Ku Sebeza ka Busepahali ni Kopano ya Jehova

“Wa sepahala ku ba ba sepahala.”—2 SAMUELE 22:26, Bibele ye Kenile, hatiso ya 1984.

 1, 2. Ki mitala ifi ye miñwi ya busepahali yeo kaufel’a luna ne lu kana lwa bona mwa puteho?

MANZIBWANA a mañwi, eluda u itukiseza ngambolo ya hae ya mukopano wa Sikreste. U tabela ku tuhela kuli a ikatuluse; mwa sibaka sa seo, u zwelapili ku sebeza, ku bata mitala ni liswanisezo za mwa Mañolo ze ka ama lipilu ni ku susueza mutapi. Fa manzibwana a mikopano, bubeli bwa bashemi ba ba topwezi mwa puteho yeo ye swana ne ba ka ishumusa manzibwana fa lapa; mwa sibaka sa seo, ba lukisa bana ba bona ka pilu-telele ni ku ya kwa mikopano. Hasamulaho wa mukopano, sikwata sa Bakreste ba buhisana ngambolo ya eluda. Kaizeli yo muñwi u lika ku bulela kuli muzwale ya swana y’o n’a mu tunkile mwa maikuto ka nako ye ñwi; mwa sibaka sa seo, u bulela ka cisehelo ka za sisupo se siñwi s’a bulezi muzwale. Kana mwa bona kalemeno ka ka swana mwa miinelo yeo kamukana?

² Kalemeno kao ki busepahali. Eluda u sebeleza mutapi wa Mulimu ka busepahali; bashemi ba fumaneha kwa mikopano ya puteho ka busepahali; kaizeli u fa kemelo kwa maeluda ka busepahali. (Maheberu 10:24, 25; 13:17; 1 Pitrosi 5:2) Ee, mwa miinelo kaufela ya bupilo, lwa bona batu ba Mulimu ha ba tukufalelwa ku sebeza ka busepahali ni kopano ya Jehova.

 3. Ki kabakalañi ha kuli kwa butokwa hahulu kuli lu zwelapili ku sepahala kwa kopano ya Jehova ya fa lifasi-mubu?

³ Jehova h’a talima fa lifasi le li silafezi le, u bona busepahali bo bunyinyani hahulu. (Mika 7:2) Pilu ya hae i lukela ku taba hakalo ha bona busepahali bwa batu ba hae! Ee, busepahali bwa mina bwa mu tabisa. Nihakulicwalo, bu bifisa Satani, mukwenuheli wa kale, mi bu mu bonahaza kuli ki lihata. (Liproverbia 27:11; Joani 8:44) Mu libelele kuli Satani u ka lika ku fokolisa busepahali bwa mina ku Jehova ni kwa kopano ya Hae ya fa lifasi-mubu. Ha lu nyakisiseñi linzila ze ñwi zeo Satani a eza seo ka zona. Kacwalo ne lu kana lwa bona hande ni ku fita ka m’o lu konela ku zwelapili ku sepahala ku isa kwa mafelelezo.—2 Makorinte 2:11.

Ku Toma Hahulu Mamelelo fa ku Sa Petahala ku Kona ku Fokolisa Busepahali

 4. (a) Ki kabakalañi ha kuli ko ku bunolo ku ba ni mubonelo o si ka luka ku ba ba mwa tamaiso? (b) Kora n’a bonisize cwañi ku sa ba ni busepahali kwa kopano ya Jehova?

