Masabelo a Bona—Ki Lishano!

‘Kakuli lishano ki sisabelo sa luna, mi lu ipatile mwatas’a bupumi.’—ISAYA 28:15.

 1, 2. (a) Ki ifi kopano kacenu ye swanela ku lemuha seo ne si ezahalile kwa mubuso wa kwaikale wa Juda? (b) Ki buikolwiso bufi bwa mafosisa b’o Juda na bile ni bona?

KANA ona manzwi ao a ama ku Krestendomu kacenu sina mwa na amezi kwa masika a mabeli a kwaikale a mubuso wa Juda? Kaniti luli, a ama! Mi ona ku swana k’o ku talusa cimo za sinyeho ya Krestendomu wa mwa lizazi la cwale. Ku talusa kuli hañi-hañi likayamana li ka wela kopano yeo ya bulapeli ya buipanguli.

² Kwa mutulo wa Juda ne ku na ni mubuso wa masika a lishumi wa Isilaele. Muta Isilaele na iponahalisize ku sa sepahala, Jehova a lumeleza Asirya ku mu hapa ka 740 B.C.E. Mubuso wa habo ona, wa Juda, ne u iponezi kezahalo yeo ye tuna kono ne u ikutwile kuli nto ye cwalo yeo ha i koni u ezahala ku ona. ‘Ee,’ baeteleli ba hae ne ba itumba ba li, ‘kikuli tempele ya Jehova ha i yo mwa Jerusalema? Kana ha lu batu ba ba shemubilwe ba Mulimu? Kikuli baprisita ba luna ni bapolofita ha ba buleli ka libizo la Jehova?’ (Mu bapanye Jeremia 7:4, 8-11.) Baeteleli ba bulapeli bao ne ba ikolwisisize kuli ne ba li mwa silelezo. Kono ne ba li mwa mafosisa! Ne ba li fela ba ba si na tumelo sina bana ba habo bona ba kwa mutulo. Kacwalo, se ne si ezahalile ku Samaria ne si na ni ku ezahala ku Jerusalema.

 3. Ki kabakalañi Krestendomu ha na ni buikolwiso ka za nako ya kwapili, kono kana ku na ni libaka le linde la hae la ku ba ni buikolwiso?

³ Ka nzila ye swana, Krestendomu u ipapata ku ba ni swalisano ye ipitezi ni Mulimu. ‘Ee,’ u itumba kuli, ‘lu na ni mashumi-shumi a’ likiti-kiti a likeleke ni bahulu ba bulapeli ba ba cuukile, mane hamohocwalo ni balapeli ba ba eza myanda-nda ye eza bolule-lule. Hape lu na ni Bibele, mi lu itusisa libizo la Jesu mwa bulapeli bwa luna. Kaniti luli, lu shemubilwe ki Mulimu!’ Kono se ne si ezahezi ku Jerusalema wa kwaikale si sebeza sina temuso ye tuna. Ku si na taba ni likezahalo ze tuna za mibuso ya mañañazwana, lu ziba kuli ona cwale-cwale fa Jehova u ka nga muhato o mutuna wa ku lwanisa Krestendomu ni bulapeli bo buñwi kaufela bwa buhata.

“Bulikani ni Lifu”

 4. Juda na hupula kuli na ezize bulikani bo bu cwañi?

⁴ Mwa linako za kwaikale, Jerusalema ya na sa sepahali na amuhezi litemuso ze ñata ka bapolofita ba niti ba Mulimu, kono na si ka li lumela. Ka ku fapahana, na itumba kuli lifu ha li na ku mu isa mwa Sheol, lona libita, sina mo ne li ezelize kwa mubuso wa kwa mutulo wa Isilaele. Mupolofita Isaya na buyelezwi ku talusa ku Juda kuli: “Kabakaleo, a mu utwe linzwi la [Jehova, NW], mina basomi ba ba busa sicaba se sa mwa Jerusalema. Kakuli, mu ize: Lu isweli bulikani ni lifu, lu ezize tumelelano ni sibaka sa ba ba shwile; koto niha i ka taha sina munda, ha i na ku fita ku luna; kakuli lishano ki sisabelo sa luna, mi lu ipatile mwatas’a bupumi.”—Isaya 28:14, 15.

