‘Ki Mañi ya Swana Sina Jehova Mulimu wa Luna?’

“Ki mañi ya swana sina [Jehova, NW] Mulimu wa luna, ya yahile mwa mabaka a kwahalimu-limu?”—SAMU 113:5.

 1, 2. (a) Lipaki za Jehova b’a nga cwañi Mulimu ni Bibele? (b) Ki lipuzo mañi ze swanelwa ku nyakisiswa?

BA BA lumbeka Jehova ba fuyauzwi luli. Ki tohonolo hakalo ku ba mwahal’a sikwata se si tabile seo! Ka ku ba Lipaki za hae, lu amuhela kelezo, milao, lituto, lisepiso, ni bupolofita bwa Linzwi la Mulimu, yona Bibele. Lu ba ba tabile ku ituta ku zwelela mwa Mañolo ni ku “lutwa ki [Jehova, NW].”—Joani 6:45.

² Bakeñisa likute la bona le lituna ku Mulimu, Lipaki za Jehova ba kona ku buza kuli: “Ki mañi ya swana sina Jehova Mulimu wa luna?” (Samu 113:5) Manzwi ao a walisamu a bonisa tumelo. Kono ki kabakalañi Lipaki ha ba na ni tumelo ye cwalo ku Mulimu? Mi ki mabaka mañi e ba na ni ona a ku lumbeka Jehova?

Tumelo ni Tumbo za Swanela

 3. Lisamu za Tumbo ki lika mañi, mi ki kabakalañi ha li bizwa cwalo?

³ Tumelo ku Jehova ki ye swanela bakeñisa kuli ki yena Mulimu ya ipitezi. Seo si koñomekilwe mwa Lisamu 113, 114, ni 115, kalulo ya Hallel Psalms (Lisamu za Tumbo) ze silezi. Ka ku ya ka Sikolo sa Hillel sa bo-rabbi, Lisamu 113 ni 114 ne li opelwa mwahal’a ku ciwa kwa sico sa Paseka ya Sijuda hamulaho wa ku seliwa kwa komoki ya bubeli ya veine mi ni ku taluswa kwa butokwa bwa kezahalo ye ne ba buluka yeo. Lisamu 115 ku isa 118 ne li opelwa hamulaho wa komoki ya bune ya veine. (Mu bapanye Mateu 26:30.) Zona zeo li bizwa “Hallel Psalms” kakuli ka ku kuta-kutela li itusisa pulelo ye tahisa maikuto ya Hallelujah (Alleluya)!—“Mu Lumbeke Jah!”

 4. Ki ifi taluso ya pulelo ya “Alleluya,” mi i fumaneha hakai mwa Bibele?

⁴ “Alleluya!” ki toloko ya mulumo wa pulelo ya Siheberu ye fumaneha h’a 24 mwa Lisamu. Ko kuñwi kaufela mwa Bibele, muinelo wa lona wa Sigerike u bonahala hane ka ku ama kwa tabo ye ba teñi ka ku sinyiwa kwa Babilona yo Mutuna, kopano ya lifasi kamukana ya bulapeli bwa buhata, ni ku wabelwa ko ku swalisani ni seo kwa ku kalisa ku busa sina Mulena kwa Jehova Mulimu. (Sinulo 19:1-6) Cwale ha lu nze lu tatuba ze talu za Lisamu za Tumbo, ne lu kana lwa ipeya mwa pono inze lu sweli ku opela lipina zeo za tumbo ku Jehova.

Mu Lumbeke Jah!

