Mu Sepe Jehova Mafelelezo Ha Nze A Atumela

“Mu sepe Muñaa Bupilo kamita.”—ISA. 26:4.

 1. Batanga ba Mulimu ba shutana cwañi ni batu ba lifasi?

BATU ba bañata ha ba sa sepa mutu ufi kamba ufi kamba nto ifi kamba ifi mi mwendi libaka kikuli ba sitatalisizwe kamba ku swabiswa hañata-ñata. Kono batanga ba Jehova bona ha ba ikutwangi cwalo! Bakeñisa kuli ba na ni butali bo bu zwa ku Mulimu, ba ziba kuli ha ba swaneli ku sepa lifasi le kamba “malena” ba lona. (Samu 146:3) Kono bona ba sepile kuli Jehova u ka ba babalela mwa nako ya cwale ni mwa nako ya kwapili, kakuli ba ziba kuli wa ba lata mi kamita u talelezanga Linzwi la hae.—Maro. 3:4; 8:38, 39.

 2. Joshua naa buleziñi ka za ku sepahala kwa Mulimu?

² Joshua wa kwaikale naa bulezi kuli Mulimu wa sepahala. Mafelelezo a bupilo bwa hae ha naa nzaa atumela, naa bulelezi Maisilaele ka yena kuli: “Mwa lipilu za mina kaufela, ni mwa maikuto a mina kamukana, mu ziba kuli kwa linto ze nde kaufela za mi sepisize Muñaa Bupilo Mulimu wa mina, ha ku na niheba i li ñwi ye tokwahezi; kamukana li bonahalile ku mina, ha ku na ye ñwi ya zona ye tokwahezi.”—Josh. 23:14.

 3. Libizo la Mulimu li patululañi ka za hae?

³ Jehova wa talelezanga lisepiso za hae isi ka libaka feela la kuli wa lata batanga ba hae kono sihulu kabakala libizo la hae. (Ex. 3:14; 1 Sam. 12:22) Manzwi a makalelo a mwa buka ya The Emphasized Bible, ye ñozwi ki bo J. B. Rotherham, a bulela kuli libizo la Mulimu li talusa kuli Mulimu wa kona ku ba nto ifi kamba ifi kuli a taleleze lisepiso za hae. Ha lu utwa libizo la hae, lu hupula kuli kamita u ezanga za bulela. Wa kona ku eza nto ya tokwa ku eza ka nako ifi kamba ifi ni mwa sibaka sifi kamba sifi. Ha ku na nto ya sa koni ku eza. Mulimu u ka na a eza ka ku lumelelana ni taluso ya libizo la hae.

 4. (a) Liñolo la Isaya 26:4 li lu susueza kuli lu ezeñi? (b) Lu ka nyakisisañi mwa taba ye?

⁴ Mu ipuze kuli: ‘Kana na mu ziba hande Jehova kuli mane na kona ku mu sepa ka ku tala? Kana ni talimezi kwapili ka sepo, inze ni ziba kuli Mulimu wa zamaisa lika?’ Liñolo la Isaya 26:4, li li: “Mu sepe Muñaa Bupilo kamita; kakuli Mulena Muñaa Bupilo ki Licwe la ka mwaha ni mwaha.” Kono Mulimu ha tusangi batu ka limakazo cwale sina mwa naa ezezanga mwa linako ze bulezwi mwa Bibele. Nihakulicwalo, bakeñisa kuli ki yena “Licwe la ka mwaha ni mwaha” lwa kona ku mu sepa “kamita.” Mulimu wa luna ya sepahala u tusanga cwañi balapeli ba hae ba ba sepahala kacenu? Ha lu nyakeñi linzila ze talu za lu tusanga ka zona: Wa lu fanga maata ha lu mu kupa kuli a lu tuse ku tula miliko, wa lu tiisanga ha lu katana batu ba ba sa isi pilu kwa litaba ze lu ba kutaza kamba ha lu talimana ni twaniso, mi wa lu tiisanga ha lu na ni lipilaelo ze ñata. Ha lu nze lu nyaka linzila zeo, mu nahanisise ka mo mu kona ku tiiseza mwa ku sepa Jehova.