⁴ Muzwale h’a li mwa mayemo a ku ba ni buikalabelo, mafosisa a hae ne a kana a bonahala hahulu. Ki ko ku bunolo cwañi ku bona ‘lutokwa lo lu mwa liito la muzwale wa luna hailif’o lu libala musumo o mwa liito la luna tota’! (Mateu 7:1-5) Nihakulicwalo, ku landalala fa bufokoli ku kona ku tahisa ku sa ba ni busepahali. Ka mutala, ha mu nyakisise shutano ye mwahal’a Kora ni Davida. Kora n’a na ni buikalabelo bo butuna, mi mwendi n’a bile ya n’a sepahala ka lilimo ze ñata, kono n’a bile ya n’a lakaza buikalabelo bo buñwi. N’a fitile fa ku nyemela tamaiso ya Mushe ni Aruni, bana ba bondat’ahe ba bahulu. Nihaike kuli Mushe ne li mutu ya musa ka ku fitisisa, ku bonahala kuli Kora n’a kalisize ku mu batela milatu. Ka mo ku inezi fela n’a boni bufokoli ku Mushe. Nihakulicwalo, bona bufokoli b’o ne bu si ka yemela ku sa sepahala kwa Kora kwa kopano ya Jehova. N’a yundisizwe mwa kopano.—Numere 12:3; 16:11, 31-33.

 5. Ki kabakalañi Davida ha n’a kabe a ikutwile ku likiwa ku lwanisa Saule?

⁵ Kwa lineku le liñwi, Davida n’a sebelize mwatas’a Mulena Saule. Saule ya n’a li mulena yo munde, n’a fitile fa ku ba ya maswe. Davida n’a tokwa tumelo, buitiiso, mane ni maseme kuli a banduke ku lwaniswa kwa muna kwa Saule. Niteñi, muta Davida n’a bile ni tohonolo ya ku lombota, n’a bulezi kuli ‘Jehova a mu tibele,’ kuli a si ke a eza kezo ya ku sa sepahala ku y’o Jehova n’a tozize.—1 Samuele 26:11.

 6. Nihaiba lu bona bufokoli ni mafosisa kwa maeluda, ki sifi se lu sa swaneli ku eza ni kamuta?

⁶ Muta ba bañwi ba ba zamaisa mwahal’a luna ba bonahala ku eza mafosisa mwa likatulo, ku bulela ka manzwi a buhali, kamba ku bonahala ku ba ni sishweka, kana lu ka tongoka ka za bona, mwendi ku ekeza kwa moya wa masheunuti mwa puteho? Kana lu ka tuhela ku taha kwa mikopano ya Sikreste ili ku bonisa ku sa tabela? Kutokwa ni hanyinyani! Sina Davida, ni kamuta ha lu na ku lumeleza bufokoli bwa mutu yo muñwi ku lu susueza ku sa sepahala ku Jehova ni kopano ya hae!—Samu 119:165.

 7. Ki likezo lifi ze ñwi ze fosahalile ze ne bile teñi kwa neku la tempele mwa Jerusalema, mi Jesu n’a ikutwile cwañi ka za seo?

⁷ Mutala o mutuna ka ku fitisisa wa busepahali bwa butu ne li wa Jesu Kreste, ya talusizwe ka bupolofita sina “ya sepahala” wa Jehova. (Samu 16:10, NW) Ku itusiswa ka mafosisa ili ko ku silafezi kwa tempele mwa Jerusalema ne ku lukela ku ba ko ne ku bisize busepahali ku ba shemaeto. Jesu n’a ziba kuli musebezi wa muprisita yo mutuna ni litabelo ne li yemela bukombwa bwa hae tota ni lifu la sitabelo, mi n’a ziba ka m’o ne ku bezi kwa butokwa hahulu kwa batu kuli ba itute ku zona zeo. Kacwalo n’a tezi buhali bo bu lukile ha n’a boni kuli tempele ne i bile “makundamo a masholi.” Ka m’ata a tamaiso a n’a filwe ki Mulimu, n’a ngile mihato habeli ya ku i kenisa.a—Mateu 21:12, 13; Joani 2:15-17.

 8. (a) Jesu n’a bonisize cwañi busepahali kwa tukiso ya tempele? (b) Lu kona ku bonisa cwañi kuli lwa itebuha ku lapela Jehova ka ku swalisana ni kopano ya hae ye kenile?

