Jehova H’a Katali ku Swalela

“Ya maswe a tuhele nzila ya hae, mi ya si na niti a tuhele mihupulo ya hae; a sikuluhele ku [Jehova, NW] . . . kakuli h’a katali ku swalela.”—ISAYA 55:7.

 1. Baamuheli ba swalelo ya Jehova ba fuy’ozwi ka sika mañi cwale?

JEHOVA u swalela lifosi ba ba bakile mi cwale u konahalisa kuli ba ikole kozo ya mwa munahano mwa paradaisi ya kwa moya. Seo si cwalo bakeñisa kuli ba fita ku ze tokwahala ze: “A mu bate [Jehova, NW] h’a sa fumanwa, mu mu lapele h’a sa li fakaufi. Ya maswe a tuhele nzila ya hae, mi ya si na niti a tuhele mihupulo ya hae; a sikuluhele ku [Jehova, NW] mi u ka mu shemuba; a kutele ku Mulimu wa luna kakuli h’a katali ku swalela.”—Isaya 55:6, 7.

 2. (a) Ki sika mañi se si taluswa ki ku ‘bata Jehova’ ni ku ‘kutela ku yena,’ ka mo ku bulelelwa kwa Isaya 55:6, 7? (b) Ki kabakalañi Majuda ba ne ba li mwa butanga mwa Babilona ha ne ba tokwa ku kuta ku Jehova, mi ki sika mañi se ne si ezahezi ku ba bañwi ba bona?

² Ku ‘bata Jehova’ ni ku mu biza ka ku amuhelwa, mutu ya maswe u na ni ku siya nzila ya hae ye fosahalile ni munahano ufi kamba ufi wa ku eza bumaswe ku ba bañwi. Tokwahalo ya ku ‘kuta ku Jehova’ i bonisa kuli sifosi n’a siile Mulimu, ili y’o ka nako ye ñwi n’a na ni swalisano ye nde hahulu ni yena. W’o ne li ona muinelo kwa bayahi ba Juda, ili bao ku s’a sepahala kwa bona ku Mulimu kwa nalulelule ne ku ba tiselize ku isiwa mwa butanga kwa Babilona. Majuda ba ne ba li mwa butanga ne ba tokwa ku kuta ku Jehova ka ku bakela likezo za bufosi ze ne li ba tahiselize ku iswa mwa butanga kwa Babilona ni ku ba matota ka lilimo ze 70 kwa naha ya lihae la bona ko ne ku bulezwi cimo. Ka 537 B.C.E., naha yeo ne i til’o yahiwa sinca ki bomasiyaleti ba ba saba Mulimu ba Majuda ba ne ba lukuluzwi mwa Babilona ka taelo ya mulonga. (Ezira 1:1-8; Daniele 9:1-4) Ze ne tahile ka ku kutiswa sinca kwa naha ne li ze nde hahulu kuli mane naha ya Juda ne i bapanyiwa ni Paradaisi ya Edeni.—Ezekiele 36:33-36.

 3. Bomasiyaleti ba Isilaele wa kwa moya ba bile cwañi ni se si bonwi se si swana ni s’ani sa ba ba mwa butanga ba ba saba Mulimu ba ne ba kutile kwa Juda?

