u ba zwise mwa lifasi, kono kuli u ba sileleze kwa bumaswe.”—Joani 17:15.

² Jehova u ketile ku sa lu ‘zwisa mwa lifasi.’ Kono mulelo wa hae kikuli lu pile ni batu ba bañwi mwa lifasi le ilikuli lu shaele ku bona lushango lo lu fa sepo ni ku omba-omba. (Maroma 10:13-15) Kono sina mwa n’a boniselize Jesu mwa tapelo ya hae, ha lu nze lu pila mwa lifasi le, lu kopana ni ‘ba ba maswe.’ Batu ba ba sa utwi ni mioya ye maswe li tahisa hahulu butuku ni masitapilu, mi Bakreste ni bona ba telwanga ki ziyezi.—1 Pitrosi 5:9.

 3. Balapeli ba Jehova ba ba sepahala ni bona ba kopananga ni nto mañi, kono Linzwi la Mulimu li lu omba-omba cwañi?

³ Ha lu li mwa miliko ye cwalo, ki nto ya ka sipepo ku ikutwa ku fokola. (Liproverbia 24:10) Mwa Bibele ku na ni litaba ze ñata za batu ba ba sepahala be ne ba ziyelehile. Walisamu u li: “Manyando a ya lukile ki a mañata: Kono [Muñ’a] Bupilo u mu lamulela ku ona kaufela.” (Samu 34:19) Ki niti, lika ze maswe li tahelanga nihaiba “ya lukile.” Sina walisamu Davida, fokuñwi lu kana mane lwa ikutwa ku ‘felelwa ki m’ata ni ku fuyuka hahulu.’ (Samu 38:8) Niteñi, kwa omba-omba ku ziba kuli “[Muñ’a] Bupilo u fakaufi ni ba ba na ni pilu ye lobehile, mi u pilisa ba ba ikutwa ku swaba mwa moya wa bona.”—Samu 34:18; 94:19.

4, 5. (a) Ka ku lumelelana ni Liproverbia 18:10, lu tokwa ku ezañi kuli lu fumane tuso ya Mulimu? (b) Ki mihato ifi ye lu kona ku nga kuli lu tusiwe ki Mulimu?

⁴ Ka ku lumelelana ni tapelo ya Jesu, Jehova kaniti luli wa lu tokomela. Ki yena ‘sisabelo sa luna mwa nako ya ziyezi.’ (Samu 37:39) Buka ya Liproverbia i bulela nto ye swana ha i li: “Libizo la [Muñ’a] Bupilo ki mapilelo a tiile, ya lukile u sabela ku ona, mi wa piliswa.” (Liproverbia 18:10) Liñolo le, li patulula taba ye ñwi ya niti ya ka za m’o Jehova a babalelela libupiwa za hae ka musa. Mulimu sihulu u sileleza ba ba lukile ili ba ba mu bata ka tukufalelo, inge ba ba matela mwa sibaka sa mapilelo.

⁵ Ha lu li mwa maziyezi, lu kona ku matela cwañi ku Jehova kuli a lu sileleze? Ha lu nyakisiseñi mihato ye milalu ya butokwa ye lu kona ku nga kuli Jehova a lu tuse. Sa pili, lu lukela ku atumela Ndat’a luna wa kwa lihalimu ka tapelo. Sa bubeli, lu swanela ku sebeza ka ku lumelelana ni moya wa hae o kenile. Mi sa bulalu, lu swanela ku ipeya kwa tukiso ya Jehova ka ku eza siango ni Bakreste ba bañwi ba ba kona ku fukuza kwa ziyezi ya luna.

M’ata a Tapelo

 6. Bakreste ba niti ba nga cwañi tapelo?

⁶ Bocaziba ba bañwi ba za bualafi ba eleza kuli tapelo ki mulyani ku ba ba fuyukile pilu ni ba ba kalezwi. Nihaike i kana ya ba niti kuli ku kutumana ka mulelo wa ku lapela kwa kona ku fukuza kwa ñalelwa, kwa swana ni mutu ha teeleza kwa milumo ye miñwi ya mwa pupo kamba mane ha pikitwa mwa mukokoto. Bakreste ba niti ha ba nyinyafazi tapelo ka ku i nga fela sina kalafo ye wetulusa munahano. Lu nga tapelo ku ba nzila ye kutekeha ya ku ambolisana ka yona ni Mubupi. Tapelo i ama buineelo bwa luna ku Mulimu ni sepo ya luna ku yena. Kaniti, tapelo ki kalulo ya bulapeli bwa luna.

