Lizazi la Mulimu la Silomboti

SINA ha ne lu boni mwa taba ye felile, ku na ni mabaka a mañatanyana hakuli ko ku fosahalile ku luna ku bata ku eza silomboti. Ki ko ku fosahalile kakuli kwa mafelelezo, ha ku tatululi nto ni ye kana. Ku fosahalile kakuli ku tiisa fapahano mwa sibaka sa ku hulisa tamo ya swalisano ya silikani. Mi ku fosahalile kakuli ku maswe ku y’a buluka mihupulo ya silomboti.

Libaka le li butokwa ka ku fitisisa, nihakulicwalo, silomboti sa batu ha si li se si fosahalile li boniwa mwa manzwi a Mushe ku Isilaele a’ li: “[Jehova, NW] Mulimu wa hao, ki Mulimu ya na ni sishemo.” (Deuteronoma 4:31) Bakeñisa kuli Mulimu u mukekecima, lu swanela ku ba ba ba na ni mukekecima sina yena. Jesu n’a bulelezi balateleli ba hae kuli: “Mu be ni mukekecima, sina Ndat’a mina h’a na ni mukekecima.”—Luka 6:36.

Nihakulicwalo, Bibele hape i talusa Jehova sina “Mulimu ya likanyisa.” (Samu 94:1) Mupolofita Isaya u bulela ka za “mwaha wa sishemo sa [Jehova, NW]” mi hape ni “lizazi l’a ka likanyisa batu Mulimu wa luna.” (Isaya 61:2) Mulimu u kona ku ba cwañi y’a mukekecima mi ili y’a silomboti? Mi haiba lu na ni ku likanyisa mukekecima wa Mulimu, ki kabakalañi ha ne lu si ke lwa mu likanyisa mwa ku eza silomboti?

Ku alaba puzo ya pili, Mulimu u mukekecima kakuli u lata mufuta wa mutu, mi wa swalelanga mwa konela kaufela ka butelele bw’a kona kaufela ili ku fa batu sibaka sa ku lukisa linzila za bona. Ba bañata, sina muapositola Paulusi, ba itusisize mukekecima w’o hande. Kono Mulimu hape ki wa silomboti—mwa kutwisiso ya ku tahisa katulo ye lukile—kakuli mukekecima o cwalo u kona ku ba fela teñi ka nako ye likani. Ba bañwi ha se ba bonisize kuli ha ba na ku cinca linzila za bona ni kamuta, Mulimu u ka tahisa katulo ya hae mwahal’a se si bizwa lizazi la hae la silomboti.

Kalabo kwa puzo ya bubeli, ki batili, kakuli ha lu na libaka le li nde la ku eza silomboti bakeñisa kuli Mulimu wa tahisanga silomboti. Jehova ki y’a petehile mwa katulo ye lukile. Batu ha ba cwalo. Mulimu u bona maneku kaufela a taba mi kamita u atulanga ka ku luka. Ha lu koni ku sepiwa ku eza nto ye swana. Ki lona libaka Paulusi ha n’a elelize kuli: “Balatiwa, mu si ke mwa kutisa bumaswe ili mina, kono mu fe buhali sibaka; kakuli ku ñozwi kuli: Ku likanyisa ki kwa ka, ki Na ni ka kutisa, ku bulela [Jehova, NW].” (Maroma 12:19) Kwa bunde bwa luna, lu lukela ku siya silomboti mwa mazoho a Jehova.

Ki Kabakalañi Lizazi la Silomboti?

Nihakulicwalo, Bibele mwa libaka ze ñata i lumelela butokwi bwa ku ba ni ku ikalabela kwa bao ba ba li lifosi ze sa baki. Sina ka mutala, muapositola Paulusi n’a bulezi cimo kuli Mulimu, ka Jesu, u ka tahisa kuli a “nate ka koto ba ba sa zibi Mulimu, ni ba ba sa ipeyi kwatas’a Evangeli ya Mulena Jesu.” (2 Matesalonika 1:8) Lu na ni mabaka a utwahala a k’u nga manzwi ao ka butuna. Ki kabakalañi?

Nto ye ñwi ki ya kuli, bakeñisa kuli buñata kacenu ba tundamezi ku nyefula bubusi bwa Mubupi, ba hana ku utwa milao ya hae ye lukile. Ne ba k’a ipapata ku lumela ku Mulimu kamba ku s’a lumela, muzamao wa bona u bonisa fo ku sweu kuli ha ba ikutwi ku ba ni ku ikalabela fapil’a Mulimu. Manzwi a walisamu a sebeza ku ba ba cwalo kaufela a’ li: “Ya maswe u nyefulelañi Mulimu? U ipulelelañi mwa pilu kuli Mulimu h’a na ku buziseza se siñwi?” (Samu 10:13) Ka niti luli, Jehova ni kamuta h’a na ku lumeleza kuli a nyefulwe ka mukwa wo ku ya ku ile. Nihaike kuli ki Mulimu y’a lilato, yena hape ki Mulimu ya na ni katulo ye lukile. U ka utwa muhuwo wa bao ba ba na ni pilaelo ya niti kwa neku la katulo ye lukile: “Wena [Jehova, NW], yema! Wena [Mulimu, NW], nanula lizoho la hao; U si ke wa libala ba ba nyandile.”—Samu 10:12.