 5. (a) Bulikani bo ne bu kulubelwa bwa Juda ni lifu ne li bufi? (b) Ki ifi temuso ye ne i filwe ku Mulena Asa yeo Juda na i libezi?

⁵ Ee, baeteleli ba Jerusalema ne ba hupula kuli ne ba ezize tumelelano, sina ka mo ku inezi, ni lifu ni Sheol ili kuli muleneñi wa bona ne u ka silelezwa. Kono kana bulikani bo ne bu kulubelwa bwa Jerusalema ni lifu ne bu talusize kuli u bakezi libi za hae mi cwale u sepile Jehova ka za puluso? (Jeremia 8:6, 7) Ku tokwa ni hanyinyani! Ka ku fapahana, na fetuhezi kwa lipuso za mibuso ya mañañazwana za mufuta wa mutu ku fumana tuso. Kono ku itinga kwa hae mwa liswalisano za lifasi ne ku bile kwa mbwashula, kwa bupumi. Batu ba lifasi ba n’a sepile ne ba si ke ba kona ku mu sileleza. Mi bakeñisa kuli na siile Jehova, Jehova ni yena a siya Jerusalema. Ne ku ezahezi fela sina mupolofita Azaria ha na kile a lemusa Mulena Asa kuli: “[Jehova, NW] u ku mina ha mu nze mu li ku Yena. Ha mu ka mu bata mu ka mu fumana. Kono ha mu ka mu fulalela, u ka mi fulalela ni Yena.”—2 Makolonika 15:2.

 6, 7. Ki mihato mañi yeo Juda na i ngile ili ku ikolwisa buiketo, kono ki lifi ze ne li zwile mwateñi kwa mafelelezo?

⁶ Ka ku ikolwisa mwa litamo za bona za kozo za mibuso ya mañañazwana, baeteleli ba Jerusalema ne ba na ni buniti bwa kuli ha ku na ku ba ni “munda” wa limpi ze ka ba taseza ze ne li ka taha bukaufi ku bona ni ku filikanya kozo ya bona ni buiketo. Muta ne ba bembilwe ki tamo ya kozo ya Isilaele ni Siria, Juda na fetuhezi ku Asirya ku bata tuso. (2 Malena 16:5-9) Hasamulaho, ha na beilwe mwa kozi ki limpi za masole za Babilona, na kupile kemelo ku Egepita mi Faro na alabile, ka ku lumela mpi ku yo tusa.—Jeremia 37:5-8; Ezekiele 17:11-15.

⁷ Kono limpi za Babilona ne li na ni m’ata a matuna luli, kuli mane limpi za Egepita ne li menuhile. Muhato wa Jerusalema wa ku beya buikolwiso ku Egepita ne u bonahezi ku ba mafosisa, mi ka 607 B.C.E., Jehova a mu neela kwa sinyeho ye ne i bulezwi cimo. Kacwalo babusi ba Jerusalema ni baprisita ne ba fosize! Sepo ya bona mwa liswalisano za lifasi ku tahisa kozo ni buiketo ne li “lishano” leo ne li tanyezwi ka munda o mutuna wa limpi za Babilona.

Ku Hana “Licwe Le Li Likilwe”