Ha mu li Mwa Muliko

 5. Ki miinelo ye cwañi ye kona ku tahisa kuli ku lu bele taata ku sepa Mulimu?

⁵ Ku bunolo ku sepa Jehova ha lu hupula lika ze lu nyolezwi ze cwale ka sepiso ya hae ya kuli Paradaisi ni zuho ya bafu li ka ba teñi. Kono ku kona ku lu bela hahulu taata ku mu sepa mwa litaba ze ama mizamao ya luna kamba ku ba ni buikolwiso bo bu tezi bwa kuli ku latelela linzila ni likuka za hae ku ka lu tahiseza tabo ye tuna. Mulena Salumoni naa ñozi kelezo ye li: “U sepe Muñaa Bupilo ka pilu ya hao kaufela, mi u si ke wa tiyela fa butali bwa hao; u beye Muñaa Bupilo mwa milelo ya hao kaufela, mi Yena u ka lukisa linzila za hao.” (Liprov. 3:5, 6) Mu lemuhe manzwi a li “milelo” ni “linzila” za luna. Manzwi ao a bonisa kuli mupilelo wa luna kaufela—isi feela tibelelo ye lu na ni yona ka ku ba Bakreste—u swanela ku bonisa kuli lu sepile Mulimu. Lu kona ku bonisa cwañi sepo yeo ha lu li mwa muliko?

 6. Lu kona ku tiiseza cwañi mwa ku hana mihupulo ye maswe?

⁶ Ku ambuka lika ze maswe ku kalelanga mwa munahano. (Mu bale Maroma 8:5; Maefese 2:3.) Kamukwaocwalo, mu kona ku tiiseza cwañi mwa ku ambuka mihupulo ye maswe? Ha mu nyakisise linzila ze ketalizoho ze lu kona ku eza cwalo ka zona: 1. Mu lapelange ku Mulimu kuli a mi tuse. (Mat. 6:9, 13) 2. Mu nahanisisange mitala ya mwa Bibele ya batu be ne ba palezwi ku utwa Jehova ni ya be ne ba mu utwile, mi mu lemuhe ze ne ezahezi ku bona kabakala ku eza cwalo.a (1 Makor. 10:8-11) 3. Mu kengeyelange butuku bo mu kona ku utwa ni bo ba kona ku utwa balatiwa ba mina haiba mu eza sibi se situna. 4. Mu hupulange mwa kona ku ikutwela Mulimu muta yo muñwi wa batanga ba hae a eza sibi se situna. (Mu bale Samu 78:40.) 5. Mu nahanange tabo ya banga ni yona Jehova muta mulapeli wa hae ya sepahala a eza se si lukile ni ku hana ku eza se si maswe, ibe mwa nyangela kamba kwa mukunda. (Samu 15:1, 2; Liprov. 27:11) Ni mina mwa kona ku bonisa kuli mu sepile Jehova.

Ha mu Katana Batu ba ba sa Tabeli ni ha mu Lwaniswa

 7. Jeremia naa talimananga ni butata bufi, mi fokuñwi naa ikutwanga cwañi?

⁷ Mizwale ba luna ba bañata ba kutalezanga mwa libaka ze taata hahulu. Mupolofita Jeremia naa kutalelize mwa sibaka se si cwalo, ili mwa mubuso wa Juda o no li mwa mazazi a ona a mafelelezo a mifilifili. Tumelo ya hae ne i likiwanga ka zazi ni zazi bakeñisa ku mamela taelo ya Mulimu ya kuli a shaele likatulo za Hae. Ka nako ye ñwi, nihaiba muñoli wa hae ya naa sepahala, Baruki, naa bilaezi kuli naa katezi. (Jer. 45:2, 3) Kana Jeremia naa zwafile? Ka linako ze ñwi, naa ikutwanga cwalo. Naa ize: “Ku kutiwe lizazi le ni pepilwe ka lona . . . Ne ni pepezwiñi kuli ni bone butata ni maswabi feela, ni kuli mazazi a ka a felele ku ze swabisa?”—Jer. 20:14, 15, 18.

8, 9. Ka ku ya ka Jeremia 17:7, 8 ni Samu 1:1-3, lu swanela ku ezañi kuli lu zwelepili ku beya miselo ye minde?