 7. Ku lapela ka buikolwiso ku talusañi, mi litapelo ze cwalo li lu tusa cwañi ku tula ziyezi?

⁷ Litapelo za luna li swanela ku zamaelela ni buikolwiso kamba sepo ya luna ku Jehova. Muapositola Joani n’a ñozi kuli: “Sepo ye tuna ye lu na ni yona ku Yena kikuli ha lu kupa nto ka ku lata kwa hae, wa lu utwa.” (1 Joani 5:14) Mane Jehova, yena Ya Pahami ka ku Fitisisa, Mulimu a nosi wa niti ni ya m’ata ote, u isa hahulu mamelelo kwa litapelo za ka ku tundamena za balapeli ba hae. Ku ba fela ni zibo ya kuli Mulimu wa luna ya lilato wa teelezanga ha lu mu bulelela lipilaelo ni matata a luna, kw’a omba-omba luli.—Mafilipi 4:6.

 8. Ki kabakalañi Bakreste ba ba sepahala ha ba sa swaneli ku ba ni boi kamba ku ikutwa kuli ha ba swaneli ku atumela Jehova mwa tapelo?

⁸ Bakreste ba ba sepahala ha ba swaneli ku ba ni boi, ku ikutwa ku sa swanela, kamba ku felelwa ki buikolwiso ha ba atumela Jehova ka tapelo. Ki niti kuli ha lu swabile kamba ha lu ziyelizwe ki matata, lu kana lwa palelwa ku zwelapili ku tabela ku atumela Jehova mwa tapelo. Ne lu ka eza hande ka linako zeo ku hupula kuli Jehova ‘u shwela makeke ba hae ba ba nyandile’ ni kuli u “tiisa lipilu za ba ba ikokobeza.” (Isaya 49:13; 2 Makorinte 7:6) Sihulu ha lu li mwa linako za masitapilu ni ziyezi, lu tokwa hahulu ku atumela Ndat’a luna wa kwa lihalimu ka buikolwiso ka ku ba yena sisabelo sa luna.

 9. Tumelo i tusa cwañi ha lu atumela Mulimu mwa tapelo?

⁹ Kuli lu tusiwe hahulu ki tohonolo ya tapelo, lu swanela ku ba ni tumelo sakata. Bibele i bulela kuli “ya taha ku Mulimu u swanezi ku lumela kuli Mulimu u teñi, ni kuli ki Yena ya fa ba ba mu bata mupuzo.” (Maheberu 11:6) Tumelo i fita ku lumela fela kuli “Mulimu u teñi.” Tumelo sakata i ama ku kolwa ka ku tiya kuli Mulimu u na ni m’ata ni takazo ya ku lu fa mupuzo kabakala ku mu utwa mwa bupilo. “Meto a Mulena a talimile ba ba na ni niti, mi lizebe za hae li teeleza tapelo ya bona.” (1 Pitrosi 3:12) Ku zwelapili ku ba ni zibo ya m’o Jehova a iyakatwela luna ka lilato ku kona ku lu tusa ku ba ni buikolwiso ha lu lapela.

10. Litapelo za luna li swanela ku ba cwañi kuli lu tiiswe ki Jehova kwa moya?

¹⁰ Jehova u teelezanga kwa litapelo za luna ha li lapelwa ka pilu kaufela. Walisamu n’a ñozi kuli: “Ni lapela ka pilu ya ka kaufela; u ni alabe Wena [Muñ’a] Bupilo.” (Samu 119:145) Ka ku fapahana ni litapelo za ka sizo ze fiwa mwa bulapeli bo buñata, litapelo za luna ha li ezezwi fela mulao kamba ku lapelwa inze lu zwisize lipilu kwateñi. Ha lu lapela ku Jehova ka ‘pilu ya luna kaufela,’ manzwi a luna a ba ni taluso ni mulelo. Hamulaho wa litapelo ze cwalo za ka ku tundamena, lu kalisa ku ikutwa ku imuluha kabakala ku lwalisa ‘Jehova mulwalo wa luna.’ Mi ‘u ka lu tiisa,’ sina ka mo i sepiseza Bibele.—Samu 55:22; 1 Pitrosi 5:6, 7.

