Ku ba Teñi kwa Mesiya ni Puso ya Hae

“Jesu yo ya isizwe kwa lihalimu a li mwahal’a mina, u ka kuta ka mukwa o mu mu boni a ya kwa lihalimu ka ona.”—LIKEZO 1:11.

 1, 2. (a) Mangeloi a mabeli ne a omba-ombile cwañi baapositola ba Jesu ha n’a nyuluhezi mwa lihalimu? (b) Ki lipuzo mañi ze tahiswa ki tibelelo ya ku kuta kwa Kreste?

BANNA ba 11 ne ba yemi kwa njetumuko ya kwa upa ya Lilundu la Likota za Olive, ba lubukezi kwa lihalimu. Se ku fitile fela nako ye kuswani ku zwa f’o Jesu Kreste a nyuluhile ku zwa mwahal’a bona, mi sibupeho sa hae sa fela ku fitela si patiwa ki lilu. Mwa lilimo ze ne ba li ni yena, bona banna bao ne ba boni Jesu a fa bupaki bo buñata ka za kuli ne a li yena Mesiya; mane ne ba boni ku tomohisa pilu kwa lifu la hae ni nyakalalo ya zuho ya hae. Kono cwale na s’a ile.

² Mangeloi a mabeli a bonahala kapili-pili mi a bulela manzwi a omba-omba a’ li: “Banna ba Galilea, kiñi ha mu yemi mu talimile kwa lihalimu? Jesu yo ya isizwe kwa lihalimu a li mwahal’a mina, u ka kuta ka mukwa [o swana, NW] o mu mu boni a ya kwa lihalimu ka ona.” (Likezo 1:11) Ki ko ku fa buikolwiso hakalo—kuli ku nyuluhela kwa lihalimu kwa Jesu ne ku s’a talusi kuli cwale na s’a tuhezi ka ku tala ku fa mamelelo kwa neku la litaba za fa lifasi-mubu ni mufuta wa mutu! Ka ku fapahana, Jesu n’a ka kuta. Ku si na kakanyo ni ye kana manzwi ao ne a talize baapositola ka sepo. Bolule-lule ba batu kacenu ni bona b’a nga ka butokwa bo butuna sepiso ya ku kuta kwa Kreste. Ba bañwi ba ku biza “Ku Taha kwa Bubeli” kamba “Ku Taha.” Ba bañata, niteñi, ba bonahala ku lyangana ka za seo ku kuta kwa Kreste ku talusa luli. Kreste u kuta ka nzila ifi? L’ili? Mi seo si ama cwañi bupilo bwa luna kacenu?

Mukwa w’o Kreste a Kuta ka Ona

 3. Ki sifi seo batu ba bañata ba lumela ka za ku kuta kwa Kreste?

³ Ka ku ya ka buka ye bizwa An Evangelical Christology, “ku taha kwa bubeli kamba ku kuta kwa Kreste (parousia) ku toma mubuso wa Mulimu, ka ku feleleza, ka ku iponelwa, ni kamita.” Ki tumelo ye amuhelwa ka butuna kuli ku kuta kwa Kreste ku ka bonahala fa patalaza, ili ku bonwa luli ki mañi ni mañi fa lifasi-mubu le. Ka ku yemela ona muhupulo w’o, ba bañata ba supa kwa Sinulo 1:7, ye bala kuli: “A mu bone, ki yo, u taha ka malu; mi meto kamukana a ka mu bona, ni [ba ne] ba mu tabile.” Kono kana timana yeo i swanelwa k’u ngiwa ka mo i bonahalela luli?

 4, 5. (a) Lu ziba cwañi kuli Sinulo 1:7 ha i na taluso ya ka mo i bonahalela luli? (b) Manzwi a Jesu yena ka sibili a koñomeka cwañi kutwisiso yeo?

