“Ya Fa Mutu Kalabo ye Nepahezi”

MWA Tuto ya fa Lilundu, Jesu n’a supile kwa “Mulao ni Bapolofita.” Kalulo ya bulalu ya Mañolo a Siheberu ne li Mañolo, a n’a kopanyeleza cwalo ni libuka za lipulelo, ze swana sina mashitanguti ze cwale ka Lisamu ni Liproverbia. (Mateu 7:12; Luka 24:44) Zona zeo ni zona, hape, ne li na ni butali bwa Mulimu.

Sina ka mutala, mashitanguti n’a lemusize baatuli mwa Isilaele wa ikale kuli: “Ya li ku ya maswe: ‘U mutu ya na ni niti,’ yo, batu ba ka mu lwaha, a toiwe ki macaba. Kono ba ba kalimela ya maswe, ba ka latwa, mi ba ka fiwa mbuyoti ye nde. Ya fa mutu kalabo ye nepahezi, inge ya mu tubeta fa mulomo.”—Liproverbia 24:24-26.

Haiba muatuli a komiwa ki lisineneketo za ku amuhela likweta kamba za buhabo mutu ni ku zibahaza kuli mutu ya maswe ki ya lukile, ba bañwi ne ba ka mu bona kuli h’a swaneli fa situlo sa hae. Ee, nihaiba lilama za “macaba” a silicaba ba ne ba ka utwa mafosisa a mufuta o cwalo ne ka fa nyazo fa nto yeo! Kwa lineku le liñwi, haiba muatuli ka bundume n’a ka nyaza mutu ya maswe ni ku fa mutu kalabo ye nepahezi fa taba ye talimwa, u ka fumana likute ni ku latiwa ki batu. Batu ka nañungelele ne ba ka susuezwa ku mu lakaleza “mbuyoti ye nde.” Sina lishitanguti ha li zwelapili kuli: “Ya fa mutu kalabo ye nepahezi, inge ya mu tubeta fa mulomo.”

Ku tubeta ko ku cwalo ku talusa likute—le li fumaneha mwahal’a muelezi ni bao ba ba bona ku nyaza kwa hae ko ku lukile. Mwendi mane nihaiba yena ya nyazwa n’a ka nga muhato o buniti ni ku talusa lilato la hae ku muatuli. Liproverbia 28:23 i talusa kuli: “Ya kalimela mutu, kwapili u ka latwa, ku fita wa lilimi la kalole.” Bao ba ba sebeza sina maeluda mwa puteho kacenu kacwalo ba lukela ku pima ku tuhelela silikani kamba swalisano ya lubasi ku sikamisa katulo ya bona. Ka ku fa kelezo ye tokwahala ka nzila ye lukile, maeluda ba ka fiwa likute ki puteho.