⁸ Nihakulicwalo, Jesu n’a file kemelo ya ka busepahali kwa tukiso ya tempele. Ku zwelela kwa bwanana, n’a fumanehanga kwa mikiti mwa tempele mi hañata n’a luta teñi k’o. Mane n’a lifanga mutelo wa tempele—nihaike kuli n’a siyo mwa tamo ya ku eza cwalo. (Mateu 17:24-27) Jesu n’a babalize musali wa mbelwa ya shebile ka ku nepela “s’a n’a ka pila ka sona” mwa sibulukelo sa mali. Hasamulahonyana wa f’o, Jehova n’a hanile tempele yeo ku ya ku ile. Kono ku fitela f’o, Jesu n’a li ya sepahala ku yona. (Mareka 12:41-44; Mateu 23:38) Kopano ya Mulimu ya fa lifasi-mubu kacenu ki ye fitela kwahule-hule muinelo wa Sijuda ni tempele ya ona. Ka buniti fela, ha i si ka petahala; kona libaka ha ku eziwanga licinceho ka linako ze ñwi. Kono ha i si ka tala mafosisa, kamba kuli Jehova Mulimu u ka tuha a i yolisa. Ni kamuta ha lu swaneli ku lumeleza ku sa petahala kufi kamba kufi k’o lu bona ku yona ku lu filikanya kamba ku lu tahiseza ku ba ni moya wa ku nyaza-nyaza, ili o sa yahisi. Haike lu likanyise busepahali bwa Jesu Kreste.—1 Pitrosi 2:21.

Ku Sa Petahala kwa Luna Tota

 9, 10. (a) Muinelo wa linto wa Satani u itusisa cwañi ku sa petahala kwa luna mwa ku lu yaululela mwa muzamao o si wa busepahali? (b) Ki sifi sa swanela ku eza mutu ya ezize sibi se situna?

⁹ Satani hape u lika ku hulisa ku sa ba ni busepahali ka ku itusisa ku sa petahala kwa luna. Muinelo wa hae wa linto u kanatela fa bufokoli bwa luna, ku lu lika kuli lu eze ze fosahezi ku Jehova. Ka bumai, ka silimo ni silimo likiti-kiti ba ikenya mwa muzamao o maswe. Ba bañwi ba ekeza kwa ku sa ba ni busepahali k’o ka ku pila bupilo bwa maneku a mabeli, ili ku zwelapili mwa nzila ya bufosi inze ba zwelapili ku ikezisa ku ba Bakreste ba ba sepahala. Ka ku ama kwa litaba za ka ku tatamana fa taba ye ye swana za mwa “Young People Ask . . .” mwa magazini ya Awake!, kalibe yo muñwi n’a ñozi kuli: “Litaba ze ñozwi ne li talusa bupilo bwa ka.” Kwa mukunda, n’a ezize sango ni mikulwani ba ne ba si na lilato la ku lata Jehova. Ki sifi se ne si zwile mwateñi? U ñola kuli: “Bupilo bwa ka ne bu sinyehile hahulu, mi ne ni ikenyize mwa muzamao o maswe mi ne ni fumani nyazo. Swalisano ya ka ni Jehova ne i sinyehile, mi bashemi ba ka ni maeluda ne ba tuhezi ku ni sepa.”b

¹⁰ Yena kalibe y’o n’a fumani tuso kwa maeluda mi n’a kutezi mwa sebelezo ya ka busepahali ku Jehova. Nihakulicwalo, ka bumai ba bañata ba fumana ze maswe hahulu ze zwa mwateñi, mi ba bañwi ni kamuta ha ba kuteli kwa mutapi. Ki ko kunde ni ku fita hakalo ku ba ya sepahala ni ku hana muliko wa lifasi le le li maswe! Mu utwe litemuso ze mwa limagazini za Tora ya ku Libelela ni Awake! fa litaba ze cwale ka za swalisano ya silifasi ni za ku itabisa ka zona ze masila. Haike ni kamuta mu si ke mwa wela mwa muzamao wa ku sa sepahala. Kono haiba mu ka wela mwa muzamao o cwalo, ni kamuta mu si ke mwa lika ku ikezisa ku ba bao mu si bona. (Samu 26:4) Mwa sibaka sa seo, mu bate tuso. Kona libaka bashemi ni maeluda ba Sikreste ha ba li teñi.—Jakobo 5:14.

