Lilato Le Lituna ku Fita la Me

BASHEMI ba basali ba inezi ku yubeka tumbututu twa bona to tu sa zo pepwa fa litishini, mwa limbuzi za nyangela, kamba mwa makululu a patehile. Fokuñwi, ba ba kotolanga manyalala mane se ba fumani mwa lingungulu tumbututu to tu nyinyani-nyinyani to tu katezi ku lilela bom’a tona. Ka ku ya ka O Estado de S. Paulo, “palo ya limbututu ze yubekiwa mwa makululu i sweli ya ekezeha.” Kaniti, me ya sa li yo munyinyani hamulaho u kana a inyazeza kezo yeo. Kono w’a yubeka kana ka hae, nihaike ku eza cwalo ku kana kwa ka bulaya.

Mu kana mwa ipuza kuli ‘Mahe mutu u kona cwañi ku yubeka kana ka hae ku sa zibwi ze ka ezahala ku kona kwapili?’ Bibele i itusisa ona muinelo o maswe wo ili ku bonisa fapano ye tuna ye ku Mubupi wa luna ka za mw’a ikutwela ka za bana ba hae: “Kana musali a ka libala mwan’a hae ya anya? kuli mane a si ke a shwela mwana ya zwa mwa mba ya hae makeke? E, ba ka libala bona, kono Na, ha ni na ku ku libala.”—Isaya 49:15.

Kaniti, Mulimu u lu lata hahulu mi u isa pilu ku ze lu tokwa, ku fita me ufi kamba ufi. Ni ko mu li banana kamba ba bahulu, ibe butata bufi kamba bufi bo mu na ni bona, ha mu yo mu nosi. Mubupi wa mina wa iyakatwa muinelo wa mina mi u bata ku mi tusa. Ka ku ya ka manzwi a walisamu, “Ndate ni me, niha ba ka ni tuhela, [Jehova, NW] u ka ni nopa.”—Samu 27:10.

Ku potoloha lifasi kaufela, limagazini za Tora ya ku Libelela ni Awake! za hatiswa kuli li fe zibo ya “Mulimu a nosi wa niti,” yena Jehova, ni Mwan’a hae, Jesu Kreste, ili nto ye kona ku fumanisa bupilo bo bu sa feli ku ba ba i amuhela ka buitebuho.—Joani 17:3.