³ Maisilaele ba kwa moya ba bile ni se si bonwi se si swana ni s’ani sa Majuda ba ba saba Mulimu ba ne ba kutile mwa Juda hamulaho wa butanga bwa mwa Babilona. (Magalata 6:16) Bomasiyaleti ba Isilaele wa kwa moya ne ba ezize cinceho ye ñwi mwa nzila ni mihupulo ya bona hamulaho fela wa Ndwa ya Lifasi ya I. Silimo sa 1919 ne si supile mafelelezo a ku ba kwa bona mwa butanga bwa ku zwa mwa ku sa yemelwa ki Mulimu ko ku tezi mwa liluko la Babilona yo mutuna, yona kopano ya lifasi kamukana ya bulapeli bwa buhata. Bakeñisa kuli ne ba bakezi libi ze ama sabo ya ku saba mutu ni ku tokwa misebezi mwa sebelezo ya Jehova, n’a ba lukuluzi ku Babilona yo Mutuna, ni ku ba kutiseza mwa muinelo wa bona o’ ba lukela wa kwa moya, mi n’a kalisize hape ku itusisa bona mwa ku kutaza taba ya Mubuso. Paradaisi ya kwa moya ne i shoshezi mwahal’a batu ba Jehova haisali ku zwiwa f’o, ili nto ye tisa likute kwa libizo la hae le li kenile. (Isaya 55:8-13) Mwa muinelo wa swanisezo wa kwaikale ni o si wa swanisezo wa mwa linako za cwale, hakulicwalo he, lu na ni bupaki bo bu utwahala bwa kuli limbuyoti z’a fumanw’angwa hamulaho wa swalelo ya bumulimu ni kuli Jehova ka mo ku inezi fela h’a katali ku swalela ba ba bakile.

 4. Ki sabo mañi yeo ba bañwi ba batanga ba Jehova ba na ni yona?

⁴ Batanga ba Jehova ba mwa lizazi la cwale kacwalo ba kona ku sepa swalelo ya hae. Niteñi, ba bañwi ku bona ba tokwile sepo bakeñisa milatu ya kwamulaho, mi maikuto a bufosi a bata ku ba koma. Ha ba nahani kuli ba swanela ku pila mwa paradaisi ya kwa moya. Ka mo ku bezi fela, ba bañwi ba na ni sabo ya kuli mwendi ba ezize sibi se si sa konwi ku swalelwa mi ni kamuta ha ba na ku fumana swalelo ya Jehova. Kana seo si kana si bile cwalo?

Libi ze ñwi ha li Konwi ku Swalelwa

 5. Ki kabakalañi ha ku konwa ku bulelwa kuli libi ze ñwi ha li swalelwi?

⁵ Libi ze ñwi ha li konwi ku swalelwa. Jesu Kreste n’a bulezi kuli: “Sibi se siñwi ni se siñwi, ni nyefulo ye ñwi ni ye ñwi, li ka swalelwa batu; kono nyefulo ya ku nyefula Moya, ha ba na ku i swalelwa.” (Mateu 12:31) Kacwalo he, nyefulo ya ku nyefula moya o kenile, kamba m’ata a’ sebeza, a Mulimu, ha i na ku swalelwa. Muapositola Paulusi n’a amile kwa sibi se si cwalo ha n’a ñozi kuli: “Ba ba kile ba bonisezwa. . . . Bona bao ha ba ka wa, hasi nto ye konahala kuli ba ncafazwe hape, kuli ba bake; kakuli fo, ba ikokotelela Mwan’a Mulimu hape fa [kota ya linyando, NW], ku mu shwaulisa ku ba bañata.”—Maheberu 6:4-6.

