Jehova H’a Nyenyi Pilu ye Lobehile

“Sitabelo se si amuhelwa ki Mulimu, ki moya o lobehile; Wena Mulimu ha u nyenyi pilu ye lobehile, ye swabile.”—SAMU 51:17.

 1. Jehova u’ nga cwañi balapeli ba hae ba ba eza sibi se situna kono ili ba ba fita fa ku baka?

JEHOVA u kona ku ‘ikwahela ka lilu kuli tapelo i si ke ya y’o fita ku yena.’ (Malilo 3:44) Kono u bata kuli batu ba hae ba kone ku mu atumela. Mane nihaiba kuli yo muñwi wa balapeli ba hae na ka eza bufosi bo butuna kono u fita fa ku baka, Ndat’a luna ya kwa lihalimu u sa hupula bunde bo ne bu ezizwe ki mutu y’o. Kacwalo, muapositola Paulusi n’a kona ku taluseza Bakreste sina yena kuli: “Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae.”—Maheberu 6:10.

 2, 3. Maeluda ba Sikreste ba swanela ku beya mwa munahano nto mañi mwa ku sebelisana ni balumeli sina bona ba ba ezize bufosi?

² Maeluda ba Sikreste hape ba swanela ku beya mwa munahano lilimo za sebelezo ya ka busepahali ye ne i ezelizwe Mulimu ki balumeli sina bona. Seo si kopanyeleza sebelezo ye kenile kwa lineku la ba ba bakile ba ne b’a ngile muhato o fosahezi kamba mane ba ne ba ezize sibi se situna. Balisana ba Sikreste ba bata buiketo bwa kwa moya bwa bao kaufela ba ba li mwa mutapi wa Mulimu.—Magalata 6:1, 2.

³ Sifosi y’a bakile u tokwa mufelañeke wa Jehova. Niteñi, ku tokwahala ze ñata. Seo si utwahaliswa hande ka manzwi a Davida a kwa Samu 51:10-19.

Pilu ye Kenile ya Tokwahala

 4. Ki kabakalañi Davida ha n’a lapezi ku ba ni pilu ye kenile ni moya o munca?

⁴ Haiba Mukreste ya ineezi u mwa muinelo o maswe wa kwa moya kabakala sibi, ki lika mañi za n’a ka tokwa kwand’a mufelañeke ni ku swalelwa ki Jehova? Kihona, Davida n’a kupile kuli: “Mulimu, u bupe ku na pilu ye kenile, u lukise sinca ku na moya o tiile.” (Samu 51:10) Ka mo ku bonahalela fela, Davida n’a fitisize kupo yeo kabakala kuli n’a lemuha kuli tengamo ya ka taho ya ku eza sibi se situna ne isali mwa pilu ya hae. Ne lu kana lwa s’a ba mwa mifuta ya sibi se ne si kwecekile Davida ka ku ama ku Bati-Sheba ni Uria, kono lu tokwa tuso ya Jehova ku lu tusa ku pima ku kena mwa muliko wa ku ikenya mwa muzamao ufi kamba ufi wa buezalibi bo butuna. Kacwalo, luna ka butu ne lu kana lwa tokwa tuso ya bumulimu kwa ku zwisa mwa pilu ya luna mikwa ya buezalibi ye cwale ka ku lakaza za ba bañwi ni sitoyo—lika za ku loba mulao ko ku swana ni busholi ni bubulai.—Makolose 3:5, 6; 1 Joani 3:15.

 5. (a) Ku ba ni pilu ye kenile ku talusa nto mañi? (b) Ki sika mañi sa n’a lakaza Davida ha n’a kupile ku ba ni moya o munca?

⁵ Jehova u tokwa kuli batanga ba hae ba be ni “pilu ye kenile,” fo kikuli, bukeni mwa maikuto kamba mulelo. Ka ku itemuhela kuli n’a si ka bonisa bukeni bo bu cwalo, Davida n’a lapezi kuli Mulimu a kenise pilu ya hae ni kuli a i eze ye lumelelana ni lipimo za bumulimu. Walisamu hape n’a bata moya kamba tengamo ya munahano ye lukile, ye nca. N’a tokwa moya o ne u ka mu tusa ku hana muliko ni ku kumalela ka ku tiya kwa milao ni likuka za Jehova.