⁸ Kono Jeremia naa si ka tuhela. Naa zwezipili ku sepa Jehova. Kabakaleo, manzwi a Jehova a ñozwi kwa Jeremia 17:7, 8, naa talelelizwe ku yena, a bulela kuli: “U filwe mbuyoti mutu ya nzaa sepa Muñaa Bupilo, ya isepisa ka Muñaa Bupilo. U swana sina kota ye calilwe kwatuko ni mezi, ye namela mibisi ya yona kwa nuka, ye sa sabi muhau wa lizazi; matali a yona inzaa li a matala, ha i sabi nako ya linanga, mi ha i kuwi.”

⁹ Sina kota ya miselo ye na ni matali a matala “ye calilwe kwatuko ni mezi” kamba mwa simu ye selaelwanga, Jeremia naa si ka ‘kuwa,’ kamba ku tuhela ku beya miselo. Naa hanile ku kukuezwa ki basomi ba ba maswe. Kono naa kumalezi Musimululi wa “mezi” a pilisa mi naa mamezi manzwi kaufela a naa mu bulelezi Jehova. (Mu bale Samu 1:1-3; Jer. 20:9) Ki mutala kwa bunde wa naa lu tomezi Jeremia, sihulu luna ba ba sebeleza Mulimu mwa libaka ze taata! Haiba mu mwa muinelo o cwalo, mu zwelepili ku itinga ku Jehova mi u ka mi tusa ku itiisa ha mu nze mu “lumba Libizo la hae.”—Maheb. 13:15.

10. Ki lifi limbuyoti ze lu na ni zona, mi lu swanela ku ipuza puzo ifi?

¹⁰ Jehova u lu file lika ze ñata kuli a lu tuse ku tiyela butata bo lu talimana ni bona mwa bupilo mwa mazazi a maungulelo a. Ze ñwi za lika za lu file ki Linzwi la hae le li kwanile ili le li swelwi ku tolokiwa ka ku nepahala mwa lipuo ze ñata. U lu fa lico za moya ze ñata ka nako ye lukela ka ku itusisa sitopa sa mutanga ya sepahala ya na ni kutwisiso. Mi hape u lu file balikani ba bañata kwa mikopano ya puteho ni mikopano ye mituna. Kana mwa sebelisa hahulu lika zeo? Ba ba eza cwalo “ba ka opela, lipilu inze li tabile.” Kono ba ba sa utwi Mulimu ‘ba ka lila, lipilu li nze li lobehile mi ba ka bokolola ba nze ba nyandile.’—Isa. 65:13, 14.

Ha mu na ni Lipilaelo

11, 12. Bakeñisa kuli mwa lifasi ku na ni butata, lu kona ku eza cwañi ka butali?

¹¹ Sina mo ne ku polofitezwi, batu ba talimana ni butata bo buñata-ñata. (Mat. 24:6-8; Sin. 12:12) Ha ku taha munda, batu ba matelanga fa libaka ze lumbile kamba ku pahama fa lituwa za miyaho. Kamukwaoswana, butata ha bu nze bu ekezeha mwa lifasi, batu ba bañata-ñata ba sabelanga kwa likopano ze bonahala sina libaka ze lumbile, ze cwale ka likampani, likopano za litaba za naha, kamba likopano za bulapeli, ku beya cwalo ni likopano za sayansi ni za bumapangapanga. Kono likopano zeo kaufela ha li koni ku sileleza batu. (Jer. 17:5, 6) Batanga ba Jehova bona ba na ni sisabelo se si tiile—ili “Licwe la ka mwaha ni mwaha.” (Isa. 26:4) Walisamu naa ize: “Licwe la ka, ni ya ni pilisa, ki [Jehova] feela; mi ki sisabelo sa ka.” (Mu bale Samu 62:6-9.) Lu kona ku sabela cwañi kwa Licwe leo?

¹² Lu kumalela Jehova ha lu utwa Linzwi la hae ili leo hañata li shutananga ni butali bwa butu. (Samu 73:23, 24) Ka mutala, batu ba ba zamaiswa ki butali bwa butu ba kona ku bulela kuli: ‘Ikole bupilo ha u sa pila.’ ‘U bate musebezi o munde.’ ‘U pange mali a mañata.’ ‘Leka se, leka sani.’ ‘U zamaye, u zibe linaha.’ Kono butali bo bu zwa ku Mulimu bu lumelelana ni kelezo ye: “Ba ba itusisa ka za lifasi le, ba be inge ha ba itusisi ka zona; kakuli mukwa wa lifasi le wa fela.” (1 Makor. 7:31) Kamukwaoswana, Jesu u lu susueza kuli kamita lu tokomelange pili za bulapeli bwa luna ku Jehova, mi ka ku eza cwalo lu ikubukanyeza “bufumu kwa lihalimu” ili ko bu ka silelezwa hande.—Mat. 6:19, 20.