 5. Samu 113 i alaba puzo mañi, mi ki ku bomañi k’o taelo ya kwa Samu 113:1, 2 sihulu i sebeza?

⁵ Samu 113 i alaba puzo ye li, Ki kabakalañi ha lu swanela ku lumbeka Jehova? I kala ka taelo ye li: “A mu lumbeke [Jehova, NW]. A mu lumbe mina batanga ba [Jehova, NW], A mu lumbe Libizo la [Jehova, NW] Ku lumbiwe Libizo la [Jehova, NW], ku kala cwale, ku isa ko ku sa feli.” (Samu 113:1, 2) “Alleluya!” Ee, “Mu Lumbeke Jah!” Taelo yeo i ama sihulu kwa batu ba Mulimu mwa “nako ya maungulo” ye. (Daniele 12:4) Ku zwa cwale ku isa kamita, libizo la Jehova li ka bub’aniswa mwa lifasi-mubu kamukana. Lipaki za hae cwale ba zibahaza kuli Jehova ki Mulimu, Kreste ki Mulena, mi Mubuso u tomilwe mwa lihalimu. Satani Diabulosi ni kopano ya hae ha ba koni ku tibela ku lumbekwa k’o kwa Jehova.

 6. Ki kamukwaufi Jehova ha lumbekwa ‘ku zwa kwa mapazulelo ku isa kwa malikelelo’?

⁶ Pina ya tumbo i ka zwelapili ku fitela Jehova a i tahiseza ku tala mwa lifasi-mubu kaufela. “Ku zwa ko ku pazulela lizazi, ku isa ko li [likelela,] Libizo la [Jehova, NW] li lukela ku lumbiwa.” (Samu 113:3) Seo si talusa nto tuna ye fita fela ku lapelwa ka zazi ni zazi ki ze ñwi za libupiwa za fa lifasi-mubu. Lizazi li pazulela mwa upa ni ku likelela mwa wiko, ili ku apesa lifasi-mubu kamukana. Sibaka kaufela k’o lizazi li benya, libizo la Jehova ona cwale-cwale fa li ka lumbekwa ki batu kamukana ba ba lukuluzwi kwa butanga bwa bulapeli bwa buhata ni kopano ya Satani. Ka buniti fela, yona pina yeo ye si ke ya fela ni kamuta cwale i swelwi ku opelwa ki Lipaki za Jehova ba ba tozizwe ni bao ba ba ka ba bana ba fa lifasi-mubu ba Mulena wa hae, yena Jesu Kreste. Ki tohonolo kwa butuna ye ba na ni yona sina baopeli ba milumbeko ku Jehova!

Jehova H’a Konwi ku Bapanyiwa

 7. Ki likalulo mañi ze peli za ku ba ya pahami kwa Jehova ze lemuhiwa kwa Samu 113:4?

⁷ Walisamu u ekeza kuli: “[Jehova, NW] u ambakani macaba kaufela, mi kanya ya hae i fahalimu a lihalimu.” (Samu 113:4) Seo si tahisa temuho ya likalulo ze peli za ku ba ya pahami kwa Mulimu: (1) Ku Jehova, yena Muambakani-ya-Pahami, ya “ambakani macaba kaufela,” macaba a swana sina kalotoli ka ka lota mwa nkwana ni sina liluli le li fa sikala; (Isaya 40:15; Daniele 7:18) (2) kanya ya hae ki ye tuna hahulu ku fita ya mahalimu a’ bonahala, kakuli mangeloi a eza tato ya hae ya bubusi.—Samu 19:1, 2; 103:20, 21.

 8. Ki kabakalañi mi ki kamukwaufi Jehova ha inama ku lemuha litaba mwa lihalimu ni fa lifasi-mubu?

⁸ Ka ku susuezwa ki mayemo a’ pahami a Mulimu, walisamu n’a bulezi kuli: “Ki mañi ya swana sina [Jehova] Mulimu wa luna, ya yahile mwa mabaka a kwahalimu-limu, ya inamela ku ukumela ze mwa lihalimu ni lifasi?” (Samu 113:5, 6) Mulimu ki ya pahami hahulu kuli mane u tokwa ku inama ilikuli a lemuhe litaba mwa lihalimu ni fa lifasi-mubu. Nihailikuli Jehova haki ya fitiwa ki mutu yo muñwi ufi kamba ufi kamba ya mwatas’a ba bañwi, u bonisa buikokobezo mwa ku sebelisa mufelañeke ni mukekecima kwa baezalibi ba ba kwatasi. Ku fa Mwan’a hae, Jesu Kreste, sina “sitabelo se si lifa libi” za Bakreste ba ba tozizwe ni za lifasi la mufuta wa mutu ki poniso ya buikokobezo bwa Jehova.—1 Joani 2:1, 2.