Moya o Kenile ki wa Butokwa Hahulu

 6. Ki kabakalañi Davida ha n’a kupile kuli Jehova a si ke a zwisa moya o kenile ku yena?

⁶ Ha lu li mwa muinelo wa ku tokwa sepo kabakala milatu kamba bufosi bwa luna, ne lu ka kona ku ikutwa kuli Mulimu u tuha lu fulalela ni ku zwisa moya wa hae o kenile, kamba m’ata a’ sebeza ku luna. Davida n’a ikutwile cwalo, kakuli n’a kupile Jehova kuli: “U si ke wa ni lelekela kwahule ni pata ya hao; Mi u si ke wa ni amuha Moya wa hao o kenile.” (Samu 51:11) Davida ya n’a inyaza ni ku ikokobeza n’a ikutwile kuli libi za hae ne li mu ezize ku ba ya sa swaneli ku sebeleza Jehova. Ku lelekelwa kwahule ni pata ya Mulimu ne ku ka talusa ku s’a fumana sishemo, ku omba-ombiwa, ni mbuyoti ya hae. Kuli Davida a kutisezwe sinca kwa mayemo a kwa moya, n’a tokwa moya o kenile wa Jehova. Ka ku ba ni ona, mulena n’a ka kona ku bata ka mukwa o buniti ketelelo ya bumulimu ilikuli a kone ku tabisa Jehova, n’a ka kona ku pima sibi, mi n’a ka kona ku busa ka butali. Ka ku itibela libi za hae ku Mufani wa moya o kenile, Davida ka swanelo n’a kupile kuli Jehova a si ke a mu amuha ona.

 7. Ki kabakalañi ha lu swanela ku lapelela moya o kenile ni ku itibelela kwa ku u swabisa?

⁷ Ku cwañi kwa neku la luna? Lu swanela ku lapelela moya o kenile mi lu lukela ku itibelela kwa ku u swabisa ka ku palelwa ku latelela ketelelo ya ona. (Luka 11:13; Maefese 4:30) Hakusicwalo, ne lu ka palelwa ku itusisa moya mi ne lu si ke lwa kona ku bonisa miselo ya ona y’e filwe ki Mulimu ili ya lilato, tabo, kozo, pilu-telele, musa, bunde, tumelo, buishuwo, ni buiswalo. Jehova Mulimu sihulu n’a ka lu amuha moya wa hae o kenile haiba lu eza sibi ku yena ka ku sa baka.

Tabo ya ku Pilisa

 8. Haiba lu ezize sibi kono lu bata ku ba ni tabo ya ku pilisa, ki sifi se lu tokwa ku ba ni sona?

⁸ Muezalibi y’a bakile ya ipumana mwa muinelo wa ku kutisiwa sinca kwa mayemo a kwa moya u kona hape ku nyakalala ka tukiso ya Jehova ya ku pilisa. Ka ku nyolelwa seo, Davida n’a kupile Mulimu kuli: “U ni kutiseze tabo ya ku pilisa kwa hao, mi u ni tiise ka moya wa ku tukufalelwa za hao.” (Samu 51:12) Ne li ko ku nde hakalo ku ba ni tabo mwa sepo ya niti ya ku piliswa ki Jehova Mulimu! (Samu 3:8) Hamulaho wa ku eza sibi ku Mulimu, Davida n’a batile ku kutisezwa tabo ya ku piliswa ka Yena. Mwa linako za kwapilinyana, Jehova n’a tahisize ku piliswa ka sitabelo sa tiululo sa Mwan’a hae, Jesu Kreste. Haiba luna ka ku ba batanga ba ba ineezi ba Mulimu lu eza sibi se situna kono lu bata ku kutisezwa tabo ya ku pilisa, lu tokwa ku ba ni mubonelo wa ku baka ilikuli lu pime ku foseza moya o kenile.—Mateu 12:31, 32; Maheberu 6:4-6.

 9. Ki sika mañi sa n’a kupa Davida ha n’a bulezi ku Mulimu kuli a mu tiise ka “moya wa ku tukufalelwa”?

⁹ Davida n’a kupile kuli Jehova a mu tiise ka “moya wa ku tukufalelwa.” Ka mo ku bonahalela fela, seo si ama, isiñi kwa ku itatela kwa Mulimu ku fa tuso kamba moya wa hae o kenile, kono kwa tengamo y’e susueza munahano ya Davida. Davida n’a bata kuli Mulimu a mu tiise ka ku mu fa moya wa ku tukufalelwa ku eza se si lukile ni ku sa wela mwa sibi hape. Jehova Mulimu u zwelapili ku tiisa batanga ba hae mi u inula bao ba ba kotobani ka miliko ye fapahana-fapahana. (Samu 145:14) Ki ko ku omba-omba hakalo ku ziba seo, sihulu haiba lu ezize bufosi kono lu ikutwa mulatu mi lu bata ku sebeleza Jehova ka busepahali ku ya cwalo kwapili!