13. Ki lipuzo lifi ze lu swanela ku ipuza, ku likana ni liñolo la 1 Joani 2:15-17?

¹³ Kana mo mu bonela “lifasi” ni “ze mwateñi mwa lifasi” ku bonisa kuli mu sepile Mulimu ka ku tala? (1 Joa. 2:15-17) Kana mu nga limbuyoti za lu fa Jehova ni matohonolo e lu na ni ona mwa sebelezo ya Mubuso kuli ki ze nde mi ki za butokwa ku fita lika ze mwa lifasi? (Mafil. 3:8) Kana mwa ikatazanga ku ba ni ‘liito le li bona hande’? (Mat. 6:22) Mulimu ha bati kuli mu eze lika ka ku tokwa butali kamba tokomelo, sihulu haiba mu na ni lubasi lo mu tokwa ku babalela. (1 Tim. 5:8) U bata kuli batanga ba hae ba mu sepe ka ku tala, isiñi ku sepa lifasi la Satani ili le li ya kwa ku sinyeha.—Maheb. 13:5.

14-16. Batu ba bañwi ba tusizwe cwañi ki ku ba ni ‘liito le li bona hande’ ni ku tokomelanga pili za bulapeli bwa bona ku Jehova?

¹⁴ Ha mu nyake mutala wa bo Richard ni bo Ruth, ba ba na ni bana ba banyinyani ba balalu. Bo Richard ba li: “Ne ni ikutwa kuli ne ni kona ku ezeza Jehova lika ze ñata. Ne ni pila hande kono ne ni ikutwa kuli Mulimu ne ni mu fa feela bungululwa. Hamulaho wa ku lapela ni ku nyakisisa ze ni zani, na ni musalaa ka Ruth lwa utwana kuli ni yo kupa muzamaisi wa ka kuli ni belekange feela mazazi a mane mwa sunda—nihaike kuli mwa naha ne ku na ni butata bwa za mali. Kupo ya ka ne i amuhezwi, mi na kalisa ku belekanga mazazi a mane mwa sunda mwa kweli yona yeo.” Bo Richard ba ikutwa cwañi cwale?

¹⁵ Ba talusa kuli: “Se ni holanga . . . mali a manyinyani ku fita e ne ni holanga sapili kono cwale se ni na ni mazazi a 50 a ekezehile mwa silimo ili e ni inanga ni lubasi lwa ka ni ku lutanga bana ba ka. Nako ye ni yanga mwa simu i ekezehile habeli, palo ya lituto za ka za Bibele i ekezehile halalu, mi se ni kona ku etelela hande mwa puteho. Mi bakeñisa kuli se ni na ni nako ye ñata ya ku tusa ku babalela bana, musalaa ka wa ezanga bupaina bwa ku tusa. Ni bata ku zwelapili ku sebezanga hona cwalo haiba ku konahala.”

¹⁶ Bo Roy ni bo Petina ba ba sa uta mwanaa bona wa musizana, ne ba konile ku fukuza kwa nako ye ba belekanga ilikuli ba eze sebelezo ya nako kaufela. Bo Roy ba li: “Ni belekanga mazazi a malalu mwa sunda mi musalaa ka Petina u belekanga a mabeli. Hape ne lu tutezi mwa ndu ye nyinyani ye sa katazi ku i babalela. Ne lu ezanga bupaina lu si ka ba kale ni mwanaa luna wa mushimani ni wa musizana, mi ne lu si ka tuhela ku ba ni takazo ya ku eza bupaina. Kamukwaocwalo, bana ba luna ha se ba hulile lwa kutela mwa sebelezo ya nako kaufela. Ha ku na masheleñi a konwa ku bapanywa ni limbuyoti ze lu filwe.”