Jehova U Na Ni Mukekecima

 9, 10. Ki kamukwaufi Mulimu ha ‘zwisa mubotana ku mu inisa ni manduna’?

⁹ Ka ku koñomeka mukekecima wa Mulimu, walisamu u ekeza kuli Jehova u “zwisa [ya maibile] mwa liluli, u zwisa mubotana mwa sileze; kuli a mu inise ni manduna mane ni makwambuyu a sicaba sa hae. U eza kuli musali wa mumba a be ni ndu, a be m’a bana, ya tabile. A mu lumbeke [Jehova, NW].” (Samu 113:7-9) Batu ba Jehova ba na ni tumelo ya kuli w’a kona ku lukulula ba ba lukile ba ba mwa butokwi, ku cinca muinelo wa bona, ni ku taleleza butokwi ni litakazo za bona ze swanela. ‘Muambakani-ya-Pahami u wetulusa moya wa batu ba ba ishuwa ni pilu ya ba ba lobehile pilu.’—Isaya 57:15.

¹⁰ Ki kamukwaufi Jehova a ‘zwisa mubotana ni ku mu inisa ni manduna’? Muta i li tato ya hae, Mulimu u beya batanga ba hae mwa mayemo a’ na ni kanya ye likana ni ya manduna. N’a ezize seo mwa taba ya Josefa, ya n’a bile muabi wa lico mwa Egepita. (Genese 41:37-49) Mwa Isilaele, ku ina ni manduna, kamba banna ba ba na ni m’ata a tamaiso mwahal’a batu ba Jehova, ne i li tohonolo ye ne i latiwa hahulu. Ka ku swana sina maeluda ba Sikreste kacenu, banna ba ba cwalo ne ba na ni tuso ni mbuyoti ya Mulimu.

11. Ki kabakalañi ha ne ku kana kwa bulelwa kuli Samu 113:7-9 i sebeza sihulu-hulu kwa batu ba Jehova mwa linako za cwale?

¹¹ Ku cwañi ka za ‘ku eza musali wa mumba kuli a be m’a bana ya tabile’? Mulimu n’a file Anna wa mumba mwana wa mushimani—yena Samuele, ili y’o n’a neezi kwa sebelezo ya Hae. (1 Samuele 1:20-28) Ka butokwa ni ku fita, ku kala ka Jesu ni ku tahiswa kwa moya o kenile fahalimu a balutiwa ba hae fa Pentekonta 33 C.E., musali wa swanisezo wa Mulimu, Sione wa mwa lihalimu, n’a kalisize ku tahisa bana ba kwa moya. (Isaya 54:1-10, 13; Likezo 2:1-4) Mi sina fela Mulimu ha n’a kutisize Majuda kwa naha ya habo bona hamulaho wa ku ba mwa butanga kwa Babilona, ka 1919 n’a lukuluzi bomasiyaleti ba ba tozizwe ba “Isilaele wa Mulimu” mwa butanga bwa Babilona mi s’a ba fuyauzi ka butuna kuli mane manzwi a Samu 113:7-9 ki a’ sebeza ku bona. (Magalata 6:16) Sina Lipaki ba ba sepahala ba Jehova, bomasiyaleti ba Isilaele wa kwa moya ni ba ba swalisana ni bona ba ba na ni sepo ya fa lifasi-mubu b’a nga muhato ka pilu kaufela kwa manzwi a mafelelezo a Samu 113, a’ li: “A mu lumbeke [Jehova, NW]”!