11. Ki kabakalañi ha neikaba mafosisa ku ipona ku ba ba ba si na tuso ni ye kana, mi ki taba ifi ya mwa Bibele ye ne ka lu tusa ku lukisa mubonelo wa luna?

¹¹ Ku sa petahala kwa luna ne ku kana kwa lu beya mwa lubeta lo luñwi. Ba bañwi ba ba eza kezo ya ku sa ba ni busepahali ba tuhela ku lika ku tabisa Jehova. Mu hupule kuli, Davida n’a ezize libi ze tuna hahulu. Niteñi, hamulaho wa nako ye telele ku zwa fa lifu la Davida, Jehova n’a mu hupuzi ku ba mutang’a hae ya sepahala. (Maheberu 11:32; 12:1) Kabakalañi? Kakuli n’a si ka tuhela ni hanyinyani ku lika ku tabisa Jehova. Liproverbia 24:16 i bulela kuli: “Ya na ni niti nih’a ka wa ha 7, u ka zuha hape ni hape.” Ka buniti fela, haiba lu kutela ku eza libi ze nyinyani—ee ka ku kuta-kutela—kabakala bufokoli bo buñwi bo lu sweli ku lwanisa, ne lu kana lu sa li ba ba lukile ku Jehova haiba lu zwelapili ‘ku zuha’—f’o kikuli, ku baka ko ku buniti ni ku kalisa sinca nzila ya sebelezo ya ka busepahali.—Mu bapanye 2 Makorinte 2:7.

Mu Mamele Mifuta ye Sa Lemusehi ya ku Sa Ba ni Busepahali!

12. Mwa taba ya Bafalisi, mibonelo ye sa sikuluhi, ye kolamela hahulu fa mulao ne i isize cwañi kwa ku sa ba ni busepahali?

¹² Ku sa ba ni busepahali hape ku taha mwa mifuta ye sa lemusehi. Mane ne ku kana kwa ipumiseza ku ba busepahali! Sina ka mutala, Bafalisi ba mwa lizazi la Jesu mwendi ne ba nahanile kuli ne ba zibahala hahulu ka busepahali.c Kono ne ba palezwi ku bona shutano ye mwahal’a ku sepahala ni ku kolamela hahulu fa milao ya butu, kakuli ne ba si ba ba sikuluha ni ba ba nyaza-nyaza hahulu. (Mu bapanye Muekelesia 7:16.) Ka seo ne ba sa sepahali luli—kwa batu ba ne ba swanela ku sebeleza, kwa taluso ya Mulao o ne ba ipapata kuli ne ba luta, ni ku Jehova ka sibili. Ka ku fapahana, Jesu n’a sepahala kwa taluso ya Mulao, ili o ne u tomilwe fa lilato. Kacwalo n’a susuelize batu, sina ka mo ne bu bulelezi cimo bupolofita bwa Bumesiya.—Isaya 42:3; 50:4; 61:1, 2.

13. (a) Bashemi ba Sikreste ne ba kana ba ba cwañi ba ba sa sepahali? (b) Ki kabakalañi bashemi ha ba swanela ku pima ku ba hahulu ni buhali, ku nyaza-nyaza, kamba ku sa susueza ha ba kalimela bana ba bona?

¹³ Bakreste ba ba na ni sipimonyana sa tamaiso ba fumana tuso ye tuna hahulu kwa mutala wa Jesu ku seo. Sina ka mutala, bashemi ba ba sepahala ba ziba kuli ba lukela ku kalimela bana ba bona. (Liproverbia 13:24) Niteñi ba bona teñi kuli ha ba halifisi bana ba bona ka kalimelo ye buhali ye fiwa ka mabifi kamba ka ku swalelela ku ba nyaza ka ku ba yukaukela. Bana ba ba ikutwa kuli ha ba koni ku tabisa bashemi ba bona ni kamuta kamba ba ba ikutwa kuli bulapeli bwa bashemi ba bona bu bonahala fela ku ba bo bu sa ba susuezi ni bo bu nyaza-nyaza ne ba kana ba fela pilu mi, ka seo, ba fita fa ku ikauhanya kwa tumelo ya niti.—Makolose 3:21.

