Liproverbia 3:5, 6—“Usike Watiyela fa Kutwisiso Yahao”

“Usepe Jehova ka pilu yahao kaufela, mi usike waitinga fa kutwisiso yahao. Umuhupulange mwa linzila zahao kaufela, mi yena ukalukisa linzila zahao.”—Liproverbia 3:5, 6, Bibele ya Toloko ya Lifasi Lelinca.

“Usepe MULENA ka pilu yahao kaufela, mi usike watiyela fa kutwisiso yahao; uipeye kwatasaa hae mwa linzila zahao kaufela, mi yena ukalukisa linzila zahao.”—Liproverbia 3:5, 6, Bibele ya New International Version.

Luswanela kukupa Jehovaa Mulimu kuli alutuse halueza likatulo za butokwa mwa sibaka sa kuikezeza feela likatulo luna bañi.

“Usepe Jehova ka pilu yahao kaufela.” Lubonisa kuli lusepile Mulimu haiba lueza lika ka kulumelelana ni tato yahae. Luswanela kusepa Mulimu ka pilu yaluna kaufela. Mwa Bibele, linzwi la pilu hañata litalusa mwainezi mutu mwahali, inge cwalo maikuto ahae, milelo yahae, munahanelo, mane ni mubonelo wahae wa lika. Kacwalo, kusepa Mulimu ka pilu yaluna kaufela hakuami feela moluikutwela. Ki katulo yelueza bakeñisa kuli lunani buikolwiso bobutuna bwa kuli Mubupi waluna waziba hande zelutokwa.—Maroma 12:1.

“Mi usike waitinga fa kutwisiso yahao.” Luswanela kusepa Mulimu bakeñisa kuli halukoni kuitinga fa kutwisiso yaluna ka kuba batu babasika petahala. Haiba luitinga feela fa zibo yaluna, kamba haiba luzamaiswa ki maikuto aluna, lukona kueza likatulo zekona kubonahala kuli ki zende, kono hasamulaho lukona kuinyaza kabakala zemaswe zekazwa mwateñi. (Liproverbia 14:12; Jeremia 17:9) Mulimu unani hahulu butali kulufita. (Isaya 55:8, 9) Haiba lulatelela ketelelo yahae, lukakondisa mwa bupilo.—Samu 1:1-3; Liproverbia 2:6-9; 16:20.

“Umuhupulange mwa linzila zahao kaufela.” Luswanela kuikataza kuba ni mubonelo wa Mulimu mwa lika kaufela zelueza mane niha lueza likatulo zetuna mwa bupilo. Lukona kueza cwalo ka kulapela ku yena kuli aluetelele ni kulatelela kelezo ye mwa Linzwi lahae, yona Bibele.—Samu 25:4; 2 Timotea 3:16, 17.

“Mi yena ukalukisa linzila zahao.” Mulimu ulukisa linzila zaluna ka kulutusa kupila ka likuka zahae zelukile. (Liproverbia 11:5) Mi nto yeo itahisa kuli lusike lwaeza lika zekona kulukenya mwa butata, ni kuli lube ni tabo mwa bupilo.—Samu 19:7, 8; Isaya 48:17, 18.

Mwa buka ya mwa Bibele ya Liproverbia kunani likuka zekona kutusa batu kuba ni bupilo bobunde bobutabisa Mulimu. Likauhanyo zapili ze 9 liñozwi ka nzila yende, inge kuli ki mushemi yafa kelezo mwanaa hae yalatwa. Kauhanyo 3 ibonisa mobatusezwa batu babaitebuha ni kusebelisa butali bobuzwa ku Mubupi waluna.—Liproverbia 3:13-26.