Ku Luta Ba Ba Sa Yi ka Mulao Nto Mañi?

10, 11. (a) Davida n’a ka kona ku luta Maisilaele ba ba sa yi ka mulao nto mañi? (b) Davida n’a ka kona ku luta baezalibi hamulaho fela yena ka sibili ha sa ezize nto mañi?

¹⁰ Haiba Mulimu n’a ka lumeleza, Davida ka nzila ye si ya buitati n’a bata ku eza nto ye ñwi ye ne ka bonisa buitebuho bwa hae kwa neku la mufelañeke wa Jehova mi n’a ka tusa ba bañwi. Ka ku libisa maikuto a’ buniti ku Jehova, mulena y’o y’a bakile ka ku tatama n’a zibahalize kuli: “Ni ka luta ba ba sa yi ka mulao linzila za hao; Mi baezalibi ba ka sikuluhela ku Wena.” (Samu 51:13) Davida ya li muezalibi n’a ka kona cwañi ku luta ba ba sa yi ka Mulao wa Mulimu? Ki sika mañi sa n’a ka ba bulelela? Mi seo ne si ka kona ku tisa bunde bufi?

¹¹ Ha n’a bonisa Maisilaele ba ba sa yi ka mulao linzila za Jehova ka sepo ya ku ba sikulula ku zwa kwa sikuka se si maswe, Davida n’a ka kona ku talusa bumaswe bwa sibi, se si taluswa ki ku baka, ni ka m’o ku fumanelwa mufelañeke wa Mulimu. Ka ku ba ya utwile maswenyeho a ku s’a lumelelwa ki Jehova ni ku ikutwa mulatu kwa lizwalo, Davida ku si na ku kakanya n’a kona ku ba muluti y’a makeke kwa baezalibi ba ba bakile, ili ba ba lobehile lipilu. Ka mo ku inezi fela, n’a ka kona ku itusisa mutala wa hae kwa ku luta ba bañwi haiba fela yena ka sibili n’a amuhezi likuka za Jehova ni ku fita fa ku swalelwa ki Yena, kakuli ba ba hana ku ipeya kwa litaelo za bumulimu ha ba na tukelo ya ku ‘talusa milao ya Mulimu.’—Samu 50:16, 17.

12. Davida n’a fumani cwañi tuso ka ku ziba kuli Mulimu na mu lukuluzi kwa mulatu wa mali?

¹² Ka ku kutela milelo ya hae ka mubulelelo o fapahana, Davida n’a bulezi kuli: “U ni lamulele kwa mulatu wa mali a’ suluhile, Mulimu, wena Mulimu ya ni pilisa; Kihona lilimi la ka li ka lumba ku sepahala kwa hao.” (Samu 51:14) Mulatu wa mali ne u tisa katulo ya lifu. (Genese 9:5, 6) Kacwalo zibo fela ya kuli Mulimu y’a li mapilelo a hae n’a mu lukuluzi kwa mulatu wa mali o ne u ama Uria ne i ka fa Davida kozo ya mwa pilu ni ya mwa munahano. Lilimi la hae f’o ne li ka kona ku opela ka tabo ka za ku luka kwa Mulimu, isiñi kwa hae ka sibili. (Muekelesia 7:20; Maroma 3:10) Davida n’a sa koni ku kwahela muzamao wa hae o maswe kamba ku kutisa Uria ku zwa mwa libita, mane sina fela mutu wa mwa lizazi la cwale ha s’a koni ku kutisa sinca bukeni bwa mutu y’a susuelize ku ikenya mwa mikwa ya tobali kamba ku zusa mutu yo muñwi y’a bulaile. Kana ha lu swaneli ku nahana ka za seo ha lu likiwa? Mi lu swanela ku itebuha ka butuna hakalo mufelañeke wa Jehova wa bonisize kwa neku la luna ka ku luka! Ka buniti fela, buitebuho bu swanela ku lu susueza ku libisa ba bañwi ku sona Simbule se Situna seo sa ku luka ni ku swalelwa.