 6. Ki sika mañi se si bonisa haiba sibi se siñwi s’a konwa ku swalelwa kamba hasi konwi?

⁶ Ki Mulimu fela ya ziba haiba mutu u ezize sibi se si sa konwi ku swelelwa. Nihakulicwalo, Paulusi n’a monyehezi fa taba yeo ha n’a ñozi kuli: “Ha lu eza sibi ka bomu, bo lu se lu amuhezi zibo ya ku ziba niti, fo, ha ku sa na sitabelo se siñwi sa libi; Kono ku siyezi talimelo ye sabisa ya Katulo.” (Maheberu 10:26, 27) Mutu ya eza lika ka bomu u eza lika a ziba hande-nde, kamba u na ni “buikezezi bwa ka buñañeli ni ka ku s’a utwa ba bañwi.” (Webster’s New Collegiate Dictionary) Ufi kamba ufi y’o ka ku itatela ni ka buñañeli a zwelapili ku eza sibi hamulaho wa ku ziba niti h’a swalelwi. Kacwalo, taba ye amiwa ka za haiba sibi se siñwi ki se si konwa ku swalelwa kamba ku tokwa, haki mukwa tota wa sona sibi ka sibili fela kono sihulu ki muinelo wa pilu, ili sipimo sa buitateli bo bu amilwe teñi. Kwa neku le liñwi, ki sika mañi se ne si kana sa ezahala haiba Mukreste ya eza foso a ikutwa maswe ka butungi ka za foso ya hae? Ku ba ni pilaelo kwa hae ko kutuna mwendi ku bonisa kuli, ka mo ku kona ku bela fela, h’a si ka eza sibi se si sa konwi ku swalelwa.

Libi za Bona ne li sa Konwi ku Swalelwa

 7. Ki kabakalañi ha lu kona ku bulela kuli ba bañwi ba bahanyezi ba bulapeli ba Jesu ne ba ezize sibi se si sa konwi ku swalelwa?

⁷ Bahulu ba bulapeli ba Sijuda ba bañwi ba ne ba hanyelize Jesu ne ba ezize sibi sa ka ku itatela, mi kacwalo se si sa konwi ku swalelwa. Nihailikuli ne ba boni moya o kenile wa Mulimu u sebeza ka Jesu ha n’a eza ze nde ni ku eza limakazo, bona bahulu ba bulapeli bao ne ba bulezi m’ata a hae kuli a zwa ku Beelzebule, kamba Satani Diabulosi. Ne ba ezize sibi inze ba iponela hande musebezi o s’a hanyezwi wa moya wa Mulimu. Kacwalo, ne ba ezize sibi se si sa konwi ku swalelwa, kakuli Jesu n’a ize: “Ya bulezi Moya o Kenile maswe, h’a na ku fumana ku swalelwa, nihaiba mwa bupilo bo, kamba ku bo bu sa taha.”—Mateu 12:22-32.

 8. Ki kabakalañi sibi sa Judasi Iskariota ha ne si li se si sa konwi ku swalelwa?

⁸ Sibi sa Judasi Iskariota hape ne si sa konwi ku swalelwa. Ku beteka Jesu kwa hae ne li mafelelezo a nzila ya hae ya buipi ni ya ku s’a sepahala kwa ka bomu, ili ka ku itatela. Sina ka mutala, muta Judasi n’a boni Maria a toza Jesu ka mafula a’ tula, n’a buzize kuli: “Kiñi sende yeo s’e si ka lekiswa lipondo ze lishumi ka ze peli, mi mali ao a abelwe babotana?” Muapositola Joani n’a ekelize kuli: “[Judasi] n’a bulelo cwalo, isi kuli n’a tokomela babotana; kono kabakala kuli ne li lisholi; ki yena ya n’a buluka sikwama, mi n’a ikungelanga se si bewa mwateñi.” Ku si ka fita nako ye telele, Judasi n’a betekile Jesu ka masheleñi a silivera a 30. (Joani 12:1-6; Mateu 26:6-16) Kaniti, Judasi n’a ikutwile maswabi a matuna mi a ipulaya. (Mateu 27:1-5) Kono n’a si ka swalelwa, bakeñisa kuli nzila ya hae ya ka bomu, ya buitati bwa ka ku swalelela ni kezo ya hae ya bubeteki i bonisa sibi sa hae sa ku foseza moya o kenile. Ki ko ku swanela hakalo kuli Jesu n’a bizize Judasi kuli ki “mwan’a Sinyeho”!—Joani 17:12; Mareka 3:29; 14:21.