⁴ Mu hupule kuli, buka ya Sinulo i tahisizwe “ka liswanisezo.” (Sinulo 1:1, NW) Hakulicwalo he, yona taba ye i lukela ku ba ya swanisezo; haiba ku si cwalo, “ba ne ba mu tabile” ne ba ka bona cwañi Kreste a kuta? Se ba shwile i bata i’ba lilimo ze myanda ye 20! Fahalimu a seo, mangeloi ne a bulezi kuli Kreste n’a k’a taha “ka mukwa o swana” sina wa n’a ile ka ona. Ki hona, n’a ile ka mukwa o cwañi? Kana ne i li ka ku ba ni bolule-lule ba ba buha? Ku tokwa, ne i li fela ba ba sepahala ba sikai ba ne ba boni kezahalo yeo. Mi muta mangeloi n’a bulezi ku bona, kana baapositola ka mo ne ku inezi luli ne ba buhile musipili wa Kreste kaufela ona ku fitela a y’o kena kwa lihalimu? Ku tokwa, ku apesa kwa lilu ne ku patile Jesu ili ku s’a mu bonahalisa. Ka nako ye ñwi hamulaho wa f’o, u lukela kuli n’a keni mwa mahalimu a kwa moya a li mutu wa kwa moya, y’a s’a bonahali ka meto a butu. (1 Makorinte 15:50) Kacwalo, ka butuna, se ne ba boni fela baapositola ne li makalelo a musipili wa Jesu; ne ba s’a koni ku bona mafelelezo a ona, ku kuta kwa hae kwa lihalimu kw’a fumaneha Ndat’ahe, Jehova. Seo ne ba kona ku si lemuha fela ka meto a bona a tumelo.—Joani 20:17.

⁵ Bibele i luta kuli Jesu u kuta ka nzila ye swana hahulu ni yeo. Jesu yena ka sibili pili a si ka shwa kale n’a bulezi kuli: “Ku sa na ni nakonyana, mi lifasi ha li na ku ni bona hape.” (Joani 14:19) Hape n’a bulezi kuli “Mubuso wa Mulimu ha u tahi ka mukwa o lemuhiwa.” (Luka 17:20) Ki ka kutwisiso mañi, cwale he, “meto kamukana a ka mu bona”? Kuli lu alabe, pili lu tokwa kutwisiso ye utwahala hande-nde ya linzwi leo Jesu ni balateleli ba hae ba itusisa kwa neku la ku kuta kwa hae.

 6. (a) Ki kabakalañi manzwi a’ cwale ka “ku kuta,” “ku esha,” “ku fita,” ni “ku taha” h’a si toloko ye likani ya linzwi la Sigerike la pa·rou·siʹa? (b) Ki sika mañi se si bonisa kuli pa·rou·siʹa, kamba “ku ba teñi,” k’u nga nako ye telele ku fita ya kezahalo ifi kamba ifi ya ka nako ye kuswani fela?

⁶ Buniti ki bwa kuli, Kreste u eza ze ñata ku fita “ku kuta” ka bunolo fela. Linzwi leo, ka ku swana sina “ku taha,” “ku esha,” kamba “ku fita,” li talusa kezahalo i liñwi mwa nako ye kuswani ye s’a liyehi. Kono linzwi la Sigerike leo Jesu ni balateleli ba hae ne ba itusisize li talusa nto ye fita hahulu yeo. Linzwi leo ki pa·rou·siʹa, mi ka mo li inezi luli li talusa “ku ba hamoho” kamba “ku ba teñi.” Baituti ba bañata ba lumela kuli linzwi leo li kopanyeleza isiñi fela ku esha kono hape ni ku ba teñi ko ku latelela—sina mo ku bel’anga mwa ku pota kwa Sikwambuyu kwa mutu y’a li mubusi. Ku ba teñi k’o haki kezahalo ya ka nako ye kuswani fela; ki kalulo ye ipitezi ya linako, ili linako ze lemuseha. Kwa Mateu 24:37-39, Jesu n’a bulezi kuli “ku taha [Sigerike, pa·rou·siʹa; “ku ba teñi,” NW] kwa Mwan’a mutu” ne ku ka ba sina “mwa mazazi a Nuwe” a n’a fitile fa ku fela ka Munda. Nuwe n’a yaha aleka ni ku lemusa ba ba maswe ka mashumi-shumi a lilimo pili Munda u si ka fita kale ni ku t’o yundisa muinelo wa lifasi le ne li bolile leo. Ka ku swana, cwale he, ku ba teñi ka ku s’a bonahala kwa Kreste k’u nga i bata i’ba mashumi-shumi a lilimo pili ni kona ku si ka isa kwa sinyeho ye tuna.