14. Balisana ba Sikreste ba kona ku bonisa cwañi ku ba ba ba sepahala kwa mutapi wo ba sebeleza?

¹⁴ Ka nzila ye swana, maeluda ni baokameli ba maeto ba Sikreste ba fa mamelelo kwa butata ni mabeta ao mutapi u talimana ni ona. Ka ku ba balisana ba ba sepahala, ba fa kalimelo ha ku tokwahala, ili ku ikolwisisa kuli ba na ni buniti kaufela pili ni ku toma ka tokomelo seo ba bulela fa Bibele ni fa lihatiso za Sosaiti. (Samu 119:105; Liproverbia 18:13) Hape ba ziba kuli, lingu li itingile ku bona kwa neku la ku yahiwa ni ku fepiwa kwa moya. Kacwalo ba bata ku likanyisa Jesu Kreste, Mulisana yo Munde. Ba sebeleza lingu ka ku sepahala ka viki ni viki mwa mikopano ya Sikreste—isiñi ka ku ba shubula, kono ka ku ba yaha ni ku tiisa tumelo ya bona.—Mateu 20:28; Maefese 4:11, 12; Maheberu 13:20, 21.

15. Ba bañwi mwa lilimo za mwanda wa pili ne ba bonisize cwañi kuli ne ba na ni busepahali bo bu sa swaneli?

¹⁵ Mufuta o muñwi o sa lemusehi wa ku sa ba ni busepahali ki ku ba ni busepahali bo bu sa swaneli. Busepahali bwa niti mwa kutwisiso ya Bibele ha bu lu lumelezi ku beya buitamo bufi kamba bufi mwa mayemo a ku fita busepahali bwa luna ku Jehova Mulimu. Majuda ba bañata mwa lilimo za mwanda wa pili ne ba kumalezi ka mañaña kwa Mulao wa Mushe ni kwa muinelo wa linto wa Sijuda. Kono nako ya Jehova ya ku shimbulula mbuyoti ya hae ku zwa kwa sicaba s’a le sa bukwenuheli ku i fa kwa sicaba sa Isilaele wa kwa moya ne i fitile. Ne li ba sikai fela ba ne ba sepahala ku Jehova mi ne ba amuhezi cinceho ye ya butokwa hahulu. Nihaiba mwahal’a Bakreste ba niti, ba bañwi ba ne ba ndongwami lizo za Sijuda ne ba hanelezi ku kutela ku “ze fokola, ze sa tusi se siñwi” za Mulao wa Mushe, ili ze ne talelelizwe ku Kreste.—Magalata 4:9; 5:6-12; Mafilipi 3:2, 3.

16. Batanga ba Jehova ba ba sepahala ba nga cwañi muhato kwa licinceho?

¹⁶ Ka ku fapahana, batu ba Jehova mwa linako za cwale se ba iponahalize ku ba ba ba sepahala mwa linako za cinceho. Liseli la niti ye patuluzwi ha li nze li zwelapili ku benya, licinceho za eziwa. (Liproverbia 4:18) Cwanoñu fa, “mutanga ya sepahala, ya na ni kutwisiso” u lu tusize ku bolosola kutwisiso ya luna ya linzwi la “lusika” le li itusisizwe kwa Mateu 24:34 ni ka za nako ya katulo ya “lingu” ni “lipuli” ye bulezwi kwa Mateu 25:31-46, hamohocwalo ni ka za mubonelo wa luna kwa mifuta ye miñwi ya sebelezo ya nyangela. (Mateu 24:45) Ku si na ku kakanya bakwenuheli ba bañwi ne ba kabe ba tabile kambe kikuli buñata bwa Lipaki za Jehova ne ba kumalezi ka mañaña kwa kutwisiso ya kwamulaho ya lituto ze cwalo ni ku hana ku eza zwelopili. Ha ku na nto ya mufuta o cwalo ye ezahalile. Kabakalañi? Batu ba Jehova ba sepahala.