Libi za Bona ne li Swalezwi

 9. Ki kabakalañi Mulimu ha n’a swalezi sibi sa Davida se si ama Bati-Sheba?

⁹ Libi za ku itatela li bonahala ka ku fapahana hahulu kwa lifoso za ba ba swalezwi ki Mulimu. M’u nge Mulena Davida wa Isilaele sina mutala. N’a ezize buhule ni Bati-Sheba, musal’a Uria, mi hamulaho n’a tahisize kuli Joabi a zamaise lika ka ku tisa lifu la Uria mwa ndwa. (2 Samuele 11:1-27) Ki kabakalañi Mulimu ha n’a shemubile Davida? Ka butuna fela ne li kabakala tumelelano ya Mubuso kono hape ne li kabakala mufelañeke wa Davida yena ka sibili ni ku baka kwa hae ko ku buniti.—1 Samuele 24:4-7; 2 Samuele 7:12; 12:13.

10. Nihailikuli Pitrosi n’a ezize sibi se situna, ki kabakalañi Mulimu ha n’a mu swalezi?

¹⁰ Mu nahane, hape, muapositola Pitrosi. N’a ezize sibi se situna ka ku yaya Jesu ka ku kuta-kutela. Ki kabakalañi Mulimu ha n’a swalezi Pitrosi? Ka ku fapahana ni Judasi Iskariota, Pitrosi n’a bile ya sepahala mwa sebelezo ya hae ku Mulimu ni Kreste. Sibi sa muapositola y’o ne si tahisizwe ki bufokoli bwa nama, mi n’a bakile ka buniti ni ku “lila hahulu.”—Mateu 26:69-75.

11. Ne mu ka talusa cwañi “ku baka,” mi ki sifi seo mutu a swanela ku eza haiba ki ya bakile ka buniti luli?

¹¹ Mitala ye se i bulezwi i bonisa kuli mane ni mutu ya eza sibi ka butuna wa kona ku fumana swalelo ya ku swalelwa ki Jehova Mulimu. Kono ki mubonelo mañi o’ tokwahala kuli mutu a swalelwe? Ku baka kwa niti ki kwa butokwa hahulu haiba Mukreste ya fosa a ka swalelwa ki Mulimu. Ku baka ku talusa “ku zwa kwa sibi ka ku ikutwa maswabi ka za bufosi bwa kwamulaho” kamba “ku inyaza kamba ku swaba ka za seo mutu a ezize kamba a si ka eza.” (Webster’s Third New International Dictionary) Mutu ya bakile ka buniti luli n’a ka bonisa ku ikutwa maswabi ka za nyazo, ze swabisa, kamba but’ata bufi kamba bufi b’o sibi sa hae si tisize fa libizo ni kopano ya Jehova. Sifosi ya bakile hape n’a ka tahisa siselo se si zamaelela, ili ku eza misebezi ye lukela ba ba bakile. (Mateu 3:8; Likezo 26:20) Sina ka mutala, haiba n’a ngulungezi mutu yo muñwi n’a k’a nga mihato ye utwahala ya ku yolisa lisinyehelo. (Luka 19:8) Mukreste ya bakile cwalo u na ni mabaka a’ butokwa hahulu a mwa Mañolo a ku ba ya na ni buikolwiso ka za kuli Jehova h’a na ku katala ku swalela. Ki afi ona mabaka ao?

Mabaka a Buikolwiso ka za ku Swalela kwa Mulimu

12. Ki ka mutomo wa nto mañi w’o Samu 25:11 i bonisa kuli mutu ya bakile u kona ku lapelela swalelo?

¹² Sifosi ya bakile ka buikolwiso u kona ku lapelela swalelo ka mutomo wa libizo la Jehova. Davida n’a kupile kuli: “Wena [Jehova, NW], kabakala Libizo la hao, U swalele bumaswe bwa ka kakuli ki bo butuna.” (Samu 25:11) Tapelo ye cwalo, ha i zamaelela ni ku baka ka za nyazo ifi kamba ifi yeo sifosi a tisize fahalimu a libizo la Jehova, hape i swanela ku sebeza sina mukwalelo kwa sibi se situna mwa nako ya kwapili.

