“Ki Na ya tiisa linzwi la mutanga wa ka, ya bonahalisa litaba ze bulezwi ki linumwana za ka.”—ISAYA 44:26.

 1. Jehova u zibahaza cwañi linumwana za mufuta o nepahezi, mi u tompolola cwañi za buhata?

JEHOVA MULIMU ki yena Muzibahazi ya Makaza wa linumwana za hae za niti. U ba zibahaza ka ku tahisa kuli lushango l’o a fa ka bona lu fite fa ku bonahala ku ba lwa niti. Jehova hape ki yena Mutompololi yo Mutuna wa linumwana za buhata. U ba tompololanga cwañi? U palelwisa lisupo za bona ni ze ba nuha. Ka nzila yeo u bonisa kuli ki linuhi ba ba itahisize isali bona, ili bao lushango lwa bona luli lu zwa fa minahano ya bona ye fosahezi—ee, minahano ya bona ye butanya, ya nama!

⁶ Fahalimu a seo, bahapiwa ba Maisilaele hape ne ba na ni ku utwa banuhi, balauli, ni banuhi ba linaleli ili ba ba itumba ba mwa Babilona. Nihakulicwalo, Jehova n’a fitile fa ku bonisa kuli zona linumwana za buhata zeo ne li likuba ze swabile, ze ne bulela lika ze futukile. Nako ha i nze i ya n’a bonisize kuli Ezekiele ne li yena numwana wa hae wa niti, sina mwa n’a bezi Isaya. Jehova n’a talelelize manzwi kaufela a n’a bulezi ka bona, sina ka mwa n’a sepiselize kuli: “Ki Na ya fosisa liponiso za bapolofita ba buhata, ya kubanyanisa balauli; ni kutiseza batalifi mwamulaho, mi zibo ya bona ni i fetula butanya. Ki Na ya tiisa linzwi la mutanga wa ka, ya bonahalisa litaba ze bulezwi ki linumwana za ka.”—Isaya 44:25, 26.