Bupaki bwa ku Ipitela kwa Jehova

12. Samu 114 i bonisa cwañi ku ipitela kwa Jehova?

¹² Samu 114 i bonisa ku ipitela kwa Jehova ka ku fa likezahalo ze ipitezi ze ama Maisilaele. Walisamu n’a opezi kuli: “Isilaele h’a zwa kwa Egepita, ba ndu ya Jakobo ha ba tuha mwa sicaba sa puo i sili, Juda a ezwa Sibaka sa Hae se si kenile, Isilaele, mubuso wa Hae.” (Samu 114:1, 2) Mulimu n’a lukuluzi Isilaele mwa butanga kwa Maegepita, ili bao puo ya bona ne i li ye sienyi mwa mazebe a Maisilaele. Ku lukululwa kwa batu ba Jehova, ba ba bizizwe Juda ni Isilaele, mwa swanisezo ye swana sina liloko, ku bonisa kuli Mulimu wa kona ku lukulula batanga ba hae kaufela kacenu.

13. Samu 114:3-6 i bonisa cwañi Jehova ku ba ya pahami mi i sebeza cwañi ku za n’a ipumani ku zona Isilaele wa kwaikale?

¹³ Bubusi bwa Jehova fahalimu a pupo kamukana ki bo bu bonahala mwa manzwi a: “Liwate li sin’o bona, la suta, Jordani a kutela mwamulaho; Malundu a tulaka sina licembwe, ni malundunyana sina bana ba lingu. N’o na niñi wena liwate ha u suta? Ni wena Jordani ha u n’o kutela mwamulaho? Mina malundu ha mu ne mu tula sina licembwe, ni mina malundunyana sina bana ba lingu?” (Samu 114:3-6) Liwate le li fubelu “la suta” muta Mulimu n’a kwalulezi batu ba hae nzila mwahal’a lona. Isilaele cwale n’a boni lizoho le li tiile la Jehova l’i nga muhato ka ku lwanisa Maegepita ba ne ba shwile mwa mezi a ne a nze a kuta. (Exoda 14:21-31) Mwa ku bonisa m’ata a bumulimu ka mukwa o’ bat’o swana, nuka ya Jordani ya “kutela mwamulaho,” ili ku lumeleza Maisilaele ku silela mwa Kanana. (Joshua 3:14-16) “Malundu a tulaka sina licembwe” lilundu la Sinai ha ne li tushana musi ni ku zikinyeha muta tumelelano ya Mulao ne i tomilwe. (Exoda 19:7-18) Ka ku ba bukaufi ni masetela a pina ya hae, walisamu n’a beile litaba mwa muinelo wa puzo, mwendi ka ku akaleza kuli liwate, nuka, malundu, ni malundunyana zeo li li lika ze si na bupilo ne li sabile hahulu ka zona liponiso zeo za m’ata a Jehova.

14. Ki sifi se ne si ezizwe ki m’ata a Jehova kwa Meriba ni Kadeshi, mi seo si swanela ku ama cwañi batanga ba hae ba mwa linako za cwale?

¹⁴ Ka ku ama hape kwa m’ata a Jehova, walisamu n’a opezi kuli: “Wena lifasi u tutumele fapil’a Mulena, fapil’a Mulimu wa Jakobo; Yena ya fetula licwe, lisa la mezi, licwe le li tata-tata, liweluwelu le li shelauka.” (Samu 114:7, 8) Ka nzila ya swanisezo, walisamu kacwalo u bonisa kuli mufuta wa mutu u swanela ku yema ka ku saba Jehova, Mulena ni Mubusi wa lifasi-mubu kamukana ili wa pupo kamukana. N’a li “Mulimu wa Jakobo,” kamba Isilaele, sina h’a li wa Isilaele wa kwa moya ni ba ba swalisana ni yena ba fa lifasi-mubu. Kwa Meriba ni Kadeshi mwa lihalaupa, Jehova n’a bonisize m’ata a hae mwa ku fa Isilaele mezi ka makazo, ili ku “fetula licwe, lisa la [mezi;] Licwe le li tata-tata, liweluwelu le li shelauka.” (Exoda 17:1-7; Numere 20:1-11) Likupuzo ze cwalo za m’ata a’ mbwetukisa ni pabalelo ya Jehova li fa Lipaki za hae mabaka a’ utwahala a ku ba ni tumelo ye si na kakanyo ku yena.