Moya wa Mulimu Ki Mutiisapilu wa Luna

11. Ki ifi nzila ye ñwi yeo Jehova a lu alabanga ha lu tundamena ‘ku kupa’ tuso ya hae?

¹¹ Jehova ha utwangi fela litapelo kono hape wa li alabanga. (Samu 65:2) Davida n’a ñozi kuli: “Mwa lizazi la ñalelwa ya ka ni ka biza ku Wena, mi u ka ni alaba.” (Samu 86:7) Ka ku swana, Jesu n’a susuelize balutiwa ba hae ku tundamena ‘ku kupa’ tuso ya Jehova kakuli “Ndate ya kwa lihalimu” u ka fa “Moya o Kenile ku ba ba u kupa ku yena.” (Luka 11:9-13) Kiniti, m’ata a sebeza a Mulimu ki mutiisapilu, kamba mutusi, kwa batu ba hae.—Joani 14:16.

12. Moya wa Mulimu u kona ku lu tusa cwañi matata ha bonahala hahulu butuna?

¹² Niha lu li mwa miliko, moya wa Mulimu wa kona ku lu fa ‘m’ata a matuna.’ (2 Makorinte 4:7) Muapositola Paulusi, ya na tiyezi maziyezi a mañata, n’a bulezi ka buikolwiso kuli: “Ni kona linto kamukana ka [Jehova, NW] ya ni fa mata.” (Mafilipi 4:13) Ka ku swana, Bakreste ba bañata kacenu ba ikutwile ku tiiswa sinca kwa moya ni mwa munahano kabakala ku alabiwa kwa likupo za bona. Hañata, maziyezi ha bonahalangi hahulu butuna ha se lu filwe tuso ya moya wa Mulimu. Kabakala m’ata ao e lu fiwa ki Mulimu, lwa kona ku bulela sina mwa n’a bulelezi muapositola kuli: “Lu mwa butata mwa maneku kaufela, kono ha lu honehi luli; lu ziyelehile maswe, kono ha lu felelwi ki sepo; lwa nyandiswa, kono ha lu fulalelwi; lu wisezwa fafasi, kono ha lu shwi.”—2 Makorinte 4:8, 9.

13, 14. (a) Jehova u bile cwañi sisabelo sa luna ka ku itusisa Linzwi la hae le li ñozwi? (b) Ku sebelisa likuka za Bibele ku mi tusize cwañi mina ka butu?

¹³ Moya o kenile hape u buyelezi ni ku bukeleza Linzwi la Mulimu le li ñozwi kuli luna lu tusiwe. Jehova u bile cwañi sisabelo sa luna mwa nako ya ziyezi ka ku itusisa Linzwi la hae le li ñozwi? Nzila ye ñwi ki ya ku lu fa butali ni buitemuso. (Liproverbia 3:21-24) Bibele i twaeza booko ni m’ata a luna a ku nahana. (Maroma 12:1, NW) Ka ku bala ni ku ituta Linzwi la Mulimu kamita, hamoho cwalo ni ku li sebelisa, lwa kona ku ‘itwaelisa kutwisiso ya ku keta ze nde ku ze maswe.’ (Maheberu 5:14) Mwendi mu kile mwa iponela ka sibili m’o likuka za Bibele ne li mi tuselize ku eza liketo ze nde ha ne mu li mwa matata. Bibele i lu fa butali bo bu kona ku lu tusa ku tatulula hande maziyezi.—Liproverbia 1:4.