17. Balatiwa ba luna ne ba kana ba beya cwañi busepahali bwa luna mwa tiko ka linako ze ñwi?

¹⁷ Nihakulicwalo, taba ya ku itusisa busepahali ka mafosisa neikana ya lu ama hahulu. Muta mulikan’a luna ya lateha kamba nihaiba silama sa lubasi a keta nzila ye lwanisa likuka za Bibele, ne lu kana lwa ikutwa kuli busepahali bwa luna bu swelwi ku manganelwa ki miinelo ye lwanisana. Ka sipepo, lu ikutwa ku ba ba ba sepahala kwa lilama za lubasi. Kono ni kamuta ha lu swaneli ku beya buitamo bwa luna ku bona mwa mayemo a ku fita busepahali bwa luna ku Jehova! (Mu bapanye 1 Samuele 23:16-18.) Ne lu si ke lwa tusa lifosi ku pata sibi sa bona se situna kamba ku lumelelana ni bona mwa ku lwanisa maeluda ba ba lika ku ‘ba kutisa ka moya o musa.’ (Magalata 6:1) Ku eza cwalo neikaba ku sa ba ni busepahali ku Jehova, kwa kopano ya hae, ni ku mulatiwa. Mane, ku palelwisa muezalibi ku amuhela kalimelo yeo a tokwa, ka mo ku inezi fela, ku tibela lilato la Jehova ku fita ku yena. (Maheberu 12:5-7) Mu hupule, hape kuli “mulikan’a hao nih’a ku utwisa butuku, u eza inz’a ku sepa.” (Liproverbia 27:6) Niti kikuli, kelezo ye lilato ili ye tomile fa Linzwi la Mulimu neikana ya utwisa butuku buikuhumuso bwa mulatiwa ya fosa, kono neikana ya bonahala ku ba ye fa bupilo kwa nalulelule!

Busepahali bwa Itiisa mwa Nyandiso

18, 19. (a) Ki sifi seo Akabe n’a bata ku Nabote, mi ki kabakalañi Nabote ha n’a hanile? (b) Ha lu nahana ko ne bu mu isize, kana busepahali bwa Nabote ne bu swanela? Mu taluse.

¹⁸ Fokuñwi Satani u taseza busepahali bwa luna ka ku nonga luli. Ha mu nyakisise taba ya Nabote. Mulena Akabe ha n’a hapilikelize Nabote ku mu lekisa simu ya hae ya likota za veine, n’a mu alabile kuli: “Ka [Jehova, NW], ha ni na ku ku fa sanda se si zwa ku bokuku ba kale.” (1 Malena 21:3) Nabote n’a sa ezi ka mañaña; n’a eza ka ku sepahala. Mulao wa Mushe ne u laela kuli ku si ke kwa ba ni Muisilaele ya lekisa sanda sa simu ku i lekiseleleza. (Livitike 25:23-28) Nabote n’a ziba hande kuli mulena y’o ya buhali n’a ka mu bulaya, kakuli Akabe n’a sa lumelelize kale mufumahali wa hae, Jezebele, ku bulaya bapolofita ba Jehova ba bañata! Nihakulicwalo Nabote n’a zwezipili ku tiya.—1 Malena 18:4.

¹⁹ Busepahali ka linako ze ñwi bu tahisa miinelo ye t’ata. Jezebele, ka tuso ya “banna bao ba ba maswe,” ba tameleza Nabote taba ka mulatu wa n’a si ka eza. Ka seo, yena ni bana ba hae ne ba bulailwe. (1 Malena 21:7-16; 2 Malena 9:26) Kana seo si talusa kuli busepahali bwa Nabote ne bu fosahezi? Kutokwa! Nabote ki yo muñwi wa banna ni basali ba bañata ba ba sepahala ba ba “pila” mwa kupulo ya Jehova ka nako ya cwale, u lobezi a silelelizwe mwa libita ku fitela nako ya zuho.—Luka 20:38; Likezo 24:15.