 8. Krestendomu u ngile mayemo a swana luli ni a Juda wa kwaikale kamukwaufi?

⁸ Kana ku na ni muinelo o swana ni wa mwa lizazi la kacenu? Ee, u teñi. Bahulu ba Krestendomu hape ba ikutwa kuli ha ku na likayamana le li ka ba kayula. Ka ku ya ka mo ku inezi, ba bulela sina mwa na taluselize Isaya kuli: ‘Lu isweli bulikani ni lifu, lu ezize tumelelano ni sibaka sa ba ba shwile; koto niha i ka taha sina munda, ha i na ku fita ku luna; kakuli lishano ki sisabelo sa luna, mi lu ipatile mwatas’a bupumi.’ (Isaya 28:15) Ka ku swana Jerusalema wa kwaikale, Krestendomu u talima kwa litamo za kozo za lifasi ku fumana buiketo, mi bahulu ba hae ba bulapeli ba hana ku fumana masabelo ku Jehova. Ee, haki ba ba itusisa nihaiba libizo la hae, mi ba sheununa ni ku nyandisa bao ba ba kuteka libizo leo. Bahulu ba bulapeli ba Krestendomu ba ezize fela seo baprisita ba batuna ba Sijuda ne ba si ezize mwa lilimo za mwanda wa pili muta ne ba hanile Kreste. Ne ba bulezi kuli, sina ka mo ku inezi, “Ha lu na mulena u sili, konji Sesare.”—Joani 19:15.

 9. (a) Ki bomañi kacenu ba ba lemusa Krestendomu ka nzila ye swana yeo Isaya na lemusize ka yona Juda? (b) Ki ku mañi k’o Krestendomu a swanela ku fetuhela?

⁹ Kacenu, Lipaki za Jehova ba lemusa kuli munda wa limpi za pulao hañi-hañi u ka tanyela Krestendomu. Fahalimu a seo, ba supa kwa sibaka sa masabelo sa niti mwa ku banduka za ona munda wo. Ba ama kwa Isaya 28:16, ye bulela kuli: “Mulena [Jehova, NW] s’a bulela ki se, u li: A mu bone, ni beya mwa Sione licwe kuli i be mutomo, ki licwe le li likilwe, licwe la mwa lilulu, la butokwa, la mutomo o tiile; ya ka li lumela h’a na ku putaka.” ‘Licwe la butokwa’ ki mañi? Muapositola Pitrosi na amile kwa manzwi ao mi na a sebelisize ku Jesu Kreste. (1 Pitrosi 2:6) Kambe Krestendomu u batile kozo ni Mulena wa Jehova, Jesu Kreste, kacwalo na kabe a konile ku pima ku taha kwa munda o mutuna.—Mu bapanye Luka 19:42-44.

10. Ki mwa lika lifi zeo Krestendomu a ikenyize ku zona?

¹⁰ Niteñi, ha si ka eza cwalo. Ka ku fapahana, mwa ku bata kwa hae kozo ni buiketo, u ikezize silambeti ni baeteleli ba mibuso ya mañañazwana ya macaba ili kuli a fumane ku shemubiwa—ku si na taba ni temuso ya Bibele ya kuli silikani ni lifasi ki ku ikeza sila ku Mulimu. (Jakobo 4:4) Fahalimw’a seo, ka 1919 na yemezi ka ku tiya League of Nations sina yona sepo ya mufuta wa mutu ka ku fitisisa ya kozo. Haisali ku zwiwa ka 1945 u s’a beile sepo ya hae mwa Kopano ya Bamacaba. (Mu bapanye Sinulo 17:3, 11.) Ki ya ikenyize ka butuna bo bu fita kai ku yona kopano yeo?

11. Bulapeli bu na ni kemelo ifi kwa UN?

¹¹ Buka ya cwanoñu fa i lu fa muhupulo ha i talusa kuli: “Likopano za Katolika ze fitelela mashumi a mabeli ka z’ene za yemelwa kwa UN. Baeteleli ba bulapeli bwa lifasi ba sikai se ba potezi kopano ya macaba a lifasi. Ze hupulwa ka ku fitisisa ki lipoto za Ya Halaleha Papa VI mwahal’a Mukopano o Mutuna ka 1965 ni Papa John Paul II ka 1979. Bulapeli bo buñata ne bu bile ni manzwi a ipitezi a ku kwalula, litapelo, lipina ni lisebelezo kwa neku la Kopano ya Bamacaba. Mitala ye zibahala ka ku fitisisa ki yeo ya Katolika, Bulapeli bwa Tumelo ya Tukuluho ni ku Punyuswa kwa Mañi ni Mañi, Baptisita ni litumelo za Bahai.”