H’a Swani ni Milimu ya Maswaniso

15. Ne ku kana kwa ba kuli Samu 115 ne i opelwa kamukwaufi?

¹⁵ Samu 115 i lu susueza ku lumbeka ni ku sepa Jehova. I bonisa kuli mbuyoti ni tuso li zwa ku yena mi i fa bupaki bwa kuli milimu ya maswaniso ha i na tuso. Ne ku kana kwa ba kuli samu yeo ne i opelwa ka mukwa wa ku tabeleza ni ku shoela. F’o ki kuli, linzwi le liñwi ne li kana la tabeleza kuli: “Ba ba saba [Jehova, NW], ba sepe [Jehova, NW].” Puteho mwendi neikana ne i shoela kuli: “Ki Yena tuso ni tebe ya bona.”—Samu 115:10, 11.

16. Ki fapahano mañi ye konwa ku bonwa mwahal’a Jehova ni milimu ya maswaniso ya macaba?

¹⁶ Tumbo ha i swaneli ku ya ku luna kono kwa libizo la Jehova, Mulimu wa sishemo, kamba lilato le li sepahala, ni niti. (Samu 115:1) Lila ne ba kana ba buza ka ku sheununa kuli: “U kai Mulimu wa bona?” Kono batu ba Jehova ba kona ku alaba kuli: “Mulimu wa luna u mwa mahalimu, s’a lata kamukana wa si eza.” (Litimana 2, 3) Nihakulicwalo, milimu ya maswaniso ya macaba ha ku na se i kona ku eza, kakuli ki ze banda-bandilwe fela ki batu za silivera ni gauda. Ku si na taba ni ku ba kwa yona ni milomo, meto, ni lizebe, ha i buleli, ha i boni, mi ha i utwi. I na ni lingo kono ha i koni ku utwa munko, i na ni mahutu kono ha i koni ku zamaya, i na ni mimizo kono ha i koni ku zwisa mulumo ni o mukana. Ba ba tahisa milimu ya maswaniso ye si na m’ata hamohocwalo ni ba ba i sepa ba ka fita fa ku ba mwa muinelo wa ku tokwa bupilo ko ku swana.—Litimana 4-8.

17. Bakeñisa kuli bafu ha ba koni ku lumbeka Jehova, ki sifi se lu swanela ku eza, mi ki ka ku ba ni litibelelo mañi?

¹⁷ Hamulaho wa f’o ku fiwa kelezo ye tiile ya ku sepa Jehova sina yena Tebe ye sileleza ya Isilaele, ya ndu ya Aruni ya buprisita, ni ya bao kaufela ba ba saba Mulimu. (Samu 115:9-11) Ka ku ba bao ba ba saba Jehova, lu na ni likute le lituna ku Mulimu ni sabo ye nde ya ku saba ku mu halifisa. Hape lu na ni tumelo ya kuli “Ya ezize mahalimu ni lifasi” u fuyaula balapeli ba hae ba ba sepahala. (Litimana 12-15) Lihalimu ki sona sibaka sa lubona lwa hae, kono Mulimu n’a ezize lifasi-mubu ku ba lihae la kamita la ba mwahal’a mufuta wa mutu ba ba sepahala ni ba ba ipeya ku utwa. Bakeñisa kuli bafu ba ba kuzize, ba ba s’a zibi se siñwi ha ba koni ku lumbeka Jehova, luna, ba ba pila, lu swanela ku eza cwalo ka buipeyo ni busepahali bo bu tezi. (Muekelesia 9:5) Ki bao fela ba ba lumbeka Jehova ba ba ka ikola bupilo ni ku kona ku “lumbeka Jehova” kamita, ili ku bulela za bunde bwa hae “ku ya ku ile.” Kacwalo haike lu yeme ka ku sepahala ni bao ba ba utwa kelezo ye tiile ya kuli: “A mu lumbeke [Jehova, NW].”—Samu 115:16-18.