 7. (a) Ki sifi se si bonisa kuli pa·rou·siʹa ha i bonahali ka meto a butu? (b) Ki kamukwaufi mi ki l’ili mañolo a’ talusa ku kuta kwa Kreste sina ko ku bonahala kwa “meto kamukana” a ka talelezwa?

⁷ Ku si na ku kakanya, pa·rou·siʹa ha i iponelwi luli ka meto a butu. Kabe neikaba ye bonwa, ki kabakalañi Jesu ha n’a k’a nga nako ye telele cwalo, sina ha lu ka bona, mwa ku fa balateleli ba hae sisupo se si ka ba tusa ku lemuha ku ba teñi kwa hae?a Nihakulicwalo, muta Kreste a taha ku t’o sinya muinelo wa lifasi la Satani, buniti bwa ku ba teñi kwa hae bu ka bonahala kwa batu kaufela ka mukwa o’ tezi. Ki ka nako yeo “meto kamukana a ka mu bona.” Mane ni bahanyezi ba Jesu ba ka kona ku lemuha, ka ku ba ni sabo, kuli puso ya Kreste ki ya luli.—Mu bone Mateu 24:30; 2 Matesalonika 2:8; Sinulo 1:5, 6.

Ku Kalisa L’ili?

 8. Ki kezahalo mañi ye li makalelo a ku ba teñi kwa Kreste, mi seo ne si ezahezi kai?

⁸ Ku ba teñi kwa Mesiya ku kala ka kezahalo ye taleleza taba ye mutomo ye kuta-kutezwi mwa bupolofita bwa Bumesiya. U beiwa sina Mulena mwa lihalimu. (2 Samuele 7:12-16; Isaya 9:6, 7; Ezekiele 21:26, 27) Jesu yena ka sibili n’a bonisize kuli ku ba teñi kwa hae ku ka ba ko ku zamaelela ni bulena bwa hae. Mwa liswanisezo ze sikai, n’a iswaniselize sina mueteleli ya siya lapa la hae ni batanga ba hae, ili ku icumba kwa “naha ye kwahule” k’o a y’o yoliswa “bulena.” N’a file swanisezo ye ñwi ye cwalo sina kalulo ya kalabo ya hae kwa puzo ya baapositola ba hae ka za muta pa·rou·siʹa ya hae ne i ka kalisa; ye ñwi hape n’a i file bakeñisa kuli “ne ba hupula kuli mubuso wa Mulimu u ka taha kapili.” (Luka 19:11, 12, 15; Mateu 24:3; 25:14, 19) Kacwalo mwahal’a nako ya hae sina mutu fa lifasi-mubu, ku beiwa fa bulena kwa hae ne ku sa li mwa nako ye kwahule, ili ko ne ku ka ezahala mwa “naha ye kwahule” ya lihalimu. Ki l’ili fo ne ku ka ezahalela?

 9, 10. Ki bupaki mañi bo bu li teñi bwa kuli Kreste ka nako ya cwale wa busa mwa lihalimu, mi n’a kalile l’ili puso ya hae?

⁹ Muta balutiwa ba Jesu ne ba mu kupile kuli: “U lu bulelele . . . se si ka supa ku taha kwa hao, ni ku fela kwa lifasi.” Jesu n’a alabile ka ku ba fa shashululo ye tungile ka za nako yeo ya kwapili. (Mateu, kauhanyo 24; Mareka, kauhanyo 13; Luka, kauhanyo 21; hape mu bone 2 Timotea 3:1-5; Sinulo, kauhanyo 6.) Sisupo seo si likana ni siswaniso se si tungile sa kalulo ya linako ye tezi but’ata. Ki nako ye tezi lindwa za mwahal’a macaba, bukebenga bo bu ekezeha, ku pongana kwa bupilo bwa lubasi, ku ata kwa matuku, lukupwe, ni lizikinyeho—isiñi ka ku ba sina but’ata bwa mwa sibaka si li siñwi fela kono sina likayamana le li kenezi lifasi kamukana. Kana zeo li utwahala ku ba lika ze lu ziba? Lizazi le liñwi ni le liñwi le li fita li koñomeka kuli lilimo za mwanda wa bu-20 li lumelelana hande hahulu ni litaluso za n’a file Jesu.