Lisepo za Kozo za Mbango

12, 13. Ku si na taba ni ku yanduluka kwa lisepo za kuli kozo i konwa ku fumanwa, ki kabakalañi Lipaki za Jehova ha ba ikolwisa kuli litemuso za bona ki za niti?

¹² Yo muñwi wa baeteleli ba mibuso ya mañañazwana ba ba m’ata a matuna ka ku fitisisa na bulezi ka ku ama fa lisepo za ba bañata ha na talusize kuli: “Lusika lo lwa batu fa lifasi-mubu lu kana lwa iponela ku bayula kwa nako ya kozo ye si ke ya kuta mwamulaho mwa litaba za zwelopili ya macaba.” Kana na nepile? Kana likezahalo za cwale li talusa kuli litemuso zeo Lipaki za Jehova ba hasanyize ka za ku tisa kwa Jehova katulo fa macaba ha li na ku ba za niti? Kana Lipaki za Jehova ba shutile?

¹³ Batili, ha ba si ka shuta. Ba ziba kuli ba talusa niti bakeñisa kuli ba beya sepo ya bona ku Jehova ni mwa Bibele, ili Linzwi la Mulimu la niti. Tite 1:2 i talusa kuli: “Mulimu [h’a] koni ku puma.” Kacwalo ba na ni buikolwiso bwa kuli muta bupolofita bwa Bibele bu bulela kuli nto ye ñwi i ka ezahala, ku si na kuli cwañi i kabe i ezahezi. Jehova ka sibili u bulela kuli: “Ki mo ku inezi ni kwa linzwi la ka, le li zwa mwa mulomo wa ka; ha li na ku kutela ku Na mukungulu, li si ka sebeza se si latwa ki Na, ni ku eza ze ni li lumezi.”—Isaya 55:11.

14, 15. (a) Baeteleli ba mwa Juda ne ba shaela nto mañi hakuswanyani pili a sinyeho ya Jerusalema ka 607 B.C.E.? (b) Paulusi na talusize cimo ku shaelwa kwa nto mañi pili ku tulukelwa ki sinyeho ya lifasi le ku si ka ezahala? (c) Ki sikamañi se lu kona ku libelela ka ku shaelwa ko kutuna ko ku polofitilwe kwa 1 Matesalonika 5:3?

¹⁴ Mwa lilimo pili Jerusalema a si ka sinyiwa kale ka 607 B.C.E., Jeremia na bihile kuli baeteleli ne ba huweleza ba li, “Kozo! Kozo!” (Jeremia 8:11) Niteñi, ne li lishano. Jerusalema na shandauzwi mwa ku talelezwa kwa litemuso ze buyelezwi za bapolofita ba niti ba Jehova. Muapositola Paulusi na lemusize kuli nto ye swana ne i ka ezahala mwa lizazi la luna. Na talusize kuli batu ne ba ka huweleza kuli “Kozo ni buiketo!” Kono niteñi, u talusa kuli, ku “tulukelwa ki sinyehelo” ne ku ka ba ‘fahalimu a bona.’—1 Matesalonika 5:3.