¹⁴ Linzwi la Mulimu li lu fa simbule se siñwi sa m’ata—yona sepo ya puluso. (Maroma 15:4) Bibele i lu bulelela kuli lika ze maswe ha li na ku zwelapili ku ya ku ile. Ñalelwa ifi kamba ifi ye lu kopana ni yona ki ya ka nakonyana. (2 Makorinte 4:16-18) Lu na ni “sepo ya bupilo bo bu sa feli, bo bu sepisizwe ki Mulimu ya sa koni ku puma, pili, lifasi li si ka ezwa kale.” (Tite 1:2) Haiba lu tabela sepo yeo, inze lu zwelapili ku ziba kuli kwapili ku ka ba ni nako ye nde ya sepisize Jehova, lwa kona ku itiisa ha lu li mwa ñalelwa.—Maroma 12:12; 1 Matesalonika 1:3.

Puteho —Poniso ya Lilato la Mulimu

15. Bakreste ba kona ku tusana cwañi?

¹⁵ Tukiso ye ñwi ye zwa ku Jehova ye kona ku lu tusa mwa nako ya ziyezi ki silikani se lu ikola mwa puteho ya Sikreste. Bibele i bulela kuli: “Mulikan’a mutu wa mu lata ka nako ni nako, u pepezwi kuli a be mwanahabo mwa liziyezi za hae.” (Liproverbia 17:17) Linzwi la Mulimu li susueza bote ba ba mwa puteho kuli ba fanane likute ni ku latana yo muñwi ku yo muñwi. (Maroma 12:10) Muapositola Paulusi n’a ñozi kuli: “Ku si ke kwa fumanwa mutu ya ya ka se si mu swanela yena a li nosi, kono a ye ka se si swanela ba bañwi.” (1 Makorinte 10:24) Ku ba ni moya o cwalo ku kona ku lu tusa ku isa pilu kwa butokwi bwa ba bañwi ku fita ku landalala fela fa miliko ya luna. Ha lu ifana ku tusa ba bañwi, ha lu tusi bona fela kono hape lu fumana tabo ni buiketo ze lu konisa ku lwala milwalo ya luna.—Likezo 20:35.

16. Mukreste ni Mukreste u kona ku ba cwañi ya susueza?

¹⁶ Banna ni basali ba ba hulile kwa moya ba kona ku tusa hahulu kwa ku tiisa ba bañwi. Kuli ba eze cwalo, ba ikezanga silikani ni ku ifana ku tusa ba bañwi. (2 Makorinte 6:11-13) Puteho ya tusehanga luli batu kaufela ha ba fumana nako ya ku babaza ba banca, ku tiisa balumeli ba ba sa z’o kalisa, ni ku susueza ba ba fuyukile lipilu. (Maroma 15:7) Lilato la Sikreste hape li ka lu tusa ku ambuka moya wa ku hupulelana bumaswe. Ha lu swaneli ku matela ku lumela kuli matata a ka butu ki sisupo sa bufokoli bwa kwa moya. Paulusi ka swanelo n’a susuelize Bakreste kuli ba “tiise ba lipilu ze shekesha.” (1 Matesalonika 5:14) Bibele i bonisa kuli nihaiba Bakreste ba ba sepahala ba ziyelehanga.—Likezo 14:15.

17. Ki lifi linzila ze lu kona ku tiisa ka zona tamo ya sizwale sa luna sa Sikreste?

¹⁷ Mikopano ya Sikreste i lu fa kolo ye nde hahulu ya ku tiisana ni ku susuezana. (Maheberu 10:24, 25) Swalisano yeo ye lilato ha i feleli fela kwa mikopano ya puteho. Kono hape, batu ba Mulimu ba selezanga linzila za ku ikola ka zona siango se sinde ka linako li sili fela. Muta ku zuha miinelo ye ziyeza, lu ka tusana ka bunolo kakuli lu tomile kale litamo za bulikani ze tiile. Muapositola Paulusi n’a ñozi kuli: “Ku kauhana ku tokwahale mwa mubili; kono lilama li babalelane. Mi silama se siñwi ha si utwa butuku, lilama kaufela li utwa butuku ni sona; mi silama se siñwi ha si lumbwa, lilama kaufela li wabelwa ni sona.”—1 Makorinte 12:25, 26.