20. Sepo i kona ku lu tusa cwañi ku bukeleza busepahali bwa luna?

²⁰ Sepiso ye swana i fa tiisezo kwa batu ba Jehova ba ba sepahala kacenu. Lwa ziba kuli busepahali bwa luna ne bu kana bwa tisa lika ze maswe hahulu ku luna mwa lifasi le. Jesu Kreste n’a bulaezwi busepahali bwa hae, mi n’a bulelezi balateleli ba hae kuli ne ba si ke ba ngiwa hande. (Joani 15:20) Ka ku ba y’a na tiisizwe ki sepo ya hae ya nako ya kwapili, kacwalo lu tiiswa ki sepo ya luna. (Maheberu 12:2) Kacwalo lwa kona ku zwelapili ku sepahala mwa ku talimana ni nyandiso ya mifuta kamukana.

21. Ki buikolwiso bufi bo Jehova a fa kwa batu ba hae ba ba sepahala?

²¹ Ki niti kuli, ki ba sikai fela ku luna kacenu ba ba ipumana mwa tasezo ye cwalo ya ka ku nonga luli fa busepahali bwa luna. Kono batu ba Mulimu ne ba kana ba talimana ni nyandiso ye tuna hahulu pili mafelelezo a si ka taha kale. Lu kona cwañi ku ba ni buniti bwa ku bukeleza busepahali bwa luna? Ka ku bukeleza busepahali bwa luna cwale. Jehova u lu file musebezi o mutuna—ku kutaza ni ku luta ka za Mubuso wa hae. Haike lu zwelepili ku sepahala mwa musebezi wo wa butokwa hahulu. (1 Makorinte 15:58) Haiba lu hana ku lumeleza ku sa petahala kwa butu ku sinya busepahali bwa luna kwa kopano ya Jehova mi haiba lu isileleza kwa mikwa ye cwalo ye sa lemusehi ye cwale ka ku ba ni busepahali bo bu sa swaneli, u zibe lu ka ba ba ba itukiselize hande ni ku fita muta busepahali bwa luna bu likiwa hahulu ka butuna. Ku be cwañi kamba cwañi, ne lu kana lwa ba ni buniti bwa kuli Jehova ha palelwi ku ba ya sepahala kwa batanga ba hae ba ba sepahala. (2 Samuele 22:26) Ee, u ka sileleza ba hae ba ba sepahala!—Samu 97:10.

[Litaluso za kwatasi]

Ne Mu Ka Alaba Cwañi?

◻ Lu kona cwañi ku pima ku sa petahala kwa ba bañwi ku lu bisa ba ba si na busepahali?

◻ Ki mwa linzila mañi m’o ku sa petahala kwa luna ku kona ku lu kenya mwa muzamao wa ku sa sepahala?

◻ Lu kona cwañi ku hana tengamo ya ku ba ni busepahali bo bu sa swaneli?

◻ Ki sifi se si ka lu tusa ku buluka busepahali bwa luna nihaiba mwa linako za nyandiso?

[Mbokisi fa likepe 21]

Ku Sebeza ka Busepahali fa Betele

“Linto kaufela li ezwe ka swanelo, ni ka mulao.” Ki mwa n’a ñolezi muapositola Paulusi. (1 Makorinte 14:40) Paulusi n’a ziba kuli puteho ku sebeza, ne ku ka ba ni tokwahalo ya ku ba ni “mulao,” tukiso ye nde. Ka mukwa o swana kacenu, maeluda ba na ni ku eza likatulo fa litaba ze na ni tuso, ze cwale ka ku abela lilama za puteho kwa libaka ze fitana-fitana za tuto ya buka, ku lukisa mikopano ya mwa sebelezo ya mwa simu, ni ku tatuba ku sebezwa kwa kalulo ya simu. Litukiso ze cwalo ne li kana za tahisa muliko kwa busepahali ka linako ze ñwi. Haki litaelo ze buyelezwi ka bumulimu, mi ha li koni ku lumelelana ni miinelo ya mutu kaufela.