13. Ki mwatas’a miinelo ifi fela muezalibi a kona ku atamisa milomo ya hae kwa ku lumbeka Jehova?

¹³ Ha ku na muezalibi y’a kona ku atamisa hande milomo ya hae kuli a lumbeke Jehova konji haiba Mulimu ka mukwa o’ mufelañeke a i atamisa, ka mubulelelo o muñwi, kuli a bulele niti ya Hae. Davida kacwalo n’a opezi kuli: “Mulena, u atamise milomo ya ka, mi mulomo wa ka u ka opela milumbeko ya hao.” (Samu 51:15) Ka ku imululwa kwa lizwalo la hae kabakala ku swalelwa ki Mulimu, Davida n’a ka susuezwa ku luta ba ba sa yi ka mulao linzila za Jehova, mi n’a ka kona ku Mu lumbeka a li ya lukuluhile. Kaufela ba ba swalezwi libi za bona sina mo ne li swalelezwi za Davida ba swanela ku itebuha sishemo se si si ka libelelwa sa Jehova kwa neku la bona, mi ba lukela ku itusisa nako ye nde kaufela mwa ku zibahaza niti ya Mulimu ni ku ‘bulela milumbeko ya hae.’—Samu 43:3.

Matabelo A’ Amuheleha ku Mulimu

14. (a) Ki matabelo mañi a n’a tokwahala ka ku ya ka bulikani bwa Mulao? (b) Ki kabakalañi ha neikaba ku fosa ku nahana kuli lwa kona ku lifa bufosi bo lu zwelapili ku eza ka lika ze ñwi ze nde?

¹⁴ Davida n’a s’a bile ni kutwisiso ye tungile ili ye ne mu ezisize ku bulela kuli: “Kakuli [Jehova] ha u tabeli matabelo; kabesi cwalo, kaba ni a tahisize; Ha u katelwi z’o cisezwa mwa mulilo.” (Samu 51:16) Bulikani bwa Mulao ne bu tokwa kuli matabelo a lifolofolo a fiwe ku Mulimu. Kono libi za Davida za bubuki ni bubulai, zeo koto ya zona i kona ku ba lifu, ne li sa konwi ku swalelwa ka matabelo ao a’ cwalo. Kabe ne ku si cwalo, kabe n’a ka eza ka buikatazo bwa ku fa matabelo a mañata a lifolofolo ku Jehova. Ha ku si na maikuto a’ buniti a ku baka, matabelo a ba a’ si na butokwa. Kacwalo neikaba ku fosa ku nahana kuli lwa kona ku lifa bufosi bo lu zwelapili ku eza ka ku eza lika ze ñwi ze nde.

15. Ki ufi mubonelo wa mutu ya ineezi ya na ni moya o lobehile?

¹⁵ Davida n’a ekelize kuli: “Sitabelo se si amuhelwa ki Mulimu, ki moya o lobehile; Wena Mulimu ha u nyenyi pilu ye lobehile, ye swabile.” (Samu 51:17) Kwa neku la muezalibi y’a bakile, “sitabelo se si amuhelwa ki Mulimu, ki moya o lobehile.” Mutu ya cwalo h’a na mubonelo wa bulwani. Pilu ya mutu y’a ineezi ya na ni moya o lobehile i fita fa ku swaba hahulu ka sibi s’a ezize, u fita fa ku ikokobeza ka ku itemuhela ku sa lumelelwa ki Mulimu, mi u itatela ku eza nto ifi kamba ifi kuli a fumane sinca sishemo sa bumulimu. Ha ku na nto ya butokwa ye lu kona ku fa ku Mulimu kwand’a kuli lu bakele libi za luna mi ni ku mu fa lipilu za luna ka buipeyo bo bu ikambusize.—Nahumi 1:2.

16. Mulimu u bona cwañi mutu ya lobehile pilu ka sibi sa hae?

¹⁶ Mulimu a’ hani sitabelo se si cwale ka sa pilu ye lobehile ni ye swabile. Kacwalo, ku si na taba ni but’ata bufi kamba bufi bo lu talimana ni bona ka ku ba batu ba hae, haike lu si ke lwa ifana kwa ku zwafa. Haiba lu sitatalile mwa nzila ya bupilo ka mukwa o ezisa pilu ya luna ku bata mufelañeke wa bumulimu, sepo i sa li teñi. Mane nihaiba kuli lu ezize sibi se situna kono lu fita fa ku baka, Jehova h’a na ku leleka pilu ya luna ye lobehile. U ka lu swalela ka mutomo wa sitabelo sa tiululo sa Kreste mi u ka lu kutiseza kwa sishemo sa Hae. (Isaya 57:15; Maheberu 4:16; 1 Joani 2:1) Ka ku swana sina Davida, nihakulicwalo, litapelo za luna li swanela ku ba za ku kupa ku kutisezwa mwa sishemo sa bumulimu isiñi za ku picuka nyazo kamba hakululo ye tokwahala. Mulimu n’a swalezi Davida, kono ni yena hape n’a mu file koto.—2 Samuele 12:11-14.