¹⁵ Sina ha lu keni mwa ma-1990, mapampili a makande ni limagazini za lifasi kai ni kai ne li bulela kuli Ndwa ya Manzwi i felile mi cwale kozo ya lifasi i mwa pono. Kono cwale ndwa ya ku kunupana ne i tumbukile mwa Middle East. Niteñi, ona cwale-cwale fa kamba hamulaho muinelo wa lifasi u ka hula ni ku fita fa sipimo seo muhuwo wa “Kozo ni buiketo!” o polofitilwe kwa 1 Matesalonika 5:2, 3 u ka ekezeha ka butuna. Ka ku tomwa kwa lisepo za luna mwa Linzwi la Mulimu, lu ziba kuli, sona sipimo seo se situna ha se si fitilwe teñi, likatulo za Mulimu li ka tahiswa ka bubebe mi ili ka ku sa fosahala. Ha ku na lizibiso za mbwashula za kozo ni buiketo ze swanela ku lu ezisa ku hupula kuli sinyeho ye bulezwi cimo ki Mulimu ha i na ku taha. Likatulo za Jehova ha licincehi ka mo li ñolezwi mwa Linzwi la hae Bibele. Krestendomu, hamohocwalo ni bulapeli kaufela bo buñwi bwa buhata, bu ka sinyiwa. Mi cwale likatulo ze bulaya za Jehova li ka libiswa kwa ku lwanisa kalulo ye siyezi ya lifasi la Satani. (2 Matesalonika 1:6-8; 2:8; Sinulo 18:21; 19:19-21) Bakeñisa kuli Lipaki za Jehova ba ikolwisa kuli Jehova u ka taleleza linzwi la hae, ba zwelapili ku ba mwa ku tona mwatas’a ketelelo ya sitopa sa mutanga ya sepahala ni ya na ni kutwisiso ni ku talima ka tokomelo ka mo likezahalo za lifasi lipatuluhela. (Mateu 24:45-47) Ka buniti fela, ha ku na buikatazo bwa mutu bwa kozo bo bu swanela ku lu ezisa ku nahana kuli Jehova u tokolomohile mulelo wa hae wa ku tisa munda wa sinyeho fahalimu a Krestendomu ya shañatezi libi.

‘Mulimu Ki Sisabelo sa Luna’

16, 17. Ki ufi muhato o b’a nga Lipaki za Jehova haiba ba bañwi ba nyemiswa ki buniti bwa taba ya bona?

¹⁶ Ba bañwi ne ba kana ba tisa twaniso kwa buniti bwa Lipaki za Jehova mwa ku shaelwa kwa seo. Niteñi, ha ba bulela kuli baeteleli ba bulapeli bwa Krestendomu ba ipata mwa tukiso ya bupumi, ba talusa fela seo Bibele i bulela. Muta ba bulela kuli Krestendomu u swanelwa ki koto kabakala kuli u bile kalulo ya lifasi, ba biha fela seo Mulimu ka sibili a bulezi mwa Bibele. (Mafilipi 3:18, 19) Fahalimu a seo, bakeñisa kuli Krestendomu u beile buikolwiso bwa hae mwa milelo ye tahiswa ki lifasi, yena ka sibili u yemela mulimu wa lifasi le, Satani Diabulosi, ili y’o Jesu na mu bulezi ku ba ndat’ahe lishano.—Joani 8:44; 2 Makorinte 4:4.

¹⁷ Kacwalo he, Lipaki za Jehova ba zibahaza kuli: Haili luna, ha lu susuezi lisepo za buhata za kozo ya lifasi kabakala ku cinceha kwa miinelo ya mibuso ya mañañazwana. Ka ku fapahana, lu kutela manzwi a walisamu kuli: “Mulimu ki sisabelo [sa luna, NW]. . . . Bana ba [batu, NW] ki mbango fela, mi batu ba batuna ki lishano; ha ba ka bewa fa sikala, ba ka ya mwahalimu; kamukan’a bona ba bubebe ku fita moya.” (Samu 62:8, 9) Milelo ya mufuta wa mutu ya ku hulisa ni ku bukeleza Krestendomu ni kalulo kaufela ya muinelo wa linto ki bupumi, lishano! Kaufel’a bona ku ba beya hamoho ha ba na m’ata a ku biula milelo ya Jehova sina mane mulomo o tezi litaba ze si na tuso!

18. Ki ifi temuso ya walisamu ye li ye swanela kacenu?

¹⁸ Hape Lipaki za Jehova ba ama kwa Samu 33, litimana 17 ku isa 19, ili ye zibahaza kuli: “Pizi [ya mwa Egepita, ku swaniseza ndwa] ha i na tuso ku bandusa mutu, ha i mu punyusi kabakala mukangafuba wa yona. A mu bone: Liito la [Jehova, NW] li shalima ba ba mu saba, ba ba sepile sishemo sa hae; kuli a lamulele bupilo bwa bona kwa lifu.” Kacenu, Bakreste ba niti ba sepile Jehova ni Mubuso wa hae wa lihalimu, yona tukiso fela ye kona ku tisa kozo ya kamita.