Tulemeno to tu Komokisa twa Jehova

18, 19. Ki ka linzila lifi tulemeno twa Jehova tu mu bonahaza ku fapahana kwa milimu ya buhata?

¹⁸ Ka ku s’a swana ni milimu ye si na bupilo ya maswaniso, Jehova ki yena Mulimu ya pila, y’a bonisa tulemeno to tu komokisa. Ki yena mutala o’ swanela ka ku fitisisa wa lilato mi ki “ya na ni makeke ni musa, ya sa akufi ku halifa, ya tezi sishemo, ya na ni niti.” (Exoda 34:6; 1 Joani 4:8) Ki y’a fapahana hakalo ku Muloke mulimu wa Makanana, ku y’o banana ne ba fiwa matabelo! Ku akalezwa kuli siswaniso sa mulimu y’o ne si na ni ponahalo ya butu ni toho ya poho. Ku bihiwa kuli mulimu wa siswaniso y’o n’a cisa hahulu, mi banana ne ba yumbelwa mwa mazoho a hae a’ bapuzwi, ni ku wela mwa liyekuyeku le li cisa hahulu le li mwatasi. Kono Jehova ki y’a lilato ni ya sishemo hahulu kuli mane taba ya matabelo a batu a’ cwalo ni kamuta n’a si ka “i hupula mwa pilu ya [hae].”—Jeremia 7:31.

¹⁹ Tulemeno to tu tuna twa Jehova hape tu kopanyeleza katulo ye lukile ili ye petehile, butali bo bu si na maciñekelo, ni m’ata kaufela. (Deuteronoma 32:4; Jobo 12:13; Isaya 40:26) Ku cwañi ka za milimu ya mwa matangu? Mwa sibaka sa ku eza katulo ye lukile, milimu ya banna ni ya basali ya mwa Babilona ne i na ni lunya. Milimu ya mwa Egepita ne i si mitala ye minde ya butali kono ne i bonisiwa sina ye na ni bufokoli bwa butu. Seo hasi komokisi, bakeñisa kuli milimu ya banna ni ya basali ya buhata i tahisizwe ki batu “ba ba si na tuso” ba ba ipapata ku ba ni butali. (Maroma 1:21-23) Ku nahaniwa kuli milimu ya Sigerike ne i fetuhelan’anga. Sina ka mutala, mwa matangu, Zeus n’a itusisize maswe m’ata a hae ka ku tulula ndat’ahe, yena Cronus, fa lubona, ili y’o n’a lunduzi ndat’ahe ka sibili, yena Uranus. Ki mbuyoti hakalo ku sebeleza ni ku lumba Jehova, Mulimu ya pila ni wa niti, ili y’o ya bonisa lilato le li petehile, katulo ye lukile, butali, ni m’ata!

Jehova U Swanelwa ki Tumbo ya ku ya ku Ile

20. Ki mabaka mañi ao Mulena Davida n’a file kwa neku la ku lumbeka libizo la Jehova?

²⁰ Sina ka mo li boniseza Lisamu za Tumbo, Jehova ki ya swanelwa ki tumbo ya ku ya ku ile. Ka nzila ye swana, muta Davida ni Maisilaele ba bañwi ne ba zwisize linubu kwa neku la ku yahiwa kwa tempele, n’a bulezi fapil’a puteho kuli: “[Jehova, NW], Wena Mulimu wa ndat’a luna, Isilaele, u lumbekwe kamita, ni ku ya ku ile. Butuna ki bwa [Jehova, NW], ni mata, ni libubo, ni ku koma, ni bulena. Kakuli linto kamukana ze kwa lihalimu, ni ze mwa lifasi, ki za hao. Mubuso ki wa hao [Jehova, NW], kakuli u pahamezi ka bulena lika kaufela. Bufumu ni libubo li zwa ku Wena, mi u busa linto kaufela. Mata ni ku kona kaufela li mwa mazoho a hao; hape mwa mazoho a hao ki mo ku na ni mata a ku hulisa, ni a ku tiisa linto kamukana. Cwale Mulimu wa luna, lwa ku lumba, lu bubeka libizo la hao le li tumile.—1 Makolonika 29:10-13.