¹⁰ Baituti ba litaba za mufuta wa mutu ba lumela kuli 1914 ne i li nako ya licinceho ze tuna mwa litaba za butu, silimo sa butokwa ka ku fitisisa ili seo hamulaho wa sona buñata bwa but’ata b’o ne bu fitile fa ku s’a konahala ku zamaiswa, ili ku ekezeha kwa sipimo mwa lifasi kamukana. Ee, litaba za mwa lifasi za kwa mubili ze ne li taleleza bupolofita bwa Bibele kaufela li supa kwa 1914 sina sona silimo seo Jesu n’a kalile ku busa sina Mulena mwa lihalimu. Fahalimu a seo, bupolofita bwa mwa Daniele kauhanyo 4 bu fa buniti bwa za ku bala nako bo bu lu isa ku sona silimo si li siñwi seo—sa 1914—sina yona nako yeo Mulena wa Jehova ya ketilwe n’a ka kalisa puso ya hae.b

Ki Kabakalañi ha i li Nako ya But’ata?

11, 12. (a) Ki kabakalañi ha ku li ko ku t’ata ku ba bañwi ku lumela kuli Kreste u sweli wa busa mwa lihalimu cwale? (b) Ne lu ka swaniseza cwañi se ne si ezahalile hamulaho wa ku yoliswa sina Mulena kwa Jesu?

¹¹ Nihakulicwalo, ba bañwi b’a komoka ba li, ‘Ki kabakalañi lifasi ha li li mwa but’ata cwalo haiba Mesiya w’a busa mwa lihalimu? Kana ki kuli puso ya hae ha i na m’ata a susuezo?’ Swanisezo ye ñwi neikana ya tusa. Naha ye ñwi i zamaiswa ki presidenti y’a maswe. U tomile muinelo wa susuezo ya tamaiso ye maswe ili o’ yandulukela kwa likalulo lifi ni lifi za naha. Kono liketisa za eziwa; mi munna yo munde w’a wina. Ki sika mañi se si ka ezahala cwale? Sina mo ku inezi mwa linaha ze ñwi za demokrasi, nako ya licinceho ya likweli ze sikai ya fita pili presidenti yo munca a si ka yoliswa kale. Bona banna ba babeli bao ba k’a nga cwañi mihato mwahal’a nako ye cwalo? Kana munna y’o yo munde kapili-pili u ka tundanisa ni ku tatulula bumaswe kaufela bw’a tahisize mwa naha kaufela y’o ya yoliwa ki yena? Kana, ka ku fapahana, n’a si ke a isa mamelelo ye tuna fa muleneñi, ku keta makwambuyu ba banca ni ku feza liswalisano kamukana ni balikani ni bayemeli ba ba s’a sepahali ba presidenti wa kale? Ka nzila ye cwalo, muta a fita fa ku ba ni m’ata a tamaiso a’ tezi, u kona ku sebeleza mwa maino a puso a’ kenile, a’ buanyu. Haili ka za presidenti ya maswe, kana n’a si ke a’ itusisa nako ye nyinyani yeo a na ni yona mwa ku bunga-bunga mwa naha sifumu kaufela s’a uzwize ka mw’a konela kaufela pili a si ka latehelwa ki m’ata kaufela a puso?

¹² Ka ku ba cwalo, ki nto ye swana ni kwa pa·rou·siʹa ya Kreste. Sinulo 12:7-12 i bonisa kuli muta Kreste n’a beilwe sina Mulena mwa lihalimu, pili n’a lunduzi Satani ni badimona mwa lihalimu, ili ku kenisa sibaka s’a mulonga wa Hae. Hamulaho wa ku tulwa ko ne ku libelezwi ka nako ye telele k’o, Satani u’ nga cwañi muhato mwahal’a ‘nako ye nyinyani’ yeo pili Kreste a si ka sebelisa kale m’ata a hae a tamaiso a’ tezi fa lifasi-mubu fa? Ka ku swana sina presidenti ya maswe y’ani, u lika k’u nga z’a kona kaufela mwa muinelo wo wa kale. H’a bati mali; u bata bupilo bwa batu. U bata ku kauhanya batu ba bañata ka mwa konela kaufela ku ba zwisa ku Jehova ni ku Mulena wa Hae ya busa.