Ku Iyakatwa ka za Bulapeli Bo Bu Kenile

17. Kwand’a ku kupa ku swalelwa ki Mulimu, baezalibi ba swanela ku eza nto mañi?

¹⁷ Haiba lu ezize sibi se siñwi se situna, ku si na ku kakanya seo si ka sisita hahulu munahano wa luna, mi pilu ye ikutwa bufosi i ka lu susueza ku kupa ku swalelwa ki Mulimu. Nihakulicwalo, lu swanela ku lapelela ba bañwi. Nihailikuli Davida n’a talimela kwapili f’o na ka ezeza bulapeli bo bu amuheleha ku Mulimu ka nako ye ñwi, samu ya hae ka ku tokwa buitati ha i si ka siya ba bañwi. I kopanyeleza kupo ye ku Jehova: “Ka sishemo sa hao u eze Sione hande, ibe Wena ya yaha makwakwa a Jerusalema.”—Samu 51:18.

18. Ki kabakalañi Davida y’a bakile ha n’a lapelezi Sione?

¹⁸ Ee, Davida na talimela kwapili kwa ku kutisezwa kwa hae sishemo sa bumulimu. Niteñi, hape walisamu ya n’a ikokobeza n’a lapezi kuli ‘Mulimu ka sishemo n’a ka eza Sione hande,’ muleneñi o mutuna wa Isilaele, Jerusalema, m’o Davida n’a lela ku yahela teñi tempele ya Mulimu. Libi ze tuna za Davida ne li beile sicaba kaufela mwa lubeta, kakuli batu kaufela ne ba ka ba mwa kozi ka bufosi bwa mulena. (Mu bapanye 2 Samuele, kauhanyo 24.) Ka mo ku inezi fela, libi za hae ne li shekeshisize “makwakwa a Jerusalema,” kuli cwale n’a tokwa ku yahiwa sinca.

19. Haiba lu ezize sibi kono ne lu kile lwa swalelwa, ki nto mañi ye ne ka ba ye swanela ku i lapelela?

¹⁹ Haiba lu ezize sibi se situna kono lu fitile fa ku swalelwa ki Mulimu, ne ku ka ba ko ku swanela ku lapela kuli ka mukwa o muñwi a lukise kolofalo ifi kamba ifi ye ezizwe ki muzamao wa luna. Ne lu kana lu tisize nyazo fa libizo la hae le li kenile, mwendi lu fokolisize puteho, mi mwendi lu tisize maswabi kwa lubasi lwa luna. Ndat’a luna ya lilato wa kwa lihalimu wa kona ku zwisa nyazo ifi kamba ifi ye tisizwe fa libizo la hae, u kona ku tiisa puteho ka moya wa hae o kenile, mi u kona ku omba-omba lipilu za balatiwa ba luna ba ba mu lata ni ku mu sebeleza. Ku si na taba kuli sibi s’a amiwa kamba ku tokwa, ka buniti fela, ku keniswa kwa libizo la Jehova ni buiketo bwa batu ba hae kamita li swanela ku ba mamelelo ya luna.—Mateu 6:9.

20. Ki mwa miinelo ifi m’o Jehova n’a ka tabela matabelo ni limpo za Isilaele?

²⁰ Haiba Jehova n’a ka yaha sinca makwakwa a Sione, ki sika mañi se siñwi hape se ne si ka ezahala? Davida n’a opezi kuli: “Kihona [Jehova] u ka amuhela ka tabo matabelo a’ lukela, matabelo a ku cisa ni a ku ciseleza kaufela; Kihona ku ka tabiwa lipoho fa aletare ya hao.” (Samu 51:19) Davida ka buniti n’a lakaza kuli yena ni sicaba ba ikole sishemo sa Jehova ilikuli ba kone ku Mu lapela ka ku amuheleha. F’o Mulimu n’a ka tabela matabelo a ku cisa ni limpo ze ñwi za bona. Seo ne si ka ba cwalo kakuli zeo ne li ka ba matabelo a’ lukela a batu ba ba ineezi, ba ba buniti, ni ba ba bakile ili ba ba ikola sishemo sa Mulimu. Ka buitumelo kwa mufelañeke wa Jehova, fa aletare ya hae ne ba ka fa lipoho—ili matabelo a mande ni a’ tula ka ku fitisisa. Kacenu, lu fa likute ku Jehova ka ku mu fa ze nde ka ku fitisisa ku ze lu na ni zona. Mi limpo za luna li kopanyeleza “matabelo a manzwi a mwa milomo ya luna,” ona matabelo a milumbeko ku Mulimu wa luna y’a mufelañeke, Jehova.—Hosea 14:2; Maheberu 13:15.