21. Sinulo 19:1-6 i fa bupaki mañi bwa ku lumbekwa kwa Jehova ki likwata-kwata za mwa lihalimu?

²¹ Jehova hape u ka bubekwa ni ku lumbekwa kamita mwa lihalimu. Muapositola Joani n’a utwile “buñata bo butuna bo bu inzi kwa lihalimu” ba bulela ba li: “Alleluya! Ku pilisa, ni kanya, ni mata, ki za Mulimu wa luna! Kakuli likatulo za hae ki za niti, li lukile; kakuli u atuzi lihule le lituna [Babilona yo Mutuna], le ne li sinya lifasi ka buhule bwa lona, mi u li lifisize mali a batanga ba hae, a n’a suluzwi ka lizoho la lona.” Hape ba bulela kuli: “Alleluya!” Ni “ba bahulu ba 24, ni libupiwa ze pila ze ne” za bulela cwalo. Linzwi le li zwa kwa lubona la bulela kuli: “Mu lumbe Mulimu wa luna, mina batanga ba hae kaufela, ni mina ba ba mu saba, ba banyinyani ni ba bahulu!” Mi Joani a ekeza kuli: “Na utwa mulumo o mutuna sina linzwi la buñata bo butuna, le li eza inge ku tuuma mezi a mañata, mi ku luma pula ye buhali; inze li li: Alleluya! kakuli Mulena Mulimu wa luna, Ya-Mata-Kaufela, wa busa.”—Sinulo 19:1-6.

22. Jehova u ka lumbekwa cwañi mwa lifasi la hae le linca le li sepisizwe?

²² Ki ko ku swanela hakalo kuli likwata-kwata za mwa lihalimu li lumbeke Jehova! Mwa lifasi la hae le linca leo cwale se li li fakaufi, ba ba sepahala ba ba zusizwe ba ka kopana hamoho ni bapunyuhi ba mafelelezo a muinelo wo mwa ku lumbeka Jah. Malundu a’ lumbile hahulu a ka inuka ka lipina za tumbo ku Mulimu. Malundunyana a’ tezi limela ze shoshela ni likota ze tahisa miselo li ka opela litumbo za hae. Ee, sibupiwa se siñwi ni se siñwi se si pila ni se si buyela si ka lumbeka libizo la Jehova mwa ku shoela ko kutuna kwa Alleluya! (Samu 148) Kana linzwi la mina li ka utwiwa mwa sikwata se si tabile seo? Li ka utwiwa haiba mu sebeleza Jah ka ku sepahala ni batu ba hae. W’o u swanela ku ba ona mulelo wa mina mwa bupilo, kakuli ki mañi ya swana sina Jehova Mulimu wa luna?

Ne Mu ka Alaba Cwañi?

◻ Ki kabakalañi ha lu swanela ku lumbeka Jehova Mulimu?

◻ Ki mwa linzila lifi Jehova ha li ya s’a konwi ku bapanyiwa?

◻ Ki bupaki bufi bo bu li teñi ka za kuli Jehova u na ni mukekecima?

◻ Jehova u fapahana cwañi ni milimu ya maswaniso ye si na bupilo ni milimu ya matangu ya buhata?

◻ Ki kabakalañi ha lu kona ku bulela kuli Jehova u ka fumana tumbo ya ku ya ku ile mwa lihalimu ni fa lifasi-mubu?