13. Ki kalulo mañi yeo tapelo i peta mwa swalelo ya bumulimu?

¹³ Jehova Mulimu u alab’anga litapelo ze buniti za batanga ba hae ba ba fosize kono ili ba ba bakile. Sina ka mutala, Jehova n’a si ka ikezisa ku ba ya si ka utwa Davida, ya n’a lapezi ka pilu kaufela hamulaho wa ku lemuha butuna bwa libi za hae ze ama Bati-Sheba. Ka mo ne ku bezi fela, manzwi a Davida kwa Samu 51 a bonisa maikuto a ba bañata ba ba kupa. N’a kupile kuli: “U ni utwele butuku Mulimu ka sishemo sa hao, ka makeke a matuna a hao, u takule lifoso za ka. U ni tapise bumaswe bwa ka kaufela, mi u ni kenise kwa sibi sa ka. Sitabelo se si amuhelwa ki Mulimu, ki moya o lobehile; Wena Mulimu ha u nyenyi pilu ye lobehile, ye swabile.”—Samu 51:1, 2, 17.

14. Mañolo a fa cwañi koñomeko ka za kuli Mulimu u swalela ba ba bonisa tumelo mwa sitabelo sa Jesu sa tiululo?

¹⁴ Mulimu u swalela ba ba bonisa tumelo mwa sitabelo sa Jesu sa tiululo. Paulusi n’a ñozi kuli: “Ka yena lu liuluzwi ka mali a hae, mi lu swalezwi lifoso.” (Maefese 1:7) Ka libaka le li swana, muapositola Joani n’a ñozi kuli: “Bana ba ka ba banyinyani, ni mi ñolela litaba zeo kuli mu si ke mwa eza sibi. Mi mutu h’a ezize sibi, lu na ni Muyemeli fapil’a Ndate, ki Jesu Kreste Ya-Lukile. Yena ki sitabelo se si lifa libi za luna; mi isi za luna fela, kono ni za lifasi kamukana.”—1 Joani 2:1, 2.

15. Kuli a zwelepili ku ikola mufelañeke wa Mulimu, ki sifi seo muezalibi ya bakile a lukela ku eza?

¹⁵ Mufelañeke wa Jehova u fa sifosi ya baka mutomo wa buikolwiso bwa kuli wa kona ku swalelwa. Nehemia n’a bulezi kuli: “U Mulimu ya lata ku swalela, ni ku shemuba, ni ku utwela mutu butuku, ya sa halifi kapili, ya na ni mukekecima.” (Nehemia 9:17; mu bapanye Exoda 34:6, 7.) Ka mo ku inezi fela, kuli a zwelepili ku ikola mufelañeke wa bumulimu, muezalibi u swanela ku satalala ku buluka mulao wa Mulimu. Sina walisamu ha n’a bulezi kuli, “za sishemo sa hao li te ku na, kuli ni pile, kakuli ni tabela mulao wa hao. Ki ze ñata hahulu lituso za sishemo sa hao, [Jehova, NW]; U ni pilise, sina ha u bulezi mwa likatulo za hao.”—Samu 119:77, 156.