“Kozo ya Mulimu” I Babalele Pilu ya Mina

17. Bakeñisa kuli ha mu zibi za kamuso, Mañolo a mi omba-ombile cwañi?

¹⁷ Ha ku na mutu ku luna ya ziba se si ka ezahala kamuso kakuli mañi ni mañi wa luna “u tamwa ki linako za pila ka zona, ni ki bushiko kamba bumai bwa hae.” (Muek. 9:11) Kono ku sa ziba za kamuso ha ku swaneli ku lu palelwisa ku ba ni mombecima kacenu, sina mo ku inezi kwa batu ba ba si na buiketo bo bu tiswa ki ku ba ni bulikani bo bunde ni Mulimu. (Mat. 6:34) Muapositola Paulusi naa ñozi kuli: “Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo. Mi kozo ya Mulimu ye fita kutwisiso kaufela, i ka buluka lipilu za mina ni mihupulo ya mina.”—Mafil. 4:6, 7.

18, 19. Mulimu u lu omba-ombanga cwañi? Mu fe mutala.

¹⁸ Mizwale ni likaizeli ba bañata ha ne ba li mwa miliko ne ba ikutwile ku ba ni mombecima o zwa ku Jehova. Kaizeli yo muñwi u bulela kuli: “Mupazuli yo muñwi naa kuta-kutezi ku ni bemba ka mulelo wa kuli ni lumele ku pompelwa mali. A mañwi a manzwi a pili a naa ni bulelezi ne li a kuli, ‘Ki butoto ku hana ku pompelwa mali!’ Ka nako yeo ni ka linako ze ñwi, na lapela ku Jehova mwa pilu, mi kozo ya hae ya ni apesa. Ne ni ikutwile ku tiya sina licwe. Niha ne ni fokozi kabakala ku tokwa hande mali mwa mubili, ne ni konile ku talusa hande ka ku itusisa Mañolo mabaka ha ne ni hanile ku pompelwa mali.”

¹⁹ Ka linako ze ñwi, Mulimu u kona ku lu tiisa ka ku itusisa mulumeli sina luna kuli a lu omba-ombe kamba ka ku lu fa sico sa moya ka nako ye lukela. Mwendi se mu ikutwezi muzwale kamba kaizeli ha bulela kuli: “Taba ye ki yona ye ne ni tokwa luli. Ni ikutwa kuli i ñolezwi na!” Kaniti, ku si na taba kuli lu mwa miinelo ye cwañi kamba kuli lu tokwañi, Jehova u ka lu bonisa lilato haiba lu mu sepa. Kakuli lu “mutapi” wa hae mi lu bizwa ka libizo la hae.—Samu 100:3; Joa. 10:16; Lik. 15:14, 17.

20. Ki kabakalañi batanga ba Jehova ha ba ka pila mwa buiketo muta lifasi la Satani li fela?

²⁰ Mwa “lizazi la buhali bwa Muñaa Bupilo” le li taha ka bubebe, lika kaufela ze sepilwe ki lifasi la Satani li ka to sinyiwa. Gauda, silivera, ni lika ze ñwi za butokwa ha li na ku kona ku ba sileleza ni kamuta. (Zef. 1:18; Liprov. 11:4) Masabelo feela a luna a ka ba “Licwe la ka mwaha ni mwaha.” (Isa. 26:4) Kabakaleo, ha lu boniseñi kuli lu sepile Jehova ka ku tala, ka ku zamaya mwa linzila za hae ze lukile lu nze lu mu utwa, ka ku kutaza taba ya Mubuso wa hae ku si na taba kuli batu ba bañwi ha ba teelezi mi ba bañwi ba lu lwanisa, ni ka ku nepela lipilaelo za luna kaufela ku yena. Haiba lu eza lika zeo, kaniti lu ka ‘pila mwa kozo, mi lu ka iketa lu sa sabi kozi.’—Liprov. 1:33.

[Litaluso za kwatasi]

Kana Mwa Kona ku Talusa?

Lu kona ku sepa cwañi Mulimu

• ha lu li mwa muliko?

• ha lu katana batu ba ba sa tabeli kamba ha lu lwaniswa?

• ha lu na ni lipilaelo?

[Siswaniso se si fa likepe 13]

Ku kumalela likuka za Mulimu ku tahisa tabo

Siswaniso se si fa likepe 15]

“Muñaa Bupilo ki Licwe la ka mwaha ni mwaha”