Fahalimw’a seo, batu ba ba nyefula mulao ba sinya lifasi-mubu tenyene le lu pila ku lona. Ba silafaza moya, mubu, ni mezi; ba taza lifasi ka silibonda ni ka situhu. Mi ba kubukanya lilwaniso za milyani, nyukilia, ni ze ñwi cwalo ze tisa lifu ili ku beya ku zwelapili ku ba teñi kwa mufuta wa mutu mwa lubeta. Muhato wa bumulimu wa ka putako u lukela ku ezahala ili ku tiisa buikolwiso bwa nako ya kwapili ya buiketo bwa mufuta wa mutu o ipeya ku utwa. (Sinulo 11:18) Ona muhato w’o ki ona wa n’a amile Isaya sina lizazi la ku likanyisa.

Ki Sifi seo Lizazi la Mulimu la Silomboti li ka Peta?

Ka ku ya ka Vine’s Expository Dictionary of Old and New Testament Words, mwa Mañolo a Sigerike, linzwi le li yemela silomboti, ha li itusisiwa ka ku swalisana ni Mulimu, ka muinelo wa lona tota li talusa “ ‘seo se si zwelela mwa katulo ye lukile,’ isiñi, se si zwelela mwa maikuto a ku fosezwa kamba ku ikutwa ku halifa, sina mo ku belanga hañata mwa silomboti sa batu.” Kacwalo, silomboti sa Mulimu kwa lila za hae ha i na ku ba nako ya ku sulula mali ka mutaka-fululele, sina mungalato wa ka butu wa ku tundamena ku holofaza yo muñwi. “[Jehova, NW] u ziba ku lamulela batu ba balapeli kwa miliko, ni ku bulukela ba ba maswe lizazi la Katulo, ku ba nata koto,” ki mo i lu taluseza Bibele.—2 Pitrosi 2:9.

Batanga ba Mulimu ba talimezi kwapili kwa lizazi la Mulimu la silomboti sina nako yeo muzamao o lukile u ka pakiwa ku ba ona o lukela ni yeo ba ba lukile ba ka punyuswa kwa buhateleli bwa ba ba maswe. Se hasi talusi kuli ba na ni lutimbo kamba malikanyiso. “Ya tabela manyando a ba bañwi h’a na ku banduka kwa koto,” Bibele i fa temuso. (Liproverbia 17:5) Ka ku fapahana, ba tahisa mukekecima ni mufelañeke, ni ku siya likatulo kaufela kwa neku la silomboti ku Mulimu.

Ki niti, haki ko ku bunolo kwa neku la batu ka buñwi ba ba nyemile k’u nga muhato ka nzila yeo. Kono kwa konahala, mi ba bañata se ba ezize cwalo. Sina ka mutala, Pedro n’a si na tabo mwa bwanana bwa hae mi hañata n’a lindaulwanga ki muhulwan’a hae wa mushimani. Kacwalo n’a hulile a na ni mifilifili, ku fumanehanga hañata kwa mapokola bakeñisa mifilifili ni ku sululelanga buhali bwa n’a ikutwa kwa neku la muhulwan’a hae ku musal’a hae ni bana ba hae. Kwa nalulelule, a teeleza ku yo muñwi wa Lipaki za Jehova mi hañi-hañi ba kalisa ku ituta Bibele. “Ka tuso ya Jehova,” wa talusa, “ne ni cincize, mi cwale, mwa sibaka sa ku lwana ni batu, n’a ba tusa sina eluda wa Sikreste.” Ka tuso ya Bibele ni moya o kenile, ba bañwi ba ba s’a balwi ba cincize ka mukwa o swana ku zwa kwa ku ba ni sitoyo kamba malikanyiso ku ya kwa ku bonisa lilato ni pilu-telele ku ba bañwi.

Ki Sifi se Mu ka Eza?

Ku beya mwa munahano lizazi la Mulimu la silomboti ku k’a lu tusa ku sebelisa hande pilu-telele ya Jehova. Kono sibaka sa ku eza cwalo haki se si si na maciñekelo. Ona cwale-cwale fa lizazi leo li ka esha. Muapositola Pitrosi n’a bonisize libaka lizazi leo ha li si ka taha kale: “[Jehova, NW] h’a liyehisi lisepiso za hae, mo ba hupulela ba bañwi kuli ki ku liyeha, kono u sa isa nako kwapili kabakala luna; kakuli h’a lati ba bañwi ha ba ka timela, kono u lata kuli kaufela ba kene mwa ku baka.”—2 Pitrosi 3:9.

Ki kwa ka putako, cwalehe, ku itukiseza lizazi la Mulimu la ku ikalabela ka ku ituta Mañolo ni ku sebelisa kelezo ya ona. Seo si ka lu tusa ku latelela manzwi a walisamu a’ li: “Lisela ku fela pilu, u tuhele ku halifa. U si ke wa filikana, ki ku isa fela kwa sibi. Kakuli ba ba maswe ba ka yundiswa; Kono ba ba sepile [Jehova, NW] ki bona ba ba ka luwa naha.”—Samu 37:8, 9.

[Siswaniso se si fa likepe 7]

Hamulaho a lizazi la Mulimu la silomboti, ‘ bao ba ba sepile Jehova ki bona ba ba ka luwa lifasi-mubu’