⁶ Kai ni kai—mwatas’a likota ze tuna, mwa misindi, fa malundu, mwa minzi—Juda i lapela milimu ya maswaniso. Kono Jehova wa bona zeo kaufela, mi ka Isaya, u patulula silafalo ya yona, u li: “U isize bulobalo bwa hao fa lilundu le li lumbile, le li bonahala; mi fateñi u ile ku y’o eza matabelo. U beile kupuzo ya hao kwamulaho a sikwalo ni a mibio ya sona.” (Isaya 57:7, 8a) Juda i isize bulobalo bwa yona bwa silafalo ya kwa moya fa libaka ze lumbile, mi i ezeza teñi matabelo a milimu i sili.a Nihaiba mwa mandu fela ku na ni milimu ya maswaniso kwamulaho a likwalo ni kwa mibio ya zona.