Jehova U Utwa Mihuwo ya Luna

21, 22. Samu 51 i na ni lituto mañi ze kona ku lu tusa?

²¹ Tapelo y’e buniti ya Davida ye ñozwi kwa Samu 51 i lu bonisa kuli lu swanela k’u nga muhato kwa neku la libi za luna ka moya wa ku baka luli. Samu ye hape i na ni lituto ze nongile ili zeo lu kona ku fumana tuso ku zona. Sina ka mutala, haiba lu ezize sibi kono lu fita fa ku baka, lwa kona ku ba ni sepo kwa mufelañeke wa Mulimu. Niteñi, ha lu beñi ni mamelelo y’e mutomo ka za nyazo ifi kamba ifi ye lu tisize kwa libizo la Jehova. (Ps 51 Litimana 1-4) Ka ku swana sina Davida, lwa kona ku kupa mufelañeke ku Ndat’a luna ya kwa lihalimu ka mutomo wa sibi sa luna sa ku hoza. (Ps 51 Timana 5) Lu swanela ku ba ni buniti, mi lu tokwa ku bata butali ku Mulimu. (Ps 51 Timana 6) Haiba lu ezize sibi, lu tokwa ku kupa Jehova ku lu kenisa, ku ba ni pilu ye twekile, ni moya o tiile.—Ps 51 Litimana 7-10.

²² Ku zwelela mwa Samu 51 lwa kona ku bona hape kuli ni kamuta ha lu swaneli ku ituhelela ili luna ku fita fa ku cinela ka sibi. Haiba ne lu ka eza cwalo, Jehova n’a ka lu amuha moya wa hae o kenile, kamba m’ata a’ sebeza. Ka ku ba ni moya wa Mulimu, niteñi, lwa kona ku kondisa lika mwa ku luta ba bañwi linzila za hae. (Ps 51 Litimana 11-13) Haiba lu eza bufosi kono lu fita fa ku baka, Jehova u ka lu lumelela ku zwelapili mwa ku mu lumbeka kakuli ni kamuta h’a nyenyi pilu ye lobehile ni ye swabile. (Ps 51 Litimana 14-17) Samu yeo ka ku ekeza i bonisa kuli litapelo za luna ha li swaneli ku toma fela ku ili luna beñi. Ka ku fapahana, lu swanela ku lapelela mbuyoti ni buiketo bwa kwa moya bwa bao kaufela ba ba ikenya mwa bulapeli bo bu kenile bwa Jehova.—Ps 51 Litimana 18, 19.

23. Ki kabakalañi Samu 51 ha i swanela ku lu susueza ku ba ni bundume ni mubonelo o’ na ni sepo ye buniti?

²³ Samu ye shwisa makeke ye ya Davida i swanela ku lu susueza ku ba ni bundume ni ku ba ni sepo ye buniti. I lu tusa ku bona kuli ha lu tokwi ku nahana kuli ha lu na sepo mane niha ne lu ka sitatala ka ku eza sibi. Ki kabakalañi? Kakuli haiba lu ba ba baka, mufelañeke wa Jehova u kona ku lu yangwela kwa ku zwafa. Haiba lu ikutwa bufosi mi lu ipeile ka ku tala ku Ndat’a luna ya lilato ya kwa lihalimu, u ka utwa mihuwo ya luna ya ku bata mufelañeke. Mi ki ko ku omba-omba hakalo ku ziba kuli Jehova h’a nyenyi pilu ye lobehile!

Ne Mu K’a Alaba Cwañi?

◻ Ki kabakalañi Bakreste ha ba tokwa pilu ye twekile ni moya o kenile wa Mulimu?

◻ Mutu ya bakile u kona ku luta ba ba sa yi ka mulao wa Jehova nto mañi?

◻ Jehova u bona cwañi pilu ye lobehile ni ye swabile?

◻ Ki lituto mañi ze fumanwa mwa Samu 51?