13. Mañolo a bonisa cwañi kuli makalelo a puso ya Kreste ne a ka ba nako ya but’ata fa lifasi-mubu fa?

¹³ Ha ku komokisi, hakulicwalo he, kuli makalelo a puso ya Mesiya a talusa nako ya “bumai [ku] . . . ba ba yahile mwa lifasi.” (Sinulo 12:12) Ka ku swana, Samu 110:1, 2, 6 i bonisa kuli Mesiya u kala puso ya hae ‘mwahal’a lila za hae.’ Ki hamulaho fela wa f’o h’a pyata ka ku tala “macaba,” hamohocwalo ni kalulo ifi ni ifi ya muinelo o bolile wa Satani, ka ku u yundisa!

Muta Mesiya a Busa Lifasi-Mubu

14. Ki sifi seo Mesiya a ka kona ku eza hamulaho wa ku sinya muinelo wa linto o’ maswe wa Satani?

¹⁴ Hamulaho wa ku sinya muinelo wa Satani ni ba ba u yemela kamukana, Mulena wa Bumesiya, yena Jesu Kreste, kwa nalulelule u ka ba mwa mayemo a ku kona ku taleleza bupolofita bwa mwa Bibele bo bu makalisa bo bu talusa Puso ya hae ya Lilimo ze Sikiti. Isaya 11:1-10 i lu tusa ku bona hande mufuta wa mubusi y’o Mesiya a ka ba. Timana 2 i lu bulelela kuli u ka ba ni “Moya wa [Jehova, NW] . . . Moya wa butali ni wa ngana, Moya wa kelezo ni wa mata.”

15. Ki sifi seo ‘moya wa m’ata’ u k’a talusa mwa puso ya Bumesiya?

¹⁵ Mu nahanisise seo ‘moya wa m’ata’ u ka talusa kwa puso ya Jesu. Ha n’a sa li fa lifasi-mubu, n’a na ni sipimo se siñwi sa m’ata a n’a zwa ku Jehova, ili a n’a mu konisa ku eza limakazo. Mi n’a bonisize takazo ya ka pilu kaufela ya ku tusa batu, ka ku bulela kuli, “Na lata.” (Mateu 8:3) Kono limakazo za hae za mwa mazazi ao ne li li fela mbengenge ya s’a n’a ka eza ha n’a ka busa ku zwelela kwa lihalimu. Jesu u ka eza limakazo fa sipimo se si ama lifasi kamukana! Ba ba kula, libofu, bosusu, ba likolofalo ze tuna, ni lianga ba ka foliswa ku ya ku ile. (Isaya 35:5, 6) Ku ata kwa lico, ili ze abiwa ka ku likanelela, ku ka feza tala ku ya ku ile. (Samu 72:16) Ku cwañi ka za bolule-lule ba ba mwa mabita bao Mulimu a tabela ku ba hupula? “Mata” a Jesu a ka kopanyeleza hamohocwalo ni mata a ku ba zusa, ku fa yo muñwi ni yo muñwi sibaka sa ku pila ku ya ku ile mwa Paradaisi! (Joani 5:28, 29) Niteñi, mane ni ha na ni m’ata ao kaufela, Mulena wa Bumesiya y’o u ka ba ya ikokobeza ka butungi kamita. “Ku saba [Jehova, NW] ki sona s’a ka tabela.”—Isaya 11:3.

16. Mulena wa Bumesiya u ka ba Muatuli wa mufuta mañi, mi seo si ka fapahana cwañi ni litaba ze zibiwa za baatuli ba butu?