Krestendomu Sibaka sa ku “Hatikelwa”

19. Ki kabakalañi buitingo fa likopano za mibuso ya mañañazwana mwa ku tisa kozo ya lifasi haili mbwashula?

¹⁹ Ku sepa nto ifi kamba ifi ye ezizwe ki mutu ku ba mwa sibaka sa Mubuso wa Mulimu ku ezisa nto yeo ku ba siswaniso, nto ye lapelwa. (Sinulo 13:14, 15) Kacwalo, ku susueza buitingo fa likopano za mibuso ya mañañazwana, ze cwale ka Kopano ya Bamacaba, kwa neku la kozo ni buiketo ki mbwashula, lishano. Ka ku ama kwa maswaniso a cwalo a lisepo za buhata, Jeremia u talusa kuli: “Kakuli siswaniso sa hae se si suluzwi ki buhata fela, ha ku na moya ku sona. Maswaniso ao ki a mbango, ki musebezi wa mangulungwa; nako y’a ka natwa a ka fela.” (Jeremia 10:14, 15) Kacwalo he, lipizi za ndwa za Egepita wa swanisezo, fo kikuli, m’ata a sisole a mibuso ya mañañazwana ya macaba kacenu, h’a na ku sileleza muinelo wa bulapeli bwa Krestendomu mwa lizazi la likayamana la hae. Tamo ya bulapeli bwa Krestendomu ni lifasi le kaniti luli i ka palelwa ku ba sileleza.

20, 21. (a) Ki sikamañi se si ezahezi kwa League of Nations, mi ki kabakalañi Kopano ya Bamacaba ha i si ke ya tisa bunde? (b) Isaya u bonisa kamukwaufi kuli litamo za kozo za Krestendomu ni lifasi ha li na ku mu sileleza?

²⁰ Krestendomu na tomile lisepo za hae fa League of Nations, kono ne i wile mane ku si na ni haiba ku taha kwa Armagedoni. Cwale u shimbululezi litamo za hae za kozo kwa Kopano ya Bamacaba. Kono hañi-hañi i ka talimana ni “ndwa ya lizazi le lituna la Mulimu Ya-Mata-Kaufela,” mi ha i na ku punyuha. (Sinulo 16:14) Nihaiba UN ye sa liteñi ha i koni ku tisa kozo ni buiketo ni kamuta. Linzwi la bupolofita la Mulimu li bonisa kuli puso ya Kopano ya Bamacaba hamoho ni macaba a’ li lilama za yona “ba ka lwanisa Ngunyana [Kreste ya li mwa m’ata a Mubuso]; mi Ngunyana u ka ba tula; kakuli Yena ki Mulena wa malena, ni Mubusisi wa babusisi.”—Sinulo 17:14.

²¹ Lipaki za Jehova ka buikolwiso ba bulela kuli ha ku na puluso ya Krestendomu mwa litamo za kozo ni lifasi la Satani. Mi ha ba bulela seo, ba supa fela ku seo Bibele ka sibili i si talusa. Isaya 28:17, 18 i ama kwa manzwi a Jehova ha na bulela kuli: “Muhala wa ku yahisa munzi ikaba likatulo za mulao, sisebeliso ibe ku luka; sisabelo sa mashano si ka wa sifako ni limbwewewe, mezi a kwahele maipato a bupumi. Bulikani bwa mina ni lifu bu ka ezwa mbango; tumelelano ya mina ni sibaka sa ba ba shwile ha i na ku tiya; koto ye tezi, ye yuboka, ha i ka fita ku mina, mu ka hatikelwa ki yona.”

