‘Ku Hula Sina Misidare ya kwa Lebanoni’

FA MALUNDU a’ buheha a Lebanoni ku mela likota ze bizwa Arz Ar-rab, ye talusa “Misidare ya Mulena.” Zona likotatuna zeo za matali a’ sa omi, ze ne li kile za cicalanga fa malundu ao, li bulezwi ibat’o ba ha 70 mwa Bibele, ili ku fita mo i bulelezwi kota ye ñwi ifi kamba ifi.

Ha talusa yona misidaretuna yeo ya Lebanoni, Mañolo a itusisa manzwi a “bunde” ni ‘bunde-nde.’ (Pina ya Lipina 5:15; Ezekiele 17:23) Butuna ni ku tiya kwa misidare ku i bisize ye itusisizwe hahulu ka nako ye telele mwa ku yaha mandu ni lisepe hamohocwalo ni libyana za ku beta. Munko ni bufubelu bwa mabala a yona li tabelwa hahulu, mi ku ata kwa njilela ye ku yona ku i bisa ye sa boli kapili ili ye sa sabelelwi ki likokwani. Likota zeo ki ze telele ili ze tuna, ze fita fa bupahamo bo bu eza limita ze 37 ni mupotoloho wa bukima o eza limita ze 12, mi li na ni mibisi ye tiile, ye ile mwa butungi hahulu. Ku swanezi bacali ba mishitu ha ba li bulezi kuli ki “limela ze feza”!

Ezekiele, ya n’a ñozi litaba ze ñwi mwa Bibele n’a swaniselize Mesiya kwa katainyana ka ka bunolo ka musidare, kao Mulimu ka sibili hamulaho a cala. (Ezekiele 17:22) Mane, linzwi la Siheberu la “musidare” li simuluha fa linzwi le li talusa “ku tiya.” Kacenu, balateleli ba Mesiya, yena Jesu Kreste, ni bona ba tokwiwa kuli ba “tiye mwa tumelo; [ba] be ni mata,” sina kota ye telele, ye tiile ya musidare. (1 Makorinte 16:13) Seo si kona ku petiwa cwañi? Ka ku ipuluka ka t’ata kwa likukuezo ze si za Sikreste ni ku tiyela mwa busepahali ni bulumeli. Ba ba eza cwalo ba taluswa mwa Bibele kuli ki ‘ba niti, ba ba hula sina misidare ya kwa Lebanoni.’—Samu 92:12.