16. Ki ku omba-omba kufi ko ku li teñi mwa taba ya kuli Jehova u beya mwa munahano muinelo wa luna o’ na ni sibi?

¹⁶ Taba ya kuli Jehova hape u beya mwa munahano muinelo wa luna o’ na ni sibi hape i fa sifosi ya bakile ku omba-ombiwa ni libaka la ku lapela ka buikolwiso bwa kuli Mulimu u ka mu swalela. (Samu 51:5; Maroma 5:12) Walisamu Davida n’a file koñomeko ye omba-omba ha n’a zibahalize kuli: “[Jehova] h’a si ka lu likanyisa ka tikanyo ya libi za luna, mi h’a si ka lu fa mupuzo o likana ni bumaswe bwa luna. Kakuli lihalimu sina mo li pahamezi kwahalimw’a lifasi, sishemo sa hae ki se situna cwalo ku ba ba mu saba. Upa sina mo i inezi kwahule ni Wiko, ni lifoso za luna u li sutiseza kwahule cwalo. Sina ndat’ahe mutu mw’a utwelela bana ba hae butuku, [Jehova, NW] u utwela ba ba mu saba, butuku cwalo. Kakuli u ziba se lu bupilwe ka sona, u nz’a hupula kuli lu liluli fela.” (Samu 103:10-14) Ee, Ndat’a luna wa kwa lihalimu ki ya na ni mufelañeke ni mukekecima ku fita mushemi wa butu.

17. Likezo za mutu za kwamulaho za sebelezo ya ka busepahali ku Mulimu li na ni ku ama mañi fa swalelo?

¹⁷ Muezalibi ya bakile wa kona ku lapelela swalelo a na ni buikolwiso bwa kuli Jehova h’a na ku beya kwatuko likezo za hae za kwamulaho za sebelezo ye sepahala. Nehemia n’a sa kupi swalelo ya sibi sa hae, kono n’a bulezi kuli: “Mawe Mulimu wa ka, u ni hupule, mi u ni eze hande.” (Nehemia 13:31) Mukreste y’a bakile wa kona ku fumana ku omba-omba mwa manzwi a’ li: “Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae.”—Maheberu 6:10.

Tuso ku Zwelela kwa Banna Bahulu

18. Ki sika mañi se si swanelwa ku eziwa haiba sibi sa Mukreste si mu tahiselize ku kula kwa moya?

¹⁸ Ku cwañi haiba Mukreste u ikutwa ku s’a swanela ku ba mwa paradaisi ya kwa moya kamba h’a palelwa ku lapela bakeñisa kuli sibi sa hae si mu tahiselize ku kula kwa moya? “A bize ba bahulu ba Keleke, ba t’o mu lapelela ni ku mu toza oli ka Libizo la [Jehova, NW],” ki mwa n’a ñolezi mulutiwa Jakobo. “Mi tapelo ye ezizwe ka tumelo i ka pilisa ya kula, mi [Jehova, NW] u ka mu zusa; mi haiba u na ni libi z’a ezize, u ka li swalelwa.” Ee, maeluda ba mwa puteho ba kona ku lapela hamoho ni mulumeli sina bona ya bakile ni ku mu lapelela ka buanyu ili ka sepo ya ku mu kutisa sinca kwa buikangulo bwa kwa moya bo bunde.—Jakobo 5:14-16.

19. Haiba mutu yo muñwi u zwisizwe, ki sika mañi s’a lukela ku eza kuli a kutiswe sinca ni ku swalelwa?

¹⁹ Mane nihaiba katengo ka buatuli ka zwisa muezalibi ya si ka baka, ha ku talusi kuli u ezize sibi se si sa konwi ku swalelwa. Nihakulicwalo, kuli a swalelwe ni ku kutiswa sinca, u lukela ku ipeya ku utwa milao ya Mulimu ka buikokobezo, ku tahisa siselo se si lukela ba ba bakile, ni ku kupa kwa maeluda ku kutiswa sinca. Hamulaho wa ku zwisiwa kwa mubuki yo muñwi mwa puteho ya Korinte ya kwaikale, Paulusi n’a ñozi kuli: “Ku likani, mutu y’o h’a nyazizwe cwalo ki ba bañata. Cwale, bunde ki ku mu swalela, ni ku mu wisa pilu; ya cwalo a ka swana a bulawa ki butuna bwa maswabi a hae. Kabakaleo na mi lapela, ni li: Mu mu bonise lilato la mina ka ku tiisa.”—2 Makorinte 2:6-8; 1 Makorinte 5:1-13.