¹⁶ Mulena y’o hape u ka ba Muatuli ya petehile. “H’a na ku atula ka sobozi ya meto, nihaiba ku puma taba ya kutwi.” Ki ufi muatuli wa butu, cwale kamba kwamulaho, ya n’a ka konwa ku taluswa cwalo? Mane ni munna ya butali hahulu ku za likatulo u kona fela ku atula ka z’a bona ni z’a utwa, ka ku itusisa butali kamba maseme afi ni afi a n’a kana a ba ni ona. Kacwalo, baatuli ni likwata za baatuli ba mwa lifasi le la kale ne ba kana ba biulwa kamba ku lyanganiswa ki lipulelo z’e tatezanisa taba ka bunangu, tushambwe twa mwa kuta, kamba bupaki bo bu lwanisana. Hañata ki bafumi fela ni ba ba m’ata ba ba kona ku lifa bayemeli ba ba buanyu mwa muzeko, ili nto ye li ku leka katulo ye lukile. Ha ku cwalo mwatas’a Muatuli wa Bumesiya! W’a kona ku bona se si mwa lipilu. Ha ku na se si si ke s’a lemuhiwa ki yena. Katulo ye lukile, ye zwakilwe ka lilato ni mufelañeke, ha i na ku lekiswa. I ka ba teñi kamita.—Isaya 11:3-5.

Ka m’o Puso ya Hae i Mi Amela

17, 18. (a) Ki muinelo mañi o’ nyangumuna wa nako ya kwapili ya mufuta wa mutu o’ boniswa kwa Isaya 11:6-9? (b) Bupolofita b’o ka mutomo bu ama ku bomañi, mi ki kabakalañi ha ku li cwalo? (c) Bupolofita b’o bu ka ba cwañi ni talelezo ya ka mo bu inezi luli?

¹⁷ Ka ku utwahala luli, puso ya Mesiya i na ni susuezo ye tungile fahalimu a ba ba busiwa ki yona. I cinca batu. Isaya 11:6-9 i bonisa ka mo li bezi butuna licinceho ze cwalo. Bona bupolofita b’o bu bonisa muinelo o’ nyangumuna maikuto wa lifolofolo ze lubeta, ze zuma ze ñwi—libere, m’akanyani, lingwe, litau, limbumbe—li li hamoho ni lifolofolo za mwa hae ze si na lubeta mi mane hamohocwalo ni banana. Kono lifolofolo ze zuma ze ñwi zeo ha li tahisi kozi ni ye kana! Ki kabakalañi? Timana 9 i alaba kuli: “Ha ku sa na ya ka holofaza kamba ku sinya fa lilundu la ka le li kenile; kakuli lifasi li ka tala zibo ya [Jehova, NW], sina mezi mw’a kwahelezi liwate.”

¹⁸ Ka mo ku inezi fela, “zibo ya Jehova” ne i si ke ya ba ni m’ata a susuezo fa lifolofolo luli; kacwalo zona litimana zeo ka mutomo li lukela ku ama kwa batu. Puso ya Mesiya i tahisa tukiso ya tuto mwa lifasi kamukana, ku luta batu ka za Jehova ni linzila za hae, ku luta batu kaufela ku sebelisana ni batu ba bañwi ka lilato, likute, ni ku b’a nga ka butuna. Mwa Paradaisi ye taha, Mesiya ka makazo u ka tisa mufuta wa mutu kwa bupetehi bwa kwa mubili ni bwa mwa muzamao. Litengamo za bufolofolo, za ku zuma ba bañwi ze kwalela muinelo wa butu wa ku s’a petahala li ka be li ile. Ka mukwa wa luli, hape, mufuta wa mutu u ka fita fa ku ba mwa kozo ni lifolofolo—kwa nalulelule!—Mu bapanye Genese 1:28.

19. Puso ya Mesiya i ama cwañi bupilo bwa batu mwa mazazi a, a mafelelezo?

¹⁹ Mu hupule, nihakulicwalo he, kuli Mesiya wa busa cwale. Nihaiba ona cwale, babusiwa ba Mubuso wa hae ba ituta ku pila hamoho ka kozo, ili ku taleleza Isaya 11:6-9 ka mubonelo o muñwi. Fahalimu a seo, ka lilimo ze bata i’ba ze 80, Jesu u sweli ku taleleza Isaya 11:10: “Ka nako yeo lituhela la Jese li ka yemisezwa macaba, ka mukwa wa ndembela; macaba a ka t’o li bata, mi ndu ya lona i ka bubekeha.” Batu ba sicaba kaufela ba sikuluhela ku Mesiya. Ki kabakalañi? Ki ka libaka la kuli haisali a kalisa ku busa, u ‘yemisizwe sina ndembela.’ U zibahalize ku ba teñi kwa hae mwa lifasi kaufela ka tukiso ya tuto ye tuna ye talusizwe fahalimu. Ka buniti fela, Jesu n’a bulezi cimo kuli musebezi wa ku kutaza mwa lifasi kamukana ne u ka ba sisupo se si zwile mubano sa ku ba teñi kwa hae pili mafelelezo a muinelo wa kale wo a si ka taha kale.—Mateu 24:14.