22. Muta katulo ye petehile i boniswa ku Krestendomu, ki sifi se si ka zwa mwateñi?

²² Muta Jehova a ka nga muhato wa katulo, u ka ezwa ka katulo ye petehile. Mi mutomo wa Krestendomu wa buikolwiso, wa “bulikani ni lifu,” u ka tanyelwa ka ku tala sina inge ku bayula kwa munda o mutuna. Isaya u zwelapili ku bulela kuli: “Kamus’o muñwi ni kamuso-ola, musihali ni busihu; konji ha mu ka mbwembweta, ki sona se si ka mi utwisa tuto.” (Isaya 28:19) Ki ku sabisa cwañi ku bao ba ba kaba batalimeli ku iponela ka ku tala m’ata a katulo ya Jehova! Ki maswabisa a cwañi kwa bahulu ba bulapeli ba Krestendomu ni balateleli ba bona ha ba ka lemuha kuli, se ili tiyeho, kuli ne ba sepile lishano!

Libizo la Jehova “ki Mapilelo a Tiile”

23, 24. Ku fita ku bata buiketo mwa lifasi le, ki sifi seo Lipaki za Jehova ba ka tundamena ku si eza?

²³ Kono ku cwañi ka za Lipaki za Jehova? Nihaiba mwa ku talimana ni sitoyo sa macaba a lifasi kaufela ni nyandiso, ba kumalela ka ku tiya mwa ku ipuluka ba li ba ba kauhani kwa lifasi. Ni kamuta haki ba ba libala seo Jesu na bulezi kwa balateleli ba hae kuli: “Hasi ba lifasi, sina na ha ni si wa lifasi.” (Joani 17:16) Ka ku zwelapili cwalo ku ona mazazi a mafelelezo a, ba beile sepo ya bona kwa Mubuso wa Jehova, isi mwa milelo ya mufuta wa mutu. Kacwalo he, kozi ya Krestendomu ha i na ku tisa sabo kwa Lipaki za Jehova. Sina Isaya ha na bulezi cimo kuli: “Ya ka li lumela h’a na ku putaka.”—Isaya 28:16.

²⁴ Liproverbia 18:10 i talusa kuli: “Libizo la [Jehova, NW] ki mapilelo a tiile, ya lukile u sabela ku ona, mi wa piliswa.” Hakulicwalo lu mema batu kaufela ba ba swana sina lingu ku fumana masabelo ku Jehova ni Mubuso wa hae ka Kreste. Haili ka za sibaka sa maipato, Jehova ha na bupumi! Mubuso wa hae ka Kreste haki lishano! Masabelo a Krestendomu ki a lishano, kono masabelo a Bakreste ba niti ki a sakata.

Kana Mwa Kona ku Talusa?

◻ Juda wa kwaikale na fumani masabelo a lisahano kamukwaufi?

◻ Ki mwa nzila ifi Krestendomu a likile ku ipata ili yena mwa bupumi?

◻ Isaya na lemusize Juda kamukwaufi, mi Lipaki za Jehova ba fa cwañi temuso ye swana kacenu?

◻ Krestendomu u ka ziba kamukwaufi kuli buikolwiso bwa hae ki bwa mafosisa?

◻ Ka ku fapahana ni Krestendomu, Lipaki za Jehova ba bonisa mayemo a fi?

[Mbokisi fa likepe 1]

LISEPO ZE PAHAMI ZE BULELWA KWA KOPANO YA BAMACABA

“Lwa pili haisali ku zwiwa fa Ndwa ya Lifasi II macaba a lifasi a swalisani hamoho. Ketelelo ya Kopano ya Bamacaba, ili yeo ne li sepo ye tomile fa muhupulo fela, cwale se i koñomeka pono ya batomi ba yona. . . . Lifasi kacwalo la kona ku nga muhato wa ku taleleza sepiso ye se i bile teñi ka nako ye telele ya tukiso ye nca ya lifasi.”—Prezidenti Bush wa United States mwa taba ya hae ya Muinelo wa Swalisano ku yona naha yeo, January 29, 1991