KUPILA SINA BAKRESTE

Kalulo Yenca Yekafumanehanga Mwa Mukopano wa Mwahalaa Sunda

Kukala mwa kweli ya January, ili mwa silimo sa 2018, mwa mukopano wa mwahalaa sunda, kukabanga ni kalulo ya litaba za kuituta ni kalulo ya mavidio ni maswaniso ili zekaingiwanga mwa Bibele ya Toloko ya Lifasi Lelinca ya Kuituta fa Intaneti, nihaikaba kuli Bibele yeo ya kuituta haisikaba kale teñi mwa puo yamina. Litaba ze likamitusa kuitukisezanga hande mukopano wo. Haike kalulo ye imituse kusutelela ku Ndataa luna ya lilato, Jehova!

LITABA ZA KUITUTA

Kalulo ye ikopanyeleza litaba zeama lizo, libaka, hamoho cwalo ni lipuo zeitusisizwe mwa litimana zeñata za mwa Bibele.

Mateu 12:20

Muhala wa lambi osatunya musi: Lambi yene iitusiswanga hahulu mwa mandu neli piza yenyinyani ya lizupa yenebeiwanga oli ya olive. Muhala wo neuanyanga oli kuli mulilo ukone kutuka hande kwa muhala. Pulelo ya Sigerike ya “muhala wa lambi osatunya musi” ikona kutalusa muhala osatunya musi kabakala kuli lilimi la mulilo selitima kamba litimile. Bupolofita bobu kwa Isaya 42:3 nebubulezi cimo za makeke anaakaba ni ona Jesu, kuli naasike afeza sepo yebanani yona batu babaikokobeza ni babanyandiswa ki babañwi.

Mateu 26:13

Kaniti: Mwa Sigerike, linzwi leo ki a·menʹ, mi linzwi leo litolokilwe ka kulatelela mulumo wa linzwi la Siheberu la ʼa·menʹ, lelitalusa “kube cwalo,” kamba “kaniti luli.” Jesu naaitusisanga hahulu pulelo yeo kwa makalelo a taba, kwa makalelo a sepiso, kamba kwa makalelo a bupolofita, ili kukoñomeka kuli taba yebulelwa ki ya niti mi yasepeha. Bakeñisa kuli Jesu naaitusisanga hahulu linzwi la “kaniti,” kamba ameni, mwa lihatiso zekenile nto yeo iingiwa kuba yeipitezi luli. Linzwi leo lanaaitusisanga Jesu folibulezwi habeli (a·menʹ a·menʹ), sina moliitusiselizwe mwa buka ya Evangeli ya Joani, litolokilwe kuli “kaniti luli.”—Joa. 1:51.

MAVIDIO NI MASWANISO

Maswaniso, mavidio asina mulumo, ni mavidio anani mulumo aabonisa litaba zeshutana-shutana za mwa Bibele.

Betifage, Lilundu la Likota za Olive, ni Jerusalema

Vidio yekuswani ye, ibonisa nzila yeli bukaufi ni upa wa Jerusalema, yezwa mwa muleneñi oliteñi kacenu obizwa et-Tur, ili muleneñi oakalezwa kuli ki fona fone kubanga Betifage yebulezwi mwa Bibele, mi nzila yeo iyofita ni fahalimwaa Lilundu la Likota za Olive. Betania ifumaneha kwa upa wa Betifage ili sibaka sesi kwa njetumuko ya kwa upa wa Lilundu la likota za Olive. Hane bayanga kwa Jerusalema, Jesu ni balutiwa bahae nebalobalanga mwa Betania ili tolopo yezibahala kacenu sina el-ʽAzariyeh (El ʽEizariya), ili libizo la Siarabe lelitalusa “Sibaka sa Lazaro.” Jesu fokuñwi naainanga mwa ndu ya Mareta, Maria, ni Lazaro. (Mat. 21:17; Mare. 11:11; Luka 21:37; Joa. 11:1) Hanaazwanga kwa ndu yeo kuya kwa Jerusalema, mwendi Jesu naaitusisanga nzila yebonisizwe mwa vidio. La Nisani 9, ka silimo sa 33 C.E., ili fo Jesu naafita fa Lilundu la Likota za Olive kuliba kwa Jerusalema inze apahami mwanaa mbongolo, mwendi naaitusisize nzila yezwa kwa Betifage, kuya kwa Jerusalema.

Nzila yezwa kwa Betania kuliba kwa Betifage
Betifage
Lilundu la Likota za Olive
Musindi wa Kidroni
Lilundu la Tempele

Mapo Mwa Lisapo la Kwa Lisito

Se ki siswaniso sene siezizwe ki mutu sa lisapo la kwa lisito la mutu lene lipunyizwe ki mapo ya sipi yeeza lisentimita ze 11.5 mwa butelele. Siswaniso seo nesifumanwi lwapili ka silimo sa 1968, ka nako yene kupumbulwa lika kwa mutulo wa Jerusalema, mi nesiezizwe mwa linako za Maroma. Siswaniso seo sifa bupaki bwa kuli mwendi limapo neliitusiswanga kwa kukokotela batu fa kota bane bafiwanga koto ya lifu. Mapo yeo mwendi iswana ni limapo zene baitusisize masole ba Siroma kwa kukokotela Jesu fa kota. Siswaniso seo nesifumanwi mwa mbokisi yeezizwe fa licwe yebizwa ossuary, ili monekubeiwanga masapo aomile a mutu, hamulaho wa kubola kwa mubili wahae. Seo sibonisa kuli mutu yanaabulaezwi fa kota naakona kupumbekwa.—Mat. 27:35