20. Babusiwa kamukana ba puso ya Mesiya ba swanela ku pima mubonelo mañi, mi ki kabakalañi?

²⁰ Kacwalo ku ba teñi kwa Kreste mwa m’ata a Bulena haki taba ye nyinyani, ya ku bulela fela, taba ya ku buhisana fela ka mukwa wa ku sebelisa fela munahano mwahal’a baituti ba za bulapeli. Puso ya hae i ama ni ku cinca bupilo bwa batu fa lifasi-mubu fa, sina fela ka mwa n’a bulelezi cimo Isaya kuli ne i ka eza cwalo. Jesu u etelezi bolule-lule ba babusiwa ba Mubuso wa hae ku zwa mwa muinelo wa lifasi le, le li bolile. Kana mu babusiwa ba ba cwalo? Hakulicwalo mu sebeze ka tukufalelo ni tabo kaufela yeo Mubusi wa luna a swanelwa! Ee, ki ko ku bunolo hahulu ku katala, ni ku kena mwa muhuwo wa busheununi wa lifasi o’ li: “I kai sepiso ya ku taha kwa hae?” (2 Pitrosi 3:4) Kono sina mwa n’a bulelezi Jesu yena ka sibili, “ya tundamena ku isa kwa mafelelezo, ki yena ya ka piliswa.”—Mateu 24:13.

21. Kaufel’a luna ne lu kana lwa tiisa cwañi buitebuho bwa luna kwa neku la sepo ya Bumesiya?

²¹ Lizazi le liñwi ni le liñwi le li fita li lu suteleza kwa lizazi le lituna muta Jehova a k’a laela Mwan’a Hae kuli a bonahaze mwa lifasi kamukana ku ba teñi kwa hae. Ni kamuta mu si ke mw’a tuhelela sepo ya mina ka za lizazi leo ku f’ifala. Mu nahanisise ka butuna ka za Bumesiya bwa Jesu ni tulemeno twa hae sina Mulena ya busa. Mu nahane ka butungi, hape, ka za Jehova Mulimu, musimululi ni mutahisi wa sepo ye tuna ya Bumesiya ye talusizwe mwa Bibele. Ha mu nze mu eza cwalo, ku si na kakanyo ni ye kana mu ka ikutwa hahulu ni ku fita sina mwa n’a ikutwezi muapositola Paulusi ha n’a ñozi kuli: “O! buliba bwa bufumu ni bwa butali ni bwa zibo ya Mulimu!”—Maroma 11:33.

[Litaluso za kwatasi]

Ne Mu ka Alaba Cwañi?

◻ Kreste u kuta kamukwaufi?

◻ Lu ziba cwañi kuli pa·rou·siʹa ya Kreste haki ye bonahala mi i’ nga nako ye telele?

◻ Ku ba teñi kwa Kreste ku kala l’ili, mi lu ziba cwañi seo?

◻ Mesiya ki Mubusi wa kwa lihalimu wa mufuta mañi?

◻ Puso ya Kreste i ama bupilo bwa babusiwa ba yona ka linzila lifi?

[Siswaniso se si fa likepe 15]

Sepo ya kuli Jesu n’a ka kuta ne i li ye butokwa hahulu kwa baapositola ba hae ba ba sepahala

[Siswaniso se si fa likepe 17]

H’a nze a busa ku zwelela kwa lihalimu, Jesu u ka eza limakazo fa sipimo se si ama lifasi kamukana

[Manzwi a bañi ba siswaniso]

Lifasi-mubu: Siswaniso seo si simuluha fa siswaniso sa NASA photo