Mulimu u F’anga M’ata

20, 21. Ki sika mañi se ne si ka tusa mutu ya ba ni pilaelo ka za kuli mwendi u ezize sibi se si sa konwi ku swalelwa?

²⁰ Haiba miinelo ye cwale ka ku tokwa buikangulo hande kamba liton’goko ze ñwi i mi tahiseza lipilaelo ka za ku ba ya ezize sibi se si sa konwi ku swalelwa, ku ba ni pumulo ni ku lobala nako ye likani ne ku kana kwa ba ko ku tusa. Nihakulicwalo, sihulu-hulu, mu swanela ku hupula manzwi a Pitrosi a’ li: “Mu nepele lipilaelo za mina kaufela fahalimw’a [Mulimu], kakuli wa mi tokomela.” Mi ni kamuta mu si ke mwa tuhelela Satani ku mi zwafisa, kakuli Paulusi n’a ekelize kuli: “Mu n’o iswala, mu libelele. Diabulosi, sila sa mina u nz’a zamaya sina tau ye lila ye bata ye i ka ca; Mu hane ku yena ka ku tiya mwa tumelo, mu nze mu ziba kuli butata ki bu li buñwi bo bu tahela banabahabo mina ba ba mwa lifasi. Mulimu wa sishemo kaufela, . . . ha mu se mu utwile butuku hanyinyani u ka mi eza ba ba petehile, a mi tiise, a mi fe mata, a mi tome.”—1 Pitrosi 5:6-10.

²¹ Kacwalo haiba mu ikutwa buinyazo kono se mu bile ni sabo ya kuli mwendi mu na ni mulatu wa sibi se si sa konwi ku swalelwa, mu hupule kuli linzila za Mulimu ki ze butali, ze lukile, ni ze lilato. Kacwalo, mu lapele ku yena ka tumelo. Mu zwelepili ku fepeha ka sico sa kwa moya seo a fa ka “mutanga ya sepahala, ya na ni kutwisiso.” (Mateu 24:45-47) Mu swalisane ni balumeli sina mina mi mu abane kamita mwa bukombwa bwa Sikreste. Seo si ka tiisa tumelo ya mina ni ku mi lukulula kwa sabo ifi kamba ifi ya kuli Mulimu mwendi h’a si ka swalela sibi sa mina.

22. Ki sifi se si latelela se lu ka nahanisisa?

²² Bayahi ba paradaisi ya kwa moya ba kona ku fumana ku omba-ombiwa mwa zibo ya ku ziba kuli Jehova h’a katali ku swalela. Niteñi, bupilo bwa bona haki bo bu si na litiko kacenu. Mwendi ba bile ni maikuto a maswabi bakeñisa kuli ya latiwa u shwile kamba kuli mulikani yo mutuna u kula hahulu. Sina ha lu ka bona, mwa miinelo ye ni ye miñwi, Jehova u tusa ni ku etelela batu ba hae ka moya wa hae o kenile.

Likalabo za Mina ki Lifi?

◻ Ki bupaki bufi bo bu li teñi bwa kuli Jehova “h’a katali ku swalela”?

◻ Ki sibi mañi se si sa swalelwi?

◻ Ki mwa miinelo mañi m’o libi za mutu li swalelwa?

◻ Ki kabakalañi lifosi ba ba bakile ha ba kona ku ikolwisa ka za swalelo ya Mulimu?

◻ Ki tuso mañi ye fumaneha kwa neku la lifosi ba ba bakile?

[Siswaniso se si fa likepe 18]

Kana mwa ziba libaka Davida ni Pitrosi ha ne ba swalezwi kono Judasi Iskariota n’a si ka swalelwa?

[Siswaniso se si fa likepe 20]

Tuso ya maeluda ba mwa puteho i kona ku sebeza hahulu mwa ku tusa Mukreste kwa moya