Kana mwa fumananga seo ku ba likulutendano, ka linako ze ñwi, ku ba ya sepahala ku ze ñwi za litukiso ze na ni tuso ze eziwa mwa puteho ya Sikreste? Haiba ku cwalo, ne mu kana mwa fumana mutala wa Betele ku ba o na ni tuso. Libizo la Betele, linzwi la Siheberu le li talusa “Ndu ya Mulimu,” li filwe kwa mitai kaufela ye 104 ya Watch Tower Society, ku kopanyeleza ni sibaka se situna sa tamaiso sa kwa United States.d Baitateli ba ba pila ni ku sebeza fa miyaho ya Betele ba bata kuli libaka zeo li bonahalise likute ni sabo ku Jehova. Seo si tokwa ku ba ni busepahali yo muñwi ni yo muñwi.

Ba ba pota kwa Betele ba makala hañata ka za ku lukiswa hande kwa lika ni bukeni bo ba bona teñi k’o. Babeleki ki ba ba swalisani ni ba ba tabile; lipulelo ni mikwa ya bona mane ni ponahalo ya bona li bonisa mazwalo a Sikreste a hulile, a’ lutilwe ki Bibele. Lilama za lubasi lwa Betele kamukana ba kumalela ka busepahali kwa lipimo za Linzwi la Mulimu.

Ka ku ekeza, Sitopa se si Busa si ba fa bukanyana ye na ni toho ya taba ye li Dwelling Together in Unity (Ku Pila Hamoho mwa Buñwi), ili ye fa ka sishemo litukiso ze ñwi ze na ni tuso ili ze tokwahala kwa lubasi lo lutuna cwalo kuli lu sebelisane hande. (Samu 133:1) Sina ka mutala, i ama kwa mandu mo ba pila, lico, makete, liapalo ni mubonahalelo, ni litaba ze ñwi ze swana. Lilama za lubasi lwa Betele ba yemela ni ku kumalela ka ku sepahala kwa litukiso ze cwalo, mane nihaiba kuli ze ba tabela ka butu ne li kana za ba li sili. Ba nga bukanyana yeo, isiñi sina milao kamba litaelo ze t’ata, kono ba i nga ku ba kalulo ya liketelelo ze lukiselizwe ku hulisa buñwi ni swalisano. Baokameli ki ba ba sepahala mwa ku sebelisa yona miezezo yeo ye tomile fa Bibele, mi ba itusisa yona ka nzila ye nde mwa ku yaha ni ku susueza lubasi lwa fa Betele ku ndongwama sebelezo ya bona ye kenile ya Betele.

[Litaluso za kwatasi]

[Mbokisi fa likepe 22]

Ya Sepahala ni Ya Kolamela Hahulu fa Mulao

Kwamulaho ka 1916 Encyclopædia of Religion and Ethics ne i bonisize kuli “shutano ye ye mwahal’a ya sepahala ni ya kolamela hahulu fa mulao neikana ya fumanwa mwa linako kaufela ni mwa libaka kaufela.” Ne i talusize kuli: “Ku na ni ya kolamela hahulu fa mulao ya eza sa bulelezwi, ha lobi milao; u buluka tumelo kwa linzwi le li ñozwi ni le li konwa ku balwa. Ku na ni ya sepahala ya eza seo kono . . . ya konwa ku itingwa hahulu ku ze ñata, ya beya munahano wa hae kaufela fa musebezi wa hae, ya eza moya wa hae ka ku lumelelana ni taluso luli ya mulelo o sebelezwa.” Ku zwaf’o, yona buka ye swana yeo ne i talusize kuli: “Ku ba ya sepahala ku talusa ku ba ya fita ku mamela fela milao. . . . Mutu ya sepahala u shutana ni mutu ya mamela milao ka ku ba ya sebeza ka pilu ni ka munahano wa hae kaufela . . . Ha itumelezi ku itatela ku eza libi za kezo, za ku sa eza seo a swanela ku eza, kamba za ku sa ziba.”