18. Ki moya ufi o lu swanela ku ambuka ha lu ikutwa ku lembwala mwa pilu?

¹⁸ Fokuñwi, lu kana lwa lembwala hahulu kwa pilu kuli mane lu ikutwa kuli ha lu koni ku ikola siango ni Bakreste ba bañwi. Lu swanela ku lwanisa maikuto a cwalo kuli lu si ke lwa icawisa tuso ni ku omba-omba ko ba kona ku lu fa balumeli ba bañwi. Bibele i lu lemusa kuli: “Mutu ya sa lati siango ni ba bañwi, u bata z’a lakaza yena a nosi, u lwanisa za ngana kaufela.” (Liproverbia 18:1) Mizwale ni likaizeli ba luna ki poniso ya pabalelo y’a lu fa Mulimu. Haiba lu itebuha tukiso ye lilato yeo, lu ka imuluha mwa nako ya ziyezi.

Mu Bukeleze Moya wa Sepo

19, 20. Mañolo a lu tusa cwañi ku hana mihupulo ya kutokwa sepo?

¹⁹ Ha lu zwafile kamba ha lu ikutwa ku swaba, ku bunolo ku felelwa ki sepo. Ka mutala, ba bañwi ha ba telwa ki likayamana, ba kana ba kala ku kakanya mayemo a bona a kwa moya, ku ikatula kuli butata bo bu ba tezi ki sisupo sa kuli Mulimu ha ba tabeli. Kono mu hupule kuli Jehova h’a liki mutu ufi kamba ufi ka “bumaswe.” (Jakobo 1:13) Bibele i li: “Pilu ya hae [Mulimu] ha i lati ku utwisa bana ba batu butuku kamba ku ba inisa mwa maswabi.” (Malilo 3:33) Ka ku fapahana, Jehova u tomohanga hahulu batanga ba hae ha ba nyanda.—Isaya 63:8, 9; Zakaria 2:8.

²⁰ Jehova ki “Ndate ya mukekecima, Mulimu wa ze tiisa pilu kaufela.” (2 Makorinte 1:3) Wa lu tokomela, mi u ka lu hulisa ka nako ya teñi. (1 Pitrosi 5:6, 7) Ku zwelapili ku ziba kuli Mulimu wa lu lata ku ka lu tusa ku bukeleza moya wa sepo, mane niheba ku lu nyakalalisa. Jakobo n’a ñozi kuli: “Banabahesu, mu talime kuli ki tabo fela ha mu tahelwa ki miliko ye miñata.” (Jakobo 1:2) Kabakalañi? U alaba kuli: “Kakuli [mutu] ha s’a likilwe, u ka amuhela kuwani ya bulena ya Bupilo, ye Mulena a sepisize ba ba mu lata.”—Jakobo 1:12.

21. Ku si na taba ni matata e lu li ku ona, Mulimu u sepisañi ku ba ba sepahala ku yena?

²¹ Sina ka mwa n’a lemuselize Jesu, lu ka ba ni manyando mwa lifasi. (Joani 16:33) Kono Bibele i sepisa kuli ha ku na “butata, kamba ñalelwa, kamba manyando, kamba tala, kamba mapunu, kamba kozi” ye ka lu kauhanya ni lilato la Jehova ni la Mwan’a hae. (Maroma 8:35, 39) Kw’a omba-omba hakalo ku ziba kuli ziyezi ifi ni ifi ye lu li ku yona ki ya ka nakonyana! Ka nako ya cwale, ha lu nze lu libelela nako y’a ka feliswa manyando a batu, Jehova, Ndat’a luna ya lilato, u nz’a lu tokomela. Haiba lu matela ku yena kuli a lu sileleze, u ka ba “sisabelo sa ba ba nyandile, sisabelo sa mwa linako za butata.”—Samu 9:9.

Lu Itutileñi?

• Bakreste ba swanela ku libelelañi ha ba nze ba pila mwa lifasi le li maswe le?

• Litapelo za luna za ka ku tundamena li kona ku lu tiisa cwañi ha lu li mwa miliko?

• Moya wa Mulimu ki mutiisapilu ka nzila ifi?

• Lu kona ku ezañi kuli lu tusane?

[Siswaniso se si fa likepe 18]

Lu swanela ku bata Jehova inge ba ba matela mwa sibaka sa mapilelo

[Maswaniso a fa likepe 20]

Ba ba hulile kwa moya ba babaza ni ku susueza ba bañwi fo ba fumanela kolo kaufela